Isahluko 9
Ubomi BukaYesu Esengumntwana Ekhaya
NGETHUBA uYesu ekhula eNazarete, isisixeko esincinane nesingabalulekanga. Ikwilizwe leenduli lommandla obizwa ngokuba yiGalili, ongekude kangako ukusuka kwiNtlambo entle yeYizereli.
Xa uYesu, mhlawumbi oneminyaka emibini ubudala, eziswa apha esuka eYiputa nguYosefu noMariya, ngokucacileyo ungokuphela komntwana kaMariya. Kodwa akudluli thuba lide engokuphela komntwana wabo. Ekuhambeni kwexesha, kuzalwa uYakobi, uYose, uSimon noYuda, baze kwakhona uMariya noYosefu babe ngabazali bamantombazana. Ubuncinane ekugqibeleni uYesu, walekelwa ngabantakwabo noodade wabo abathandathu.
UYesu ukwanezinye izalamane. Sele sisazi ngomza wakhe omdala kunaye uYohane, ohlala kumgama ozikhilomitha ezininzi kwelakwaYuda. Kodwa ohlala kufuphi eGalili nguSalome, ngokucacileyo ongudade boMariya. USalome wendele kuZebhedi, ngoko oonyana babo ababini, uYakobi noYohane, baya kuba ngabaza bakaYesu. Asazi nokuba, ekukhuleni kwakhe uYesu wachitha ixesha elininzi nala makhwenkwe kusini na, kodwa kamva baba zizinxulumani ezisondeleleneyo.
Kufuneka uYosefu asebenze nzima ukuze axhase intsapho yakhe ekhulayo. Ungumchweli. UYosefu ukhulisa uYesu njengonyana wakhe, ngoko uYesu ubizwa ngokuba ‘ungunyana wengcibi yokwakha.’ UYosefu ufundisa uYesu ukuba naye abe ngumchweli, yaye uYesu uza kakuhle gqitha. Kungenxa yoko le nto kamva abantu besithi ngoYesu, ‘Lo yingcibi yokwakha.’
Ubomi bentsapho kaYosefu busekelwe kunqulo lukaYehova uThixo. Ngokuvisisana noMthetho kaThixo, uYosefu noMariya bafundisa abantwana babo izinto ezingokomoya ‘ekuhlaleni kwabo endlwini yabo, ekuhambeni kwabo ngendlela, ekulaleni kwabo nasekuvukeni kwabo.’ Kukho indlu yesikhungu eNazarete, yaye sinokuqiniseka ukuba uYosefu kunye nentsapho yakhe baya rhoqo ukuya kunqula apho. Kodwa alithandabuzeki elokuba bafumana uyolo olukhulu kakhulu kuhambo lokuya rhoqo etempileni kaYehova eseYerusalem. Mateyu 13:55, 56; 27:56; Marko 15:40; 6:3; Duteronomi 6:6-9.
▪ Bangaphi ubuncinane abantakwabo Yesu noodade wabo abamalekelayo, yaye ngoobani amagama abanye babo?
▪ Ngoobani abaza bakaYesu abathathu abaziwa kakuhle?
▪ Ekugqibeleni nguwuphi umsebenzi wokuziphilisa uYesu awenzayo, yaye ngoba?
▪ Yiyiphi imfundiso ebalulekileyo uYosefu ayidlulisela kwintsapho yakhe?