Ngubani Oya Kuzisa Uxolo Lokwenene?

YINTONI ebangela ukuba uThixo angayiphenduli imithandazo yoxolo eyenziwa ziinkokeli zeecawa ezahlukahlukeneyo? Impendulo yeBhayibhile ibangel’ umdla. Ukungayiphenduli kukaThixo le mithandazo akuthethi ukuba akalukhathalele uxolo—ulufuna nangaphezu kwabo befundisi baluthandazelayo. Eneneni, uThixo sele enze ilungiselelo eliqinisekileyo lokuzisa uxolo ehlabathini. Sele ewathabathile amanyathelo okuzisa uxolo. Abantu ubachazele ngokucacileyo iinjongo anazo. Noko ke okubuhlungu kukuba, iicawa ziye zakugatya oko kuthethwe nguThixo.

UThixo wathembisa kwangaphambili ukuba kukho ‘imbewu,’ engumlawuli, yaye iBhayibhile inikela inkcazelo engakumbi ngokuphathelele loo mlawuli. (Genesis 3:15; 22:18; 49:10) Umprofeti uIsaya, owathetha ngeziprofeto ezimangalisayo eziphathelele uMesiya, wathi le Nkokeli yaxelwa kwangaphambili yayiza kuba ‘yiNkosana yoXolo’ phezu komhlaba yaye xa kulawula yona, ‘uxolo lwalungayi kuphela.’ (Isaya 9:6, 7) NjengoMlawuli wasezulwini, uya kungenelela aze aphelise ubungendawo, aguqule lo mhlaba ube yiparadesi, kungaphindi kubekho ntlungu, kugula, buhlwempu nakufa. Uxolo luya kwesamela yaye abantu baya kuphila ngonaphakade. (INdumiso 72:3, 7, 16; Isaya 33:24; 35:5, 6; Daniyeli 2:44; ISityhilelo 21:4) Kuya kwenzeka nini oku?

Uxolo Lwehlabathi Lusemnyango

UYesu waxelela abafundi bakhe ukuba ngaphambi kokuba le nkqubo ingendawo yezinto iphele, kubekho nebutho elitsha labantu kuya kuhla iziganeko ezigungqisa ihlabathi eziya kwenzeka ngaxeshanye. (Mateyu 24:3, 7-13) Uninzi lwezi ziganeko—iimfazwe, ukunqongophala kokutya, iinyikima zomhlaba, xa sikhankanya nje ezimbalwa—ziya zisanda. Noko ke, uluntu aluzange luthwaxwe zezi ziganeko ehlabathini lonke njengoko kunjalo kumhla wethu. Yaye ezi ntlekele zichaphazela abantu ngendlela ezingazange zibachaphazele ngayo ngaphambili kuba abantu baninzi kakhulu emhlabeni ngoku.

Esinye isiganeko esaxelwa kwangaphambili eBhayibhileni kukonakalisa kwabantu umhlaba. (ISityhilelo 11:18) Ukanti, ngaphambi kokufika kwesiphelo esaxelwa kwangaphambili, kufanele kulunyukiswe abantu ehlabathini lonke, ngokushunyayelwa ‘kweendaba ezilungileyo zobukumkani.’ Namhlanje, amaNgqina kaYehova enza lo msebenzi ehlabathini lonke.—Mateyu 24:14.

Ukuzaliseka kwezo ziprofeto ziindaba ezilungileyo kubantu abathembekileyo. Ihlabathi elitsha loxolo ekwaprofetwa ngalo lisemnyango! Oko kuya kuthetha ukuphela kwentiyo nobunqolobi. IBhayibhile ithi: “Aziyi kwenzakalisa okanye zonakalise entabeni yam yonke engcwele; ngenxa yokuba umhlaba ngokuqinisekileyo uya kuzaliswa kukwazi uYehova njengamanzi egubungele ulwandle.”—Isaya 11:9.

Imithandazo Ayiphulaphulayo UThixo

Ukuthandaza kuThixo asingombandela nje wokugqithisa usana kunina. IBhayibhile ithi, uYehova ‘ngumphulaphuli wemithandazo.’ (INdumiso 65:2) Ngoko ngalo lonke ixesha, uphulaphula imithandazo emininzi eyenziwa ngabantu abanyanisekileyo abasemhlabeni. Noko ke, ngaba kukho imilinganiselo emele ifikelelwe ukuze loo mithandazo iviwe? IBhayibhile ithi abantu abantliziyo zinyanisekileyo abafunda iinyaniso zeBhayibhile ngoThixo bafanele babe ‘ngabanquli bokwenyaniso,’ bamnqule “ngomoya nenyaniso.” (Yohane 4:23) Imithandazo eyenziwa ngabo bangamhloneliyo akayiphenduli: “Oyisusayo indlebe yakhe ekuveni umthetho [kaThixo]—kwanomthandazo wakhe uyinto ecekisekayo.”—IMizekeliso 28:9.

Okubuhlungu kukuba, namhlanje iinkokeli zonqulo ezininzi azibafundisi abantu ngenjongo kaThixo yokuzisa uxolo yaye azithandazi ngokuvisisana naloo njongo. Kunoko, zithandazela ukuba oorhulumente babantu bacombulule iingxaki zoluntu, nakubeni iLizwi likaThixo lisitsho ngokucacileyo ukuba “asikokomntu ohambayo ukwalathisa inyathelo lakhe.”—Yeremiya 10:23.

Kwaxelwa kwangaphambili ukuba “ekupheleni kwemihla,” kwixesha esiphila kulo, abantu abathanda uxolo baya kuthontelana ukuya ‘kwintaba yendlu kaYehova’ yokomfuziselo—oko kukuthi, kunqulo lokwenyaniso. Abo bantu baya kwenza iinguqulelo eziphawulekayo ebomini babo: ‘Bawakhande amakrele abo abe ngamakhuba nemikhonto yabo ibe zizikere zokuthena imithi. Uhlanga aluyi kuphakamisela uhlanga ikrele, bengayi kuphinda bafunde nemfazwe kwakhona.’—Isaya 2:2-4.

Ngaba namhlanje likho iqela lonqulo elizama ukuphila ngokuvisisana naloo mazwi? Okanye ngaba zonke iinkonzo zanela nje kukuthetha ngoxolo ngoxa kwangaxeshanye zikhuthaza imfazwe? Xa uphinda udibana namaNgqina kaYehova, uze uncede uxubushe nawo ngombandela woxolo yaye uya kuyazi inkonzo efundisa abantu ngendlela yokuba seluxolweni nabantu bonke.