Imbono YeBhayibhile
Ngaba UThixo Uyatshintsha?
INGCALI ngemvelaphi nentlalo yabantu uGeorge Dorsey wachaza uThixo “weTestamente Endala” “njengoThixo okhohlakeleyo.” Wongezelela ngelithi: “UYahweh . . . ngeliphandle akanalo uthando. UnguThixo wabaphangi, wabangcungcuthekisi, wamajoni nowoloyiso.” Abanye baye bafikelela kwisigqibo esifanayo ngokuphathelele uThixo “weTestamente Endala”—uYahweh, okanye uYehova. Ngenxa yoko, abanye namhlanje abaqiniseki enoba eneneni uYehova wayenguThixo okhohlakeleyo owathi ekugqibeleni watshintsha ubuntu bakhe waba nguThixo onothando nenceba “weTestamente Entsha.”
Le ngcamango iphathelele uThixo weBhayibhile asinto intsha. Yavela noMarcion, owayengumGnostiki wenkulungwane yesibini yeXesha Eliqhelekileyo. UMarcion akazange amginye uThixo “weTestamente Endala.” Wamgqala loo Thixo njengonogonyamelo nothanda ukuziphindezela, uzwilakhe obapha izipho abo bamnqulayo. Kwelinye icala, uMarcion wachaza uThixo “weTestamente Entsha”—njengotyhilwe ngoYesu Kristu—njengoThixo ofezekileyo, uThixo onothando olungangxengwanga nenceba, onobubele noxolelayo.
UYehova Wenza Ngokuvisisana Nokutshintsha Kweemeko
Igama likaThixo, uYehova, lithetha ukuba “Ubangela Kubekho.” Loo nto ithetha ukuba uYehova uzenza abe nguMzalisekisi wazo zonke izithembiso zakhe. Xa uMoses wabuza uThixo igama lakhe, uYehova wayichaza ngolu hlobo intsingiselo yalo: “Ndinguye lowo ndiya kuzingqina ndinguye.” (Eksodus 3:14) Inguqulelo kaRotherham ikubeka ngale ndlela oku: “Ndiya Kuba yiloo nto ndifuna ukuba yiyo.”
Ngoko uYehova ukhetha ukuba, okanye uba, yiyo nantoni na efunekayo ukuze azalisekise iinjongo namadinga akhe obulungisa. Oku kungqinwa sisibakala sokuba unezibizo eziliqela namabinzana amchazayo: uYehova wemikhosi, uMgwebi, uSomandla, uKhwele, iNkosi enguSomandla, uMdali, uBawo, uMyaleli Ozukileyo, uMalusi, uMphulaphuli wemithandazo, uMhlawuleli, uThixo ovuyayo namanye amaninzi. Uye wakhetha ukubizwa ngezi zibizo—nangezinye—ukuze aphumeze iinjongo zakhe zothando.—Eksodus 34:14; ABagwebi 11:27; INdumiso 23:1; 65:2; 73:28; 89:26; Isaya 8:13; 30:20; 40:28; 41:14; 1 Timoti 1:11.
Ngoko, ngaba oku kuthetha ukuba ubuntu okanye imilinganiselo kaThixo iyatshintsha? Akunjalo. UYakobi 1:17 uthi ngokuphathelele uThixo: “Yena akaguquguquki njengesithunzi.” UThixo unokwenza njani ngokuvisisana nokutshintsha kweemeko ngoxa yena engatshintshi?
Umzekelo wabazali abanenyameko abatshintshatshintsha imisebenzi ngenxa yabantwana babo ubonisa kakuhle indlela oku okwenzeka ngayo. Ngemini enye, umzali unokuba ngumpheki, umcoci wendlu, ichule lombane, umongikazi, umhlobo, umcebisi, umfundisi, umqeqeshi nezinye izinto ezingakumbi. Lo mzali akabutshintshi ubuntu bakhe xa esenza le misebenzi; usuka azivumelanise neemeko njengoko zivela. Kunjalo ke nangoYehova kodwa kuye oko kwenzeka ngomkhamo ongaphezulu. Akukho mlinganiselo kwizinto anokuzenza abe zizo ukuze azalisekise injongo yakhe nokuze kungenelwe izidalwa zakhe.—Roma 11:33.
Ngokomzekelo, uYehova uchazwa njengoThixo wothando nenceba kwiZibhalo zesiHebhere nezamaKristu zesiGrike. Umprofeti uMika wenkulungwane yesibhozo ngaphambi kweXesha Eliqhelekileyo wabuza oku ngoYehova: “Ngubani na onguThixo onjengawe, oxolela isiphoso nodlulayo ekunxaxheni kwentsalela yelifa lakhe? Ngokuqinisekileyo akayi kubambelela kumsindo wakhe ngonaphakade, kuba uyoliswa bububele bothando.” (Mika 7:18) Ngokufanayo, umpostile uYohane wabhala la mazwi adumileyo: “UThixo uluthando.”—1 Yohane 4:8.
Kwelinye icala, kuzo zombini iinxalenye zeBhayibhile, uYehova uchazwa njengoMgwebi onobulungisa wabo bathi ngokuphindaphindiweyo, ngokugqithiseleyo nangokungaguquki bophule imithetho yaye baze benzakalise abanye. Umdumisi wathi: “Bonke abangendawo [uYehova] uya kubabhubhisa.” (INdumiso 145:20) Ngokufanayo, uYohane 3:36 uthi: “Lowo ubonisa ukholo kuNyana unobomi obungunaphakade; lowo ungamthobeliyo uNyana akayi kububona ubomi, kodwa ingqumbo kaThixo ihleli phezu kwakhe.”
Iimpawu Zakhe Azitshintshi
Ubuntu bukaYehova neempawu zakhe ezibalaseleyo—uthando, ubulumko, okusesikweni namandla—azitshintshanga. Wabaxelela oku abantu bakwaSirayeli: “NdinguYehova, anditshintshanga.” (Malaki 3:6) Kwakusele kudlule iminyaka engama-3 500 emva kokuba uThixo edale uluntu. Ngokuvisisana naloo nkcazelo ingokobuthixo, uhlolisiso olunzulu lweBhayibhile xa iyonke lubonisa ukuba uThixo akayitshintshi imilinganiselo neempawu zakhe. Ukutyhubela iinkulungwane ubuntu bukaYehova uThixo abukhange bungxengwe, ekubeni oko kwakungeyomfuneko.
Ukumela ngokuqinileyo kukaThixo ubulungisa, njengoko kuboniswe kwiBhayibhile xa iyonke, akuhlanga, nothando lwakhe alukho ngaphezulu kunokuba lwalunjalo ekuqaleni kwakhe ukuqhubana nabantu e-Eden. Ubuntu bakhe obahlukahlukeneyo obuchazwa kwiinxalenye ezahlukeneyo zeBhayibhile eneneni buziinkalo ezahlukeneyo zobuntu obunye obungatshintshiyo. Ezi nkalo zibangelwa ziimeko ezahlukeneyo nabantu asebenzisana nabo, nto leyo ebangela ukutshintsha kwesimo sengqondo okanye ulwalamano.
Ngoko ke, iZibhalo zibonisa ngokucacileyo ukuba ubuntu bukaThixo abutshintshanga ukutyhubela iinkulungwane ibe abuzi kutshintsha kwikamva. UYehova ungumzekelo ophakamileyo wolungelelwano nokungaguquguquki. Uthembekile ngawo onke amaxesha. Sinokuhlala sithembele ngaye.
[Imifanekiso ekwiphepha 24, 25]
Laa Thixo watshabalalisa iSodom neGomora . . .
. . . uya kuzisa ihlabathi elitsha lobulungisa