Sasibaleka Iziqhushumbisi—Kwiminyaka Engama-50 Kamva!
“Kuza kudubula iziqhushumbisi apha kungekudala. Wonk’ ubani makabalekele kwindawo ekhuselekileyo!”
LAWO ngamazwi awabhekiswa kum nakumyeni wam lipolisa elalisilumkisa ukuba siyishiye indlu size sisabele kwigumbi elinqatyisiweyo elenziwe ngekonkile. Eso saziso sasothusa gqitha. Ngapha koko, sasingekho kummandla womhlaba odlavulwe yimfazwe; sasityelele abahlobo emaphandleni amahle eziQithi zeMarshall, eMicronesia.
Sasize kuchitha iveki kunye nomhlobo kwakunye nomyeni wakhe kwisiqithi esincinane saseTõrwã. Lo mfazi wayekuphela kweNgqina likaYehova elalikweso siqithi, yaye sasifuna ukumnceda ashumayele kubantu ababehlala apho.
Abemi baseMarshall ngokuqhelekileyo banobuhlobo yaye bayakulangazelela ukuthetha ngeBhayibhile. Ekubeni incwadi ethi Unokuphila Ngonaphakade KwiParadisi Esemhlabeni yayisandul’ ukukhululwa ngolwimi lwasekuhlaleni, saba nethuba elihle lokuhambisa imibhalo eliqela. Bonke ababeyifuna le ncwadi basiqinisekisa ukuba baza kuyifunda yaye bangayisebenzisi njengeken karawan, okanye “ikhubalo lethamsanqa,” lokugxotha iidemon. Isiko eliqhelekileyo apho kukufaka iphepha elisongiweyo leBhayibhile phakathi ebhotileni ize ixhonywe kwiplanga lophahla okanye kumthi okufuphi, kuba kukholelwa ukuba oku kugxotha imimoya engendawo.
Kangangeentsuku eziliqela besikunandipha ukuhlala apho, kodwa kwathi xa kusondela usuku lwangoMgqibelo, sahle saqonda ukuba izinto azizi kuba njengesiqhelo. Sasiqalise usuku ngokuqubha kamnandi ekuseni kumanzi echibi acwengileyo nafudumeleyo. Ngoxa sasibuya sivela elunxwemeni, sabona inqanawa engwevu erhanelekayo isiza. Kungekudala, sakuqonda oko yayisiza nako. Ipolisa lasicacisela ukuba iqela laseMerika lamadoda asixhenxe asemkhosini lalize kubhangisa iziqhushumbisi ezindala kwesi siqithi. Ukuqinisekisa ukuba wonke ubani ukhuselekile, kwakumelwe kushiywe amakhaya yaye abahlali besi siqithi babefanele bachithe usuku kumagumbi anqatyisiweyo akhiwa ngamaJapan ebudeni beMfazwe Yehlabathi II.
Loo magumbi anqatyisiweyo, aphawulwa ngokukhawuleza ngabo batyelela iTõrwã, bubungqina bezinto ezoyikekayo ezadlulayo. Xa ukude esi siqithi sikhangeleka sinjengeparadesi yeleenjiko, kodwa xa usondela kucace gca ukuba ubuhle baseTõrwã bonakaliswa ziziva zemfazwe eyaphela kwiminyaka engama-50 eyadlulayo. Ekubeni sasisisikhululo seenqwelo-moya zomkhosi zaseJapan, esi siqithi sizele zizikhumbuzo zeMfazwe Yehlabathi II. Kuyo yonke indawo, kukho izinto ezindala zemfazwe—iinqwelo-moya zokulwa, imipu ebotshelelwe phantsi, neenkanunu—ezigqunyelelwa butyani beleenjiko.
Noko ke, ziziqhushumbisi eziseleyo ezi zothusayo. Ebudeni bemfazwe, imikhosi yaseUnited States yaphosa iziqhushumbisi ezingaphezu kweetoni ezingama-3600 eTõrwã, iibhombu zepetroli kunye nemijukujelwa yomlilo yaye imikhosi yamaJapan yayinezayo iziqhushumbisi kwanezixhobo ezininzi emhlabeni. Nangona kubonakala kungenakwenzeka isiqhushumbisi esineminyaka engama-50 ubudala ukuba sidubule, kusoloko kukho ingozi, nto leyo ebonisa isizathu sokuba amaqela okubhangisa iziqhushumbisi atyelele esi siqithi ubuncinane izihlandlo ezihlanu ukususela ngowe-1945, unyaka eyaphela ngawo imfazwe.
Sasithandabuza enoba esi silumkiso sasiyinyaniso kusini na, ngoko saya kwindawo elafikela kuyo eli qela elibhangisa iziqhushumbisi elunxwemeni saza sathetha nalo. Lathi, esi silumkiso sasingeyonyani nje kuphela, kodwa ukudubula kweziqhushumbisi kwakuza kuqalisa kwiyure nje elandelayo! Saxelelwa ukuba ukuba sasingangeni kumagumbi anqatyisiweyo, kwakuya kufuneka sinduluke kwesi siqithi ngoko nangoko.
Umhlobo lo wethu wagqiba kwelokuba ahlale eTõrwã aze azikhusele kunye neentsapho eziliqela ngokungena kumagumbi anqatyisiweyo agcina imipu. Kamva wasixelela ukuba ekuphela kweefestile kwigumbi elinqatyisiweyo elidala eyenziwe ngekonkile yayiyimungxunya eyayenzelwe imipu, yaye phakathi kuyatshisa kakhulu kwaye kuzele ngabantu. Ukuchitha usuku apho kwakukhumbuza iminyaka yemfazwe, yaye wavuma ukuba ngoxa ukudubula kweziqhushumbisi kwakumchulumancisa njengomntwana, ngoku kwakubonakala kusoyikisa.
Umyeni wakhe wavuma ukusisa kwiSiqithi seWollet, esikwiikhilomitha ezisibhozo ukusuka apho, ngephenyane elincinane elinenjini. Kwimizuzu embalwa sindulukile elunxwemeni seva isithonga esikhulu. Sathi sakujonga emva eTõrwã, sabona umsi omninzi unyuka kufuphi nendawo ekuhlalwa kuyo kwesi siqithi. Kungekudala, kwatsho esinye kwaza kwalandela nesesithathu, isithonga esikhulu ngakumbi.
Sachitha usuku sishumayela eWollet, yaye olu yayilusuku olwaluphazanyiswa kukudubula kweziqhushumbisi mgama. Iziqhushumbisi ezindala zazifunyenwe zaze zaphawulwa kwiinyanga ezimbalwa ngaphambili. Iziqhushumbisi zasemkhosini zafumaneka kuyo yonke indawo—elunxwemeni, kwindawo ezifikela kuyo iinqwelo-moya, kwanakwiiyadi zabantu! Ukuze kuncitshiswe inani lokudubula kwezithonga, iqela lokubhangisa iziqhushumbisi laqokelela iziqhushumbisi eziliqela ezincinane laza lazibhangisa kunye.
Kwakusele kusihlwa xa sasibuyela eTõrwã. Njengoko sasisondela kwesi siqithi, saphawula ukuba wawungekho umsi oqhelekileyo obakho xa kuphekwa. Saqonda ukuba kwakukho undonakele. Ngequbuliso, iphenyana elincinane leza ngakuthi lingxamile, lisilumkisa ukuba singasondeli. Kwakushiyeke esinye isiqhushumbisi esikhulu esintywiliselweyo ekwakufuneka sidutyulisiwe kufuphi kuqaqa. Ngaloo ndlela, njengoko sasinduluka ngaselunxwemeni ngorhatya, sabona into abantu abaninzi abaphilayo namhlanje abangazange bayibone—ukuqhushumba kwesiqhushumbisi seMfazwe Yehlabathi II phantsi kwamanzi, esawabetha amanzi kwanomsi atsibela kwiimitha ezingamakhulu emoyeni!
Okuvuyisayo kukuba, akukho namnye umntu owonzakalayo eTõrwã ngaloo mini. Ngaba iqela elibhangisa iziqhushumbisi ekugqibeleni lazisusa zonke iziqhushumbisi eziseleyo kwesi siqithi? Mhlawumbi akunjalo. Umphathi weli qela wathi ulindele ukuba kwixesha elizayo abemi besi siqithi babhaqe iziqhushumbisi ezingakumbi. Kakade ke, oko kwasinika into esinokuthetha ngayo nabantu njengoko sasigqibezela umsebenzi wethu wokushumayela eTõrwã. Kwakulilungelo elikhulu ukuxelela abantu besi siqithi ngexesha uBukumkani bukaYehova obuya ‘kuphelisa ngalo iimfazwe kude kuse eziphelweni zehlabathi.’—INdumiso 46:9.
Ngokubaliswa nguNancy Vander Velde
[Umfanekiso okwiphepha 25]
Isiqhushumbisi esingekadubuli