Umenywa Ngokufudumeleyo

ISIDLO Sangokuhlwa Sokugqibela, esasungulwa yiNkosi uYesu Kristu iminyaka enokuba ngama-2 000 eyadlulayo, ayisosiganeko nje sembali esibangela umdla. Siye saba nempembelelo enamandla kubantu ukususela ekusungulweni kwaso. Bechukunyiswe koko bakufunde kwiingxelo zeVangeli ngokuphathelele koko kwenzeka kobo busuku, abaninzi baye bazama ukwenza iSidlo seNkosi Sangokuhlwa ngeendlela ezahlukahlukeneyo.

Yonke le migudu iyaqondakala, ekubeni uYesu Kristu ngokwakhe wayalela abalandeli bakhe basigcine esi siganeko baze basenze rhoqo. Wabaxelela ngokungqalileyo esithi: “Hlalani nisenza oku nindikhumbula.”—Luka 22:19; 1 Korinte 11:23-25.

Kakade ke, ukuze esi sikhumbuzo siphumelele, ubani ufanele ayiqonde ngokuchanileyo intsingiselo yaso, njengoko ifumaneka kwiLizwi likaThixo, iBhayibhile. Ukongezelela, kubalulekile ukwazi oko iBhayibhile ikutshoyo ngosuku nangendlela esifanele senziwe ngayo.

Ethobela umyalelo kaYesu, amaNgqina kaYehova ehlabathini lonke aya kuba ehlanganisene kunye ngobusuku bangoLwesithathu, ngoAprili 16, 2003 ukuze enze isikhumbuzo sokufa kukaYesu. Iya kuba sisihlandlo sokuba ahlolisise iZibhalo nokuvuselela ukholo nothando lwawo ngeNkosi uYesu Kristu, eyathi: “UThixo walithanda kakhulu ihlabathi kangangokuba wanikela ngoNyana wakhe okuphela kwamzeleyo, ukuze wonk’ ubani obonisa ukholo kuye angatshabalali kodwa abe nobomi obungunaphakade.” (Yohane 3:16) Umenywa ngokufudumeleyo ukuba ube kunye nawo ngobo busuku ukuze nawe womeleze ukholo nothando lwakho ngoYesu Kristu nangoBawo osezulwini uYehova uThixo.