AmaNazi Akazange Akwazi Ukunditshintsha

Kubalisa uHermine Liska

NDANDINGUMNTWANA ofanayo nabanye abantwana de kwangowe-1938, xa uAdolf Hitler namaNazi baluthabathela kubo ulawulo lwelizwe lasekhaya iOstriya. Kungekudala, mna nabantwana endandifunda nabo sanyanzelwa ukuba sikhahlele uHitler ngokuthi, “Heil Hitler,” sicule iingoma zamaNazi size sibe ngamalungu eqela loLutsha lombutho kaHitler. Ndabetha ngenqindi etafileni ndisithi, ngunotshe lowo. Makhe ndikubalisele.

Mna noobhuti bam abane sakhulela kwifama yaseSt. Walburgen eseCarinthia eOstriya. Abazali bam yayinguJohann noElisabeth Obweger. Ngowe-1925, utata waba yiBibelforscher okanye uMfundi weBhayibhile, igama awayebizwa ngalo amaNgqina kaYehova ngeloo xesha. Umama wabhaptizwa ngowe-1937. Abazali bam bandifundisa imigaqo yeBhayibhile nokumthanda uThixo nendalo yakhe, ukususela ebuntwaneni. Ngokomzekelo, bandifundisa ukuba kuphosakele ukunqula nawuphi na omnye umntu. UYesu Kristu wathi: “NguYehova uThixo wakho omele umnqule, yaye nguye yedwa omele unikele inkonzo engcwele kuye.”—Luka 4:8.

Abazali bam babenobubele. Kwakuhlala kukho iindwendwe ekhaya yaye abasebenzi basezifama abaninzi babehlala ekhaya. Sasikuthanda ukucula—isiko elisathandwa nanamhl’ oku eCarinthia—yaye sasidla ngokuncokola ngeBhayibhile. Ndisayikhumbula nangoku intsapho yakowethu ihleli etafileni kwigumbi lokutyela rhoqo ngentsasa yangeCawa ukuze ixubushe iBhayibhile.

Yaphel’ Inkululeko Kwaqala Uloyiko

IJamani yaqalisa ukulawula elaseOstriya xa ndandiza kuba neminyaka esibhozo ubudala. Ukususela ngoko, abantu kwanyanzeleka ukuba bathobele amaNazi yaye kungekudala bonke abemi kwafuneka bakhahlele besithi “Heil Hitler” xa bebulisa abanye. Andizange ndivume ukubulisa ngale ndlela kuba ngesiJamani igama elithi “heil” lithetha “usindiso” yaye ndandingazukuthi usindiso luvela kuHitler. Ndandisazi ukuba uMsindisi wam nguYesu Kristu. (IZenzo 4:12) Ngenxa yoko, ootitshala nabantwana endandifunda nabo babedla ngokuhlekisa ngam. Xa ndandineminyaka eli-11 ubudala, inqununu yesikolo endandifunda kuso yathi: “Hermine, ndiza kukuhlisela uye kwa-A. Soze ndimnyamezele umntwana onenkani aph’ eklasini yam!”

Ekubeni mna noobhuti bam sasisala ukukhahlela uHitler, uTata wasiwa enkundleni. Kwathiwa makatyobele uxwebhu olwalusithi uyalulahla ukholo lwakhe. Olu xwebhu lwalukwathi uza kufundisa abantwana bakhe iimfundiso zamaNazi. Ngenxa yokuba engazange avume ukulutyobela, sohluthwa kuye noMama yaye mna ndathunyelwa kwisikolo esasikumgama weekhilomitha ezingama-40 ukusuka ekhaya ukuze ndiye kufundiswa ulwazi olutsha.

Kungekudala ndakhumbula ekhaya yaye ndandisoloko ndikhala. Ngeloo xesha inenekazi elaliphethe eso sikolo lazama ukundinyanzela ukuba ndibe lilungu lombutho woLutsha lukaHitler kodwa ke latsho phantsi. Namanye amantombazana azama ukuphakamisa isandla sam sasekunene xa kukhahlelwa iflegi yamaNazi kodwa ke nawo akazange aphumelele. Ndandiziva ngendlela ababeziva ngayo abakhonzi bakaThixo bamandulo abathi: “Makube lee, kuthi, ukushiya uYehova ukuze siye kukhonza abanye oothixo.”—Yoshuwa 24:16.

Abazali bam babengavunyelwa ukuba bandityelele. Noko ke, babedla ngokwenza indlela yokuba bandibone xa ndisendleleni eyayo naxa ndisesikolweni. Loo nto yandikhuthaza ukuba ndiqhubeke ndinyanisekile kuYehova. Ngeny’ imini utata wandinika iBhayibhile encinane ndaza ndayifihla ebhedini yam. Ndandingahlukani nayo nangona kwakufuneka ndiyifihle xa ndiyifunda. Phofu ngeny’ imini ndaphantsa ndabhaqwa kodwa ndathath’ iBhayibhile yam ndayithi tshwa phantsi kwengubo.

Ukusiwa Kwikhaya Loonongendi

Ekubeni abasemagunyeni bengazange bakwazi ukundenza nditshintshe iinkolelo zam, bakrokrel’ ukuba abazali bam babesandifundisa. Ngenxa yoko, ngoSeptemba wowe-1942 ndafakwa kuloliwe owawusiya eMunich, eJamani ndisisiwa eAdelgundenm, isikolo samaKatolika esasikwalikhaya loonongendi. Endleleni eya apho, oonongendi bayibhaqa iBhayibhile yam baza bayihlutha.

Sekunjalo, ndandizimisele ukubambelela kwiinkolelo zam ibe ndala ukuya ecaweni. Xa ndaxelela omnye woonongendi ukuba abazali bam babedla ngokundifundela iBhayibhile rhoqo ngeCawa, yandothusa gqitha into awayenzayo. Wandinika iBhayibhile yam. Kuyabonakala ukuba oko ndakuthethayo kwamchukumisa. Wade wandicela ukuba ndimfundele yona.

Ngeny’ imini utitshala wam wathi: “Hermine, awungomYuda kodwa uliJamani ndikubona ngeenwele namehlo akho. UYehova nguThixo wamaYuda.”

Ndaphendula ndathi: “UYehova wenza zonke izinto. NguMdali wethu sonke!”

Nenqununu yakhe yazama ukundenza nditshintsh’ ingqondo. Ngeny’ imini yathi: “Hermine, omnye woobhuti bakho usemkhosini. Ungumzekelo omhle yaye nawe ufanele umlandele!” Ndandisazi ukuba omnye woobhuti bam wayesemkhosini kodwa ndandingafuni ukulandela umzekelo wakhe.

Ndathi: “Andingomlandeli kabhuti wam. Ndingumlandeli kaYesu Kristu.” Inqununu yandigrogrisa ngokundisa kwisibhedlele sabantu abagula ngengqondo. Kodwa ke ayizange ide iyenze loo nto.

Ngehlobo lowe-1943, iMunich yahlaselwa yaye abantwana baseAdelgunden babalekiselwa emaphandleni. Ngelo xesha ayesoloko enkenteza ezindlebeni amazwi kamama athi: “Mntanam ukuba kuyenzeka sahlukaniswe uze ungazifumani neeleta zam, ukhumbule ukuba uYehova noYesu baya kuba nawe. Abasoze bakulahle. Ngoko uz’ uqhubeke uthandaza.”

Ukuvunyelwa Ukuba Ndibuyele Ekhaya

NgoMatshi 1944 ndabuyiselwa eAdelgunden, apho sasichitha phantse lonke ixesha lethu—imini nobusuku—sikwiindawo ezikhuselekileyo ngenxa yokuba iMunich yayihlaselwa ngeebhombu. Ngeloo xesha abazali bam babesoloko becela ukuba ndibuyiselwe kubo. Eso sicelo sade samkelwa yaye ndabuyela ekhaya ngasekupheleni kuka-Aprili 1944.

Xa kwafika ixesha lokuba ndiye kuthi ndlela-ntle kwinqununu, yathi: “Uze usibhalele xa ufika ekhaya. Ungatshintshi mntanam.” Wayetshintshe ngokwenene! Ndeva ukuba emva nje kokuba ndihambile, amantombazana asithoba nonoongendi abathathu babulawa yibhombu. Hayi indlela ebuhlungu ngayo imfazwe!

Kwelinye icala, kwandonwabisa gqitha ukubuyela kwintsapho yasekhaya. NgoMeyi 1944 njengoko imfazwe yayisaqhubeka, ndabhaptizelwa ebhafini ngaloo ndlela ndibonisa ukuba ndizahlulele kuYehova. Xa yaphelayo ngowe-1945, ndangena kwinkonzo yexesha elizeleyo ndifuna ukufundisa abanye ngeendaba ezilungileyo zoBukumkani bukaThixo, ekuphela kwethemba loluntu loxolo nonqabiseko.—Mateyu 6:9, 10.

Ngowe-1950, ndadibana noErich Liska igatyana lomfana laseVienna eOstriya elalingumveleli ohambahambayo wamaNgqina kaYehova. Ngowe-1952 satshata yaye kangangexeshana ndandihamba noErich njengoko wayetyelela amabandla ukuze omeleze ukholo lwawo.

Umntwana wethu wokuqala wazalwa ngowe-1953 saza kamva safumana abanye ababini. Ngenxa yomsebenzi ongakumbi ekwakufuneka siwenze, sayeka ukushumayela ngokusisigxina ukuze sikhulise abantwana bethu. Ndiye ndafunda ukuba uThixo akasoze kodwa uya kukunika amandla. Nam akazange andiphoxe. UYehova uye wandithuthuzela waza wandinika amandla, ingakumbi emva kokusweleka komyeni wam ngowama-2002.

Xa ndikhangela emva kubomi bam, ndibabulela ngokungazenzisiyo abazali bam ngokundifundisa ukuba ndimthande ngentliziyo yonke uThixo neLizwi lakhe elibhaliweyo, elingumthombo wobulumko bokwenene. (2 Timoti 3:16, 17) Kodwa ngaphezu kwako konke, ndibulela uYehova, oqhubeka endinika amandla okumelana namahla-ndinyuka obu bomi.

[Amagama acatshulweyo akwiphepha 19]

“Andingomlandeli kabhuti wam . . . ndingumlandeli kaYesu Kristu”

[Umfanekiso okwiphepha 19]

Ndikunye nentsapho yakowethu kwifama yethu eSt. Walburgen

[Imifanekiso ekwiphepha 19]

Abazali bam uElisabeth noJohann Obweger

[Inkcazelo]

Both photos: Foto Hammerschlag

[Umfanekiso okwiphepha 20]

Ndikunye nomyeni wam uErich