Ukwalusa Umhlambi KaThixo Ngokumanyeneyo
Bambi babuza bathi: ‘Ibandla lazwenibanzi lamaNgqina kaYehova lilawulwa njani?’ Siphendula sisithi: Ilungiselelo lokulawula lilandela umzekelo webandla lamaKristu enkulungwane yokuqala.
Kwiminyaka yee-1870 uCharles T. Russell nezinxulumani zakhe baqalisa ukusasaza imiphumo yokufundisisa kwabo iBhayibhile besebenzisa iintetho noncwadi. Kweli lizwe jikelele, abo banyula ukunxulumana nalo msebenzi bakhangela kuRussell nakwizinxulumani zakhe ezisondeleyo njengequmrhu lamadoda anamava kunene ekwenzeni umsebenzi weNkosi nanokuthi kuwo bafune isiluleko ngokubhekisele kwimisebenzi yabo.
Ngowe-1884 kwasekwa iZion’s Watch Tower Tract Society ngaphantsi kwemithetho yeCommonwealth of Pennsylvania. URussell nezinxulumani zakhe ezinembopheleleko babebandakanyeke ngokupheleleyo ekwalathiseni lo Mbutho kwanemisebenzi yaBafundi BeBhayibhile. Ngowe-1909 ikomkhulu labo balifudusela eBrooklyn, eNew York. Ukutyhubela iminyaka abalathisi beWatch Tower Society namanye amadoda anxulumene nayo ngokusondeleyo, afanelekileyo ngokomoya nathanjisiweyo ebekhonza njengequmrhu elilawulayo lamaNgqina kaYehova.
IQumrhu Elilawulayo libunjwe liqela lamadoda angamaKristu athanjisiweyo (ali-13 ngowe-1986), kuquka asi-7 asebenza kwibhodi yabalathisi beWatch Tower Society. Aba bongamela imisebenzi yazwenibanzi yamaNgqina kaYehova. Abaphefumlelwanga nguThixo yaye ngenxa yoko bayazenza iimpazamo, kodwa bakholosa ngeLizwi likaThixo elingaphazamiyo njengelona gunya liphakamileyo emhlabeni, kwanamava obomi bonke bokuzithoba ekuthandeni kukaThixo. Ngamnye unengxelo yeminyaka engaphezu kwama-40 kubulungiseleli bexesha elizeleyo namaNgqina kaYehova.
IQumrhu Elilawulayo longamela oko uMbutho ukupapashayo. Okubhalwayo kusekelwa ekondelweni kweemfuno zokomoya zomhlambi ibe kungumphumo wokufundisisa ngokucokisekileyo nangomthandazo nokuphanda eLizwini likaThixo. Njengoko la madoda eqhubeka efundisisa iBhayibhile aze ondele ukuphunyezwa okuhambela phambili kweenjongo zikaThixo, ukuzaliseka kwesiprofeto kwiziganeko zehlabathi nemeko yabantu bakaThixo ehlabathini, maxa wambi asenokukufumanisa kuyimfuneko ukwenza uhlengahlengiso olukhanyisa ngakumbi ekuqondeni iimfundiso ezithile. Ngale ndlela, ulwazi lwenyaniso lwanda ngakumbi nangakumbi.—INdumiso 97:11; IMizekeliso 4:18; Daniyeli 12:4.
IQumrhu Elilawulayo liye lamisela iKomiti Yesebe ebunjwe ngamadoda amathathu okanye angakumbi afanelekileyo ngokomoya kwisebe ngalinye kwangaphezu kwama-90 emhlabeni ngokubanzi ukuba yongamele imisebenzi kumazwe angaphezu kwama-200 namaqela eziqithi. Amasebe ayanxibelelana namabandla angaphantsi kolwalathiso lwawo. Kukho unxibelelwano oluthe rhoqo phakathi kweQumrhu Elilawulayo neeKomiti zamaSebe, ibe amalungu eQumrhu Elilawulayo ngokobuqu atyelela amasebe amaninzi nyaka ngamnye ukuze ahlale ezazi iimeko.
La madoda akazonkosi zokholo lwabanye kodwa angabalungiseleli abasebenza nzima ukuze abanye abaninzi bafunde ngeLizwi likaThixo. Awakhonzi ukuze azuze ngokwemali, kodwa iimfuno zawo zokuphathekayo zilungiselelwa ngendlela efanayo nawo onke amalungu eentsapho zaseBheteli. Ubungqina bokuba akhonza ngokuthembekileyo bubonwa kwinzondelelo, kumanyano, kwimilinganiselo ephakamileyo yokuziphatha nokunyaniseka kwiimfundiso zeBhayibhile okubonakaliswa ngamaNgqina kaYehova zwenibanzi.—1 Korinte 3:5-9; 4:1, 2; 2 Korinte 1:24; 3:1-3; 1 Petros 5:2, 3.
• Liliphi ilungiselelo lokulawula elavelayo?
• Ngoobani abakhonza kwiQumrhu Elilawulayo namhlanje, ibe ziyintoni iimbopheleleko zabo?
• Umsebenzi wonganyelwa njani kwamanye amazwe?
[Imaphu ekwiphepha 26]
(Ukuba ufuna inkcazelo ehlahlelwe kakuhle, yiya kwimpapasho)
Imimandla amaNgqina kaYehova enza ukuthanda kukaThixo kuyo
[Imifanekiso ekwiphepha 26]
Abongameli beWatch Tower Society
UC. T. Russell, 1884-1916
UJ. F. Rutherford, 1916-1942
UN. H. Knorr, 1942-1977
UF. W. Franz, 1977-
[Imifanekiso ekwiphepha 27]
Iiofisi zamasebe ezimbalwa kwezingaphezu kwama-90 apho imisebenzi yamaNgqina kaYehova zwenibanzi yalathiswa khona
EKhanada
EZambia
EJamani
EJapan
EOstreliya
EBrazil