“Ndiya Kujikeleza Isibingelelo Sakho, Yehova”
“IZANDLA zam ndiya kuzihlamba ngobumsulwa, yaye ndiya kujikeleza isibingelelo sakho, Yehova.” (INdumiso 26:6) Ngala mazwi uKumkani uDavide wamandulo wavakalisa ukuzinikela kwakhe kuYehova. Noko ke, kwakutheni ukuze ‘ajikeleze’ isibingelelo sikaYehova yaye wakwenza oko ngayiphi ingqiqo?
KuDavide, isazulu sonqulo lukaYehova yayingumnquba onesibingelelo sayo esasigqunywe ngobhedu, owawuseGibheyon ebudeni bolawulo lwakhe, emntla weYerusalem. (1 Kumkani 3:4) Isibingelelo sasimalunga nezkwemitha ezisisi-2, 2, sisincinane lee kunesibingelelo esibalaseleyo esasimiswe kwintendelezo yetempile kaSolomon.a Sekunjalo, uDavide wayewuthanda gqitha umnquba nesibingelelo sawo, owawusisazulu sonqulo olunyulu kwaSirayeli.—INdumiso 26:8.
Amadini anyukayo, imibingelelo yoxolo neminikelo yesono yayisenzelwa esibingelelweni, yaye uMhla Wocamagusho owawusenziwa minyaka le wawunemibingelelo eyayisenzelwa uhlanga. Isibingelelo nemibingelelo yayo inentsingiselo kumaKristu namhlanje. Umpostile uPawulos wacacisa ukuba isibingelelo sasimele ukuthanda kukaThixo, awathi Yena wamkela isibingelelo esifanelekileyo ukuze kukhululwe uluntu. UPawulos wathi: “Kungenxa yale ‘ntando’ yakhe le nto siye sangcwaliswa ngokunikelwa komzimba kaYesu Kristu kwaba kanye.”—Hebhere 10:5-10.
Xa babeza kulungiselela kwisibingelelo, ababingeleli babeqhele ukuhlamba izandla zabo emanzini ukuze bazihlambulule. Ngoko ke, kwakufanelekile ukuba uKumkani uDavide ahlambe izandla zakhe “ngobumsulwa” ngaphambi ‘kokuhambahamba esibingelelweni’. Wayesenza “ngentliziyo egqibeleleyo nangokuthe tye.” (1 Kumkani 9:4) Ukuba wayengazihlambi ngale ndlela izandla zakhe, unqulo lwakhe—‘ukuhamba kwakhe kwisibingelelo’—kwakungayi kwamkeleka. Kakade ke, uDavide wayengenguye umLevi yaye wayengenalo ilungelo lokwenza inkonzo yobubingeleli esibingelelweni. Nangona wayengukumkani, wayengavumelekanga nakwintendelezo yomnquba. Sekunjalo, njengomSirayeli othembekileyo, wathobela uMthetho kaMoses yaye wayezisa iminikelo yakhe rhoqo ukuze anikele esibingelelweni. Wayehambahamba esibingelelweni ngengqiqo yokuba ubomi bakhe babusekelwe kunqulo olunyulu.
Ngaba thina namhlanje sinokuwulandela umzekelo kaDavide? Ewe. Nathi sinokuzihlamba izandla zethu ngobumsulwa size sijikeleze isibingelelo sikaThixo ukuba sinokholo kwidini likaYesu size, ‘sinezandla ezimsulwa nentliziyo enyulu,’ sikhonze uYehova ngentliziyo iphela.—INdumiso 24:4.
[Umbhalo osemazantsi]
a Eso sibingelelo sasiziizkwemitha ezisi-9.
[Umfanekiso okwiphepha 23]
Isibingelelo sasifanekisela ukuthanda kukaYehova, apho amkela idini elifanelekileyo ukuze kukhululwe uluntu