Imbono YeBhayibhile

Ngaba Ukuvumisa Ngeenkwenkwezi Kunokukutyhilela Ikamva Lakho?

UNOKUBUPHUCULA njani ubomi bakho uze uphumelele kwimibandela yothando nemali? Abantu abaninzi babhenela ekuvumiseni ngeenkwenkwezi ukuze bafumane isicombululo. Mihla le izigidi ngezigidi zabantu ziya kumacandelo athetha ngeenkwenkwezi kumaphephandaba ngeenjongo zokuphucula ikamva lazo. Kwaneenkokeli zehlabathi ziyaziwa ukuba zixhomekeka kwiinkwenkwezi xa zisenza izigqibo.

Ngaba ukuvumisa ngeenkwenkwezi kunokuthenjwa? Abavumisi ngeenkwenkwezi balwenza njani uqikelelo lwabo? Ngaba amaKristu afanele avumele iinkwenkwezi zilawule ubomi bawo?

Yintoni Ukuvumisa Ngeenkwenkwezi?

Ngokutsho kweThe World Book Encyclopedia, ukuvumisa ngeenkwenkwezi “kusekelwe kwinkolelo yokuba izinto ezisesibhakabhakeni zimi ngendlela enokutyhila ubuntu bomntu okanye ikamva lakhe.” Abavumisi ngeenkwenkwezi bemi ngelithi indawo ezimi kuyo izijikelezi-langa nemiqondiso yeenkwenkwezi ngexesha azalwa ngalo umntu inokubuchaphazela ubomi bakhe.a Indawo ezimi kuyo ezi zinto zisesibhakabhakeni nangaliphi ixesha kuthiwa yihoroscope.

Ukuvumisa ngeenkwenkwezi kuyinkolelo endala. Kwiminyaka emalunga namawaka amane eyadlulayo, abantu baseBhabhiloni baqalisa ukwenza uqikelelo ngekamva ngokwendlela elimi ngayo ilanga, inyanga nezona zijikelezi-langa zihlanu zibonakala kakuhle. Bathi ezi zinto zisesibhakabhakeni zinamandla athile achaphazela indlela abantu abenza ngayo izinto. Kamva bafakela imiqondiso yeenkwenkwezi kuqikelelo lwabo.

Imbali Ende Yokusilela

IBhayibhile ibalaselisa unxibelelwano phakathi kweBhabhiloni nokuvumisa ngeenkwenkwezi, yaye izihlandlo eziliqela ibhekisela kubavumisi ngeenkwenkwezi abangamaBhabhiloni. (Daniyeli 4:7; 5:7, 11) Ngemihla yomprofeti uDaniyeli, ukuvumisa ngeenkwenkwezi kwakuxhaphake gqitha kwelamaKhaledi (eBhabhiloni) kangangokuba ukusebenzisa ibinzana elithi “amaKhaledi” kwakufana nje nokuthi abavumisi ngeenkwenkwezi.

UDaniyeli akazange abone impembelelo yokuvumisa ngeenkwenkwezi nje kuphela eBhabhiloni kodwa wabona nokusilela kwabavumisi ngeenkwenkwezi balapho ukuprofeta ngokuwa kweso sixeko. (Daniyeli 2:27) Phawula oko umprofeti uIsaya wakuchaza kusengaphambili ngendlela echanileyo kwiinkulungwane ezimbini ngaphambilana. UIsaya ubagculela ngelithi: “Mabeze kaloku oosiyazi bakuhlangule—nditsho abo bacalula iinkwenkwezi, abo bazoba amazulu ngezigaba zawo, baze bambulule baxele izinto ezizayo. Sobe babe nako nokuzihlangula.”—Isaya 47:13, 14, IBhayibhile yesiXhosa yowe-1996.

Kuyabonakala ukuba, abavumisi ngeenkwenkwezi baseBhabhiloni abazange bakwazi ukuprofeta ngokuwa kwesi sixeko kwanakwiiyure nje ezimbalwa ngaphambi kokuwa kwaso. Yaye naxa umgwebo kaThixo oqatha wabonakala kudonga lwebhotwe likaKumkani uBheleshatsare, aba bavumisi ngeenkwenkwezi boyiswa kukuchaza lo mbhalo untsonkothileyo.—Daniyeli 5:7, 8.

Nabanamhlanje abavumisi ngeenkwenkwezi baye boyiswa kukuprofeta ngeziganeko eziphawulekayo. Emva kokuhlolisisa uqikelelo olungaphezu kwama-3 000 olwenziwa ngabavumisi ngeenkwenkwezi, abaphengululi bezenzululwazi uR. Culver noPhilip Ianna bafikelela kwisigqibo sokuba li-10 ekhulwini kuphela elalichanile. Nawuphi na umhlalutyi ophum’ izandla wayenokwenza bhetele kunoko.

Kuyangqubana Neemfundiso ZeBhayibhile

Noko ke, abaprofeti abangamaHebhere, abazange bakuchase ukuvumisa ngeenkwenkwezi ngenxa nje yokusilela kwako okuphandle ukuchaza ikamva ngokuchanileyo. UMthetho kaThixo awawunika uMoses wawalumkisa ngokuthe ngqo amaSirayeli nxamnye nokuhlaba izihlabo. Kulo Mthetho kwathiwa: “Maze kungafunyanwa namnye kuwe . . . ovumisayo . . . nohlaba izihlabo. UYehova uyamcekisa wonke ubani ozenzayo ezi zinto.”—Duteronomi 18:10, 12.

Nakuba ukuvumisa ngeenkwenkwezi kungachazwa ngokuthe ngqo kweso sibhalo, kodwa nako kuphakathi kwezinto ezalelweyo. IEncyclopædia Britannica ithi ukuvumisa ngeenkwenkwezi “luhlobo lokuvumisa oluquka ukuxela kusengaphambili iziganeko zasemhlabeni nezabantu ngokujonga nokuchaza iinkwenkwezi, iLanga, iNyanga nezijikelezi-langa.” Zonke ke iintlobo zokuvumisa—enoba zisekelwe kwiinkwenkwezi okanye kwezinye izinto—zichasene nomthetho kaThixo. Ngoba? Kukho isizathu esibambekayo.

Kunokuba impumelelo nokusilela kwethu iyinxulumanise neenkwenkwezi, iBhayibhile itsho ngokucacileyo ukuba “loo nto ayihlwayelayo umntu, uya kuvuna kwayona.” (Galati 6:7) Siya kuphendula kuThixo ngezinto esizenzayo ekubeni sinenkululeko yokuzikhethela. (Duteronomi 30:19, 20; Roma 14:12) Enyanisweni, sisenokwehlelwa yingozi okanye sigule ngenxa yeziganeko ezingaphaya kwamandla ethu. Kodwa iZibhalo zithi ezo ntlekele zibangelwa ‘lixesha nesihlo esingenakubonwa kwangaphambili’ kungekhona ilishwa elisekelwe ezinkwenkwezini.—INtshumayeli 9:11.

Ngokuphathelele ulwalamano lwethu nabanye abantu, iBhayibhile isibongoza ukuba sambathe iimpawu ezifana nemfesane, ububele, ukuthobeka kwengqondo, ubulali, ukuzeka kade umsindo nothando. (Kolose 3:12-14) Ezi mpawu zibalulekile ukuze kwakhiwe ubuhlobo obungapheliyo kuze kuqiniswe imitshato. “Ukuzalwa ngexesha lenkwenkwezi efanayo” akusosikhokelo sinokuthenjwa sokukhetha iqabane lomtshato. Isazi ngengqondo uBernard Silverman wathetha ngamaqabane atshatileyo amalunga nama-3 500 azalwe ngexesha leenkwenkwezi ezifanayo, yaye nakuba kunjalo ali-17 kuwo ayeqhawule umtshato. Ukuzalwa kwala maqabane ngexesha leenkwenkwezi ezifanayo akuzange kuwathintele ekuqhawuleni umtshato.

Lizicacele elokuba ukuvumisa ngeenkwenkwezi akunakuthenjwa yaye kuyalahlekisa. Kubangele ukuba sibeke ityala kwiinkwenkwezi kunokulibeka kuthi xa senze iimpazamo. Ngaphezu kwako konke, kugatywa ngokuphandle liLizwi likaThixo.

[Umbhalo osemazantsi]