E aihödzé ĩpire

“Te waihuꞌu petse wamhã dawaꞌre tsiꞌutõrĩꞌõ (câncer) ré hã, wa tô rotsaꞌrata: ‘wa dza dörö.’ Tadzahã, ĩ̱nhõrõwa u ĩ̱witsi wamhã wa tô rotsaꞌrata: ‘Pire di dza, tane nherẽ wa dza ꞌwapé.’ ” — Linda, 71 ãma ĩwahu.

“Ĩ̱hödzé di, ĩ̱ꞌubu nhimiꞌe tsé uptabi di, tahawa ĩ̱ma robdzeiꞌõ. Ĩ̱tsiwaprotsi wa ꞌre ĩ̱höimana duré wa tô rotsaꞌrata ĩ̱tsiwĩrĩ da.” — Elise, 49 ãma ĩwahu.

Ĩhire te mo titsiré ĩtsimidzawi pe norĩ hã

E AIHÖDZÉ ĩpire. Niwamhã, e aima waihuꞌu petse di niꞌwa hödzé ĩpire, tawamhã aima waihuꞌu petse di, pire di. Ãté dawedeꞌwa u te dza natsi ne duré dawededzé ãté ĩwaꞌöbö tsaꞌẽtẽ. Tahawa aihötöꞌö di duré aiwatsutu di.

Tawamhã, e marĩ te dza aipawapto. Rowaptẽrẽ Höimanaꞌuꞌö wi, duré tsõré wamhã Bíblia aima wẽ di dza. Duré atsiwaihuꞌu norĩ hã, atsitsãnawã norĩ hã, te dza aipawaptob dzaꞌra.

ĨHÖDZÉRÉ NORĨ NHIMIROWATSUꞌU

Aibö Robert na ĩtsitsi, 58 ãma ĩwahu, te tinha: “Höimanaꞌuꞌö ãma umnhatsi wamhã te dza aipawapto ꞌre ꞌwapéi mono da. Rowaptẽrẽ Jeová wi. Tãma rowatsuꞌu atsimirobdzépada, waptẽrẽ nhiptetedzé ĩpe Höimanaꞌuꞌö hawi. Duré rowaptẽrẽ atsiptete na ꞌre aihöimana mono da, ãne aima wẽ di. Tahã te dza aipawapto duré te dza pawaptob dzaꞌra aihĩni atsõrõwa ꞌre.

“Bötö tsidödötsi, ĩ̱tsitsãnawã norĩ duré ĩ̱tsiwadi norĩ te natsi ĩ̱ma taꞌa dzaꞌra te ĩ̱dzadanharĩ dzaꞌra: ‘E rowẽ di.’ Tahã ĩwẽ uptabi, te ĩ̱pawapto petse. Duré ĩ̱tsiwaihuꞌu norĩ daro mono bö te ĩ̱pawapto petse ꞌre ꞌwapéi mono da.” – Ãne Robert te watsuꞌu.

Aimorĩ wamhã atsiwaihuꞌu ĩhödzéré u tsabu da, ãne te dza ĩꞌmanha, Linda te te watsuꞌudzéb dzarina: “Ĩhödzéré te tsima wẽ ãma poꞌre tsiꞌörĩ da tihödzém na. Dahödzém na tãma watsuꞌu tõ. Taré tãma robdzanha ãma.”

E aihödzé ĩpire. Tawamhã, e ꞌwam norĩ hã te dza aipawapto robdze na ꞌre ꞌwapéi mono da. Höimanaꞌuꞌö, atsitsãnawã norĩ, atsiwaihuꞌu norĩ duré Bíblia.

Bíblia te dza aipawapto

Höimanaꞌuꞌö atsina umnhatsi.

‘Wa hã, Uburé Danhibꞌapito nhimipawaptobdzé te tiwi ꞌre waptẽrẽ mono wamhã, ma tô õ hã te te ãma ꞌre ĩ̱dzadaꞌöbö . . . Wa hã, ĩ̱nhimarĩꞌõ te ꞌre ĩrobdzépata mono, wa tô ĩhörö ꞌrãihö na hö. Taha wamhã, Uburé Danhibꞌapito hã ma tô ĩ̱wapa.’ — Salmo 34:4, 6.

Linda duré te tinha: “Höimanaꞌuꞌö ma te waptẽrẽ õ di te te ĩ̱dzéptöꞌö da. Wa waptẽ te te ĩ̱nhiptete da te ꞌre ꞌwapéi mono da.”

Höimanaꞌuꞌö mreme hã te dza atsiptete.

‘Duré dahödzé, da te ꞌre tsépata dzaꞌra mono õ di dza oto.’ — Apocalipse 21:4.

Rotsaꞌrata petse Höimanaꞌuꞌö nhimiropitsutu norĩ hã. Ãne, atsimidzadze atsiptete di dza ꞌre ꞌwapéi mono da aihödzé wamhã.

Tsô airĩtĩ atsiwaihuꞌu norĩ duré atsitsãnawã norĩ nhimipawaptobdzéb dzô.

‘Niꞌwa hã te dza titsiwaihu te te ꞌre tsawi uꞌötsi. Ropipa hã tsô watobro wamhã, te dza ĩtsitsãnawã ne hã tãma ꞌre höimana.’ — Provérbios 17:17.

Elise duré te tinha: “Atsiwaprotsi aihöimana tõ. Atsiwaihuꞌu norĩ nhimipawaptobdzé hã aima wẽꞌõ tõ. Ãté te ĩrotsaꞌra: ‘Höimanaꞌuꞌö te te ĩ̱wapari õ di, wa hã ĩ̱tsiwaprotsi.’ Taha nherẽ, atsiwaprotsi aihöimana tõ.”