Ngaba Umntu Umele Aye ETempileni, ENgcweleni, Okanye ECaweni Ukuze Athandaze KuThixo?

ABANTU abaninzi bahlala besiya kwizakhiwo zonqulo ukuze bathandaze. Abanye bahamba imigama emide besiya kunqula kwezo ndawo. Ngaba nawe uvakalelwa ukuba umele uye etempileni, engcweleni, okanye ecaweni ukuze uthandaze? Okanye uvakalelwa kukuba ungathetha noThixo nanini na okanye naphi na? Ithini iBhayibhile?

Ekuqaleni kwabantu, kwakungekho zakhiwo zonqulo. Ekuphela kwendawo eyayikho ngumyezo omhle owawulikhaya labazali bethu bokuqala. (Genesis 2:8) Babekwazi ukuthetha noMdali wabo, uYehova uThixo apho kuwo. Kamva, njengoko abantu babesanda, amadoda alungileyo, njengoNowa, “ahamba noThixo oyinyaniso”—onke engenazo izakhiwo zonqulo. (Genesis 6:9) Ayemthanda uYehova ngoko esoloko ethandaza, naye ke ekholiswa ngawo.

UThixo Akahlali Kwizakhiwo Ezenziwe Ngezandla

Amadoda athembekileyo amandulo ayesazi ukuba uMdali womhlaba nendalo iphela akahlali kwizakhiwo ezenziwe ngabantu. UKumkani uSolomon osisilumko wabuza: “Ngaba ngokwenene uThixo uya kuhlala noluntu emhlabeni?” Echan’ ucwethe waba sele esithi: “Khangela! Izulu, ewe, izulu lawo amazulu, alikulingene.”. (2 Kronike 6:18) Yinyaniso ukuba, amaSirayeli amandulo ayenomnquba aze kamva akha itempile awayehlanganisana kuyo xa kukho imithendeleko yaminyaka le yoMthetho kaThixo. (Eksodus 23:14-17) Sekunjalo, ayekwazi ukuthandaza kuThixo nanini na—xa esalusa imihlambi, esemasimini, xa ekunye njengentsapho, okanye ehleli odwa.—INdumiso 65:2; Mateyu 6:6.

Nathi ke, sinokuthandaza kuThixo naphi na, nanini na. Umzekelo wethu, uYesu Kristu, wayedla ngokuya ngasese kwiindawo epholileyo aze athandaze. (Marko 1:35) Ngokomzekelo, ngesinye isihlandlo “waphuma waya kuthandaza entabeni, yaye waqhubeka ethandaza kuThixo ubusuku bonke.”—Luka 6:12.

NjengomYuda, uYesu wayesiya kwimithendeleko eyayisiba setempileni eYerusalem. (Yohane 2:13, 14) Phezu kwako nje oko, wathi kwakuya kubakho ilixa apho itempile yayingasayi kuba yindawo yonqulo lokwenyaniso. Xa wayethetha nebhinqa elingumSamariya kufutshane nentaba eseSamariya eyayinetempile yalapho, uYesu wathi: “Liyeza ilixa ekuya kuthi ngalo ningamnquli uBawo kule ntaba okanye eYerusalem.” Wongeza wathi abanquli bokwenyaniso “baya kumnqula uBawo ngomoya nenyaniso.”—Yohane 4:21, 23.

Ewe, eyona nto yayikhathalelwe nguYesu yayilunqulo lwenyaniso olusuka entliziyweni ngaphezu kwezitena nodaka. Ngaba oko kwakuthetha ukuba abalandeli bakaYesu, ababizwa ngokuba ngamaKristu kamva, babeza kumnqula ngasese kuphela uThixo? (IZenzo 11:26) Akuthethwa loo nto, ibe zininzi izizathu zoko.

Abantu BakaThixo Bayintsapho Yokomoya

Abakhonzi bokwenene bakaThixo bayintsapho—intsapho yokomoya. (Luka 8:21) Xa intsapho iqhuba kakuhle izinto ezininzi izenza kunye, njengokutya kunye ibe oko kuyayomeleza. Kunjalo ke nangentsapho yokomoya. Iintlanganiso zamaKristu zifana nesidlo sokomoya kuba zisondla ngaphakathi ngoxa zisomeleza amaqhina okomoya. Umpostile uPawulos ongumKristu wathi: “Masinyamekelane, sivuselelane eluthandweni nasemisebenzini emihle, singakutyesheli ukuhlanganisana kwethu ndawonye, njengoko kulisiko labathile ukwenjenjalo, kodwa masikhuthazane.”—Hebhere 10:24, 25.

Ngoko ke, abanquli bokwenyaniso bayaqonda ukuba ibandla linendima ebalulekileyo, kuba linceda ilungu ngalinye libe neempawu zamaKristu ebelingenakuzifumana xa lilodwa. Ezi mpawu ziquka uthando, ukuxolela, ububele, ululamo, noxolo.—2 Korinte 2:7; Galati 5:19-23.

AmaKristu enkulungwane yokuqala ayehlanganisa phi ukuze anqule anandiphe nobudlelane? Ayedla ngokuhlanganisa emizini. (Roma 16:5; Kolose 4:15) Ngokomzekelo, xa wayebhalela omnye umKristu, kuloo leta umpostile uPawulos wathetha ‘ngebandla elisendlwini yalo.’a—Filemon 1, 2.

Nanamhlanje, abakhonzi bakaThixo abafuni zakhiwo ziyokoyoko bafuna nje ezifanelekileyo eziza kulungela bonke abezileyo. AmaNgqina kaYehova anezo ndawo, azibiza ngokuba ziiHolo zoBukumkani. Eneneni, kusenokwenzeka ukuba ikho iHolo yoBukumkani kwindawo ohlala kuyo. Ezi zakhiwo zihlala zixakekile yaye azinabugocigoci neentlanganiso eziqhutywa apho zilula—ziquka ingoma, umthandazo, neengxubusho zeBhayibhile.

AmaNgqina kaYehova ayixabisa gqitha imithandazo yangasese, amathuba okuthetha kunye noThixo. Ngoko ke, mihla le ayathandaza, njengeentsapho nanjengabantu ngabanye ngasese. UYakobi 4:8 uthi, “Sondelani kuThixo, naye uya kusondela kuni.”

[Umbhalo osemazantsi]

NGABA WAKHA WAZIBUZA?

● Ngaba uThixo uhlala kwizakhiwo ezenziwe ngabantu?—2 Kronike 6:18.

● Kuphi apho uYesu wathandaza khona ubusuku bonke?—Luka 6:12.

● Kutheni amaKristu okwenyaniso ehlanganisana nje?—Hebhere 10:24, 25.

[Amagama acatshulweyo akwiphepha 15]

Ngaba imithandazo iviwa bhetele xa ukwiindawo ezithile?