Imbono YeBhayibhile
Ngaba Amaphupha Zizigidimi Ezivela KuThixo?
KUTHIWA, ingcamango yomyili uElias Howe yokwenza umatshini wokuthunga yayisekelwe ephupheni. Umqambi weengoma uMozart wathi uninzi lwemixholo yeengoma zakhe wayifumana emaphupheni. UFriedrich August Kekule von Stradonitz osebenza ngemichiza naye uthi ukumila kwemolekyuli yebhenzina wakufumana ephupheni. Amava anjalo asinto ingaqhelekanga. Ukutyhubela imbali kumaqela athile abantu amaphupha abalwa phakathi kwezinto ezinamandla angaphezu kwawemvelo. Amanye akholelwa ekuthini umntu ophuphayo uyafana nomntu osezingqondweni.
IBhayibhile ineengxelo ezininzi apho amaphupha achazwa njengowona mthombo ubalulekileyo wenkcazelo—uhlobo oluthile lokunxibelelana olungokobuthixo. (ABagwebi 7:13, 14; 1 Kumkani 3:5) Ngokomzekelo, uThixo wathetha noAbraham, uYakobi kunye noYosefu ngamaphupha. (Genesis 28:10-19; 31:10-13; 37:5-11) UKumkani uNebhukadenetsare waseBhabhiloni wafumana amaphupha asisiprofeto avela kuThixo. (Daniyeli 2:1, 28-45) Ngoko ngaba sikho isizathu esibambekayo sokukholelwa ukuba nanamhlanje amaphupha sisigidimi esivela kuThixo?
Amaphupha Avela KuThixo
EBhayibhileni, uThixo wayesoloko edlulisela amaphupha ngenjongo ethile ekhethekileyo. Liyinyaniso elokuba, maxa wambi lowo uphuphayo wayengasoloko eyiqonda ngokukhawuleza intsingiselo yephupha elo. Noko ke, kwiimeko ezininzi, “UMtyhili weemfihlelo” wayeyicacisa ngokwakhe intsingiselo yephupha ukuze kungabikho sizathu sakuyithandabuza intsingiselo yalo. (Daniyeli 2:28, 29; Amosi 3:7) Amaphupha avela kuThixo ayengafani namaphupha aqhelekileyo angaqondakaliyo yaye angekho ngqiqweni.
Maxa wambi, uThixo wayesebenzisa amaphupha ukuze akhusele abantu abathile ababalulekileyo ngoxa bephumeza iinjongo zakhe. Abantu abafumana amaphupha anjalo kwakunganyanzelekanga ukuba babe ngabakhonzi bakaThixo. Ngokomzekelo, abavumisi ngeenkwenkwezi ababetyelele umntwana oselula uYesu abazange babuyele kwisigwinta esinguHerode njengoko wayebayalele. Ngoba? Bafumana isilumkiso ephupheni. (Mateyu 2:7-12) Oku kwanika uyise kaYesu owamkhulisayo, uYosefu, ithuba elaneleyo lokubalekela eYiputa kunye nentsapho yakhe, ethobela ulwalathiso naye awayelufumene ngephupha. Oku kwasindisa ubomi bukaYesu oselula.—Mateyu 2:13-15.
Kwiinkulungwane ngaphambilana, ufaro waseYiputa waphupha izikhwebu ezisixhenxe ezityebileyo neenkomo ezisixhenxe ezityebileyo zithelekiswa nezikhwebu ezisixhenxe ezingcakacileyo neenkomo ezisixhenxe ezibhityileyo. Ngoncedo lobuthixo, uYosefu, wawalawula ngokuchanileyo loo maphupha ngokuthi: IYiputa yayiya kunandipha iminyaka esixhenxe yendyebo ilandelwe yiminyaka esixhenxe yendlala. Ukwazi oku kwangethuba kwanceda amaYiputa akwazi ukulungiselela aze avalele ukutya koovimba. Oku kwangqineka kuluncedo ekulondolozeni intsapho ka-Abraham nasekuyiziseni ezweni laseYiputa.—Genesis, isahluko 41; 45:5-8.
Ngokufanayo uKumkani uNebhukadenetsare waseBhabhiloni waphupha. Iphupha lakhe laxela kusengaphambili ukumiswa nokuwa kwamagunya ehlabathi okwakuza kuchaphazela ngokuthe ngqo abantu bakaThixo. (Daniyeli 2:31-43) Kamva, waphinda waphupha iphupha elalixela kwangaphambili ukuba wayeya kushiywa ziingqondo zize ziphinde kamva zibuye. Eli phupha lisisiprofeto laba nenzaliseko enkulu, lalatha ekumiselweni koBukumkani obungoMesiya, obabuya kufeza injongo kaThixo.—Daniyeli 4:10-37.
Kuthekani Ngomhla Wethu?
Ewe, uThixo wayenxibelelana nabantu abathile ngamaphupha. Kodwa iBhayibhile ibonisa ukuba oku kwakungafane kwenzeke. Amaphupha ayengazange aba yindlela eyintloko yobuthixo yokunxibelelana. Babebaninzi abakhonzi bakaThixo abanyanisekileyo abangazange bafumane isigidimi esivela kuThixo ngamaphupha. Ukusebenzisa kukaThixo amaphupha ukuze adlulisele isigidimi kunokuthelekiswa naxa Wahlula uLwandle Olubomvu. Siyazi ukuba oku wakwenza kwakanye, kodwa ngokuqinisekileyo le asiyondlela yakhe eqhelekileyo yokuqhubana nabantu bakhe.—Eksodus 14:21.
Umpostile uPawulos wavuma ukuba ngomhla wakhe umoya kaThixo wawusebenza ngeendlela ezininzi ezikhethekileyo kubakhonzi bakhe. UPawulos wathi: “Omnye unikwa ngomoya intetho yobulumko, omnye intetho yolwazi ngokwaloo moya ukwamnye, omnye ukholo ngomoya omnye, omnye iziphiwo zokuphilisa ngaloo moya mnye, kanti omnye ukwenza imisebenzi yamandla, omnye ukuprofeta, omnye ukuqonda amazwi aphefumlelweyo, omnye iilwimi ezahlukeneyo, yaye omnye ukutolika iilwimi.” (1 Korinte 12:8-10) Nangona amaphupha angokobuthixo engakhankanywa ngokuthe ngqo, amaKristu aliqela kuyacaca ukuba awafumana njengenxalenye yezipho zokomoya ukuzalisekisa uYoweli 2:28.—IZenzo 16:9, 10.
Noko ke, umpostile wathi ngezi ziphiwo zikhethekileyo: “Enoba kukho iziphiwo zokuprofeta, ziya kubhangiswa; enoba kukho iilwimi, ziya kuphela; enoba kukho ulwazi, luya kubhangiswa.” (1 Korinte 13:8) Kubonakala ukuba phakathi kwezipho ezaziya “kubhangiswa” kwakukho iintlobo ezithile zokunxibelelana zobuthixo. Emva kokufa kwabapostile, uThixo wayeka ukudlulisela kubakhonzi bakhe ezi zipho zikhethekileyo.
Namhlanje iingcali zisazama ukuqonda enokuba inkqubo yokuphupha inayo kusini na injongo eyiphumezayo. IBhayibhile ayicacisi nto ngaloo miba. Noko ke, kwabo bafuna amaphupha abe yindlela yonxibelelwano engokobuthixo, iBhayibhile inaso isilumkiso. KuZekariya 10:2, ithi: ‘Abavumisayo bathetha amaphupha angenaxabiso.’ UThixo uyasilumkisa nangokuhlaba izihlabo. (Duteronomi 18:10-12) Ngenxa yokwazi ezi zilumkiso, amaKristu namhlanje akalindelanga ukuba afumane ukhokelo olungokobuthixo emaphupheni. Kunoko, awagqala amaphupha kuphela njengento ezenzekelayo xa ulele.