Ropotoꞌwa te te daꞌãma roti wamhã uburé ropoto mono bö ma tô ꞌre höimana dzaꞌra tsimitsutu duré rowẽ na
E marĩ wa, te wawi tsô tirowaptöꞌö dzaꞌra Ropotoꞌwa nhimirobꞌrudzéb dzô.
Ropoto naꞌrata hawimhã, Wapotoꞌwa Jeová tsi Rotiꞌwa na ma tô ꞌre höimana. Õ hã ma tô daꞌãma roti ĩtsimidzawi petse dzéb dzarina. Ma tô poto ro ĩwẽ uptabi, Éden na ĩtsitsi, ꞌre dahöimana dzaꞌra mono da. Duré ma tô dama tsõmri dzaꞌra datsa ahö na romhuri ĩwẽ uptabi dzama. (Gênesis 1:28, 29; 2:8, 15) Ropotoꞌwa nhimiroti, da te wapari dzaꞌra ꞌwaꞌöhã, rowẽ uptabi na te aré ꞌre dahöimana dzaꞌra.
Ĩmorĩꞌrada aibö duré piꞌõ te te tsima wẽ dzahuré õ di Ropotoꞌwa te te ãma roti dzahuré da.
Ropotoꞌwai mreme te höiꞌré dawatsuꞌuꞌwa ĩwatsédé, Waꞌuburé na ĩtsitsi, te te ĩnharĩ na hã Jeováhá ma ĩꞌrudzahi tãma ĩhöimana õ na hã te te daꞌãma roti da. Te te ĩnharĩdzéb dzarina, Ropotoꞌwa te te daꞌãma roti õ wamhã, te dza ꞌre dahöimana dzaꞌra danhipai u robdze na. Ĩmorĩꞌrada aibö duré piꞌõ, Adão duré Eva, ma tô tsimidzadze dzahuré Waꞌuburé dzadawa nhipetse na duré õhõ ne ma tô rẽme dzahuré Ropotoꞌwa. — Gênesis 3:1-6; Apocalipse 12:9.
Adão duré Eva ma tô aipiꞌra dzahuré Ropotoꞌwai wi, duré õ hã daꞌãma Rotiꞌwa na te te ꞌre wapari dzahuré mono õ di oto. Taha wa, ma tô tiwi tsimini dzahuré tiro ĩwẽ duré dahöimana uꞌötsi dzé dahödzé ãna. (Gênesis 3:17-19) Ĩtsimipitsutu dzahuré dzé ma tô roꞌwaꞌré uburé ĩtsihudu norĩ wi, taha pari ĩrereꞌe hã. Ropotoꞌwai mreme dzarina, ‘dawatsédé ma tô tidzébré naꞌrata, Adão ĩwatsétédzém hawi. Ta hawimhã ma tô duré dawatsédé hã te te ropé, uburé dapoto mono bö.’ (Romanos 5:12) Dawatsété uꞌöbö, “te da te datsiꞌãma ꞌre roti dzaꞌra, ꞌre tsiwamnarĩ dzaꞌra mono da.” (Eclesiastes 8:9 TNM) Tahã te watsuꞌu ropire ĩhöimana na hã daro mono bö danhimiwadaꞌuri uꞌöbö.
DANHIMIROBꞌRUDZÉ MA TINHANAꞌRATA
Ninrode ma tô tihöiba Jeová dzada.
Ĩmorĩꞌrada aibö Rotiꞌwa, Ropotoꞌwai mreme te te ĩnharĩ hã Ninrode na ĩtsitsi. Taha aibö watsédé ma tô tihöiba Ropotoꞌwa nhimirobꞌrudzéb dzada. Ta hawim haré, dama ĩpire ĩꞌahö norĩ dama tsimimnhatsi dzaꞌra dzarina, ma tô te te daꞌãma roti dzaꞌra mono, da te ꞌre robdzépata dzaꞌra mono da. Duréihã, 3.000 na wahu wana ré, Rotiꞌwa Salomão ma tô tsihötö ãne: “Wa tô ꞌmadö da te ĩꞌuwati dzaꞌra norĩ upĩ hã, tadzahã niꞌwa te te pẽꞌẽ hiri dzaꞌra õ di. Te te tãma ĩꞌuwati dzaꞌra norĩ hã dama ĩpire na ma tô ꞌre höimana dzaꞌra.” — Eclesiastes 4:1 TNM.
à bötö mono na hã, daꞌãma romhöimanadzé hã aiwa te ꞌre höimana. 2019 wahum na ĩhöiwarobo Nações Unidas nhimiꞌmanharĩ hã ma tô watsuꞌu daꞌahö na da te ĩrotsaꞌrata dzaꞌra na ‘rowatsédé daro mono bö dama ĩpire norĩ nhimirobꞌrudzé watsété hawi’.
ROMHÖIMANADZÉ TE DZA TSAPRĨ NI!
Te dawi tsô tirowaptöꞌö dzaꞌra dama ĩpire norĩ danhipai u ĩwẽ dzô duré robꞌrudzé danhipai u ĩwẽ dzô. Taha na Wapotoꞌwa ma tô wama ropitsutu dzaꞌra!
Danhimirobꞌrudzé wẽ nherẽ, te te uprotsi waihuꞌu õ di rowatsédé
Ropotoꞌwa ma tô poto ĩtsimirobꞌrudzé te te daꞌãma roti da, uburé danhimirobꞌrudzé upana. Ãne wamhã, ‘te dza õhõ tsi oto ꞌre höimana uꞌötsi, pire na apito nhimiꞌmadöꞌödzém na hã.’ (Daniel 2:44) Ãhã robꞌrudzém na, daꞌahö na te natsi rowaptẽrẽ dzaꞌra ni Ropotoꞌwai wi. (Mateus 6:9, 10 RTN) Tadzahã, Ropotoꞌwa ꞌre höimana mono õ di dza Rotiꞌwa na tinhimirobꞌrudzéb ꞌremhã. Taha waꞌrãmimhã, õ hã ma tô pitsutu niꞌwa Tiꞌai ãma oto ꞌre ĩhöimana mono hã Rotiꞌwa da tinhimirobꞌrudzéb ꞌremhã. E ꞌwa bété Ropotoꞌwa ma pitsutu.