Romanu
Imroꞌõ norĩ mrozém na rowasuꞌu na isimiré
7 Ĩsisãnawã norĩ, ꞌRe ihâimana uꞌâsi mono nhimiroti ꞌrata na robꞌuiꞌéré hã aima waihuꞌu pese zaꞌra waꞌaba di. Tahawa, ãhã na ĩnhimiꞌuiꞌéré na te aima irowasuꞌu zaꞌra waꞌaba zé hã, aima waihuꞌu pese zaꞌra waꞌaba di za duré. Niꞌwa hã tiꞌai ãma ꞌre hâimana mono ré, te za ꞌRe ihâimana uꞌâsi mono nhimiroti hã pire na tãma ꞌre hâimana, tiꞌab ré ꞌre idanomro mono zém na roti hã. Tane nherẽ, dâꞌâ wamhã oto, tãma ꞌre hâimana mono õ di za oto, isarina ꞌre ihâimana mono zéb da hã. E marĩ wa. Dâꞌâ wa oto. 2 Ãne na wa za aima romnhimiréꞌé zaꞌra waꞌwa. Piꞌõ norĩ hã imro hã tiwi ꞌre dâꞌâ zaꞌra mono õ ré, ꞌRe ihâimana uꞌâsi mono nhimiroti ꞌmadâꞌâ sina, te te ꞌre rẽme waihuꞌu zaꞌra mono õ di za. Imro tiwi ꞌre dâꞌâ zaꞌra mono wapsi, te za oto ꞌre mro zaꞌra, ꞌRe ihâimana uꞌâsi mono nhimiroti zarina, aimawi aibâ na, piꞌõi wi imro ꞌre dâꞌâ zaꞌra mono wa, timro na te te ꞌre sahu tõ zaꞌra mono da, te te ãma roti õ wa, ꞌRe ihâimana uꞌâsi mono hã. 3 Tane nherẽ, piꞌõ norĩ hã imro hã tiwi ꞌre dâꞌâ zaꞌra mono õ nherẽ, aibâ aimawi ré ꞌre hâimana zaꞌra mono wamhã, ꞌRe ihâimana uꞌâsi mono nhimiroti zarina ꞌre hâimana zaꞌra mono õ wa, te za ipoꞌreꞌõ hã da te ãma ꞌre saꞌra zaꞌra, piꞌõ norĩ ãma hã, tihâiba na tiwasédé te te ꞌre ꞌmanharĩ zaꞌra mono wa. Imro tiwi ꞌre dâꞌâ zaꞌra mono wapsi, te za oto ꞌre mro zaꞌra, aibâ aimawi na. Tawapsi tihâiba na tiwasédé hã te te ꞌre ꞌmanharĩ zaꞌra mono õ di za, apâ ꞌre mro zaꞌra mono wa. Ãne hã aima waihuꞌu pese zaꞌra waꞌaba di. 4 Ĩsisãnawã norĩ, tane duré, a norĩ waꞌwa hã. Cristu hã wedepoꞌo nhonhiꞌrãmi na asada dâꞌâ zaꞌra waꞌaba wa, ma tô isiré ꞌre atâꞌâ zaꞌra waꞌaba mo. Tahawa, ꞌRe ihâimana uꞌâsi mono nhimiroti ꞌrata na robꞌuiꞌéré hã asina tãma ãma ꞌre iꞌuwaimrami zaꞌra waꞌaba mono zéb zarina, aiwasédé hã te te oto aiꞌãma ꞌre aꞌmadâꞌâ aba mono tõ da, ꞌre asiꞌmadâꞌâ zaꞌra waꞌaba mono õ di za. Tâibâ oto. ꞌRe ihâimana uꞌâsi mono te te ihâiwaꞌutu nhibꞌaꞌuwẽ si, wa oto ꞌre wanomro, taha ma si, wa te oto ꞌre romhuri zaꞌra mono da, iwẽ na si. Piꞌõi wi, imro tiwi ꞌre dâꞌâ zaꞌra mono wamhã, isimiroti hã te te ꞌre wapari zaꞌra mono õ di za oto. ꞌRe mro zahu zaꞌra mono wapsi, te za duré timro tém nhimiroti hã te te ꞌre ꞌmadâꞌâ pese zaꞌra apâ. Tane hã ꞌRe ihâimana uꞌâsi mono nhimiroti ꞌrata na robꞌuiꞌéré hã asina tãma ãma ꞌre iꞌuwaimrami zaꞌra waꞌaba mono zéb zarina, ꞌRe ihâimana uꞌâsi mono, aiwasédé hã te te oto aiꞌãma ꞌre aꞌmadâꞌâ aba mono tõ da, ꞌre asiꞌmadâꞌâ zaꞌra waꞌaba mono õ di za oto, piꞌõi wi imro ꞌre dâꞌâ zaꞌra mono wa, isimiroti te te oto ꞌre iꞌmadâꞌâ zaꞌra mono õ ne. Tâibâ oto. Cristuhu ãma si, te za oto ꞌre anomro aba mo, piꞌõ hã apâ ꞌre imro zahu zaꞌra mono norĩ, timro tém nhimiroti te te ꞌre iwapari pese zaꞌra mono ne. 5 Wahâimana wasété na ꞌre wahâimana zaꞌra mono ré, wa tô marĩ iwasété zô si, wa te ꞌre robꞌruiwapari zaꞌra aré. Taha ré, ꞌRe ihâimana uꞌâsi mono nhimiroti ꞌrata na robꞌuiꞌérézé hã, wawasété ãna ꞌre iwanomro mono zé waihuꞌuzéb da, wama ꞌre hâimana zaꞌra mono nherẽ, duré wama waihuꞌu pese zaꞌra nherẽ, taha upana si, wa tô marĩ iwasété zô si, wa te ꞌre robꞌruiwapari zaꞌra, tô õhõ zô si, ꞌRe ihâimana uꞌâsi mono te te wawi ꞌre iꞌazawi mono zô si. Taha zarina wa tô aré wapẽꞌẽ ꞌre, wadâꞌâ uꞌâsi ne ꞌre wahâimana zaꞌra, ꞌRe ihâimana uꞌâsi mono nhiti. 6 Tane nherẽ, ꞌRe ihâimana uꞌâsi mono hã ma tô te te wama ꞌre apisutu oto, isimiroti na robꞌuiꞌéré ꞌrada hã wa te wasina tãma ãma ꞌre iꞌuwaimrami zaꞌra mono zéb zarina, wawasédé hã te te waꞌãma ꞌre iꞌaꞌmadâꞌâ mono zéb da, ꞌre wasiꞌmadâꞌâ zaꞌra mono tõ da oto. Isimiroti na robꞌuiꞌéré ꞌrada hã wa te wasina tãma ãma ꞌre iꞌuwaimrami zaꞌra mono zéb zarina, te te ꞌre iwaꞌanhoꞌreptui mono zéb zô, ꞌre wanhopré mono sina, wa te oto tãma ꞌre romhuri zaꞌra mono õ di, ꞌre iwahâimana ꞌrata zaꞌra mono zém na hã. Ipẽꞌẽzani hã te te wama ꞌre iꞌaroti mono zéb zarina si, wa oto wa te tãma ꞌre romhuri zaꞌra, ꞌre iwahâimana zaꞌra mono zép tém na si.
ꞌRe ihâimana uꞌâsi mono nhimiroti, da te oto ꞌre iwaihuꞌu zaꞌra mono zarina, dawasété na ꞌre idasiwaihuꞌu zaꞌra mono zé wasuꞌu
7 Tawamhã e ꞌRe ihâimana uꞌâsi mono nhimiroti ꞌrata na robꞌuiꞌéré hã wasété di, Mozési te te ãma irobꞌuiꞌéré na hã. Mare di. Wasété õ di. Ãhã wasuꞌu hawi, wa tô wa hã ĩwasété na ĩsiwaihuꞌu, ꞌrâwi. Ãne, ꞌRe ihâimana uꞌâsi mono nhimiroti ꞌrata wasuꞌu hã: “Marĩ iwẽ hã dawi ꞌre ꞌruiwapari zaꞌra waꞌaba mono õ di za.” Ãne hã te waihuꞌu õ ꞌwaꞌâhã, aré ĩwasété na ĩsiwaihuꞌu õ di, marĩ te ĩsima iꞌruiwaparizém na hã. 8 Ãhã wasuꞌu na te oto waihuꞌu wamhã, marĩ hã te dawi ꞌre iꞌruiwapari mono zéb da si, wa tô te ĩsima ꞌre rosaꞌrata uꞌâsi, ꞌre ĩhâimana wasété mono zéb zarina. ꞌRe ihâimana uꞌâsi mono nhimiroti ꞌrata na robꞌuiꞌéré hã dama waihuꞌu zaꞌra õ wa, dawasété na ꞌre dasisãmri waihuꞌu zaꞌra mono õ di. Wa hã bété. ꞌRe ihâimana uꞌâsi mono nhimiroti ꞌrata wasuꞌuzéb zarina si, wa tô ĩsiwaihuꞌu, ĩwasété na hã. 9 7:9-10 Duréihã ꞌRe ihâimana uꞌâsi mono nhimiroti ꞌrata na rowasuꞌu hã te waihuꞌu õ nherẽ, wa tô aré ĩsiꞌãma rosaꞌrata na te ꞌre upa. Ĩwasété na ꞌre ĩsiꞌmadâꞌâ mono ãna, wa tô ꞌre ĩhâimana. Tane nherẽ, isimiroti ꞌrata na robꞌuiꞌéré wasuꞌu hã te oto waihuꞌu wamhã, ãne na te oto ĩsiꞌãma ꞌre rosaꞌrata mono õ di. ꞌRe ihâimana uꞌâsi mono ma, ĩwasété na aré ꞌre ĩhâimana mono zém na hã wa tô ĩsiꞌãma waihuꞌu. Ĩdâꞌâ uꞌâsi, wa tô aré ꞌre ĩhâimana, ĩpẽꞌẽ ꞌre. ꞌRe ihâimana uꞌâsi mono hã ma tô tinhimiroti ꞌrata na robꞌuiꞌéré hã wama sõmri zaꞌra, wa te wasina tãma ꞌre iꞌuwaimrami zaꞌra mono zéb zarina, rowẽ uptabi na ãma ꞌre wanomro wẽ mono da. Tane nherẽ, te ĩsina tãma uwaimrami õ di, wa hã. Tahawa, wa tô aré ĩdâꞌâ uꞌâsi ꞌre ĩhâimana uꞌâsi, ꞌRe ihâimana uꞌâsi mono nhiti. 10 ꞌMadâꞌâ 7:9 11 ꞌRe ihâimana uꞌâsi mono nhimiroti ꞌrata si te ꞌre iꞌmadâꞌâ pese mono na, ĩwasédé hã te te oto ĩꞌãma ꞌre ꞌmadâꞌâ tõ mono da, te te sima ĩꞌãma roti da newa, wa tô aré ĩnhimizaꞌrese ãna ꞌre ĩhâimana. Taha zarina, wa tô aré ĩpẽꞌẽ ꞌre, ĩdâꞌâ uꞌâsi ꞌre ĩhâimana, ꞌRe ihâimana uꞌâsi mono nhiti hã.
12 Ta hã, isimiroti ꞌrata na Mozési te te irobꞌuiꞌéré hã wẽ uptabi di. Isarina si te wama ꞌre hâimana zaꞌra, iwẽ uptabi si. 13 E tawamhã, ꞌRe ihâimana uꞌâsi mono nhimiroti ꞌrata na robꞌuiꞌéré hã wẽ uptabi nherẽ, e taha zarina, wa tô aré ĩpẽꞌẽ ꞌre, ĩdâꞌâ uꞌâsi ꞌre ĩhâimana. Mare di. Ĩwasété na ꞌre ĩhâimana ꞌrata mono zéb zarina si, wa tô aré ĩdâꞌâ uꞌâsi ꞌre ĩhâimana. Taha zarina, wa tô ꞌre ĩhâimana wasété mono zém na ĩsina waihuꞌu. Uburé marĩ iwasédé hã da te ꞌre iꞌmanharĩ zaꞌra mono zé hã iwasété uptabi na wa tô duré waihuꞌu.
Paulu hã ꞌrâwi tinhimirosaꞌrata wasété na isiꞌwapézé wasuꞌu
14 ꞌRe ihâimana uꞌâsi mono nhimiroti ꞌrata na Mozési te te ãma irobꞌuiꞌéré hã e ma hawimhã. Ipẽꞌẽzani hawip si. Tane nherẽ, ta hawimhã, wa hã ꞌre ĩhâimana mono õ di. Wa hã aꞌuwẽ hâiba na ꞌre ĩmorĩ wa, wa ĩhâimana nhibꞌuware na ꞌre ĩhâimana, ĩsiꞌuihâ na ĩsina ꞌre ĩnhiptete waihuꞌu mono õ na hã. ꞌRe ĩhâimana wasété mono zé ma si, wa tô ĩhâiba hã te ꞌre sõmri uꞌâsi. 15 ꞌRe ĩsisaꞌrese mono õ di, marĩ te ꞌre iꞌabꞌmanharĩ mono zém na hã. Uburé marĩ iwẽ si te ꞌre aꞌmadâꞌâ mono da nherẽ, taha si te ꞌre ꞌmadâꞌâ mono õ di. Uburé marĩ hã te ꞌre abꞌmanharĩ tõ mono da, te ĩsiwi ꞌre awẽꞌõ mono nherẽ, wa tô te ꞌre abꞌmanharĩ tô, iwẽ upana. 16 Uburé marĩ hã te ꞌre abꞌmanharĩ tõ mono da, te ĩsiwi ꞌre awẽꞌõ mono nherẽ, iwẽ upana te ꞌre abꞌmanharĩ mono wamhã, wa ĩsina te ꞌre waihuꞌu, ꞌRe ihâimana uꞌâsi mono nhimiroti ꞌrata na robꞌuiꞌéré, iwẽ si ꞌre ihâimana mono na hã, isarina si. 17 Uburé marĩ iwasédé hã te ꞌre abꞌmanharĩ mono da, te ĩsima ꞌre awẽ mono õ nherẽ, ĩwasédé hã ĩpẽꞌẽ ꞌre, ĩma ꞌre ihâimana mono zéb zarina, wa te te ꞌre abꞌmanharĩ uꞌâsi tô, te ĩsiwi ꞌre awẽꞌõ waihuꞌu mono ãna. 18 Marĩ iwẽ hã ĩpẽꞌẽ ꞌremhã ĩma ꞌre hâimana mono õ di. Ãne hã ĩma waihuꞌu pese di. Uburé marĩ iwẽ si te ꞌre abꞌmanharĩ mono da, te ĩsima ꞌre awẽ mono nherẽ, te ĩsina ꞌre uwaimrami waihuꞌu mono õ di, ĩsiꞌuihâ na hã. 19 Uburé marĩ iwẽ si te ꞌre aꞌmadâꞌâ mono da nherẽ, taha si te ꞌre ꞌmadâꞌâ mono õ di. Taha upana, wa iwasété si te ꞌre abꞌmanharĩ, ãne hã te ꞌre abꞌmanharĩ tõ mono da, te ĩsiwi ꞌre awẽꞌõ mono nherẽ. 20 Uburé marĩ iwasédé hã te ĩsima ꞌre awẽꞌõ mono nherẽ, te ꞌre abꞌmanharĩ mono wamhã, e ĩsiꞌuihâ na te ĩsima iwẽzéb zarina, wa te te ꞌre abꞌmanharĩ. Mare di. Ĩwasédé hã ĩpẽꞌẽ ꞌre, ĩma ꞌre ihâimana uꞌâsi mono zéb zarina si, wa tô te ꞌre abꞌmanharĩ tô.
21 Ãne hã wa tô uburé ĩsina waihuꞌu, ꞌre ĩhâimana mono zém na hã. Marĩ iwẽ si te ꞌre abꞌmanharĩ uꞌâsi mono da, te ĩsima ꞌre wẽ mono nherẽ, wa iꞌupana marĩ iwasété zô si ꞌre ĩsipizari, te ĩsiwi ꞌre awẽꞌõ waihuꞌu mono ãna. 22 Wa hã ꞌRe ihâimana uꞌâsi mono nhimiroti wẽ wasuꞌu na hã ꞌrâwi wa tô te ĩsima ꞌre wẽ uꞌâsi, ĩpẽꞌẽ ꞌremhã. 23 Tane nherẽ, aimawi ꞌre ĩhâimana mono zéb da hã, te ĩma ꞌre hâimana uꞌâsi, ĩpẽꞌẽ ꞌremhã, ĩnhimirosaꞌrata wasédé hã. Ĩpẽꞌẽ ꞌremhã ĩnhimirosaꞌrata wasédé hã, ĩnhimirosaꞌrata wẽ me hã te ꞌrâwi nherẽ, ꞌre siꞌwapé uꞌâsi zahuré, ĩwasédé hã te ꞌre iꞌmanharĩ mono zéb da hã, duré te ĩsima ꞌre iwẽ mono zéb zarina, iwẽ hã te ꞌre iꞌmanharĩ mono zéb da hã. Niꞌwam norĩ hã danhimiwadaꞌuri zarina si ꞌre hâimana zaꞌra mono wamhã, marĩ hã te te sima ꞌre iwẽ zaꞌra mono zéb zarina, te te ꞌre ꞌmanharĩ waihuꞌu zaꞌra mono õ di. Tane duré, wa hã marĩ iwẽ si te ꞌre abꞌmanharĩ uꞌâsi mono da, te ĩsima ꞌre wẽ mono nherẽ, marĩ iwasédé hã ĩpẽꞌẽ ꞌremhã ĩma ꞌre ihâimana mono zarina, wa marĩ iwasédé hã te ꞌre abꞌmanharĩ tô. 24 7:24-25 Wa hã ĩwasété uꞌâsi ꞌre ĩhâimana mono zém na, ꞌrâwi ꞌre ĩsipoꞌre puꞌu mono wa, wa ꞌre ĩsiwẽꞌõ uꞌâsi. ꞌRe ihâimana uꞌâsi mono nhimiroti zarina si ꞌre ĩhâimana uꞌâsi mono da, te ĩsima ꞌre rosaꞌrata wẽ uꞌâsi mono nherẽ aré, tane nherẽ, ĩpẽꞌẽ ꞌre, ĩwasédé hã ĩma ꞌre ihâimana uꞌâsi mono zéb zarina si, wa ꞌre ĩhâimana uꞌâsi tô. E ꞌwa hã te za ãne wamhã, ĩnhoꞌreptu, ĩpẽꞌẽ ꞌre, ĩdâꞌâ uꞌâsi ꞌre ĩhâimana mono zém hawimhã. ꞌRe ihâimana uꞌâsi mono si te za ĩnhoꞌreptu, ĩdâꞌâ uꞌâsi ꞌre ĩhâimana mono zém hawi, Wanhibꞌapito Zezu Cristuhu nhimipawaptobzéb zarina hã. Tahawa, wa oto taha ãma si ꞌre ĩwata uꞌâsi. 25 ꞌMadâꞌâ 7:24