Umqondiso Oyintlanganisela Oneenxalenye Ezininzi

Isiphelo Sehlabathi—Sikufuphi Kangakanani?

INTSOMI yaseIndiya ibalisa ngamadoda amathandathu aseIndostan awayeziimfama awaya kubona indlovu. Eyokuqala yabamba icala lomzimba wayo yaza yathi: “Tyhini bafondini! kanti indlovu le injengodonga!” Eyesibini yabamba ibamba layo yaza yathi: “Indlovu le injengomkhonto!” Eyesithathu yabamba umboko wayo yaza yathi: “Indlovu le kanti injengenyoka!” Eyesine yolula isandla yaza yampampatha idolo layo yaza yathi: “Kucace gca ukuba indlovu le kanti injengomthi!” Eyesihlanu yabamba indlebe yayo yaza yathi: “Iyamangalisa into yokuba kanti indlovu le injengefan!” Eyesithandathu yabamba umsila wayo yaza yathi: “Ndiyabona ukuba indlovu le injengentsontelo!” La madoda mathandathu aziimfama aphikisana kalukhuni ngohlobo elulo indlovu, kodwa akukho nanye kuwo eyanikela inkcazelo echanileyo. Inkcazelo engaphelelanga ayizange inikele umfanekiso opheleleyo.

Kuphakama ingxaki efanayo xa kuziwa ekuchazeni umqondiso wokubuya kukaKristu. Esabela kumbuzo wabafundi bakhe othi: “Uya kuba yini na umqondiso wokufika kwakho, nowokupheliswa kwephakade eli?” uYesu waphendula wenjenje: “Uhlanga luya kuvukelana nohlanga, nobukumkani buvukelane nobukumkani. Kuya kubakho iinyikima zomhlaba ezinkulu kwiindawo ngeendawo, neendlala, neendyikitya zokufa.” (Mateyu 24:3; Luka 21:10, 11) Kodwa xa kuthethwa ngezi zinto kuphela njengobungqina bokuba uKristu wabuya ngowe-1914, abantu bachasa ngelithi: “Hayi bo, kusel’ oko zikho iimfazwe, iindlala, iindyikitya zokufa nezinyikimo zomhlaba!” Yaye banyanisile.

Ezi zinto zimbalwa—nangona zibangela ukubandezeleka okungenakuthelekiswa nanto kunanini na ngaphambili—kubantu abaninzi azanelanga ukuphawula ukubuya kukaKristu; kufuneka okungakumbi ukwenza umqondiso ube ngopheleleyo nocacileyo. Xa kunikelwa ubungqina obunganelanga kwizibhengezo ezingokusondela kwesiphelo sehlabathi, kunikelwa nje inxalenye enye okanye ezimbalwa zomqondiso eziboniweyo, umphumo woko kukwenziwa kwezilumkiso zobuxoki. Into efunekayo zizo zonke izinto awathetha ngazo uYesu ezaziya kubonakalisa ukubuya kwakhe, kungekhona nje into enye okanye ezimbalwa. Wanikela umqondiso oyintlanganisela owawuza kuphawula ubukho bakhe, mqondiso lowo owawunezinto ezaneleyo ukuwenza ube ngoqinisekileyo, ukudityaniswa kweenxalenye ezininzi ezahlukeneyo, ezithi xa sele zidityaniswe zonke, ziwenze ube ngocacileyo.

Njengomzekelo womqondiso oyintlanganisela, cinga ngalowo onikelwe eBhayibhileni ofanisa uYesu njengoMesiya ngexesha lokuza kwakhe okokuqala. Wawuquka iziganeko ezininzi ezinxulumene noMesiya ezazinikelwe kwiZibhalo zesiHebhere. UYesu wayebaxelele abafundi bakhe ngezithile zezi zibhalo, kodwa abazange bayiqonde intsingiselo yazo. Abafundi, ngokufanayo namaYuda ngokubanzi, babefuna uMesiya owayeza koyisa iRoma aze alawule ihlabathi kunye nabo njengezinxulumani. Ngoko xa wafayo, iingqondo zabo zabethabethana baza bakhathazeka ngokunzulu. Emva kokuba uYesu evusiwe, wadibana nabo waza wathi: “Ngawo la amazwi endawathethayo kuni ndisenani, okokuba zimelwe kukuzaliseka zonke izinto ezibhaliweyo ngam emthethweni kaMoses, nasebaprofetini, nasezindumisweni. Wandula wayivula ingqiqo yabo, ukuze baziqonde izibhalo.”—Luka 24:44, 45.

Ngokwendlela iKingdom Interlinear eyiguqulela ngayo indinyana yama-45, uYesu wakwenza oku “ngokuzihlanganisa iZibhalo” ukusuka kwinxalenye yesiHebhere yeBhayibhile eyaxela ngenx’ engaphambili ngeziganeko nangeemeko zobomi bukaMesiya othenjisiweyo owayesiza, waza wazinxulumanisa neziganeko zobomi bukaYesu ezaziye zalisekisa ezo zibhalo. Kamva, umpostile uPawulos wasebenzisa le nkqubo ikwanye xa ‘wayetyhila, ebeka phambi kwabo’ ukuba uYesu wayenguMesiya. (IZenzo 17:3) Kwakhona, yiKingdom Interlinear eyicacisayo le nkqubo ngokuthi wakwenza oko “ngokuzityhila ngokucokisekileyo aze anxulumanise” iziprofeto ezingoMesiya ezikwiziBhalo zesiHebhere neziganeko ezenzeka kubomi bukaYesu ezazalisekisa ezo zibhalo. Ibhokisi ekwalapha inikela intsingiselo yokwenene yenkoliso yezi ziprofeto zikwizibhalo zesiHebhere ezazizalisekiswa ziziganeko zobomi bukaYesu nezazingqina ukuba wayenguMesiya oxelwe ngenx’ engaphambili. Ibonisa oko kuyila umqondiso oyintlanganisela.

Umqondiso Oyintlanganisela Wobukho BukaKristu

Ikwangumqondiso oyintlanganisela onjalo ophawula ixesha lokuza kukaYesu okwesibini, okanye, ngokuchane ngakumbi, lobukho bakhe. Igama lesiGrike elithi pa·rou·siʹa iinguqulelo ezininzi eziliguqulela ngokuthi “ukuza” kuMateyu 24:3 alithethi ixesha awayeya kuza okanye awayeya kufika ngalo kodwa lithetha ukuba sele efikile yaye, ukho. Kwimeko kaYesu oku kuthetha ukuba ukho ngokungabonakaliyo njengoKumkani kaYehova osetroneni yaye ulawula esezulwini. Oku kuyavumelana namazwi kaYesu akuYohane 14:19 athi: “Liselilifutshane ixesha, ukuze ihlabathi lingabi sandibona.” Ekubeni wayengayi kubonwa ngamehlo enyama, wanikela umqondiso owawuya kubonisa ukubuya kwakhe nobukho bakhe obungabonakaliyo njengoKumkani kaYehova olawulayo.

Umqondiso awawunikelayo wawungenanto inye nje kuphela okanye ezimbalwa. Wawunezinto ezininzi ezaziya kudityaniswa zenze umqondiso oyintlanganisela, njengokuba kwakunjalo ngomqondiso oyintlanganisela wexesha lokuza kwakhe okokuqala njengoMesiya. Ngaloo ndlela, ngezinto okanye iziganeko ezininzi, ngeli xesha ubonisa ngokucacileyo ubukho bakhe obungabonakaliyo njengoKumkani kaYehova olawulayo kwitrone yasezulwini kodwa edlulisela amandla nempembelelo yakhe kwimicimbi yasemhlabeni. Ziya kubakho izilumkiso zobuxoki xa kugxininiswa nje kuphela kwinto enye okanye kwezimbini kwezo wazichazayo, endaweni yokugxininisa kwezininzi zazo eziyila umqondiso oyintlanganisela. Oko bekuya kufana noko kwenziwa ngamadoda amathandathu aseIndostan awayeziimfama, nganye kuwo eyafikelela kwisigqibo esiphosakeleyo ngenxa yokuchukumisa ilungu elinye nje kuphela lomzimba wendlovu.

Ukuzaliseka kwalo mqondiso uyintlanganisela owanikelwa nguYesu, kuquka neemeko ezithile ezongezelelekileyo ezanikelwa ngabapostile abathathu, kwaqalisa ngendlela ephawulekayo ukususela ngowe-1914 ukusa phambili. Ukushwankathelwa kwezi zinto zahlukahlukeneyo kuquka nokuzaliseka kwazo kungendlela elandelayo.

“Uhlanga luya kuvukelana nohlanga, nobukumkani buvukelane nobukumkani.” (Mateyu 24:7) IMfazwe Yehlabathi I yaqalisa ngowe-1914 kubandakanyeke kuyo amazwe angama-28, kwabulawa abantu abazizigidi ezili-14. IMfazwe Yehlabathi II yalandela kubandakanyeke kuyo amazwe angama-59, kwabulawa abantu abangama-50 ezigidi.

“Kuya kubakho iindyikitya zokufa kwiindawo ngeendawo.” (Luka 21:11) Ekupheleni kweMfazwe Yehlabathi I, abantu abanokuba zizigidi ezingama-21 babulawa ngumbathalala. Ukususela ngoko, abantu abangamakhulu ezigidi baye babulawa sisifo sentliziyo, umhlaza, uGawulayo nezinye izifo.

“Kuya kubakho iindlala.” (Mateyu 24:7) Eyona ndlala inkulu kuyo yonke imbali yathwaxa emva kweMfazwe Yehlabathi I. Enye eyoyikekayo yalandela emva kweMfazwe Yehlabathi II, yaye ngoku ukungondleki kuchaphazela umntu omnye kwabahlanu kubemi behlabathi. Nyaka ngamnye, abantwana abanokuba zizigidi ezili-14 bayafa ngenxa yokungondleki.

“Kuya kubakho iinyikima zomhlaba ezinkulu.” (Luka 21:11) Iinyikima ezabakho emva kowe-1914—khawuqwalasele ezimbalwa kwezona zinkulu. Ngowe-1915, eItali, abangama-32 610 baphulukana nobomi babo; ngowe-1920, eTshayina, abangama-200 000 babulawa; ngowe-1923, eJapan, abali-143 000 bafa; ngowe-1939, eTheki, kwafa abangama-32 700; ngowe-1970, ePeru, kwafa abangama-66 800; ngowe-1976, eTshayina, kwafa abangama-240 000 (yimbi imithombo ithi babengama-800 000); ngowe-1988, eArmenia, kwafa abangama-25 000.

“Ukwanda kokuchasa umthetho.” (Mateyu 24:12) Ukuchasa umthetho kuye kwanda ukususela ngowe-1914; namhlanje kwanda ngephanyazo. Ukubulawa kwabantu, ukudlwengulwa, ukuphanga, imilo yamaqela eenjubaqa—zigubungela imixholo ephambili yaye zizalise amajelo eendaba. Abezobupolitika baqhatha uluntu, abakwishumi elivisayo baphatha imipu baze babulale, abantwana besikolo bangamaxhoba omnye komnye. Kwimimandla emininzi kuyingozi ukuhamba ezitratweni kwanaxa ilanga lihlab’ umhlaba.

“Kubekho ukuxinezeleka kweentlanga, zithingaza . . . abantu besifa kukoyika nakukulindela izinto ezilizelayo elimiweyo.” (Luka 21:25, 26) Ulwaphulo-mthetho, ugonyamelo, ukukhotyokiswa ziziyobisi, ukuqhekeka kweentsapho, ukuxengaxenga kwezoqoqosho, ukungaqeshwa—kungatshon’ ilanga sibala. Isazinzulu esidumileyo sabhala: “Siya kudla sisoyika, silale sisoyika, siphile sisoyika yaye siya kufa sisoyika.”

“Ngemihla yokugqibela kuya kufika amaxesha anomngcipheko.” (2 Timoti 3:1) Umpostile uPawulos wathetha ngabantu ‘abaphelelwe ziintloni.’ (Efese 4:19, TE) Noko ke, wanikela iinkcukacha ezibhekele phaya ngokuwohloka kokuziphatha awakuxela kwangaphambili njengomqondiso ‘wemihla yokugqibela.’ Oku kuvakala njengeendaba eziphambili namhlanje: “Ke, kwazi oku, ukuba ngemihla yokugqibela kuya kufika amaxesha anomngcipheko. Kuba abantu baya kuba ngabazithandayo, abathandi bemali, abaqhankqalazi, abakratshi, abanyelisi, abangeva bazali, abangabuleliyo, abangengcwele, abangenabubele, abangenatarhu, abatyholi, abangenakuzeyisa, izibhoja, abangenakuthanda kulunga, abancethezi, izityhuthutyhuthu, abathiwe lwale likratshi, abathandi beziyolo kunokuba bathande uThixo; benokumila kokuhlonela uThixo, ukanti bayawakhanyela amandla ako. Kwabo ke khwebuka.”—2 Timoti 3:1-5.

‘Ngemihla yokugqibela kuya kuza abagxeki.’ (2 Petros 3:3) Amaphephandaba, usasazo-ndaba, amaphephancwadi, iincwadi nemifanekiso eshukumayo ngokugxekayo ziyayigatya iBhayibhile zize endaweni yayo zikhokelise indlela yazo ekhululekileyo yokucinga, zisithi, njengoko uPetros waxela ngenx’ engaphambili: “Liphi na kaloku idinga lokufika kwakhe? Kuba kuseloko oobawo balalayo ukufa, izinto zonke zahlala zihleli zinjengokwasekuqalekeni kwendalo.”—2 Petros 3:4.

“Baya kunisa izandla, banitshutshise.” (Luka 21:12) Ukususela ngowe-1914 nokutyhubela iminyaka, amaNgqina kaYehova ebebanjwa ngenkohlakalo, etyholwa ngobuxoki, ehlaselwa ngamahlokondiba, yaye evalelwa engamawaka kwiikampu zoxinaniso zikaHitler, apho ayethuthunjiswa khona, amaninzi abulawa, wambi ngenkohlakalo ngokunqunyulwa iintloko. Kwamanye amazwe, awobuzwilakhe nawolawulo-melo, umsebenzi wawo wokungqinela uYehova ngoBukumkani bakhe ubuvaliwe yaye amaNgqina ephoswa entolongweni. Konke oku bekuyinzaliseko yamazwi kaYesu angemihla yokugqibela.—Mateyu 5:11, 12; 24:9; Luka 21:12; 1 Petros 4:12, 13.

“Zaye ezi ndaba zilungileyo zobukumkani ziya kuvakaliswa kulo elimiweyo liphela.” (Mateyu 24:14) Iindaba ezilungileyo zantoni? Iindaba ezilungileyo ezingoBukumkani bukaKristu obulawulayo busezulwini, kuba lowo ngumbuzo owabuzwa kuYesu owabangela ukuba anikele isiprofeto sakhe esingomqondiso oyintlanganisela welo xesha. Ezi ndaba ziye zashunyayelwa ngamaNgqina kaYehova ukususela ngowe-1914. Lo msebenzi wawusenziwa ngabantu abangamawaka amane ngowe-1919, ngabangaphezu kwezigidi ezine ngowe-1990, kwaye ngenyanga nje enye ngowe-1992 ubusenziwa ngabantu abangama-4 472 787. Kuye kwasasazwa uncwadi lweBhayibhile ngeelwimi ezinokuba ngama-200 kumazwe angama-229. Akuzange nanini na ngaphambili ezi zinto zingumqondiso oyintlanganisela zizaliseke ngolu hlobo.

“Nelokonakalisa abo bawonakalisayo umhlaba.” (ISityhilelo 11:18) Abantu ababawayo bebesoloko bewonakalisa umhlaba ngokukhululekileyo ukuze bafumane inzuzo yokuzingca, kodwa asizange ngaphambili esi sizukulwana sibe namandla okwenza oko. Ngoku, ukususela ngowe-1914, ubugcisa bezi mini buye banika aba bantu amandla okwenjenjalo, yaye bawasebenzisa kakubi. Bayawonakalisa umhlaba.

Nazi nje ezimbalwa zezenzo zenkohlakalo eziye zangumphumo woku: imvula eneasidi, ukufudumala komhlaba, imingxuma ekumaleko okhusela umhlaba ekugqatsweni yimitha yelanga eyingozi, amayeza ayingozi okubulala izinambuzane ezitshabalalisa izityalo, iindawo zokulahla amabibi ezinetyhefu, inkunkuma eninzi ngokugqithisileyo, izinto ezilahlwayo zokwenza izixhobo zenyukliya, ukuchitheka kweoli, amanzi angcolileyo achithwayo, amachibi amileyo, ukutshatyalaliswa kwamahlathi, ukungcoliswa kwemithombo, ukonakaliswa kwendalo, ukonakaliswa kwempilo yabantu.

Isazinzulu uBarry Commoner sithi: “Ndikholelwa ekubeni ukungcoliswa okuqhubekayo komhlaba, ukuba akuthintelwa, ekugqibeleni kuya kubangela ukuba esi sijikelezi-langa singabi yindawo efanelekileyo yokuhlala abantu. . . . Ubunzima abubangelwa kukungazi kwezenzululwazi, kodwa kukubawa kwangabom.” IState of the World 1987 sithi: “Umlinganiselo wezinto ezenziwa luluntu uyawusongela umhlaba njengendawo enokuhlalwa ngabantu.” Iinkqubo zikamabonwakude ezazisasazwa emoyeni ngowe-1990 zazinomxholo ofanelekileyo othi, “Ukhuphiswano Lokukhusela Isijikelezi-langa.”

Ezi ziganeko zininzi xa zihlanganisiwe njengomqondiso omnye ebudeni besizukulwana nje esinye kungangenkankulu ukuba zigatywe njengeziganeko ezisuke zazenzekela nje ngaxeshanye. Kwakhona ubukhulu bazo bongeza ubunzima. Yaye kukho ezithile kwezi ziganeko, njengeso sokushunyayelwa kwesi sigidimi seendaba ezilungileyo zwenibanzi nesokonakaliswa komhlaba, ebezingazange zenzeke ekuqalekeni kwendalo. Umqondiso oyintlanganisela wobukho bukaKristu Yesu uyeyisa.

“Ukuba ubani uneendlebe zokuva, makeve.”—Marko 4:23.

[Ibhokisi ekwiphepha 22]

Ubungqina Obuyintlanganisela Bokuza KukaYesu Okokuqala NjengoMesiya

WAYEZA kuzalwa kwisizwe sakwaYuda (Genesis 49:10); wayeza kuthiywa, angcatshwe ngomnye wabapostile bakhe; kwakuza kwenziwa amaqashiso ngeengubo zakhe; wayeza kusezwa iviniga nenyongo; ahlaziswe kumthi wentuthumbo; kwakungayi kwaphulwa thambo kuye; wayengayi kubona kubola; wayeza kuvuswa (INdumiso 69:4; 41:9; 22:18; 69:21; 22:7, 8; 34:20; 16:10); wayeza kuzalwa yintombi enyulu; ezalwa kumnombo kaDavide; wayeza kuba lilitye lesikhubekiso; wayeza kuchaswa; wayengayi kuwuvula umlomo wakhe phambi kwabamangaleli bakhe; wayeza kuzithabathela phezu kwakhe izifo zoluntu; wayeza kubalelwa kuboni; afe ukufa okulidini; wayeza kuhlatywa; ingcwaba lakhe libe nabazizityebi (Isaya 7:14; 11:10; 8:14, 15; 53:3; 53:7; 53:4; 53:12; 53:5; 53:9); wayeza kuphuma eYiputa (Hoseya 11:1); wayeza kuzalelwa eBhetelehem (Mika 5:2); wayeza kuphathwa njengokumkani; wayeza kukhwela e-esileni; angcatshwe ngama-30 esilivere; abalandeli babe ziintsali.—Zekariya 9:9; 11:12; 13:7.

[Ibhokisi ekwiphepha 23]

Umqondiso Oyintlanganisela Wobukho BukaYesu NjengoKumkani Ekuzeni Kwakhe Okwesibini

IMFAZWE yehlabathi; ukunqongophala kokutya; iindyikitya zokufa; iinyikima zomhlaba (Mateyu 24:7; Luka 21:10, 11; ISityhilelo 6:1-8); ukwanda kokuchas’ umthetho; ukunikelana nokuthiyana; ukungathobeli abazali; ukungabi nabubele; ukungabi nakuzeyisa; ukungabi natarhu; abathandi bemali; ukuthanda iziyolo kunokuthanda uThixo; ukumila kokuhlonela uThixo ukanti ayakhanyelwa amandla ako; abanyelisi; izibhoja; ukutshutshiswa kwabalandeli bakaKristu; ukunikelwa kwabalandeli ezinkundleni zamatyala nokubulawa kwabalandeli bakaKristu (Mateyu 24:9, 10, 12; Luka 21:12; 2 Timoti 3:1-5); ababugxekayo ubukho bukaYesu; besithi zonke izinto zahlala zihleli zinjengokwasekuqalekeni kwendalo (2 Petros 3:3, 4); abatshabalalisi bommandla womhlaba.—ISityhilelo 11:18.