IZaziso

◼ NgoJanuwari kuza kuhanjiswa nayiphi na incwadi endala ekhoyo kwisitokhwe sebandla, kuquka ethi Ulwazi. Ukuba azikho esitokhweni, sicela nibuze amabandla aselumelwaneni enoba anazo kusini na iincwadi ezindala eziseleyo eninokuzisebenzisa. Amabandla angenazo iincwadi ezindala anokuhambisa incwadana enemifanekiso ethi Hlalani Nilindile! NgoFebruwari: Sondela KuYehova. NgoMatshi: Yintoni Ngokwenene Efundiswa YiBhayibhile? NgoAprili: IMboniselo noVukani!

◼ Ukususela ngoFebruwari, ngaphambi kukaMatshi 4, intetho yesidlangalala yabaveleli beziphaluka iza kuba nomxholo othi “Ihlabathi Elitsha LikaThixo—Ngoobani Abaya Kufanelekela Ukungena Kulo?”

◼ Ividiyo enomxholo othi Young People Ask—What Will I Do With My Life? iza kuxutyushwa kwiNtlanganiso Yenkonzo ngoAprili. Ukuba kuyimfuneko, nifanele niyiodole ngebandla ngokukhawuleza kangangoko kunokwenzeka.

◼ Uncwadi lwethu lwesiTshayina luza kupapashwa ngemibhalo emibini. Abantu abavela eHong Kong naseTaiwan badla ngokufunda umbhalo womthonyama, ophawulwa “njengowesiTshayina” (CH). Abanye abafundi besiTshayina badla ngokufunda umbhalo owenziwe lula ekudla ngokuthiwa yi-“Simplified Chinese” (CHS). Ekubeni umbhalo umntu awufunayo ungadibani nento yokuba umntu uthetha isiCanton, isiMandarin, okanye esinye isiyelelane, kubalulekile ukuba achaze umbhalo awufunayo. Kunokusetyenziswa iphepha 3 ukuya kwele-14 lencwadana ethi Good News for People of All Nations ukuze kuthelekiswe. Ngale ndlela, kuya kuodolwa uncwadi lombhalo ofanelekileyo.

◼ Amabandla afanele enze amalungiselelo afanelekileyo eSikhumbuzo salo nyaka esiza kuqhutywa ngoMvulo, Aprili 2, emva kokutshona kwelanga. Ngoxa intetho isenokuqaliswa kwangethuba, imifuziselo ayifanele idluliswe de kube semva kokutshona kwelanga. Zamani ukuqonda ixesha elitshona ngalo ilanga kwindawo enihlala kuyo. Ibandla ngalinye lifanele lizame ukuba neSikhumbuzo salo. Noko ke, ngezinye izihlandlo oko kusenokungenzeki. Xa iHolo yoBukumkani isetyenziswa ngamabandla angaphezu kwelinye, mhlawumbi elinye ibandla okanye angakumbi kusenokufuneka asebenzise enye indawo ngolo rhatya. Ukuba kunokwenzeka, sicebisa ukuba amabandla anikane isithuba semizuzu engama-40 ngaphambi kokuba elinye lingene ukuze bonke bangenelwe ngokupheleleyo kunxulumano lwasemva kweSikhumbuzo. Kufuneka kucingelwane kumba wezithuthi eziphumayo nezingenayo nendawo yokuzipaka, kuquka nomba wokuzisa nokulanda abantu. Iqumrhu labadala lifanele ligqibe ngendlela eya kulungela abazalwana basekuhlaleni.

◼ Oonobhala bamabandla bafanele baqiniseke ukuba baneleta yokumisela uvulindlela (S-202) yovulindlela ngamnye ebandleni. Ukuba abanayo, sicela babhalele iofisi yesebe.

◼ Oonobhala bamabandla bafanele baqiniseke ukuba idilesi nenombolo yemfonomfono yeHolo yoBukumkani ikho kwincwadi yefoni yasekuhlaleni.

◼ UMatshi, uAprili noMeyi Baziinyanga Ezikhethekileyo: UMatshi, uAprili noMeyi lixesha lokwandisa inkonzo yethu. Abavakalisi abaninzi baza kuba ngoovulindlela abangabancedani. Sikhuthaza ukuba abaveleli benkonzo baqalise ngoku ukwenza amalungiselelo enkonzo eyongezelelekileyo yasentsimini kumabandla abo, kuquka namalungiselelo oSuku Olukhethekileyo Lwamaphephancwadi olungoAprili 14, 2007. NgoFebruwari 1, 2007, amabandla afanele abe sele ezifakile iioda zamaphephancwadi angakumbi aza kusetyenziswa ebudeni bezi nyanga. Nisenokungawafumani amaphephancwadi awaneleyo ukuba iioda nizifake emva kwelo xesha.

[Ibhokisi ekwiphepha 7]

USuku Olukhethekileyo Lwamaphephancwadi luya kuba ngoAprili 14, 2007. Sinikhuthaza nonke ukuba niqalise ngoku ukulungiselela ukuze nibe nenxaxheba ezeleyo kulo nyaka. Ngaba unokuba nguvulindlela ongumncedani ngoAprili?