3 Dawadzé

E MARĨ TE WATSUꞌU.

Ĩmro ré norĩ tsiwadzéb dzahuré wamhã te dza tsima ꞌre höimana wẽ dzahuré, marĩ na ãma tsitsadze dzahuré õ nherẽ. Ĩhöiwarobo 10 roti norĩ atsina aimrodzém na ãma tsaprĩ daa te tinha ãne: “Ĩmro ré norĩ ãma ĩtsiwadzéb dzaꞌra, tsiꞌwapé dzahuré õ di tinhimirotsaꞌrata dzô tsi . . . Taha waꞌrãmimhã te tsima robdzanhamri dzahuré ãma ĩtsitsadze dzahuré õ dzém na hã duré tinhimidzawi na te tsiwapari dzahuré. Taha parimhã, marĩ na te ãma tsitsadze dzahuré ĩwẽ tsahuré ma.”

ROPOTOꞌWAI MREME NHIMIROTI: ‘Danhimidzawi petse na dahöimanadzé . . . ꞌröwi tihöimanadzéb da tsi, te te tsiꞌãma ꞌre rotsaꞌrata dzaꞌra mono õ di dza.’ — 1 Coríntios 13:4, 5.

“Ĩ̱mro te wadzé wamhã, wa höiꞌré te ãma ĩrotsaꞌrata na hã ĩpire na duré dza te ĩꞌmanharĩ õ na hã marĩ te waiꞌre da niwamhã watsina wamrodzé te wamnarĩ da.” — Micah.

E MARĨ WA WẼ DI.

Tsiwadzéb dzaꞌra õ wamhã, ĩmro ré norĩ robdzanhamri na te dza tsina aiwaptsari dzaꞌra, te dza tsina tito watsété dzaꞌra duré te dza tsiwaꞌẽ dzaꞌra. Rowaihuꞌu petse ꞌwa norĩ nhimiromnhoré dzarina, ta norĩ te höiꞌré dzaꞌra ĩmro ré norĩ ãté dza ĩtsirẽme dzahuré na hã.

“Damreme watsédé, damreme nhipetse niwamhã dato ĩwatsédé te dza tiꞌawi aimro tsitsawidzé hã, te te ĩꞌaiꞌumnhatsidzé hã, duré taha nhipai u te dza ĩroꞌwaꞌré atsina aimrodzé wi hã.” — Brian.

E MARĨ TE DZA ĨꞌMANHA.

ÃMA ROTSAꞌRATA

Rotsaꞌrata, e niha ma tô ĩrobdzanha duré e niha ma tô ꞌre aihöimana aimro ma hã ãhã romhuri ré hã. Taha parimhã, tsadaꞌöbö:

• ‘E niha na ĩ̱mro ãma, wa ãma aiwaptsa. E niha na wa ãma ĩ̱wata.’

• ‘E niha na ĩ̱nhimiwadzé wa tãma höiꞌré.’

ATSIMA ROBDZANHAMRI ABA

• Aima hã, e mahã damreme duré dahöimanadzé aiwadzéb di.

• Aima hã, e mahã damreme duré dahöimanadzé aiwadzéb õ di.

AIPAWAPTOBDZÉB DA

• Tsihötö marĩ tsiꞌubdatõ aimro te te ꞌmanharĩ da aiwadzé te te höiꞌré da. A hã duré aimro te dza ĩtsihötö waꞌwa duré te dza atsima ĩtsõmri ꞌwa ĩtsihötödzé. Taha parimhã, atsiwatsutu aba ãma aihöimana aba da ĩhöiba amo te te aiwi ĩwaptẽrẽdzém na.

• Tsihötö e marĩ aima ĩwẽ aimro na hã. Taha parimhã, ãma aiwata aimro ãma aima ĩwẽ na ĩhöimanadzém na.

“Ĩ̱mro te wadzéb da, wa dza höiꞌré ĩ̱nhimiꞌmanharĩdzém na ĩ̱ma ĩpire na hã duré te ĩ̱tsima ĩwẽ na hã tãma robdze da. Tiha tsuru hawim na nherẽ tsada hã wa te ĩdawadzém na hã wa te höiꞌré da.” — Megan.

Ãté te atsina ĩrotsaꞌra atsimiwadzé petse na ĩꞌaihöimana na. Tadzahã, danhipai u ĩpire ꞌröwi atsitsadanharĩ da: “E ĩ̱mro te rotsaꞌrata te ĩwadzé petse na hã.”

ROPOTOꞌWAI MREME NHIMIROTI: ‘Maꞌãpé atsima tsô ꞌre atsõpré uꞌötsi aba mono, daꞌãma ꞌre aiba dzaꞌra waꞌaba mono da, duré aihöimana wẽ na dama ꞌre aihöimana dzaꞌra waꞌaba mono da, duré atsiꞌmadöꞌö dzei ãna, duré marĩ da te datsima ꞌre ĩwẽ dzaꞌra mono dzéb dzarina, ãma ꞌre dadzadze dzaꞌra waꞌaba mono da, mare di, atsima ĩwẽdzéb dzarina tsi ꞌre ĩdawati dzaꞌra waꞌaba mono da hã, duré daꞌãma aiwaꞌa tsuꞌu ãna ꞌre aihöimana dzaꞌra waꞌaba mono da.’ — Colossenses 3:12.