Indlela Esinokububona Ngayo Ubuhle Bezinto Ezisingqongileyo

“Kuzo zonke iilwimi, elinye lamazwi ethu okuqala lelithi ‘khawuthi ndibone!’”—William White, Omnci.

UMNTWANA omncinane owondele ibhabhathane lindanda, isibini esikhulileyo esibukele ukutshona kwelanga okuthi ndijonge, inkosikazi ewuxabisileyo umhombiso wayo weentyatyambo—bebonke okwexeshana basanikele ingqalelo yabo kubuhle.

Ekubeni ubuhle bendalo kaThixo bukho kuyo yonke indawo, akukho mfuneko yakuhamba amakhulu eekhilomitha ukuze ububone. Kusenokufuneka uhambe umgama omde ukuze ubone izinto zobugcisa ezoyikekayo, kodwa ubugcisa obuchukumisayo bunokufumaneka kummandla ohlala kuwo ukuba uyabukhangela yaye—okubaluleke nangakumbi—ukuba uyayazi indlela yokubukhangela.

Kusoloko kusithiwa “amehlo akaphakelani.” Noko ke, nangona ubuhle bukho, asinguye wonke ubani oya kububona. Kusenokufuneka umfanekiso okanye ifoto ukuze sibubone size sinikele ingqalelo kubo. Enyanisweni, amagcisa amaninzi akholelwa ekubeni impumelelo yawo ixhomekeke kubuchule bawo bokubona kunokuzoba. Incwadi ethi The Painter’s Eye, kaMaurice Grosser, ichaza ukuba “umzobi uzoba ngamehlo akhe, kungekhona ngezandla zakhe. Nokuba ubona ntoni, ukuba uyibona ngokucacileyo, unokuyizoba. . . . Ukubona ngokucacileyo kuyinto ebalulekileyo.”

Enoba singamagcisa okanye asingawo, sinokufunda ukubona ngokucacileyo, ukuze siphawule izinto ezintle ezisingqongileyo. Ngamany’ amazwi, kufuneka senze umgudu size izinto sizibone ngolunye uhlobo.

Ngokuphathelele oku uJohn Barrett, umbhali wembali yokwemvelo, ugxininisa ekuxabisekeni kokuzibandakanya kobuqu. Uthi: “Ayikho into enokuthabathela indawo ukuzibonela, ukubamba, ukujoja nokuphulaphula izilwanyana eziphilayo nezityalo namandla emvelo ngoxa zikwindawo ezihlala kuzo. Buvumele ubuhle bendele . . . Enoba ubani uphi, okokuqala makakhangele, anandiphe akhangele kwakhona.”

Kodwa sifanele sikhangele ntoni? Sinokuqala ngokufunda ukunikela ingqalelo kwizinto ezisisiseko ezine ezenza ubuhle. Ezi zinto zinokubonwa phantse kuzo zonke iinkalo zendalo kaYehova. Okukhona sinqumama size sizibukele, kokukhona siya kubunandipha ubugcisa bakhe.

Ukwazi Izinto Ezibangela Ubuhle

Ukwenziwa Nohlobo Lwento. Siphila kwihlabathi elinezinto ezenziwe ngokwahlukeneyo. Ezinye zime nkqo njengeqela leentsika zoqalo okanye zimile njengendlu yesigcawu, ngoxa ezinye zimile kakubi oku kwelifu eliguquka rhoqo. Iindlela ezininzi ezenziwe ngazo izinto zinomtsalane, enoba yintyatyambo engaqhelekanga eyiorchid, imfumba yamaqokobhe ezilwanyana zaselwandle, okanye amasebe omthi ovuthuluke amagqabi.

Xa kuphindwa ukwenziwa okunjalo, kwenza into esenokubonakala inomtsalane. Ngokomzekelo, khawucinge ngeqela lemithi esehlathini. Ukwenziwa kwayo—omnye wahlukile komnye, sekunjalo iyafana—yenza into ebukekayo. Kodwa ukuze ubone ukwenziwa nohlobo lwayo, kumele kubekho ukukhanya.

Ukukhanya. Ukukhanya kwenza izinto ezenziwe ngendlela enomtsalane kuthi zibe kumgangatho okhethekileyo. Kwenza sibone iinkcukacha zazo, imibala yazo yaye kudala enye imekobume. Ukukhanya kuyahluka ngokwamaxesha emini, ngokwamaxesha onyaka, ngokwemozulu kwanangokwendawo esihlala kuyo. Usuku olunamafu nokukhanya kwalo okuluzizi lunokwenza ube noxabiso ngemibala enomtsalane yeentyatyambo zasendle okanye amagqabi asekwindla, ngoxa iingxondorha neencopho zentaba ziqhayisa ngendlela ephawulekayo ezenziwe ngayo xa zizotywe kukuphuma okanye kukutshona kwelanga. Ilanga lasebusika elibuthathaka, loMntla weIkweyitha lihombisa umhlaba wasezilalini. Kwelinye icala, ilanga eliqaqambileyo kweleeNjiko lenza ulwandle olungekho nzulu lube yindawo entle ekhanyayo yeendadi ezithanda ukuntywila.

Kodwa kusekho into ebalulekileyo esashiyekileyo.

Umbala. Ubangela umtsalane kwizinto esizibonayo ezisingqongileyo. Ngoxa ukwenziwa kwazo kusenokwahluka, umbala wazo ubalaselisa ukukhetheka kwazo. Ngokubhekele phaya, ukubakho kombala kwizinto eziyeleleneyo kuzenza zibe ntle. Usenokuba ngumbala oqaqambileyo njengobomvu okanye o-orenji otsala ingqalelo yethu, okanye umbala ongaqaqambanga onjengozuba okanye oluhlaza yaka.

Khawube nombono wombala weentyatyambo ezilubhelu ezisehlathini. Ukukhanya kufikelela iintyatyambo ezilubhelu, ezibonakala ziqaqamba kwimpepho yakusasa, ngoxa izikhondo zemithi ezimdaka zihonjiswa lilanga lakusasa zitsho zenze umfanekiso omhle. Ngoku sinomfanekiso. Esifanele sikwenze “kukuwufreyimisha,” kulapho ukuyila kungena khona.

Ukuyila. Ngendlela ezidibana ngayo ezi zinto zintathu zisisiseko—ukwenziwa, ukukhanya nombala—zenza ukuyila. Yaye thina njengabakhi-mkhanya, sinendima ebalulekileyo esimele sibe nayo. Ngokuya phambili nje kancinane, emva, ecaleni, phezulu, okanye ezantsi, sinokutshintsha izinto okanye ukukhanya okusemfanekisweni wethu. Ngaloo ndlela sinokuwucutha lo mfanekiso ukuze siquke nje izinto esizinqwenelayo.

Ngokufuthi, ngokuzenzekelayo siyila umfanekiso xa sigqitha kwindawo entle efreyimishwe yimithi okanye lutyani olukufuphi kuyo. Kodwa imifanekiso emininzi emihle, ngomlinganiselo ongaphantsi, isenokuba ngaphantsi kweenyawo zethu.

Ukunikela Ingqalelo Kwizinto Ezincinane Nezinkulu

Imisebenzi yezandla zikaThixo emikhulu nemincinane mihle, yaye uyolo lwethu lunokuphindaphindwa ukuba sifunda ukubona iinkcukacha zazo, ezidibana kakuhle. Zenza imifanekiso emincinane ethe saa kumfanekiso omkhulu wemvelo. Ukuze sizixabise, ekufuneka sikwenzile kukugoba size sinikele ingqalelo.

Le mifanekiso ikulo mfanekiso umfoti uJohn Shaw kwincwadi yakhe ethi Closeups in Nature uyichaza ngolu hlobo: “Akuzange kuyeke ukundimangalisa ukuba xa uzibukelela kufutshane iinkcukacha zemvelo kusoloko kukho into ethi phinda usondele. . . . Okokuqala sibona umhlaba omkhulu, emva koko sibone umbala othile kwikona yale freyimu. Ukusondela kwenza ubone iintyatyambo, kwenye intyatyambo, ubone ibhabhathane. Amaphiko alo anomhombiso owahlukileyo, lo mhombiso ubangelwa ngumaleko osemaphikweni olungelelaniswe kakuhle, yaye iphiko ngalinye ligqibelele. Ukuba ngokwenyaniso sinokuyiqonda indlela owenziwe ngokugqibelele ngayo lo maleko mnye kwiphiko lebhabhathane, ngokuqinisekileyo sinokuqalisa ukukuqonda ukugqibelela kwalo mfanekiso oyimvelo.”

Ngaphandle koyolo olubangelwa bubuhle bemvelo kuthi, ubugcisa bemvelo—obuncinane nobukhulu—bunokusisondeza kufuphi noMdali wethu. “Phakamiselani amehlo enu phezulu, nibone,” watsho uYehova. Ngokuma sibukele, sondele, sicinge, enoba sibukele isibhakabhaka esineenkwenkwezi okanye nayiphi na indalo kaThixo, sikhunjuzwa ngaLowo “wadala ezi zinto.”—Isaya 40:26.

Amadoda Awafunda Ukubukela

Kumaxesha okubhalwa kweBhayibhile abakhonzi bakaThixo babenomdla okhethekileyo kwindalo. Ngokutsho kweyoku-1 yooKumkani 4:30, 33, “ubulumko bukaSolomon bebubuninzi ngaphezu kobulumko boonyana bonke basempumalanga . . . Wathetha ngemithi, ethabathela kumsedare waseLebhanon, ase nakwihisope ephuma eludongeni; wathetha nangeenkomo, nangeentaka, nangezinambuzane, nangeentlanzi.”

Mhlawumbi umdla awayenawo uSolomon kubuhle bendalo waphenjelelwa ngumzekelo kayise. UDavide, owachitha iminyaka yakhe yobuntwana njengomalusi, ngokufuthi wayecamngca ngomsebenzi wezandla zikaThixo. Wachukunyiswa ngakumbi bubuhle bamazulu. KwiNdumiso 19:1, wabhala: “Izulu libalisa uzuko lukaThixo, saye isibhakabhaka sixela umsebenzi wezandla zakhe.” (Thelekisa INdumiso 139:14.) Kuyabonakala ukuba, ukunxibelelana kwakhe nendalo kwamsondeza kufuphi noThixo wakhe. Kunokuba njalo nakuthi.a

Njengokuba la madoda ahlonela uThixo ayesazi, ukuqonda nokuxabisa umsebenzi wezandla zikaThixo kuphakamisa umoya yaye kuhlaziya ubomi bethu. Kwihlabathi lethu lanamhlanje elizaliswe kukuzonwabisa ngokufuthi okuthoba isidima, ukunikela ingqalelo kwindalo kaYehova kunokusenza sibe nomsebenzi oyingenelo thina neentsapho zethu. Kwabo balangazelela ihlabathi elitsha elithenjiswe nguThixo, kuya kuba yinto abaya kuyinandipha kwikamva.—Isaya 35:1, 2.

Xa singasaboni ubugcisa obusingqongileyo kuphela kodwa sesibona iimpawu zeGcisa Eliyintloko elenza bonke ubugcisa, ngokungathandabuzekiyo siya kushukunyiselwa ukuba siphinde amazwi kaDavide athi: “Akukho unjengawe . . . , [Yehova] akukho zenzo zinjengezakho.”—INdumiso 86:8.

[Umbhalo osemazantsi]

[Imifanekiso ekwiphepha 26]

Imizekelo yohlobo nokwenziwa kwento, ukukhanya, umbala nokuyila

[Inkcazelo]

Godo-Foto