Ngaba Izizukulwana Ezilandelayo Ziya Kukwazi Ukuphila Emhlabeni?

NGUMBHALI KAVUKANI! EKHANADA

◼ Emva kweminyaka emine yokwenza uphando olucokisekileyo ngendlela eziphila ngayo izinto ezisemhlabeni, iqela labaphengululi nezazi ngemeko bume ezaziyinxelenye yelo phando zapapasha ingxelo yazo yokuqala. Nazi ezinye zezinto ezazifumanisayo: Kwisiqingatha sale kulungwane idluleyo, kuye kwafuneka ukutya okungakumbi, amanzi, izinto zokwakha ezokunxiba, amafutha esetyenziswa zizithuthi aye azichaphazela kanobom izinto ezisemhlabeni, nto leyo eyakwenza kube nzima kwizizukulwana ezilandelayo ukuphila emhlabeni. Inkqubo yemvelo yezityalo yokusasaza imbewu, eyokuhlaziya umoya neyezondlo zomhlaba yokondla izityalo zishokoxekile. Kwakhona iintlobo ngeentlobo zezinto eziphila kwesi sijikelezi langa sethu zisecicini lokuphela.

IGlobe and Mail newspaper yaseKhanada yathi: “Abantu bawonakalisa ngendlela engathethekiyo umhlaba kangangokuba usenokungakwazi ukuzihlaziya kwakhona nto leyo enokwenza kubekho izifo, kutshabalale amahlathi kwezinye indawo kungabikho nto iphilayo.” Eli phepha lolek’ umsundulo lathi: “Imihlaba yokulima, amahlathi, amathafa, amachweba, iintlanzi nezinye indawo ezicoca umoya, amanzi nezinto zokondla izinto eziphilayo ziyonakaliswa.” Isigqeba sabalathisi bolu phando bavuma ukuba ukulungiswa kwale ngxaki kuxhomekeke ebantwini ngokuba bakhe bathobe isantya kwindlela abazisebenzisa ngayo izinto ezisemhlabeni, bathi ukuze ilungiswe le ngxaki “kuza kufuneka babuyis’ unyawo kwindlela abayiphethe ngayo indalo.”

Ngaba umhlaba unokusindiswa? Ngokuqinisekileyo unako ukusindiswa. Ekubeni sinembopheleleko yokunyamekela indalo kaThixo, simele sizame ukuyiphatha kakuhle. (INdumiso 115:16) Noko ke, kukungenelela kukaThixo kuphela okuya kuguqula imeko bume yomhlaba ibuyele kwimeko yayo efanelekileyo. ‘Umenzi wethu Ozukileyo’ uthembisa ukuba uza kunikela ingqalelo yakhe emhlabeni “ukuze uwunike intabalala.” (Yobhi 35:10; INdumiso 65:9-13) Oku kuquka ulwandle nazo zonke izinto ezikulo kuba njengokuba uMdali, uYehova uThixo elawula ulwandle. (INdumiso 95:5; 104:24-31) Yaye into ayithembisileyo iza kwenzeka nakanjani kuba uThixo ‘akanakuxoka.’—Tito 1:2.

Kuyathuthuzela ukwazi ukuba izizukulwana ezilandelayo ziya kukwazi ukuphila emhlabeni. Esi sibakala senza bonke abantu abamoyikayo uThixo bamdumise ngobulumko, amandla nokulunga kwakhe size simdumise ngothando lwakhe kuzo zonke izinto azidalileyo.—INdumiso 150:1-6.

[Inkcazelo Ngomfanekiso okwiphepha 12]

Globe: NASA photo