Utshintsho Olubangel’ Imincili KwiMboniselo!
1 Ebutsheni balo nyaka, amabandla aye afumana isaziso esibangel’ imincili: Ukususela ngoJanuwari 2008, IMboniselo iza kwahlulwa kubini, olunye uhlelo lube lolukawonke-wonke luze olunye lube lolwethu maKristu! Mhlawumbi ubuzibuza ukuba: ‘Aza kwahluka njani la maphephancwadi mabini? Ziyintoni iingenelo zokulahlula kubini eli phephancwadi? Ngaba zikho izinto ezintsha esinokukhangela phambili kuzo?’
2 Umahluko: Inkupho enomhla wokuqala wenyanga iza kwaziwa ngokuba luHlelo Lukawonke-wonke. Onke amanqaku ale nkupho aza kulungiselelwa kucingwa ngowonke-wonke. Inkupho enomhla we-15 wenyanga iza kwaziwa ngokuba luHlelo Lokufundisa kwaye ayiyi kuhanjiswa entsimini. Iza kuba nawo onke amanqaku afundwayo enyanga kunye namanye amanqaku abaluleke ngokukhethekileyo kumaKristu azahluleleyo. UHlelo Lukawonke-wonke lweMboniselo luya kubangel’ umdla kumaNgqina kodwa ke ngokukhethekileyo luya kuba nomtsalane kubantu abangengomaNgqina abayikholelwayo iBhayibhile. Kwelinye icala uVukani!, uza kuqhubeka ejoliswe kubantu bonke, kuquka abo bathandabuzayo kunye nabo bangena iicawa ezingezozabuKristu.
3 Iingenelo: KuHlelo Lokufundisa, akuyi kuba yimfuneko ukucacisa amagama afana nelithi “uvulindlela” ngendlela eya kuqondwa ngabantu abangengomaNgqina. Olu hlelo luza kuba nenkcazelo engqalileyo elungiselelwe ngokukhethekileyo amaNgqina kaYehova kunye nezifundo zeBhayibhile ezenza inkqubela ngokomoya. Kuthekani ngoHlelo Lukawonke-wonke? Ekubeni imibandela eza kuxutyushwa nendlela yokubhala iza kube ijoliswe kuwonke-wonke, umntu ongeloNgqina ufanele akunandiphe ukufunda eli phephancwadi ukusuka ekuqaleni aye kutsho ekugqibeleni. Kakade ke, onke amaNgqina kaYehova aya kungenelwa ngokufunda inkupho nganye. Ekubeni siza kube sihambisa IMboniselo enye noVukani! omnye nyanga nganye, siza kuba nenyanga yonke yokulungiselela iintshumayelo eziphumelelayo.
4 Izinto Ezintsha: Kukho izinto ezintsha ezicetywayo kwiMboniselo yoHlelo Lukawonke-wonke. Enye yazo kukuxutyushwa kweemfundiso ezisisiseko zeZibhalo ngendlela elula. Kwakhona kuza kuboniswa indlela iBhayibhile enokuzinceda ngayo iintsapho. Abaselula baza kunikwa umsebenzi wokufunda iBhayibhile. Inkupho nganye iza kuba nenqaku elibalaselisa isicatshulwa esithile seBhayibhile esisifundisa ngeempawu zikaYehova.
5 Sithandazela ukuba uYehova alisikelele eli lungiselelo litsha leMboniselo. Ngamana eli phephancwadi, kunye noVukani!, lingafikelela kubantu abangakumbi ezibafaneleyo iindaba ezilungileyo.—Mat. 10:11.