Indlela Olunokulawulwa Ngayo Uxinezeleko
IBhayibhile ithetha ‘ngamaxesha amanqam ekunzima ukujamelana nawo.’ Nawe unokuyingqina into yokuba kungokunje siphila kumaxesha oxinezeleko.—2 Timoti 3:1.
NJENGOKO usazi, kulula ukucima umlilo ongephi kunokucima amadangatye. Ngokufanayo, kulula ukulawula uxinezeleko olungephi kunolo lumandla noluye lwakhelana kangangexesha elide. Omnye ugqirha uthi, “kubalulekile ukuba suku ngalunye siyiqhele into yokulawula uxinezeleko nangona sixakekile.”a
Ukulawula uxinezeleko suku ngalunye kunceda ngeendlela ezimbini. Okokuqala kunciphisa izinto ezinokulubangela. Kanti okwesibini, kusinceda silawule indlela esilujonga ngayo uxinezeleko olungapheliyo.
Ngaba iBhayibhile inokusikhokela ize isincede sihlangabezane noxinezeleko?
Inyaniso EseBhayibhileni Ibalulekile
Ngokufunda inyaniso eseBhayibhileni, sinokuhlaziywa size somelezwe ngamazwi oMdali wethu. ILizwi likaThixo linolwalathiso oluxabiseke gqitha. Ngokwenene, lizaliswe yinyaniso esiphumzayo kuxinezeleko! Le nyaniso inokusinceda ‘singothuki okanye sinkwantye’ yaye isinceda sikwazi ukuphumelela xa sijamelene noxinezeleko lwamihla le.—Yoshuwa 1:7-9.
IBhayibhile isinceda sinciphise uxinezeleko ngokusiqinisekisa ukuba uBawo wethu osezulwini, uYehova, “unomsa omkhulu nenceba.” (Yakobi 5:11) UPatricia, owakha wangunjingalwazi kwenye iyunivesithi yaseKhalifoniya uthi: “Eyona nto yandincedayo kukucinga ngokuthanda kukaThixo, nangezinto ezimangalisayo azenzileyo.”
Cinga ngamazwi kaYesu Kristu athuthuzelayo nangendlela awabaphatha ngayo abaphulaphuli bakhe ababecinezelwe nababexinezelekile. Wathi: “Yizani kum, nina nonke nisindwayo, nibulalekayo; ndoniphumza [ndonihlaziya ngokomoya].”—Mateyu 11:28-30, iBhayibhile yesiXhosa yowe-1996; izibiyeli zezabo.
Kanye ngokuvisisana namazwi akhe, uYesu wayengekho ngqwabalala. Kodwa wayicingela indlela abafundi bakhe ababevakalelwa ngayo esazi nokuba babedinwa maxa wambi, kangangokuba wada wenza nelungiselelo lokuba baphumle emva kokuba beshumayele. (Marko 6:30-32) Sinokuqiniseka ukuba uYesu, osele enguKumkani ezulwini uba nolwazelelelo ngathi xa siguliswa luxinezeleko. Ngenceba, usinika ‘uncedo ngexesha elifanelekileyo.’—Hebhere 2:17, 18; 4:16.
Indlela Okunokuba Luncedo Ngayo Ukuthetha
Ukuthetha kuyenye yezona zinto zibalulekileyo ezinokusinceda silawule uxinezeleko. IBhayibhile ifundisa oku: “Amacebo ayatshitsha apho kungekho gqugula, kodwa ngobuninzi babacebisi kukho okufezwayo.” (IMizekeliso 15:22) Ngenxa yoko, abantu abaninzi bafumanise ukuba xa bethetha namaqabane abo omtshato, abahlobo babo, okanye abo basebenza nabo, loo nto ibanceda banciphise uxinezeleko.
Olona hlobo lubalulekileyo nolufumaneka lula ‘lwegqugula’ kukuthandaza kuThixo. Ukuthandaza rhoqo kunokukunceda uphephe ‘ukuxhalela nantoni na.’ Abaninzi bafumanise ukuba ukuthandaza kuye kwabanceda bafumana “uxolo lukaThixo olungaphaya kokuqonda.” Ngokuvisisana nesithembiso seBhayibhile, ‘iintliziyo namandla engqondo,’ zabantu abanjalo ziyakhuselwa.—Filipi 4:6, 7.
Enye incwadi ethetha ngoxinezeleko ithi, “abantu abancedwa ngabanye abantu bayakwazi ukumelana noxinezeleko yaye bayaphila engqondweni kunabo bazama ukuzenzela yonk’ into.” Abakho abanye abantu abanokukuxhasa ukodlula abo banqula uThixo wokwenene, uYehova. Balandela isibongozo esifumaneka eBhayibhileni baze bahlanganisane rhoqo ngenjongo yokukhuthazana. (Hebhere 10:24, 25) Omnye umntu odla ngokuya kwezi ntlanganiso wathi: “Maxa wambi ndisebenza iiyure ezininzi yaye ndihlala ndixinezelekile. Kodwa qho xa ndisezintlanganisweni, kuthi xa kuqukunjelwa ngomthandazo ndibe sele ndihlaziyekile, lungasavakali ndawo nolo xinezeleko.”
Enye into ebalulekileyo, kukuba noburharha ukuze ukwazi ukumelana noxinezeleko. INtshumayeli 3:4 ithi kukho “ixesha lokulila nexesha lokuhleka.” Omnye ugqirha uthi kuyahlaziya ukuhleka yaye kusinceda sibe sempilweni kuba “umzimba uvelisa ichiza i-endorphins yaye linciphisa ukuveliswa kwe-adrenaline xa sihleka.” Enye inkosikazi ithi: “Umyeni wam ukhe athi kanye xa ndixinezeleke gqitha athethe into endihlekisayo yaye loo nto iyandinceda.”
Iimpawu Ezinciphisa Uxinezeleko
IBhayibhile ikhuthaza ukuba sibe neempawu ezinokusinceda sinciphise uxinezeleko. Ezi mpawu ziquka “uthando, uvuyo, uxolo, ukuzeka kade umsindo, ububele, ukulunga, ukholo, ubulali, ukuzeyisa,” yaye ‘zibizwa ngokuba zisisiqhamo somoya [kaThixo].’ Ngaphezu koko, iBhayibhile isikhuthaza ukuba sibususe “ubukrakra bolunya nomsindo nengqumbo nokumemeza nokutshabhisa.” Iphinda ithi: “Yibani nobubele omnye komnye, nibe nemfesane, nixolelane ngesisa.”—Galati 5:22, 23; Efese 4:31, 32.
Omnye ugqirha usichazela ngokubaluleka kokusebenzisa iimfundiso zeBhayibhile, ingakumbi kweli hlabathi siphila kulo. Uthi: “Ukubahlonela abantu kulunciphisa kakhulu uxinezeleko.” NeBhayibhile isinceda ukuba sihlakulele ukuthozama, phawu olo olusinceda sizazi izinto esikwaziyo ukuzenza.—Mika 6:8.
UThixo ulindele ukuba sithobeke size sizazi iintsilelo zethu, nalapho sinokuhamba sime khona ngokwamandla ethu engqondo nangokweemvakalelo, kwanokuba asinakukwazi ukwenza yonk’ into ebesingathanda ukuyenza. Kunzima kona kodwa simele sikufunde ukulandula xa kufuneka senze izinto esingakwaziyo ukuzenza.
Oku akuthethi ukuba xa uwasebenzisa onke amacebiso asekelwe eBhayibhileni ekuthethwe ngawo apha ngasentla akuzi kuxinezeleka. Eyona nyaniso yeyokuba uSathana uMtyholi akayi kubayeka abantu abanqula uThixo kuba ufuna ukubabonisa ukuba banokumshiya uThixo xa bexinezeleke kakhulu. (ISityhilelo 12:17) Kodwa kanye njengoko sibonile, zininzi iindlela asinceda ngazo uThixo ngexesha elifanelekileyo ukuze sikwazi ukunciphisa uxinezeleko nokumelana nalo.b
[Imibhalo esemazantsi]
a Xa uxinezeleko ixesha elide ude ugule, kunokuba kuhle ukuya kufuna unyango kugqirha.
b Ukuze ufumane iindlela ezingakumbi zokukwazi ukumelana noxinezeleko sicela ufunde ungcelele lwamanqaku anomxholo othi “Ukufumana Isiqabu Kuxinezeleko!” kuVukani! kaFebruwari 8, 2005 nakungcelele lwamanqaku olunomxholo othi “Coping With Today’s Hectic Pace,” kuVukani! wesiNgesi kaFebruwari 8, 2001.
[Ibhokisi ekwiphepha 9]
EZINYE IINDLELA ZOKUNCIPHISA UXINEZELEKO
● Musa ukulindela ukuba wena okanye abanye abantu niza kusoloko nizenza kakuhle izinto.—INtshumayeli 7:16.
● Qiniseka ngezinto ezibaluleke ngakumbi.—Filipi 1:10, 11.
● Yenza umthambo rhoqo.—1 Timoti 4:8.
● Bukela indalo kaYehova.—INdumiso 92:4, 5.
● Ziphe ixesha lokuba wedwa.—Mateyu 14:23.
● Lala uze uphumle ngokwaneleyo.—INtshumayeli 4:6.
[Umfanekiso okwiphepha 7]
Kubalulekile ukuzipha ixesha lokuthetha ukuze unciphise uxinezeleko
[Umfanekiso okwiphepha 7]
Ukuhlakulela iimpawu zobuthixo kuyanceda ekunciphiseni uxinezeleko