Bulumkele Ububele Obungafanelekanga
1 Abantu bakaYehova baziwa ngomoya wabo wobubele nowokupha. Ngokufuthi oku sikubonakalisa ngezinto eziphathekayo xa sixelisa umSamariya ongummelwane uYesu awathetha ngaye kumzekeliso wakhe ochukumisayo. (Luka 10:29-37) Kanti, abathile abangakufanelekelanga ukuncedwa ngezinto eziphathekayo basenokuzama ukubusebenzisa kakubi ububele bethu. Ngaloo ndlela, uthando lwethu ngabanye lumele luhambisane ‘nokwazi okukhulu, nako konke ukuqonda.’—Fil. 1:9.
2 Ebandleni: Ngokomzekelo, ubani usenokuthi uphelelwe ngumsebenzi okanye anikele ezinye izizathu zokucela uncedo. Maxa wambi aba bantu abazikhathazi ngokufuna umsebenzi kodwa bafuna nje abanye babaxhase ngezinto eziyimfuneko ebomini. Umpostile uPawulos wayalela wathi ngabanjalo: “Ukuba umntu akathandi kusebenza, makangadli nokudla.”—2 Tes. 3:10.
3 Sonke siyafikelwa “lixesha nasisihlo,” ngoko ukuba siswele izinto eziphathekayo, asinaso “isonka sethu semihla ngemihla,” asifanele sixhalabe ngokugqith’ emgceni, kuba uYehova uyabaxhasa abo bamthandayo nabenza ukuthanda kwakhe. (INtshu. 9:11; Mat. 6:11, 31, 32) Umntu osweleyo usenokungenelwa ngokuthetha nomnye wabadala. Abadala basenokuba bayazazi iinkqubo zikarhulumente ezilungiselelwe ukunceda yaye basenokukwazi ukunceda kwizinto ekufuneka zibhaliwe okanye basenokuba bayaziqonda izinto ezifunekayo kwiinkqubo ezinjalo. Enoba imeko iyintoni na, abadala banokuzihlolisisa iimeko zomntu ngamnye ocela uncedo baze bagqibe ngoko kunokwenziwa.—Thelekisa eyoku-1 kuTimoti 5:3-16.
4 Abakhohlisi Abahambahambayo: UMbutho usoloko ufumana iingxelo zokuba abathile emabandleni baye bathatyathelwa ngobuqhinga imali nezinto zabo eziphathekayo ngabakhohlisi abahambahambayo. Oku akufanele kusimangalise, kuba iZibhalo zilumkisa zisithi “abantu abangendawo noosiyazi [“abakhohlisi,” NW], kukhona baya kuhambela phambili ebubini, belahlekisa, belahlekiswa.” (2 Tim. 3:13) Ngokufuthi aba bakhohlisi bazenza abasengxakini nabafuna imali ukuze bafumane into yokuhamba nomphako xa bebuyela ekhaya. Nangona besenokuvakala benyanisekile, kwiimeko ezininzi iba ngabantu abangengomaNgqina kaYehova kwaphela kodwa abazenza wona.
5 Ukuba umntu ongaziwayo ucela uncedo, kububulumko ukudibana nomnye wabadala bebandla, onokukhokela ekuqinisekiseni ukuba lo mntu ngumzalwana wethu kusini na. Ngokuqhelekileyo kufanele kutsalelwe umnxeba omnye wabadala okwibandla laloo mntu ukuze kuqinisekwe ngokuma kwakhe. Abazalwana noodade bokwenene abazifumanisa ngokungalindelekanga beswele baya kuqonda ukuba kuya kwenziwa uhlolisiso olulolu hlobo ukuze kukhuselwe bonke ababandakanyekileyo. Kwelinye icala, abakhohlisi baya kubhenceka xa kusenziwa uhlolisiso olunje. Akukho mfuneko yokurhanela ngokungafanelekanga bonke abantu esingabaziyo, kodwa simele sibalumkele abakhohlisi abangendawo.—Kwakhona bona ikmXO 11/80, iphepha 7.
6 UKumkani osisilumko uSolomon wacebisa wathi: “Musa ukwala nento elungileyo kolunge nayo, kwakuba kusemandleni esandla sakho ukuyenza.” (IMize. 3:27) Ngokuqonda kwethu ngobulumko, sinokuqhubeka sinenceba ngoxa sibulumkele ububele obungafanelekanga.