Kulindelwe Iinyikima Ezinkulu Ezingakumbi
UKUSUSELA oko kwenziwa izixhobo ezikwaziyo ukubala ubukhulu benyikima, izazinzulu ziye zabala amakhulukhulu eenyikima ezinkulu. Ezo zenzeka kude neendawo ezihlala abantu azixhalabisi kangako yaye namajelo eendaba akathethi kakhulu ngazo. Kwelinye icala umonakalo unokuba mkhulu xa inyikima ihlasela izixeko ezikhulu. Ukufa kwabantu nobungakanani bomonakalo owenzekayo kuxhomekeka kwinani labantu abahlala kuloo ndawo kwakunye nendlela abayilungele ngayo inyikima.
NgoJanuwari 12, 2010, iHaiti yahlaselwa yenye yezona nyikima zakha zankulu kwimbali, xa kubalwa inani labantu abaswelekayo kunye nomonakalo owenzekayo. Kodwa ke yayingeyonyikima yokuqala yaye asiyiyo kuphela inyikima enkulu eye yabakho kulo nyaka. Nazi ezinye zeenyikima eziye zabakho kwiinyanga zokuqala zowama-2010 nekuthiwa zazilingana okanye zingaphezulu kunaleyo yantlitha ikomkhulu laseHaiti.
NgoJanuwari 3: Inyikima yaseSolomon Islands, 7.1 Ngobukhulu
Le nyikima, ekuqaleni ekwakucingelwa ukuba yayingaphezu kuka-7.1, yabangela itsunami eyayihamba “namanzi olwandle [aziimitha ezimbini ukuya kwezintathu] ukuphakama.” ULoti Yates oligosa kwiofisi enceda ngamaxesha entlekele wathi xa ujonge ezantsi ukwinqwelo-moya wawubona “ubutyobo bodwa.” Lo kaYates uthi, kwilali yaseBainara ekwisiqithi saseRendova, kwatshabalala izindlu ezili-16 kwaza kwadilika nezinye ezininzi.
Ngaphambi kwale nyikima, kwaqala kwashukuma umhlaba. Abantu abaninzi bothuka baza babalekela ezintabeni. Ngenxa yoko basinda xa kwafika itsunami eyayibangelwe yinyikima enkulu eyenzeka kwiiyure ezimbini kamva.
NgoFebruwari 26: Inyikima yaseRyukyu Islands, eJapan, 7.0 Ngobukhulu
Le nyikima yenzeka nge-5:31 ekuseni kumgama weekhilomitha ezingama-80 ukusuka eNaha, eseOkinawa, eyinxalenye yeeRyukyu Islands, eJapan. Ngaphambili kwakukhutshwe izilumkiso ngetsunami kodwa zaphinda zarhoxiswa. Elinye ixhegwazana elalineminyaka engaphezu kwama-90 lihlala eOkinawa lathi le yeyona nyikima inkulu lakha layibona.
NgoFebruwari 27: Inyikima yaseChile, 8.8 Ngobukhulu
Le nyikima yayiyeyesihlanu ngobukhulu xa kubalwa iinyikima eziye zabakho ukususela ngowe-1900. Eyona nyikima yakha yankulu yenzeka eChile ngowe-1960. Yona kunye naleyo yantlitha ikomkhulu laseChile ngowe-1985 zabangela ukuba elo lizwe limisele imithetho yokwakha engqongqo.
Ngenxa yoko kwadilika izakhiwo ezimbalwa zaseSantiago xa kwenzeka inyikima kulo nyaka. Noko ke, kwenzakala amawaka abantu baza balahlekelwa yimpahla yabo. Kuthiwa kwasweleka abantu abangama-500, malunga nesiqingatha sabo babulawa yitsunami eyenzeka kunxweme lwaseChile.
NgoAprili 4: Inyikima yaseBaja California, eMexico, 7.2 Ngobukhulu
Le nyikima yayikumgama oziikhilomitha ezili-18 ukusuka eGuadalupe yaseVictoria, eMexico, neekhilomitha ezingama-47 ukusuka eMexicali. Lo ngummandla wasezilalini kwaye akuhlali bantu baninzi. Noko ke, ukushukuma komhlaba kwavakala kwizixeko needolophu ezininzi zaseMexico nasemazantsi eUnited States.
NgoMeyi 9: Inyikima yaseNorthern Sumatra, eIndonesia, 7.2 Ngobukhulu
Le nyikima yenzeka elwandle malunga neekhilomitha ezingama-217 ukusuka kwisixeko saseBanda Aceh esikumantla eIndonesia. Abantu abaninzi bayishiya imizi yabo yaye kwadlula ixesha elithile bengafuni ukubuyela kuba besoyika. Noko ke, akukho bantu bafayo.
Kulindelwe Ezingakumbi
Xa sijonge imbali yeenyikima ezinkulu eziye zantlitha umhlaba, kusengqiqweni ukulindela ukuba kubekho ezingakumbi kwiminyaka ezayo. IU.S. Geological Survey ithi: “Iinyikima ezinkulu ziseza kubakho.”
Okubangela umdla kukuba elinye iphephandaba lathi: “Iinyikima esisandul’ ukuzibona. . . azinakupheliswa ngabantu yaye zisikhumbuza ukuba zikho izinto ezingaphaya kwamandla ethu. Loo nto ayithethi kuthi sifanele sisonge izandla . . . , kodwa ithetha ukuthi sifanele silindele iintlekele zemvelo ezinkulu nesingenakukwazi ukuzithintela.”
Yonke le nto ikhumbuza abafundi beBhayibhile ngeziprofeto zayo ezikhankanya iinyikima njengenxalenye yomqondiso wemihla yokugqibela yale nkqubo yezinto.—Mateyu 24:3, 7; Marko 13:8; Luka 21:11.
[Imaphu ekwiphepha 20, 21]
(Ukuba ufuna inkcazelo ehlahlelwe kakuhle, yiya kwimpapasho)
Ezinye zeenyikima ezinkulu eziye zenzeka phakathi kukaJanuwari noMeyi
Mexico
Haiti
Chile
Japan
Indonesia
Solomon Islands