Imibuzo Yabantu Abaselula . . . 

Ndinokuhlangabezana Njani Nokungaphumeleli?

“Ndisandul’ ukufumana ingxelo yam yeemviwo, ndiphinde andaphumelela eza zifundo zine ndandingaziphumelelanga kwixa elidluleyo. Ndenze konke endinako, kodwa ndiphinde ndatsho phantsi.”—ULauren, oneminyaka eli-15 ubudala.

“Asinakuyibaleka into yokuba yintlungu ukuhlangabezana nokungaphumeleli. Ngokulula nje uqalisa ukuzigxeka.”—UJessica, oneminyaka eli-19 ubudala.

UKUNGAPHUMELELI. Kunokwenzeka ukuba akufuni nokucinga ngelo gama. Kodwa izihlandlo ezininzi sonke sinezinto esingaphumeleliyo kuzo. Enoba kukungaphumeleli kwiimviwo zesikolo, ukwenza into ebangel’ iintloni, ukudanisa umntu esimthandayo okanye ukwenza impazamo enkulu ephathelele ukuziphatha, ukungaphumeleli kubangela intliziyo ebuhlungu.

Kakade ke, bonke abantu bayazenza iimpazamo. IBhayibhile ithi: “Bonke bonile baza basilela kuzuko lukaThixo.” (Roma 3:23) Kodwa kwabaninzi kuthabatha ixesha ngaphambi kokuba balungelelane emva kokuba benze impazamo. Omnye oselula ogama linguJason ukuchaza ngale ndlela oku: “Ndizigxeka ngokwenene. Ukuba ndenza impazamo, abantu basenokundihleka—kodwa ngokuqhelekileyo bayayilibala loo nto. Kodwa ihlala inkenteza kweyam ingqondo.”

Akuphosakalanga ukucinga ngempazamo oyenzileyo—ingakumbi ukuba oko kukunceda uphucule. Sekunjalo, ukuhlala uzigxeka kuyingozi yaye akuyongenelo. IMizekeliso 12:25 ithi: “Inyameko yokuxhalaba esentliziyweni yendoda iya kuyibangela iqubude.”

Khawucinge ngoEpafrodito, indoda ekuthethwa ngayo eBhayibhileni. Wathunyelwa eRoma ukuze ancede umpostile uPawulos. Noko ke, uEpafrodito wagula waza akakwazi ukusiphumeza eso sabelo. Ngenxa yoko, kwafuneka uPawulos amnyamekele! UPawulos wambuyisela ekhaya, waza waxelela ibandla awayekulo ukuba le ndoda ithembekileyo idandathekile. Sasiyintoni isizathu soko? UPawulos wathi: “Neva ukuba wayegula.” (Filipi 2:25, 26) Emva kokuba uEpafrodito evile ukuba abanye bayazi ukuba uyagula, nto leyo eyabangela ukuba angakwazi ukuphumeza isabelo sakhe, kusenokwenzeka ukuba waziva engento yanto. Yiloo nto eyambangela wadandatheka.

Ngaba ikho indlela yokuphepha intlungu yokungaphumeleli?

Zazi Izinto Ongakwaziyo Ukuzifikelela

Enye indlela onokuzama ngayo ukuphumelela kwizinto ozenzayo kukuzibekela usukelo olusengqiqweni nolufanelekileyo. IBhayibhile ithi, “Bunabathozamileyo ubulumko.” (IMizekeliso 11:2; 16:18) Yaye umntu othozamileyo uyazazi izinto angakwaziyo ukuzifikelela. Liyinyaniso elokuba ngamathub’ athile ufanele ukhe uzivavanye ukuze uphucule ubuchule namandla onawo. Kodwa ungazenzi into ongeyiyo. Usenokungabi yingcaphephe yezibalo okanye incutshe kwezemidlalo. Umfana ogama linguMichael uyavuma: “Ndiyazazi ukuba andiyoncutshe kwezemidlalo. Ngoko xa ndidlala andizibekeli usukelo endaziyo ukuba andizukuluphumelela.” Uthi: “Umele uzibekele usukelo lwento oza kukwazi ukuyenza.”

Khawucinge ngesimo sengqondo sikaYvonne oneminyaka eli-14 ubudala, ogula sispina bifida necerebral palsy. UYvonne uthi: “Andikwazi ukuhamba okanye ukudanisa njengabanye. Iyandikhathaza into yokuba ndingenakuzenza izinto ezenziwa ngabanye. Abanye abantu abazi ukuba ndivakalelwa njani. Kodwa ndiyakwazi ukumelana nentlungu endinayo.” Uthini xa ecebisa abanye? “Ningatyhafi. Qhubekani nizama. Ukuba aniphumeleli kwizinto enizenzayo okanye azenzeki ngendlela ebenifuna ngayo, ninganikezeli. Qhubekani nisenza konke okusemandleni enu.”

Kwangaxeshanye, ungazingcungcuthekisi ngokuzithelekisa nabanye ngendlela engekho ngqiqweni. UAndrew oneminyaka eli-15 ubudala uthi, “Ndiyakuphepha ukuzithelekisa nomnye umntu kuba amandla nobuchule esinabo abufani.” UAndrew uvumelana namazwi aseBhayibhileni kumaGalati 6:4 athi: “Ngamnye makangqine oko ukuko umsebenzi wakhe, uya kwandula ke abe nesizathu sokugcoba ngaye siqu, kungekhona ngokuzithelekisa nomnye umntu.”

Xa Abanye Belindele Lukhulu Kuwe

Maxa wambi, abantu balindela lukhulu kuwe—abazali, ootitshala nabanye. Yaye uyaqonda ukuba enoba ungazama kangakanani, akusoze ubakholise. Eyona nto ikutyhafisayo kukuba abo bantu basenokude bathethe izinto ezikuthez’ amandla bechaza indlela obadanise ngayo. (Yobhi 19:2) Kusenokwenzeka ukuba uyaqonda ukuba abazali bakho nabanye abayenzi ibe lihlwili ngabom intliziyo yakho. Ngokutsho kukaJessica, “amaxesh’ amaninzi abaqondi ukuba bayakuthunuka. Maxa wambi iba kukungaqondani nje.”

Kwelinye icala, ngaba akunakwenzeka ukuba ikho le nto bayibonayo ungayiboniyo wena? Ngokomzekelo, mhlawumbi uzibona kungekho nto ibhetele onokuyenza okanye uzijongela phantsi. Kunokuba ungawakhathaleli amacebiso abakunika wona, wenza ngobulumko ukuba ‘uphulaphula uqeqesho.’ (IMizekeliso 8:33) UMichael uthi: “Kuya kukunceda oko. Bafuna uphucule. Kujonge njengocelomngeni oku.”

Kodwa, kuthekani ukuba uvakalelwa kukuba abazali bakho nabanye bafuna wenze izinto ezingekho ngqiqweni—izinto ongenakukwazi ukuzenza? Xa kunjalo, thetha nabo—ngentlonelo, kodwa ungajikelezi—ubazise indlela ovakalelwa ngayo. Ukunye nabo unokuzibekela usukelo olusengqiqweni.

“Ukungaphumeleli” Kwizinto Zokomoya

KumaNgqina kaYehova, ulutsha lujamelene nocelomngeni lokusingatha izabelo zalo njengabalungiseleli bakaThixo. (2 Timoti 4:5) Ukuba ungumKristu oselula, maxa wambi usenokuziva ungafaneleki. Mhlawumbi akwaneliseki yindlela ogqabaza ngayo ezintlanganisweni. Okanye kunzima ukucacisela abanye ngesigidimi seBhayibhile. Ngokomzekelo, uJessica wayeqhubela enye intombazana ekwishumi elivisayo isifundo seBhayibhile. Kangangethuba elithile isifundo sakhe seBhayibhile sasisenza inkqubela entle. Le ntombazana yasuka yenza isigqibo sokungamkhonzi uThixo. UJessica uthi, “Ndavakalelwa kukuba andikwazi kufundisa.”

UJessica wahlangabezana njani naloo ntlungu? Okokuqala, kwafuneka aqonde ukuba isifundo sakhe sasingagatyi yena kodwa sasigatya uThixo. Wancedwa nakukucamngca ngomzekelo oseBhayibhileni kaPetros, indoda eyayisoyika uThixo neyayineentsilelo ezininzi. Uthi, “IBhayibhile ithi uPetros waboyisa ubuthathaka bakhe, ibe uYehova wamsebenzisa ngeendlela ezininzi ukuze ahambisele phambili izilangazelelo zoBukumkani.” (Luka 22:31-34, 60-62) Kakade ke, ukuba kufuneka uphucule ubuchule bakho bokufundisa, kutheni ungazibhokoxi ekwenzeni oko? (1 Timoti 4:13) Cela uncedo kwabaqolileyo ebandleni abanokukufundisa baze bakuqeqeshe.

Mhlawumbi eyona nto ilucelomngeni kuwe kukushumayela kwindlu ngendlu. UJason uthi, “Ngalo lonke ixesha xa ndichaswa kuba ngathi kukho apho ndisilele khona.” Uhlangabezana njani naloo ntlungu? “Ndiye ndikhumbule ukuba akukho nto ndisilele kuyo.” Ewe, uyaphumelela ekwenzeni oko akuyalelwe nguThixo—ukushumayela! Kuyavunywa ukuba akumnandanga ukuchaswa, kodwa sekunjalo asingabo bonke abantu abasichasayo isigidimi seBhayibhile. UJason uthi, “Xa ndifika kumntu ophulaphulayo, ndiyazi ukuba andisebenzeli lize.”

Iimpazamo Ezinzulu

Kuthekani ke ukuba wenze impazamo enzulu—mhlawumbi isono esinzulu? UAna, oneminyaka eli-19 ubudala, wenza impazamo enjalo.a Uthi, “Ndaphoxa ibandla, intsapho yakowethu, ngokukodwa uYehova uThixo.” Ukuze iphele loo ntlungu, umele uguquke uze ufune uncedo lwamadoda amakhulu okomoya ebandleni. (Yakobi 5:14-16) UAna ukhumbula amazwi amncedayo omnye umdala: “Wathi phezu kwazo nje iimpazamo ezenziwa nguKumkani uDavide, uYehova wayesakulungele ukumxolela, ngenxa yoko uDavide wabuyela ezingqondweni. Oko kwandinceda.” (2 Samuweli 12:9, 13; INdumiso 32:5) Nawe kufuneka wenze konke onako ukuze uzomeleze ngokomoya. UAna uthi,“Ndibetha ndibuyelela kwincwadi yeeNdumiso, yaye ndinencwadi endibhala kuyo izibhalo ezikhuthazayo.” Emva kokuba umntu enze isono esinzulu, ekuhambeni kwexesha usenokubuyela ezingqondweni. IMizekeliso 24:16 ithi: “Kuba ilungisa lisenokuwa kasixhenxe, yaye ngokuqinisekileyo liya kuvuka.”

Ukubuyela Ezingqondweni

Kakade ke, unokukhathazwa nakukungaphumeleli kwizinto ezingenamsebenzi. Yintoni enokukunceda ulibale? Okokuqala, yamkele into yokuba wenze impazamo. UMichael uthi: “Kunokuba uzijonge njengomntu ohleli engaphumeleli, yazi into osilele kuyo nento ebangele oko. Ukuba wenza njalo, unokwenza bhetele kwixa elizayo.”

Kwakhona, kulumkele ukuzikhathaza ngokugqithiseleyo. Kukho “ixesha lokuhleka”—ibe oku kusenokuthetha nokuzihleka! (INtshumayeli 3:4) Ukuba udimazekile, yenza into oyincutshe kuyo, njengomsetyenzana wokuzonwabisa okanye uhlobo oluthile lomdlalo. ‘Ukutyeba emisebenzini emihle’—njengokwabelana nabanye ngokholo onalo—kunokukwenza uzidle ngesiqu sakho.—1 Timoti 6:18.

Okokugqibela, khumbula ukuba “uYehova unenceba nobabalo . . . Akayi kuqhubeka ehlab’ amadlala ngalo lonke ixesha.” (INdumiso 103: 8, 9) UJessica uthi, “Okukhona ndisondela kuYehova uThixo, ndiqiniseka ngakumbi ngenkxaso noncedo lwakhe kuzo zonke izinto endityhubela kuzo.” Ewe, kuyathuthuzela ukwazi ukuba phezu kwazo nje iintsilelo ozenzayo, uYihlo osezulwini ukuxabisile.

[Umbhalo osemazantsi]

[Umfanekiso okwiphepha 30]

Ukuba uyoyisakala kukwenza izinto abantu abazilindeleyo kuwe, thetha nabo ngentlonelo

[Umfanekiso okwiphepha 31]

Ukwenza izinto oyincutshe kuzo kunokukunceda uphelise intlungu yokungaphumeleli