“Iyintoni Intsingiselo Kanxantathu Omfusa?”
“KWIINTSUKU ezimbalwa ezidluleyo, ndifumene IMboniselo komnye wamaNgqina kaYehova,” yatsho njalo enye indoda esebenza kwisebe lezobulungisa eSeoul, kwiRiphabliki yaseKorea. Yahlabela mgama yathi: “Kweli phephancwadi, ndifunde ngendlela awayetshutshiswa ngayo amaNgqina kaYehova ngurhulumente wamaNazi nowamaKomanisi. Kodwa kukho into endifuna ukuyibuza. Kwiqweqwe elingaphandle, kukho iifoto zamaNgqina kaYehova anxibe iibhatyi ezinonxantathu omfusa [purple triangle] kwicala elingasekhohlo. Iyintoni intsingiselo kanxantathu omfusa?”
Phantsi korhulumente wamaNazi eJamani, amaNgqina kaYehova ayengavumi ukukhahlela uHitler yaye ayengathabathi cala kwimicimbi yezopolitiko neyezomkhosi. Ngoko amaNazi awatshutshisa amaNgqina yaye amalunga ne-12 000 kuwo avalelwa ezintolongweni nakwiinkampu zoxinaniso, enikwa izigwebo ezingalinganiyo. Amalunga nama-2 000 kuwo afa, angamakhulu esifa ngokubulawa.
Yayiyintoni intsingiselo kanxantathu omfusa owawufakwa kwimpahla yawo yasentolongweni? Incwadi ethi Anatomy of the SS State ithi: “Amaqela awahlukahlukeneyo amabanjwa awayevalelwe kwiinkampu [zamaNazi] ayesahlulwa ngeempawu ezithile. Ngaphambi kwemfazwe, ayesahlulwa ngokuba kuthungelwe ilaphu elingunxantathu kwiyunifom yebanjwa ngalinye yaye la malaphu ayenemibala engafaniyo: amabanjwa ezopolitiko ayenxiba ilaphu elibomvu; amaNgqina kaYehova enxiba elimfusa; abo banobungozi kwabanye babenxiba elimnyama; izaphuli-mthetho, eliluhlaza; amafanasini, elipinki; abavela kwamanye amazwe, elizuba. Kunxantathu omibalabala owawunxitywa ngamabanjwa angamaYuda kwakuthungelwa omnye unxantathu omthubi ukuze kuphume unxantandathu ofanekisela iNkwenkwezi kaDavide.”
Kwincwadi yakhe ethi Holocaust Politics, uNjingalwazi John K. Roth wathi: “Ukuba intsingiselo yalo nxantathu omfusa iye yahlala ikhunjulwa nakwixesha elizayo, uya kuqhubeka eyinkuselo kwintlekele, ikhaka elinamacala amathathu libethelela imfuneko yokwenza okulungileyo nto leyo yenza sihlonelwe ngabantu.” AmaNgqina kaYehova aye enza ividiyo esemagqabini enomxholo othi Jehovah’s Witnesses Stand Firm Against Nazi Assault. Kutheni ungaceli omnye wamaNgqina kaYehova ukuba enze indlela yokuba ubukele le vidiyo?