Imeko-bume—Indlela Eyichaphazela Ngayo Impilo Yakho
KUTSHANJE, uGqr. Walter Reed, weWorld Resources Institute, waxelela iUN Radio ukuba igalelo lomntu kwinkqubo yemeko-bume emhlabeni wonke ikwinqanaba lokuba umntu “uyiphazamisa gqitha le mijikelo.” UGqr. Reed uthi ngenxa yoko, oku kuphazamiseka kwemeko-bume, kufak’ isandla kwisisongelo sempilo kumhlaba wonke. Kwinqaku elaligqabaza ngencwadi ethi World Resources 1998-99, iphephancwadi elithi Our Planet, elapapashwa yiUnited Nations, lidwelisa ezinye zezisongelo kwimpilo yabantu. Phakathi kwazo zezi zilandelayo:
□ Ungcoliso lomoya wangaphakathi nowangaphandle luye lwanxulunyaniswa neengxaki zokuphefumla ezibulala abantwana abaphantse babe zizigidi ezine nyaka ngamnye.
□ Ukungabikho kwamanzi acocekileyo nenkqubo yokugutyula kufak’ isandla ekusasazekeni kwezifo zorhudo ezibulala abantwana abazizigidi ezithathu nyaka ngamnye. Ngokomzekelo, ikholera, eyaphela kudala kuMzantsi noMbindi Merika, yaphinda yakho apho yaza yabulala abantu abali-11 000 ngowe-1997 kuphela.
Suku ngalunye ngaphezu kwabantwana abangama-30 000 abakwezona ndawo zihlwempuzekileyo emhlabeni bafa ngenxa yezifo ezinxulumene nemeko-bume. Khawube nomfanekiso-ngqondweni nje—wabantu abangama-30 000 suku ngalunye lonyaka, aboneleyo ukuzalisa zonke izihlalo zeenqwelo-moya ezinkulu ezingama-75!
Noko ke, usongelo lwemeko-bume kwimpilo aluphelelanga nje kumazwe asakhasayo. Iphephancwadi elithi Our Planet lithi “ngaphezu kwabantu abazizigidi ezili-100 eYurophu naseMntla Merika basesengozini yomoya ongacocekanga,” nto leyo efak’ isandla ekwandeni okukhawulezileyo kwesifo sesifuba. Kwangaxeshanye, ukwanda kokuhambela kumazwe ngamazwe nezorhwebo kuye kwafaka isandla kwizifo ezinokuba ngama-30 ezintsha kumazwe ahambele phambili. Ukongezelela, eli phephancwadi lathi izifo ezikade zilawulwa ngaphambili “zibuye ngamandla.”
Eyona nto imbi nangakumbi kukuba inkoliso yezi zifo zinxulumene nemeko-bume inokuthintelwa ngobugcisa obukhoyo nangexabiso eliphantsi. Ngokomzekelo, impilo yabantu inokuphuculwa gqitha ngokubenza bonke abantu bafumane amanzi acocekileyo baze babe nenkqubo yokugutyula. Ingakanani imali efunekayo ukuze kuphunyezwe oku? IUN Radio ithi ngokutsho kweHuman Development Report 1998 yeZizwe Ezimanyeneyo, ukwenza bonke abantu bafumane amanzi acocekileyo baze babe nenkqubo yokugutyula kuya kufuna ii-R68 500 ezigidi—leyo yimali engaphantsi kwaleyo ichithwa ngabantu baseYurophu ukuthenga i-ice cream ngonyaka omnye!
[Inkcazelo Ngomfanekiso okwiphepha 15]
Photo: Casas, Godo-Foto