Imbono YeBhayibhile

Ngaba Ihlabathi Liya Kutshatyalaliswa Yintlekele Enkulu?

NGOMATSHI 12, 1998, imixholo yamaphephandaba, oomabonwakude, neenkqubo zeInternet ehlabathini lonke zasasaza ezi ndaba zitsho kuthi hlathu amanwele: “Isijikelezi-langa esingangekhilomitha enesiqingatha sisendleleni yoMhlaba yaye kukhangeleka ngathi siza kungquzulana nawo.” Izazinzulu nabantu ngokubanzi zaziphatha ziyeka zizama ukukhangela eyona ngozi. Kungabanga thuba lide, izazi ngeenkwenkwezi zafikelela kwisigqibo sokuba akubonakali ngathi luya kwenzeka olo ngquzulwano.

Noko ke, phezu kwayo nje loo ntsholo yomothuko, kwathi gqi eny’ intw’ entsha. IU.S.News & World Report yathi: “Kuyacaca ukuba esi silumkiso sobuxoki enoba soyikisa kangakanani na, kodwa abantu abaninzi abazange basithabathe njengento nantso. Ingcamango yokuba thina apha eMhlabeni sifanele silumkele nezinye izinto ezifana nale—size sizimisele ukwenz’ into ngazo—yayimele ukuba isothuse kwishumi leminyaka nangaphezulu eladlulayo kodwa kungokunje izazinzulu nabanye bezobupolitika bacinga ukuba le nkathazo nangona incinane yinto yokwenene.”

Ezinye izazi ngeenkwenkwezi zicinga ukuba izinto ezisesibhakabhakeni ezimalunga nama-2000 zinkulu kangangokuba zinokubangela intlekele emhlabeni wonke zihamba kwindlela enqumla kwindawo ojikeleza kuyo umhlaba okanye kufutshane nayo. Abaphengululi bathi kwanokuba eyona ikhangeleka incinane kuzo ingquba umhlaba, iya kudubula ngendlela efanayo nezixhobo zenyukliya eziqhushumbiswe ngaxeshanye. Olo ngquzulwano lunokusitshabalalisa isijikelezi-langa sethu nezinto ezikuso, abantu nezilwanyana ngokufanayo.

Ingcamango esoloko ibekelw’ ecaleni xa kusenziwa uqikelelo olufana nolu, yile yoMdali wendalo iphela, uYehova uThixo. (INdumiso 8:3; IMizekeliso 8:27) EBhayibhileni ukwenze kwacac’ okwekat’ emhloph’ ehlungwini ukuthanda nenjongo yakhe ngomhlaba nangohlanga loluntu. Ngaba uya kuvumela umhlaba utshatyalaliswe yintlekele enkulu?

Ummandla Wendalo Olawulwa NguThixo

Ekubeni uYehova enguMdali ongusomandla wendalo iphela, kusengqiqweni ukugqiba kwelokuba unamandla okulawula amandla aqhuba izinto ezisesibhakabhakeni. UKumkani uSolomo osisilumko wathi uYehova uye “walizinzisa izulu ngengqondo.” (IMizekeliso 3:19) Umprofeti uYeremiya wathi uThixo “waneka izulu ngengqondo yakhe.”—Yeremiya 51:15.

UYehova uye wamisela imithetho namandla aqhuba izinto ezisemazulwini, kuquka iinkwenkwezi, izijikelezi-langa, iinkwenkwezi ezinotshoba nezijikelezi-langa ezincinane. (Isaya 40:26) Noko ke, kubonakala ngathi uvumela iinkwenkwezi nezijikelezi-langa zihambe imijikelo yazo yemvelo zizalwe, ziphile zize zife ngokomfuziselo ngaphandle kokuba asoloko ezincedisa. Oku kuquka ungquzulwano oloyikekayo lwezi zinto zisezulwini. Omnye umzekelo wakutshanje lungquzulwano olwenzeka ngoJulayi 1994 apho iziqwenga zenkwenkwezi enotshoba uShoemaker-Levy 9 yangquzulana nesijikelezi-langa uJupiter.

Kukho ubungqina obungokwenzululwazi bokuba kukho amatye amakhulu angaphandle komhlaba awayentlaleka emhlabeni ngaphambi kokuba kubekho abantu. Ngaba isiganeko esinjalo siya kuze senzeke kwesi sijikelezi-langa sinabemi? Ngokomzekelo, yintoni enokwenzeka ukuba isijikelezi-langa esingangekhilomitha enesiqingatha singquzulana nomhlaba? Kaloku isazi ngeenkwenkwezi uJack Hills siqikelela ukuba olo ngquzulwano beluya kuba namandla aphindwe kangangezigidi ngezigidi kunalawo esiqhushumbisi esabetha iHiroshima yayingqushu. Ukuba sasinokubeth’ elwandle sasiya kubangela amaza amakhulu akhukulise unxweme. Uthi ke lo kaHills: “Iindawo ezinezixeko, beziya kusala zinemigxobhozo nje kuphela.” Eyona nto igabadeleyo iqikelelwayo yile yokutshatyalaliswa ngokupheleleyo kohlanga loluntu. Kudibana njani ke oku kuqikelelwa kwemini yentshabalalo nenjongo yoMdali wethu ngomhlaba? IBhayibhile ibonisa ukuba uYehova unenjongo ekhethekileyo ngesi sijikelezi-langa

Umhlaba—Wawenzelwe Injongo

Kaloku wathi umdumisi xa wayethetha ngesi sijikelezi-langa: “Amazulu ngamazulu kaYehova, ihlabathi ulinike oonyana babantu.” (INdumiso 115:16) UIsaya yena uthi xa echaza uYehova ‘nguMenzi wehlabathi, yena walizinzisayo akalidalelanga ukuba kube senyanyeni, walibumba ukuba limiwe.’ (Isaya 45:18) Umhlaba lilifa uYehova alinike uluntu. Ibe ekubeni uMdali wethu enekamva elingunaphakade aligcinele abantu aboyika uThixo, umhlaba uya kuhlala ngonaphakade njengekhaya labo. Nasi isiqinisekiso esisifumana kwiNdumiso 104:5: “[UYehova] waliseka ihlabathi phezu kwemimiso yalo, ukuba lingashukunyiswa naphakade kanaphakade.”

Liyinyaniso lona elokuba, uThixo uye wavumela iintlekele ezishiy’ amehlo kwesi sijikelezi-langa, zinto ezo eziye zabulala inyambalala yabantu. Ezinye zezi ntlekele—njengeemfazwe, iindlala noobhubhani—ngokupheleleyo okanye inxalenye yazo zibangelwe kukunyoluka, ubudenge bentwala nakukukhohlakala kwabantu. (INtshumayeli 8:9) Ezinye—njengeenyikima, ugqabhuko-dubulo lwentaba-mlilo, izikhukula neenkqwithela—ziye zabangelwa zizinto ezingokwemvelo abangazazi kakuhle abantu. Ngokwahlukileyo kwinjongo kaThixo yantlandlolo, abantu abafezekanga; banesono. Loo nto ke iye yaphumela ekubeni, mntu ngamnye kube nzima ukuba athembele kwinkuselo kaThixo kwiintlekele ezingokwemvelo.

Noko ke, uYehova akazange nanini na abe nomdla wokuba umntu aphile ubomi bentshontsho emhlabeni. Ukususela ekudalweni komntu, imithombo ethembekileyo yembali ayichazi siganeko sokutshatyalaliswa kwendalo esakha sabek’ esichengeni uluntu xa lulonke.a

Sikho Isiqinisekiso Sokuba Uhlanga Loluntu Luya Kusinda

Ukususela ekudalweni komntu, injongo yoMdali wethu ibikukuba umntu ‘azalise umhlaba aweyise.’ (Genesis 1:28; 9:1) Uye wathembisa ukuba “amalungisa aya kulidla ilifa ilizwe, ahlale kulo ngonaphakade.” (INdumiso 37:9, 11, 22, 29) Uthi uYehova xa eqinisekisa ezi zithembiso zakhe: “Icebo lam liya kuma, ndikwenze konke ukuthanda kwam.”—Isaya 46:10; 55:11; INdumiso 135:6.

IBhayibhile ayibethi ngenqindi phantsi isithi akunakuze kwehle ntlekele emhlabeni enoba incinane kangakanani na. Noko sinokuqiniseka ngokupheleleyo ukuba uYehova akasayi kuvumela nayiphi na intlekele iphazamisane nenjongo yakhe ayichazileyo ngomhlaba noluntu. Ngokusekelwe kumadinga aseBhayibhileni, sinokuqiniseka ukuba esi sijikelezi-langa siya kuqhubeka siyindawo ekunokuhlalwa kuyo—ewe, siya kuba likhaya loluntu ngonaphakade!—INtshumayeli 1:4; 2 Petros 3:13.

[Umbhalo osemazantsi]