Abantu Abaselula Bayabuza . . .

Ngaba Ndifanele Ndenze Itattoo?

“Ezinye ii-‘tattoo’ zintle. Zizotywe kakuhle.”—UJalene.a

“Bendisoloko ndicinga nge-‘tattoo’ yam yokuqala kangangeminyaka emibini.”—UMichelle.

IITATTOO zikho kuyo yonke indawo—okanye kubonakala njalo. Iimvumi zerock, abadlali abadumileyo, ababonisi befashoni, nabadlali kwimifanekiso bhanyabhanya baqhayisa ngazo. Ulutsha oluninzi luye lwaxelisa bona, lubonisa ngeetattoo kumagxa, kwizandla, kwizinqe nasemaqatheni alo. UAndrew uthi: “Iitattoo zisemcimbini. Kuxhomekeke kuwe ukuba uyenze okanye ungayenzi.”

IWorld Book Encyclopedia ithi: “Ukwenza itattoo kukuzoba okanye ukubhala into eya kuhlala ngokusisigxina emzimbeni. Kudla ngokugqojozwa imingxuma emincinane kwisikhumba ngoluthi oluloliweyo, ngethambo, okanye ngenaliti ethiwe nkxu kwii-inki eziyimibalabala.”

Nangona kungelula ukufumana amanani achanileyo, enye incwadi ithi abantu abangama-25 ekhulwini abaneminyaka eli-15 ukusa kwiminyaka engama-25 ubudala eUnited States banetattoo. USandy uthi: “Iyathandwa.” Kutheni olunye ulutsha luzithanda iitattoo?

Kutheni Zithandwa Kangaka?

Kwabanye, itattoo yindlela yokubonakalisa uthando. UMichelle uthi: “Umntakwethu ubhale igama lentombi awayethandana nayo eqatheni lakhe.” Yintoni ke ingxaki? “Akasathandani nayo.” Ngokutsho kwephephancwadi iTeen, “oogqirha baqikelela ukuba abantu abangaphezu kwama-30 ekhulwini abafuna kususwe itattoo ngamantombazana akwishumi elivisayo afuna amagama amakhwenkwe abethandana nawo asuswe.”

Olunye ulutsha luzigqala iitattoo njengomsebenzi wobugcisa. Abanye bayijonga njengophawu lokuzimela geqe. “Ndiziphethe,” watsho njalo uJosie, esongezelela esithi ukwenza itattoo “sesona sigqibo sibalulekileyo endakhe ndasenza ebomini bam.” Iitattoo zivumela olunye ulutsha ukuba luzame into entsha—ukuziva lukwazi ukulawula inkangeleko yalo. Kwakhona iitattoo zisenokuba luphawu lwemvukelo okanye indlela nje eyahlukileyo yokuphila. Ngoko ke, ezinye iitattoo zinamagama nemizobo ekrwada okanye intetho evuselela inkanuko.

Noko ke, inkoliso yolutsha isenokuba ilandela nje umndilili. Kodwa ngaba nawe ufanele uyenze, kuba kusenokubonakala ngathi wonke umntu wenza itattoo?

Ubuchule Bamandulo Bokwenza Itattoo

Ukwenza itattoo asiyonto ethi gqi ngoku. Kuye kwafunyanwa izidumbu eziqholiweyo zaseYiputa nezaseLibhiya ezineetatto zabantu ababephila kwiminyaka engamakhulu ngaphambi kwexesha likaKristu. Kwakhona kuye kwafunyanwa izidumbu eziqholiweyo ezineetattoo eMzantsi Merika. Inkoliso yezo zidumbu ezineetattoo zinxulumene ngokungqalileyo nokunqulwa koothixo babahedeni. Ngokutsho komphengululi uSteve Gilbert, “eyona tattoo indala engumfanekiso wento ethile, kunokuba ibe yinto engaqondakaliyo, imela uthixo uBes. Kwiintsomi zaseYiputa uBes nguthixo wokuziphatha okubi noweziyolo.”

Kuyabonakala ukuba, uMthetho kaMoses wawukwalela ukuba abantu bakaThixo benze iitattoo. ILevitikus 19:28 ithi: “Ningenzi ntlanga enyameni yenu ngenxa yomphefumlo oswelekileyo, ningenzi mbhalo wamvambo [tattoo] kuni. NdinguYehova.” Abanquli bobuhedeni, njengamaYiputa, babesenza iitattoo zamagama okanye imiqondiso yoothixo babo kumabele nakwiingalo zabo. Ngokuthobela umyalelo kaYehova wokuba angenzi itattoo, amaSirayeli ayeza kwahluka kwezinye iintlanga.—Duteronomi 14:1, 2.

Nangona amaKristu namhlanje engekho phantsi koMthetho kaMoses, isibakala sokuba itattoo yayalelwe sifanele siwenze acingisise. (Efese 2:15; Kolose 2:14, 15) Ukuba ungumKristu, ngokuqinisekileyo ubungayi kufuna imibhalo kumzimba wakho—nokuba yeyexeshana—efuzisela ubuhedeni okanye unqulo lobuxoki.—2 Korinte 6:15-18.

Iingozi Kwimpilo

Umele ucinge nangempilo yakho. UGqr. Robert Tomsick, unjingalwazi osaqeqeshwayo wezifundo ngesikhumba, uthi: “Eyona nto uyenzayo kukukrazula isikhumba uze ufake i-inki kuloo ndawo. Nangona inaliti ingena nje kancinane, nanini na ukrazula isikhumba, usengozini yokungenwa ziintsholongwane. Ndicinga ukuba [ukwenza itattoo] kukuzifaka engozini.” UGqr. Tomsick uqhubeka esithi: “Emva kokuba i-inki ingenile, kwanokuba akufumananga ntsholongwane, umzimba wakho usenokungayamkeli loo nto uyifakileyo, ube neengxaki zesikhumba, sibe bomvu, sidumbe, sibe namakhokho kwaye sirhawuzele.”

Nangona itattoo isenziwa ngenjongo yokuba ihlale ngokusisigxina, zikho iindlela ezahlukahlukeneyo zokuzama ukuyisusa: Ukuyisusa ngelaser (ukuyitshisa), ukuyisusa ngotyando (ukuyisika), idermabrasion (ukuyikhuhla ngebhrashi yocingo ukuze kusuke isikhumba), isalabrasion (ukufaka isikhumba esinetattoo kumxube onetyuwa), nescarification (ukususa itattoo ngomxube oneasidi ukuze kushiyeke isiva endaweni yayo). Ezi ndlela zixabisa kakhulu yaye zibuhlungu. Iphephancwadi iTeen lithi: “Kubuhlungu ngakumbi ukususa itattoo ngelaser kunokuyenza.”

Baza Kucinga Ntoni Abanye?

Kwakhona ufanele ucingisise nzulu ngendlela abanye abaza kuvakalelwa ngayo ngokuba netattoo, kuba abaninzi abayithandi. (1 Korinte 10:29-33) Engakhange acingisise, uLi, ibhinqa laseTaiwan, wenza itattoo xa wayeneminyaka eli-16 ubudala. Ngoku uneminyaka engama-21 ubudala yaye usebenza eofisini. ULi uyavuma esithi: “Iyandikhathaza indlela abantu endisebenza nabo abayiqwalasela ngayo le tattoo.” Enye ingcali ngokusebenza kwengqondo uTheodore Dalrymple waseBritani uthi kubantu abaninzi, iitattoo “yindlela ebonakalayo ebonisa ukuba loo mntu . . . unogonyamelo, ukhohlakele, akathandi bantu yaye usisaphuli-mthetho.”

Inqaku elikwiphephancwadi iAmerican Demographics ngokufanayo lathi: “Kucacile ukuba inkoliso yabantu baseMerika ikugqala kuyingozi ukuba nombhalo obonakalayo emzimbeni. Amashumi asibhozo ekhulwini [olutsha] ayavumelana noku, ‘abantu abaneetattoo ezibonakalayo . . . bafanele baqonde ukuba oku kunokubangela iingxaki kumsebenzi wabo nakulwalamano lwabo nabanye.’”

Kwakhona cinga enoba ukukhetha kwakho ukuba netattoo kuza kubangela ukuba ugqalwe okanye ungagqalwa njengomKristu. Ngaba ‘usenokubakhubekisa’ abanye? (2 Korinte 6:3) Liyinyaniso elokuba, olunye ulutsha luye lwenza iitattoo kwiindawo ezifihlakeleyo emzimbeni. Kusenokwenzeka ukuba nabazali balo abazazi ezi tattoo zifihliweyo. Kodwa lumka! Xa kunokufuneka uye kwagqirha ngokungxamisekileyo okanye xa uhlamba esikolweni loo mfihlo yakho inokwaziwa! Kungabhetele “ukuziphatha ngokunyaniseka kwizinto zonke,” sibuphephe ubudenge bokuqhatha.—Hebhere 13:18.

Njengazo zonke izimbo, iitattoo zinokuphelelwa lixesha. Enyanisweni, ngaba kukho impahla ethile—ijini, ihempe, ilokhwe okanye izihlangu—ozithanda kangangokuba ungafuna ukuzinxiba ubomi bakho bonke? Kakade akunjalo! Izimbo, uhlobo oluthile lwempahla nemibala iyaguquguquka. Noko ke, ngokungafaniyo nempahla, kunzima ukususa iitattoo. Ngaphezu koko, into “esemcimbini” kuwe xa uneminyaka eli-16 ubudala isenokungabi ntle kangako xa uneminyaka engama-30 ubudala.

Abaninzi baye bazisola ngokwenza utshintsho olusisigxina kwindlela abakhangeleka ngayo. UAmy uthi: “Ndenza itattoo ngaphambi kokuba ndifunde ngoYehova. Ndiyazama ukuyifihla. Xa abanye ebandleni beyibona, ndiba neentloni.” Sifunda ntoni koku? Cinga ngaphambi kokuba uyenze. Ungenzi isigqibo ekunokwenzeka uzisole ngaso kamva.

[Umbhalo osemazantsi]

[Umfanekiso okwiphepha 17]

Ii-“tattoo” zidla ngokunxulunyaniswa nabantu abanemvukelo

[Umfanekiso okwiphepha 17]

Ekuhambeni kwexesha, abaninzi bayazisola ngokwenza i-“tattoo”

[Umfanekiso okwiphepha 18]

Cinga ngaphambi kokuba uyenze