DATSITÉTÉ WAIHUꞌU PETSE WAMHÃ DAMA ROWẼ DI

E MARĨ DATSITÉTÉDZÉ.

Niꞌwa ĩtsitété waihuꞌu pe

• tsimipari dze ti

• tinhimirobꞌruiwaparidzé hã te te tété waihuꞌu petse di

• te te ꞌrãtsutu waihuꞌu petse di romhuri te te ãma ĩtsãnaꞌrada

• te daꞌãma rotsaꞌrata tsitsipai u

E MARĨ WA DATSITÉTÉDZÉ WẼ DI.

Aiꞌuté ĩtsitété waihuꞌu pe te dza wẽꞌõ marĩ ĩwatsédé da te pibui wamhã tahã te te ꞌmanharĩ dze nherẽ. Taha waꞌrãmimhã, aiꞌuté ĩtsitété waihuꞌuꞌõ

• tsimiꞌahöri dze ti

• ãté robdzeiꞌõ uꞌötsi dzém na te ꞌre höimana

• ãté warĩdzeiꞌwa na, ödzédzeiꞌwa na niwamhã warĩtsiparĩ dzeiꞌwa na te dza ꞌre höimana

• ãté te dza natsi titsa marĩ na tihöiba wamnarĩdzé

Romnhoré ĩwatobro dzarina, aiꞌuté norĩ ĩtsitété waihuꞌu petse dzaꞌra, prédub dzaꞌra wamhã, natsi hödzé dzaꞌra õ di dza, tite robꞌruipradzé te dza ꞌmadöꞌö wẽ dzaꞌra duré tãma danhipai wapu dzaꞌra di dza dama ĩpire norĩ nhimiroti te te tsadawa dzamarĩ dzaꞌra da. Ãhã romnhoré hã te te ꞌmadöꞌö petse parimhã, dama romnhoréꞌwa Angela Duckworth Romnhoré ꞌrãihödzém hawimhã Pensilvânia ãma te tinha: “Datsitété waihuꞌu petse wamhã, te dza datsima rowẽ wadzere dzaꞌra ni, madze di rowatsédé.”

E NIHA TE DZA ĨROWAHU AIꞌRA MA TSITÉTÉ DA.

Tiwi tsawi na duré aimremedzé ãma uwaimrami

BÍBLIA NHIMIROTI: ‘Marĩ hã dama ꞌre ꞌmanharĩ dzaꞌra waꞌaba mono da wamhã, ãne tsi te dza dama ꞌre ĩnharĩ dzaꞌra waꞌaba mo: “Ĩ̱he.” Duré atsima ꞌre wẽ dzaꞌra waꞌaba mono õ wamhã: “Mare di.”’ — Mateus 5:37.

Niꞌwa aiꞌuté norĩ danhoꞌa te ꞌre tsitsadzari dzaꞌra ruruꞌu tsina marĩ damama niwamhã dana wi te te tsima wẽ dzaꞌra wamhã. Ãne wamhã, damama duré dana ĩꞌra te te tsima ĩwẽdzé te te tãma tsõmri dzaꞌra wamhã, ãne aiꞌuté te dza natsi ꞌmanharĩ uꞌötsi.

Taha waꞌrãmimhã, damama duré dana timreme na te te ãma uwaimrami dzaꞌra wamhã ĩꞌra te te tsima ĩwẽdzé hã te te tãma tsõmri ãna, aiꞌuté te dza waihuꞌu marĩ ĩmorĩꞌrata uptabi: nimahã na, tsadai õ di wama höimana da wa te watsima ĩwẽdzé hã. Dr. David Walsh te tinha: Tahã te te ĩwaihuꞌu dzaꞌra norĩ ma hã, danhipai u robdze ti. Wa te pawaptob dzaꞌra õ di dza waꞌra norĩ hã wa te tãma rowahutu dzaꞌra wamhã aihĩni dza te te tãma ĩtsõmri dzaꞌra na hã uburé te te tsima ĩwẽ dzaꞌra dzé hã.a

Marĩ norĩ wẽꞌõ wamhã aiꞌra norĩ wi dzahadu aiꞌuté ré, danhipai u wapu di dza prédu wamhã te te wẽꞌõ da marĩ norĩ ĩwatsédé — ãma ĩtsimiré: warĩtsipãrĩ, datsina dahöimana damro wanaré duré tsiwaꞌru marĩ te te tiwi ĩroꞌwaꞌrutu waihuꞌu pe.

Pawapto na aiꞌra te te waihuꞌu da ĩwẽ niwamhã ĩwatsédé dza ĩwatobro na hã te te ĩꞌmanharĩdzéb dzarina

BÍBLIA NHIMIROTI: ‘ꞌRöwi atsima ꞌre rotsaꞌrata upa dzaꞌra waꞌaba mono tõ: Niꞌwa hã ꞌRe ĩhöimana uꞌötsi mono ãma tsima toi waihuꞌu õ di. Niꞌwa marĩ te te ĩꞌaꞌre hã ta hã te dza tô tehö.’ — Gálatas 6:7.

Aiꞌra te te ĩwaihuꞌu da tsi te te ĩꞌmanharĩdzéb dzarina dza ĩromhöimana na hã ĩwẽ niwamhã ĩwatsédé. Ãma ĩtsimiré, aiꞌra natsi tsiꞌrãiwaꞌro uꞌötsi wamhã te dza tiwi datsitsawi dzaꞌra ni, taha waꞌrãmimhã, tsitété waihuꞌu petse wamhã daꞌãma tsiꞌrãi waꞌro tõ da duré robdzanhamri te te dawi roꞌwaꞌrutu tõ da õhã te dza dama rowẽ. Waihuꞌu aiꞌra ma dza te te tsima ĩrobdzei uptabi na hã danhipai u tsitété waihuꞌu petse wamhã.

Waihuꞌu aiꞌra ma marĩ ĩpire ĩmorĩꞌrata na te te ꞌmanharĩ da

BÍBLIA NHIMIROTI: “Atsima waihuꞌu dzaꞌra waꞌaba marĩ danhipai u ĩpire norĩ na.” — Filipenses 1:10 TNM.

Niꞌwa ĩtsitété waihuꞌu pe te dza wẽꞌõ marĩ ĩꞌupa. Tadzahã, taha tsi õ di. Te dza duré ãma uwaimra romhuri tãma ĩhöimana hã tãma wẽ õ nherẽ. Aiꞌra te te ĩwaihuꞌu da tsi marĩ danhipai u ĩpire norĩ ta norĩ hã ĩmorĩꞌrata na te te ãma uwaimrami da. Ãma ĩtsimiré, romhuri romnhorédzéb da hã te te ĩꞌmanharĩ da tsi toi wana ré.

Aiꞌra ma ãma atsanho na.

BÍBLIA NHIMIROTI: ‘Wa ãma aima atsanho dzaꞌra waꞌwa, ĩ̱tsine ꞌre ꞌmanharĩ dzaꞌra waꞌaba mono da.’ — João 13:15.

Aiꞌra te dza ꞌmadö e niha te aihöiba ropire atsô watobro wamhã. Höiꞌré na atsitsanhodzém na hã dza tãma ĩrowẽ na hã ꞌre tsitété mono wamhã. Ãma ĩtsimiré, aiꞌra marĩ ĩꞌupa te te ꞌmanharĩ wamhã, atãma na aihöimana ãma atsiꞌrãiwaꞌro da nherẽ.