YOWELI
1 Eli lilizwi likaYehova elafika kuYoweli* unyana kaPetuweli:
Yakha yenzeka na into enje ngemihla yenu
Okanye ngemihla yookhokho benu?+
3 Xelelani oonyana benu,
Oonyana benu baxelele oonyana babo,
Noonyana babo babalisele isizukulwana esilandelayo.
4 Okushiywe ziinkumbi ezibhuqayo, kutyiwe libubu leenkumbi,+
Okushiywe libubu leenkumbi, kutyiwe ngumqikela,
Nokushiywe ngumqikela, kutyiwe ziinkumbi ezitshabalalisayo.+
5 Vukani nina manxila,+ nilile!
Yenzani isijwili nonke nina basela iwayini,
Kuba iwayini enencasa ihluthiwe emilonyeni yenu.+
6 Kuba kuze uhlanga olunamandla nolungenakubalwa kwilizwe lakowethu.+
Amazinyo alo ngamazinyo engonyama,+ nemihlathi yalo yeyengonyama.
7 Luyitshabalalisile imithi yam yeediliya, lwashiya eyamafiya* izizikhondo,
Lwayihluba yaba ze lwaza lwayijula phayaa,
Amasetyana ayo asele emhlophe.
8 Yenza isijwili, njengoko isenza intombi enxibe ilaphu lokwenza ingxowa
Isenzela umyeni wobutsha bayo.
9 Awusezi endlini kaYehova umnikelo wokutya okuziinkozo+ noselwayo,+
Ababingeleli, abasebenzi bakaYehova, bazilile.
10 Intsimi ibhuqiwe, umhlaba uzilile,+
Kuba ukutya okuziinkozo kubhuqiwe, iwayini entsha iphelile, neoli ayisekho.+
11 Abalimi banxunguphele, abasebenzi bamasimi eediliya benza isijwili,
Ngenxa yengqolowa nerhasi,
Kuba isivuno samasimi sitshabalele.
Umthi werharnati, owesundu noweapile,
Yonke imithi yasendle yomile,+
Kuba uvuyo lujike lwalihlazo ebantwini.
13 Nxibani amalaphu okwenza ingxowa, nizile,* nina babingeleli.
Yenzani isijwili, nina basebenza kwisibingelelo.+
Ngenani, ninxibe amalaphu okwenza ingxowa ubusuku bonke, nina basebenzi boThixo wam,
Kuba umnikelo wokutya okuziinkozo+ noselwayo+ awusasiwa endlini yoThixo wenu.
14 Bhengezani* ixesha lokuzila ukutya, bizani indibano engcwele.+
Qokelelani abadala nabo bonke abemi belizwe,
Endlini kaYehova uThixo wenu,+ nize nikhalele uncedo kuYehova.
15 Kuza kuba kubi ngaloo mini!
Kuba isondele imini kaYehova,+
Kwaye iza kuza iyintshabalalo evela kuSomandla!
16 Akuthathwanga phambi kwamehlo ethu na ukutya,
Imihlali novuyo endlini kaThixo wethu?
17 Imbewu yomile* phantsi kwemihlakulo yabo.
Oovimba abananto.
Izisele zichithiwe, kuba ukutya okuziinkozo kuphelile.
18 Nkqu nemfuyo iyancwina!
Imihlambi yeenkomo iyabhadula, kuba ayinadlelo!
Nemihlambi yeegusha ixhwalekile.
19 Owu Yehova, ndiza kubhenela kuwe,+
Kuba umlilo uwaqwengile amadlelo asendle,
Nedangatye liyidle yonke imithi yamasimi.
20 Kwanezilwanyana zasendle ziyakulangazelela,
Kuba imijelo yamanzi yomile,
Nomlilo uwaqwengile amadlelo asendle.”
Hlabani umkhosi entabeni yam engcwele.
2 Yimini yobumnyama nesithokothoko,+
Imini yamafu nesithokothoko,+
Njengokukhanya kwesifingo okunabileyo ezintabeni.
Kukho isizwana esikhulu nesinamandla,+
Zange yabakho imini enjengayo,
Yaye soze ibekho enye efana nayo
Kwiminyaka yazo zonke izizukulwana.
Ilizwe phambi kwaso linjengomyezo wase-Eden,+
Kodwa emva kwaso yintlango nje,
Yaye akukho nto inokusinda kuso.
5 Sitsho ngesandi esifana neseenqwelo ezihamba phezulu ezintabeni,+
Nesandi somlilo odangazelayo odla iindiza.
Sinjengesizwana esinamandla esilungele idabi.+
6 Ziza kuba sentlungwini zonke izizwana ngenxa yaso.
Bonke abantu baza kuphatsha ebusweni.
7 Sihlasela njengamakroti emfazwe,
Sinyuka eludongeni njengamajoni,
Ngamnye uhamba ngendlela yakhe,
Ungqala phambili angajiki.
8 Asityhalani,
Ngamnye uhamba ngendlela yakhe.
Xa omnye ehlaselwa ngezixhobo* aze awe,
Abanye abasuki endaweni yabo.
9 Siyagxalathelana ukungena esixekweni, sibaleka eludongeni.
Sikhwela ezindlini, singene ngeefestile njengesela.
10 Phambi kwaso ilizwe liyangcangcazela namazulu ayanyikima.
Ilanga nenyanga zijike zaba mnyama,+
Kwafiphala nokukhanya kweenkwenkwezi.
11 UYehova uza kuthetha ngelizwi elikhulu phambi komkhosi wakhe wemfazwe,+ kuba inkampu yakhe inkulu kakhulu.+
Kuba lowo uphumeza ilizwi lakhe unamandla;
Imini kaYehova inkulu yaye iyoyikeka kakhulu.+
Ngubani na onokumelana nayo?”+
12 “Kodwa nangoku,” utsho uYehova, “buyelani kum ngeentliziyo zenu zonke,+
Ngokuzila ukutya,+ ngokulila nangokwenza isijwili.
13 Krazulani iintliziyo zenu,+ ningakrazuli iimpahla zenu,+
Nibuyele kuYehova uThixo wenu,
Kuba unosizi nenceba, akakhawulezi ukucaphuka+ yaye unothando oluninzi olungagungqiyo,+
Kwaye uza kuyirhoxisa intlekele yenu.*
14 Ngubani na owaziyo ukuba angajika abe nosizi*+
Aze anishiyele intsikelelo,
Ukuze nenze umnikelo wokutya okuziinkozo nomnikelo othululwayo kuYehova uThixo wenu?
15 Vuthelani uphondo eZiyon!
Bhengezani* ixesha lokuzila ukutya, bizani abantu nibe nendibano engcwele.+
16 Qokelelani abantu, lenzeni ngcwele ibandla.+
Qokelelani amadoda amadala,* qokelelani abantwana neentsana ezincancayo.+
Umyeni makaphume kwigumbi lakhe elingaphakathi, nomtshakazi egumbini lakhe.
‘Khawube nosizi ngabantu bakho, yhini Yehova,
Sukubenza into yokuhlekisa abantu abalilifa lakho,
Ubayeke balawulwe ziintlanga.
Ungathini ukuziyeka izizwana zithi, “Uphi uThixo wabo?”’+
19 UYehova uza kubaphendula abantu bakhe athi:
‘Ndiza kuninika ukutya okuziinkozo newayini entsha neoli,
Ibe niza kwanela kuko,+
Andizukuphinda ndinenze nibe yintlekisa ezintlangeni.+
20 Ndiza kumgxothela kude kuni lowo uvela ngasemntla,
Ndiza kumdudulela kwilizwe elingahlali bantu,
Amajoni akhe aphambili ndiwase kulwandle* lwasempuma*
Ndize lawo angasemva ndiwase kulwandle lwasentshona.*
Ukunuka kwakhe kakubi kuza kunyuka,
Nevumba lakhe elibi liza kunyuka,+
Kuba yena uza kwenza izinto ezinkulu.’
21 Sukoyika mhlaba.
Vuya ube nemihlali, kuba uYehova uza kwenza izinto ezinkulu.
22 Sanukoyika nani zilwanyana zasendle,
Kuba amadlelo asentlango aza kuba luhlaza,+
Nemithi iza kuthwala iziqhamo,+
Imithi yamafiya neyeediliya iza kuchuma.+
23 Vuyani nibe nemihlali ngoYehova uThixo wenu, nina bonyana baseZiyon,+
Kuba uza kuninika imvula eyaneleyo ngexesha lasekwindla,
Aninike izantyalantyala,
Imvula yasekwindla nemvula yasentwasahlobo, njengakuqala.+
24 Amabala okubhula aza kugcwala ukutya okuziinkozo,
Neefatyi zesixovulelo ziza kuphuphuma yiwayini entsha neoli.+
25 Ndiza kunibuyekeza ngelahleko yeminyaka
Ebangelwe libubu leenkumbi, umqikela, iinkumbi ezitshabalalisayo neenkumbi ezibhuqayo,
Ezingumkhosi wam omkhulu wamajoni endanithumela ngawo.+
26 Ngokuqinisekileyo niza kutya nanele,+
Nitsho nilidumise igama likaYehova uThixo wenu,+
Onenzele yonke le mimangaliso,
Soze baphinde bahlazeke abantu bam.+
Soze baphinde bahlazeke abantu bam.
28 Emva koko ndiza kuthulula umoya wam+ phezu kwalo lonke uhlobo lwabantu,*
Yaye baza kuprofeta oonyana benu neentombi zenu,
Amaxhego enu aza kuphupha amaphupha,
Abafana benu babone imibono.+
29 Nkqu naphezu kwezicaka nezicakakazi zam
Ndiza kuthulula umoya wam ngaloo mihla.
31 Ilanga liza kujika libe mnyama nenyanga ibe ligazi+
Ngaphambi kokuba ifike imini enkulu neyoyikekayo kaYehova.+
32 Wonke umntu othembela egameni likaYehova uza kusindiswa,+
Kuba eNtabeni YaseZiyon naseYerusalem kuza kubakho abasindileyo,+ kanye njengoko watshoyo uYehova,
Abasindileyo ababiziweyo nguYehova.”
3 “Jongani! ngaloo mihla nangelo xesha,
Xa ndibuyisa abathinjiweyo bakwaYuda nabaseYerusalem,+
2 Ndiza kuqokelela zonke iintlanga
Ndizihlisele entlanjeni yakwaYehoshafati.*
Ndiza kuzigweba apho+
Ngenxa yabantu bam nelifa lam uSirayeli,
Kuba ziye zamsasaza phakathi kweentlanga,
Zahlulelana ngelizwe lam.+
3 Zazisenza amaqashiso ngabantu bam,+
Zazithengisa ngomntwana oyinkwenkwe kuba zifuna umfazi othengisa ngomzimba,
Zithengise ngentombazana kuba zifuna ukusela iwayini.
4 Yintoni le ndinenze yona,
Wena Tire neSidon nani nonke mimandla yamaFilisti?
Ngaba niyaphindisa?
Ukuba niyaphindisa,
Ndiza kukhawuleza ndibuyekeze impatho yenu phezu kweentloko zenu.+
5 Kuba nithathe isilivere yam negolide yam,+
Nazisa obona butyebi bam ezitempileni zenu,
6 AmaYuda nabantu baseYerusalem nibathengise kumaGrike,+
Ukuze nibase kude nomhlaba wabo,
7 Ndiza kubavuselela ukuba babuye kuloo ndawo nibathengise kuyo,+
Ibe ndiza kuyibuyisela kwiintloko zenu impatho yenu.
8 Ndiza kuthengisa oonyana benu neentombi zenu kumaYuda,+
Ibe wona aza kubathengisa kumadoda akwaShebha, uhlanga olukude,
Kuba uYehova uthethile.
9 Zixeleleni le nto iintlanga:+
‘Lungelani* imfazwe! Vuselelani amadoda anamandla!
Onke amajoni makasondele, makanyuke!+
10 Khandani amakhuba enu abe ngamakrele, nezitshetshe zokuthena imithi zibe yimikhonto.
Ongenamandla makathi: “Ndinamandla.”
11 Yizani nize kunceda, nonke nina zintlanga zijikelezileyo, nize niqokelelane!’”+
Owu Yehova, wehlisele kuloo ndawo amakroti akho.
12 “Mazivuseleleke iintlanga, zinyuke ziye entlanjeni yakwaYehoshafati,
Kuba ndiza kuhlala apho ukuze ndigwebe zonke iintlanga ezikufutshane.+
13 Fakani irhengqa, kuba isivuno sivuthiwe.
Yizani kuba isixovulelo sewayini sigcwele.+
Iifatyi zesixovulelo ziyaphuphuma, kuba ububi babo buninzi.
15 Ilanga nenyanga ziza kuba mnyama,
Neenkwenkwezi ziza kuyeka ukuqaqamba.
16 UYehova uza kugquma eseZiyon,
Uza kulivakalisa ilizwi lakhe eseYerusalem.
Izulu nomhlaba ziza kunyikima,
Kodwa uYehova uza kuba yindawo yokubalekela yabantu bakhe,+
Inqaba kumaSirayeli.
17 Kuza kufuneka nazi ukuba ndinguYehova uThixo wenu, ohlala eZiyon, intaba yam engcwele.+
18 Ngaloo mini iintaba ziza kuvuza iwayini enencasa,+
Zona iinduli zibe nobisi oluninzi,
Nemisinga yakwaYuda iza kuba namanzi amaninzi.
Endlini kaYehova kuza kugqabhuka umthombo,+
Kwaye uza kunkcenkceshela iNtlambo Yemithi Yomnga.
19 Kodwa iYiputa iza kuba yinkangala,+
Ne-Edom iza kuba ngumhlaba owomileyo ongahlali mntu,+
Ngenxa yobundlobongela ezibenze kumaYuda,+
Ziphalaza igazi elimsulwa kwilizwe lawo.+
Othetha ukuthi “UYehova NguThixo.”
Okanye “bomhlaba.”
Okanye “eyamakhiwane.”
Okanye “wamakhiwane.”
Okanye “nizibethe izifuba.”
Ngokoqobo, “Lenzeni ngcwele.”
Okanye kusenokwenzeka, “Amafiya omile.”
Okanye “bomhlaba.”
Okanye “ngemijukujelwa.”
Okanye “kuzisola ngentlekele yenu.”
Okanye “azisole.”
Ngokoqobo, “Lenzeni ngcwele.”
Okanye “abadala.”
Ngokoqobo, “Ubuso bakhe bungakulwandle.”
Oko kukuthi, uLwandle Olufileyo.
Oko kukuthi, uLwandle LweMeditera.
Ngokoqobo, “lwenyama.”
Okanye “imihlola.”
Othetha ukuthi “UYehova NguMgwebi.”
Ngokoqobo, “Yenzeni ngcwele.”
Okanye “zisethafeni lesigqibo.”
Okanye “ethafeni lesigqibo.”
Okanye “ityala labo legazi.”