E niha Ropotoꞌwa nhitsi.
Dahöimanadzé ĩꞌahö norĩ ãma hã dawaihuꞌu da wamhã ĩmorĩꞌrata na te dza ĩdadzadanha: “E niha atsitsi.” Tadzahã Ropotoꞌwa ãne tsadanharĩ ꞌwaꞌöhã, e marĩ te aré tsadaꞌö.
“Wa hã Jeová. Ãhã ĩ̱nhitsi.” — Isaías 42:8 TNM.
Ĩtsitsi e ma tô ĩwapa. Ãté wapari õ di, ãma ĩtsaprĩdzé ĩꞌahö norĩ Ropotoꞌwai mreme na Ropotoꞌwa nhitsi tsuru na te te höiꞌré dzaꞌra wa niwamhã te te höiꞌré dzaꞌra õ wa. Te te natsi tsãrĩ dzaꞌra ĩtsitsi upana “DANHIBꞌAPITO” na. Tadzahã Bíblia waꞌõno hebraico mreme na ĩtsihötö ꞌremhã, Ropotoꞌwa nhitsi te tsihöiꞌré nimahã 7 mil na. Ropotoꞌwa nhitsi hã hebraico mreme na ĩꞌmanharĩ hã maparane tsiꞌuiwana ĩtsihötödzém norĩ ma, te te ãma ĩtsaprĩ ĩtsihötödzém norĩ YHWH niwamhã JHVH. Aꞌuwẽ mreme na, waradzu mreme na dzama, wahubꞌahö na, te da te ãma ꞌre tsaprĩ dzaꞌra Ropotoꞌwa nhitsi hã “Jeová” na.
Ĩhöiwarobo Öporé Ĩdöꞌö hawi Salmo nhihötö ré — wahu 30 hawi 50 u ꞌremhã Jesus parimhã HEBRAICO MREME
Tyndale nhimidzaprĩdzé 1530, INGLÊS MREME
Reina-Valera version 1602, ESPANHOL MREME
Union Version 1919, CHINÊS MREME
Ropotoꞌwa nhitsi te tsihöiꞌré uburé ĩtsihödö hebraico mreme na duré ãma ĩtsaprĩdzé ĩꞌahö norĩ ma Ropotoꞌwai mreme na
E MARĨ WA ROPOTOꞌWA NHITSI ĨWẼ UPTABI.
Tãma ĩwẽ uptabi. Ropotoꞌwa da te tsitsi õ di. Jeová tsiꞌuihö na ma tsitsitsi. Õ hã te tinha: “Tahã ĩ̱nhitsi hã õne uꞌö, duré ãne te dza ĩ̱ꞌãma ꞌre dapoꞌre puꞌu uꞌötsi dzaꞌra dapoto nhidöpötsi.” (Êxodo 3:15 TNM) Bíblia na, Ropotoꞌwa nhitsi te tsihöiꞌré ahö na tsiwaꞌru ĩwamri norĩ nhipai u, ãma ĩtsimiré Uburé Ĩwaihuꞌu pe, Damama, Danhibꞌapito duré ꞌRe Ĩhöimana uꞌötsi mono hã. Te duré tsihöiꞌré ahö na tsiwaꞌru danhitsi ĩhöiba amo norĩ nhipai u, ãma ĩtsimiré Abraão, Moisés, Davi duré Jesus. Taha nhipai u Jeová te tsima wẽ ĩtsitsi da te waihuꞌu dzaꞌra da. Ropotoꞌwai mreme te tinha: “Da te waihuꞌu dzaꞌra da a hã atsitsi Jeová na, Aiwététsi Atsaꞌẽtẽ uptabi di uburé tiꞌa nhitsiwi.” — Salmo 83:18 TNM.
Ĩwẽ uptabi Jesus ma. Rowaptẽrẽ na dama ĩwaihuꞌu pe Wamama na, Jesus ma tô rowahutu tidzadawa dzamarĩꞌwa norĩ ma Ropotoꞌwai wi te te rowaptẽrẽ dzaꞌra da ãne: ‘Atsitsi hã ĩwadzé petse na ꞌre ĩhöimana mono da tsi ĩwẽ hã.’ (Mateus 6:9) Jesus ma tô duré rowaptẽ Ropotoꞌwai wi: ‘Ĩ̱mama maꞌãpé we höiꞌré na atsitsi ĩwẽ uptabi na ꞌre ĩhöimana mono dzé hã.’ (João 12:28) Ropotoꞌwa nhitsi höiꞌré marĩ danhipai u ĩmorĩꞌrata uptabi Jesus ma. Taha wa te tinha Ropotoꞌwai ma: ‘Wa hã, wa anhitsi hã tãma tsõmri dzaꞌra, õ norĩ hã te te adzaꞌretse dzaꞌra da hã, duré õ norĩ ma wa dza tsõmri dzaꞌra te te waihuꞌu dzaꞌra da.’ — João 17:26 RTN.
Ĩwẽ uptabi ãma ĩwata dzaꞌra norĩ ma hã. Duréihã Ropotoꞌwa nhibꞌaꞌuwẽ norĩ ma waihuꞌu petse di Ropotoꞌwa nhitsi hã ĩpire uptabi datsimapadzéb da na hã duré danhoꞌreptudzéb da na hã. Ropotoꞌwai mreme tsiꞌuihö na te tinha: ‘Uburé Danhibꞌapito nhitsi hã [Jeová] aiwa ꞌri ꞌrãihö datsimapadzé ĩtsiptete ne hã te ꞌre höimana. Taha tẽme te tsena na ĩꞌuwaibaba na tsi ꞌre ĩhöimana dzaꞌra mono norĩ hã ꞌre nomro, tsima ĩwẽ na ĩwa ꞌre höimana dzaꞌra mono da hã.’ (Provérbios 18:10) Te duré tinha: ‘Uburé niꞌwam norĩ hã Uburé Danhibꞌapito dzô ĩtsitsi na ĩhãtsi norĩ hã ta norĩ hã te dza tsõꞌreptu dzaꞌra.’ (Atos 2:21) Taha nhipai u, Ropotoꞌwai mreme te rowahutu Ropotoꞌwa nhitsi hã dza te te dama ĩhöiꞌré na hã ĩromhuriꞌwa norĩ hã: “Dapoto mono bö te dza ꞌre datsiꞌabaꞌré da te Ropotoꞌwa nhitsi na, tadzahã wa norĩ hã wa dza ꞌre aiꞌabaꞌré Jeová nhitsi na, wate Ropotoꞌwa, õne uꞌö.” — Miqueias 4:5 TNM; Atos 15:14 TNM.
E MARĨ ROPOTOꞌWA NHITSI TE HÖIꞌRÉ.
Te rowahutu ĩhöimanadzé duré te te ĩꞌmanharĩ waihuꞌu petse dzé. Romnhoré petse ꞌwa ĩꞌahö norĩ, ma tô waihuꞌu dzaꞌra Jeová te te ĩwatsuꞌu na hã “Õ hã te ꞌmanha watobro da”. Ropotoꞌwa Jeová tsiꞌuihö na ma tô wama waihuꞌu dzaꞌra tinhitsi waihuꞌudzé Moisés ma te te nharĩ wamhã: “Wa hã wa dza ĩ̱tsiꞌmanha te ĩpitsutudzé ĩ̱tsiꞌmanharĩ da.” (Êxodo 3:14 TNM) Ãne na hã, Ropotoꞌwa nhitsi te te watsuꞌu õ di taré te te ĩꞌaropoto mono na hã. Te watsuꞌu ĩtsiꞌmanharĩ waihuꞌu petse na hã niwamhã te te ĩꞌmanharĩ waihuꞌu petse na hã tinhimiropodo tsiwaꞌru marĩ na tsiꞌmanharĩ da, te te tsima ĩwẽdzéb da hã. Ropotoꞌwa ĩwamri mono tsõꞌawi te höiꞌré õ hã danhipai u ĩtsiptede ĩhöimana hã duré danhipai u dama ĩpire na ĩhöimana hã. Tadzahã ĩtsitsi tsi Jeová te höiꞌré uburé ĩhöimanadzé hã duré te te ĩꞌmanharĩ waihuꞌu petse dzé.
Te höiꞌré õ hã te te tsima ĩwẽ na hã waꞌãma tsiwaihuꞌu da. Ropotoꞌwa nhitsi watsuꞌudzé te höiꞌré te te ãma ĩrotsaꞌrata na hã ĩtsimiropoto na duré wahöiba mono bö. Ropotoꞌwa tsiꞌuihö na ma tô wama höiꞌré dzaꞌra tinhitsi tsô warĩtĩ õ ré. Tawamhã te tsima wẽ wa te ãma waihuꞌu dzaꞌra da duré romhö na wanhiti ĩhöimana õ na hã duré õ hã niꞌwa ĩꞌuptabi na, watsiwaihu watsiré ĩhöimana na. — Tiago 4:8.
Ropotoꞌwa nhitsi na wahöimana dzaꞌra wamhã wa höiꞌré dzaꞌra ni wa te watsima ĩwẽ dzaꞌra na hã ãma watsiwaihuꞌu da. Rotsaꞌrata atsima ĩwẽ na hã niꞌwai ãma atsiwaihuꞌu da. Tawamhã atsitsi te dza tãma ĩwatsuꞌu. E niha te aré aihöiba atsitsi te te wẽꞌõ ꞌwaꞌöhã. Ãté te aré ĩrotsaꞌra te te tsima ĩwẽ õ na hã aiꞌãma tsiwaihuꞌu da. Ãne duré Ropotoꞌwa na hã. Jeová tinhitsi ma tô wama watsuꞌu dzaꞌra duré te tinha wa te nharĩ dzaꞌra da. Ĩtsitsi na wahöimana dzaꞌra wamhã, Jeová ma, wa höiꞌré dzaꞌra ni wa te watsima ĩwẽ dzaꞌra na hã ãma watsiwaihuꞌu da. Duré Jeová te ꞌre tsimipari niꞌwa ‘ĩtsitsi na te te ãma ꞌre rotsaꞌrata mono wamhã’. — Malaquias 3:16 TNM.
Ropotoꞌwa nhitsi waihu marĩ ĩmorĩꞌrada wa te waihuꞌu dzaꞌra da. Tane nherẽ taha tsi õ di. Ĩhöimanadzé hã wa te ĩwaihuꞌu dzaꞌra da tsi duré.
E NIHA ROPOTOꞌWA NHITSI HÃ. Ropotoꞌwa nhitsi hã Jeová na. Ĩtsitsi te höiꞌré õhõ tsi te te ãma ĩꞌuwaimrami waihuꞌu petse na hã uburé tinhimiropitsutu norĩ.