Luluphi Unqulo Olumkholisayo UThixo?
NGELISHWA, intiyo yonqulo yeFransi yenkulungwane ye-16 ayizange iphele. Kwinkulungwane eyalandelayo, ikhethe elinzulu lalahlula kubini elaseYurophu, njengoko amaKatolika namaProtestanti aya kumathafa edabi ebudeni beMfazwe yamaShumi Amathathu Eminyaka (1618-48). Egameni likaThixo, abo bazibanga bengamaKristu baqala phantsi ngokubulalana ngenkohlakalo.
Intiyo yonqulo nokubulalana ayikapheli. Kutshanje amaKatolika namaProtestanti aye abulalana eIreland, ibe amalungu eenkonzo zobuOthodoki nezamaRoma Katolika aye enza okufanayo kummandla owawusakuba yiYugoslavia. Njengokuba oku kuvakala kungenakukholeleka, ebudeni beMfazwe Yehlabathi I neyesi II amaKatolika namaProtestanti abulala amakhulu amawaka amalungu onqulo lwawo kumathafa edabi. Ngaba ikho indlela abanokukuthethelela ngayo oku kubulalana? Ithini imbono kaThixo?
Imigudu Yokuzithethelela
I-1995 Britannica Book of the Year ithi: “Iimfundiso zezakwalizwi ezithethelela ugonyamelo zalingwa ngabantu abaninzi ngowe-1994.” Ngaphezu kweminyaka eli-1500 eyadlulayo, ilinge elifanayo lokuthethelela ukubulala lenziwa sisithandi sobulumko esingumKatolika “iNgcwele” uAugustine. Ngokutsho kweNew Catholic Encyclopedia, “wayengumseki wengcamango yemfazwe yobulungisa,” ibe le ntyilalwazi ithi ingcamango yakhe ‘isenempembelelo kwanakula maxesha anamhlanje.’
Iicawa zamaKatolika, zobuOthodoki nezamaProtestanti ziye zakuvumela zaza zakukhuthaza, ukubulala egameni likaThixo. Nangona iyingxelo engezi nkonzo ezaliswe kukuphalaza igazi, neyezinye iinkonzo ezininzi eziphambili ehlabathini lonke akukho nto ibhetele ngayo. Ngoko, unokubahlula njani abantu abakunqulo lokwenyaniso?
Akubahluli ngokuphulaphula nje koko bazibanga bekukholelwa. Ngokuphathelele lo mbandela, uYesu Kristu walumkisa ngelithi: “Baphapheleni abaprofeti bobuxoki abeza kuni ngesigqubuthelo segusha, kodwa ngaphakathi baziingcuka eziqwengayo. Nobaqonda ngeziqhamo zabo. . . . Wonke umthi olungileyo uvelisa isiqhamo esihle, kodwa wonke umthi obolileyo uvelisa isiqhamo esingento yanto. . . . Wonke umthi ongavelisi siqhamo sihle uyagawulwa uze uphoswe emlilweni.”—Mateyu 7:15-20.
Zaziwa Ngeziqhamo Zazo
Izigidi zabantu abanyanisekileyo ziyaqonda ukuba iinkonzo zehlabathi ‘ziyimithi ebolileyo’ eye yavelisa “isiqhamo esingento yanto,” ingakumbi, ngokukhuthaza iimfazwe ekuphalazwa izantyalantyala zegazi kuzo. EBhayibhileni ubukhosi behlabathi bonqulo lobuxoki buchazwe njengehenyukazi lokomoya elibizwa ngokuba “yiBhabhiloni Enkulu.” IBhayibhile ithi ‘kuyo kwafunyanwa igazi labaprofeti nelabo bangcwele nelabo bonke abaye babulawa ngogonyamelo emhlabeni.’—ISityhilelo 17:3-6; 18:24.
Ngenxa yoko, kunokuba avumele iimfazwe eziye zasikelelwa ziinkokeli zonqulo, kungekudala uThixo uya kuphumeza umgwebo kwezo nkonzo ziye zabulala egameni lakhe. Oku uya kukwenza ezalisekisa isiprofeto seBhayibhile esithi: “Ngokugadlela okukhawulezileyo iBhabhiloni isixeko esikhulu iya kuphoselwa phantsi, ibe ayisayi kuze ifunyanwe kwakhona.” Xa kusenzeka esi siganeko sivuyisayo, uThixo uya kuba ‘uphumeze umgwebo kwihenyukazi elikhulu’ waza ‘waliphindezelela igazi lamakhoboka akhe esandleni salo.’—ISityhilelo 18:21; 19:2.
Abantu abakuthiyileyo konke ukubulawa kwabantu obekuqhubeka egameni likaThixo basenokuzibuza enoba akho ngokwenene kusini na amaKristu aphila ngokuvisisana nesiprofeto seBhayibhile esithi: “Ziwakhande amakrele azo abe ngamakhuba, nezikhali zazo zibe zizitshetshe zeediliya; uhlanga lungaphakamiseli uhlanga ikrele, nezizwe zingaphindi zifunde ukulwa.” (Isaya 2:4) Ngaba uyabazi abantu abamoyika ngokwenene uThixo abaye bayiyeka imfazwe?
Unqulo Olwamkelekileyo KuThixo
Uhlolisiso lwenzululwazi ngoluntu olunomxholo othi “Inkcazelo Engakumbi Ngokuthethelela Ugonyamelo,” nolwapapashwa kwiUniversity of Michigan lwathi: “Ukususela ngasekupheleni kwale nkulungwane amaNgqina kaYehova aye alondoloza ngokuqhubekayo ukuma kwawo okungenalugonyamelo ‘koBundilele BobuKristu’ ukutyhubela iimfazwe ezimbini ezinkulu zehlabathi nokungavisisani kwemikhosi ngexesha ‘leMfazwe Yomlomo.’” Luchaza isizathu sokuba amaNgqina ahlale engoondilele, olu hlolisiso lwathi: “Iimfundiso zamaNgqina kaYehova zisuka kulweyiseko lwawo lokuba iBhayibhile ililizwi likaThixo eliphefumlelweyo.”
Ewe, amaNgqina kaYehova aphila ngokuvisisana neBhayibhile efundisa oku: ‘Abantwana bakaThixo nabantwana bakaMtyholi babonakala ngesi sibakala: Wonk’ ubani ongaqhubekiyo nobulungisa akaphumi kuThixo, engenjalo nalowo ungamthandiyo umzalwana wakhe. . . . Sifanele sibe nothando omnye ngomnye; singabi njengoKayin, . . . owambulala ngogonyamelo umntakwabo.’—1 Yohane 3:10-12.
Ngokufuthi amaNgqina kaYehova aye atsalela ingqalelo yabantu kwityala legazi elikwiinkonzo zehlabathi. Kwakhona aye avakalisa esi sibongozo seBhayibhile singxamisekileyo: “Phumani kuyo [iBhabhiloni Enkulu], bantu bam, ukuba anifuni kwabelana nayo ngezono zayo, yaye ukuba anifuni kwamkela inxalenye yezibetho zayo. Kuba izono zayo ziye zaba yimfumba zada zafikelela phezulu ezulwini, noThixo uye wazikhumbula izenzo zayo zokungekho sikweni.”—ISityhilelo 18:4, 5.
Abantu abaninzi abanyanisekileyo bathobela isimemo sokushiya ubukhosi behlabathi bonqulo lobuxoki. Ukuba usala ubamb’ ongezantsi ngenxa yako konke ukubulawa kwabantu okwenziwa egameni lonqulo, siyakumema ukuba uqhagamshelane nomntu okunike eli phephancwadi okanye ubhalele kwenye yeekhelingi ezikwiphepha 5. AmaNgqina kaYehova aya kukuvuyela ukukunceda ufunde ngesithembiso seBhayibhile sehlabathi elitsha lobulungisa, apho kungasayi kuphinda kubekho mfazwe.—INdumiso 46:8, 9; 2 Petros 3:13.
[Umfanekiso okwiphepha 10]
“Bavakalisa esidlangalaleni ukuba bayamazi uThixo, kodwa bayamkhanyela ngemisebenzi yabo.” Tito 1:16