Ngaba Ibandla Lenu Linentsimi Enkulu?
1 UYesu washumayela ngokucokisekileyo kulo lonke elakwaSirayeli esusela kwizixeko zakwaYuda ukusa kwiilali zaseGalili. (Marko 1:38, 39; Luka 23:5) Nathi simele sishumayele iindaba ezilungileyo kubantu abaninzi kangangoko kunokwenzeka. (Marko 13:10) Kodwa ke, oku akuyondlwan’ iyanetha. Ngoba?
2 Amabandla amaninzi asebenza intsimi enkulu yasezilalini. Abazalwana abakumabandla athetha iilwimi zasemzini asenokusebenza kwimimandla yezixeko ezikhulu, ekhangela abantu abathetha ulwimi lwabo. Sinokwenza njani ukuze abantu abahlala kule mimandla mikhulu bafunde inyaniso ngoYehova, uYesu noBukumkani?
3 Ceba Ngenyameko: Umveleli wenkonzo nesicaka sentsimi bamele basebenzisane nebandla ukuze kufezwe lukhulu. Kunokukhethwa iMigqibelo ethile apho abantu abaninzi baza kukwazi ukusebenza imini yonke. Xa niye kwintsimi ekude, zamani ukusebenza ixesha elide niziphathele ukutya. Yenzani ingxubusho yenkonzo yasentsimini ngaphambi kwexesha eniqhele ukuyiqhuba ngalo ukuze niqale kwangethuba, okanye niyenze kwindawo ekufutshane naloo ntsimi. Lungelelanisani amaqela ngohlobo lokuba wonke ubani abe nenxaxheba kangangoko. Zamani ukusebenza intsimi yasezilalini ngamaxesha onyaka axa imozulu ivuma yaye neendlela zintle.
4 Abo basebenza intsimi yolwimi lwasemzini banokonga ixesha ngokuba namagama needilesi kunye nemaphu. Lungelelanisani intsimi ukuze kube lula ukuba abazalwana abasebenza loo ntsimi baye kuloo mizi.
5 Phathani isixa esaneleyo soncwadi. Ukuba loo ntsimi ayifane isetyenzwe, shiyani iphecana okanye iphephancwadi elidala kwimizi enifike ingenabantu. Ukuba ninalo ngolwimi lwenu iphecana elithi Ngaba Ungathanda Ukwazi Ngakumbi NgeBhayibhile?, linikeni bonke abantu enidibana nabo nize nishiye libe linye apho kungekho bantu.
6 Sebenzisanani: Kufuneka ibandla lisebenzisane xa linentsimi enkulu. Xa kuza kuhanjwa umgama omde, makuncediswane ngeendleko zamafutha. Sebenzisani ingqiqo xa nifumana abantu abanomdla. Zamani ukufikelela bonke abakuloo ntsimi, nize nicingele abo nihamba nabo. Ukuba ufuna ukuqhubeka uncokola nomntu onomdla, ngaba akunakubakhulula abanye babe beqhubeka nentsimi?
7 Lungiselelani ukubuyela kubo bonke abanomdla. Ukongezelela kwidilesi, cela nenombolo yomnxeba yaloo mntu unomdla ukuze uqhubeke umshumayeza. Ukuba izitrato azinamagama nezindlu azinanombolo, zoba imaphu okanye ubhale indlela onokuwufumana ngayo loo mzi xa ubuyela.
8 Elinjani ukukhetheka ilungelo esinalo lokuthobela umyalelo kaYesu othi: “Nakusiphi isixeko okanye idolophana eningena kuyo, funisisani ukuba ngubani na ofanelekayo kuyo”! (Mat. 10:11) UYehova uya kuyisikelela imizamo eniyenzayo kulo msebenzi uvuzayo!