Icandelo 7
Injongo KaThixo Sele Iza Kuzaliseka
1, 2. Kutheni sinokuqiniseka ukuba uThixo uya kwenza okuthile ukuphelisa ubungendawo nokubandezeleka?
Nangona uThixo eye wavumela ukungafezeki nokubandezeleka ithuba elide ngokwembono yabantu, akayi kuzivumela iimeko ezimbi ziqhubeke ngonaphakade. IBhayibhile isixelela ukuba uThixo unexesha alimisileyo lokuvumela ezi zinto zenzeke.
2 “Into yonke inexesha elimisiweyo.” (INtshumayeli 3:1) Xa ixesha uThixo alimisileyo lokuvumela ubungendawo nokubandezeleka lifikelela esiphelweni salo, uya kwandula ke angenelele kwimicimbi yabantu. Uya kubuphelisa ubungendawo nokubandezeleka aze azalisekise injongo yakhe yantlandlolo yokuba lo mhlaba uzaliswe yintsapho yabantu efezekileyo neyonwabileyo enandipha uxolo olupheleleyo nonqabiseko lwezoqoqosho kwiimeko zeParadisi.
Imigwebo KaThixo
3, 4. Incwadi yeMizekeliso iyichaza njani imiphumo yokungenelela kukaThixo?
3 Phawula ezimbalwa zeziprofeto ezininzi zeBhayibhile ezichaza oko kungenelela kukaThixo, oko kukuthi, imiphumo yemigwebo yakhe, kuya kukuthetha kungekudala kwintsapho yabantu:
4 “Abathe tye baya kulima ilizwe, basale kulo abagqibeleleyo, banqunyulwe ezweni abangendawo, abanginizayo bancothulwe kulo.”—IMizekeliso 2:21, 22.
5, 6. INdumiso 37 ikubonisa njani oko kuya kwenzeka xa uThixo engenelela?
5 “Abenzi bobubi baya kunqunyulwa; ke bona abamthembayo uYehova, baya kulidla ilifa ilizwe. Kusaya kuba mzuzwana, angabikho ongendawo . . . Ke bona abalulamileyo baya kulidla ilifa ilizwe, baziyolise ngobuninzi boxolo.”—INdumiso 37:9-11.
6 “Thembela kuYehova, ugcine indlela yakhe; wokuphakamisa, ulidle ilifa ilizwe; ekunqanyulweni kongendawo wobonela. Gcina ogqibeleleyo, ukhangele othe tye; ngokuba izivela-mva zezomntu woxolo. Ke bona abangendawo batshatyalaliswa kuphele; izivela-mva zongendawo ziyanqanyulwa.”—INdumiso 37:34, 37, 38.
7. ILizwi likaThixo lisinika siphi isiluleko esisengqiqweni?
7 Ngoko ke, xa sijonga ikamva elimangalisayo eliya kufunyanwa ngabo balamkelayo ilungelo loMdali onamandla onke lokusilawula, sibongozwa ngala mazwi: “Intliziyo yakho mayiyibambe imithetho yam; kuba iya kukongeza imihla emide, neminyaka yobomi, noxolo.” Enyanisweni, abo bakhetha ukwenza ukuthanda kukaThixo baya kongezelwa ubomi obungunaphakade! Ngaloo ndlela, iLizwi likaThixo liyasiluleka: “Kholosa ngoYehova ngentliziyo yakho yonke, ungayami okwakho ukuqonda. Uze umazi yena ezindleleni zakho zonke; wowulungelelanisa umendo wakho.”—IMizekeliso 3:1, 2, 5, 6.
Ulawulo LukaThixo Ngokusuka Ezulwini
8, 9. UThixo uya kuwucoca njani umhlaba?
8 UThixo uya kuwenza lo msebenzi wokucoca umhlaba ngoyena rhulumente ubalaseleyo uluntu olunokuze lube naye. Ngurhulumente obonisa ubulumko basezulwini ngenxa yokuba ulawula usezulwini ngaphantsi kolwalathiso lukaThixo. Yaye obo Bukumkani basezulwini buya kususa zonke iintlobo zolawulo lwabantu emhlabeni. Abantu abasayi kuphinda bakhethe ukuzama ukuzilawula ngaphandle koThixo.
9 Kule nkalo isiprofeto sikaDaniyeli 2:44 sithi: “Ngemihla yabo kumkani [oorhulumente banamhlanje], uThixo wamazulu uya kumisa ubukumkani [ezulwini] obungayi konakala naphakade. Obo bukumkani abuyi kusala nabantu bambi [abantu abayi kuphinda bavunyelwe balawule ngaphandle koThixo]; buya kuzicola buzigqibe zonke ezo zikumkani [ezikhoyo ngoku], bona bume ngonaphakade.”—Bona kwaneSityhilelo 19:11-21; 20:4-6.
10. Kutheni sinokuqiniseka ukuba ngaphantsi koBukumkani bukaThixo basezulwini, abasayi kuphinda babekho abalawuli abanganyanisekanga?
10 Ngaloo ndlela, uluntu aluyi kuphinda lulawulwe ngabalawuli abanganyanisekanga, kuba emva kokuba uThixo eyiphelisile le nkqubo, ulawulo lwabantu ngaphandle kwakhe aluyi kuphinda lubekho. Yaye uBukumkani obulawula busezulwini abuyi konakaliswa, ekubeni inguThixo uMyili nomLondolozi wabo. Kunoko, buya kusebenzela ukwanelisa izilangazelelo zabantu obubalawulayo. Ukuthanda kukaThixo ngoko kuya kwenziwa emhlabeni njengokuba kusenziwa ezulwini. Kungenxa yoko uYesu wayenokufundisa abafundi bakhe ukuba bathandaze kuThixo bathi: “Mabufike ubukumkani bakho. Makwenziwe ukuthanda kwakho nasemhlabeni, njengokuba kusenziwa emazulwini.”—Mateyu 6:10.
Sisondele Kangakanani?
11. Sizifumana phi eBhayibhileni iziprofeto eziya kusinceda siqonde ukuba sisondele kangakanani ekupheleni kwale nkqubo yezinto?
11 Sisondele kangakanani kwisiphelo sale nkqubo inganelisiyo yezinto nasekuqaliseni kwehlabathi elitsha likaThixo? Iziprofeto zeBhayibhile zisinika impendulo ngokucacileyo. Ngokomzekelo, uYesu wakuxela kwangaphambili oko simele sikukhangele ukuze siqonde ukuba sindawoni na, ngokutsho kweBhayibhile, ‘ekuphelisweni kwephakade eli.’ Oku kubhalwe kuMateyu isahluko 24 nesama-25, uMarko 13, noLuka 21. Kwakhona, njengokuba kubhaliwe kweyesi-2 kuTimoti isahluko 3, umpostile uPawulos waxela kwangaphambili ukuba kwakuya kubakho ixesha elaliya kubizwa ngokuba ‘yimihla yokugqibela’ xa iziganeko ezahlukahlukeneyo zaziya kubonisa ngokubhekele phaya ukuba siphi na kumsinga wexesha.
12, 13. UYesu noPawulos bathini ngexesha lesiphelo?
12 UYesu wathi eli xesha laliya kuqalisa ngezi ziganeko: “Uhlanga luya kuvukelana nohlanga nobukumkani buvukelane nobukumkani, yaye kuya kubakho ukunqongophala kokutya, nezinyikimo zomhlaba kwiindawo ngeendawo.” (Mateyu 24:7, NW) ULuka 21:11 ubonisa ukuba kwakhona wakhankanya ‘iindyikitya zokufa kwiindawo ngeendawo.’ Yaye, kwakhona, walumkisa ‘ngokwanda kokuchasa umthetho.’—Mateyu 24:12.
13 Umpostile uPawulos wakuxela kwangaphambili oku: “Ke, kwazi oku, ukuba ngemihla yokugqibela kuya kufika amaxesha anomngcipheko. Kuba abantu baya kuba ngabazithandayo, abathandi bemali, abaqhankqalazi, abakratshi, abanyelisi, abangeva bazali, abangabuleliyo, abangengcwele, abangenabubele, abangenatarhu, abatyholi, abangenakuzeyisa, izibhoja, abangenakuthanda kulunga, abancethezi, izityhuthutyhuthu, abathiwe lwale likratshi, abathandi beziyolo kunokuba bathande uThixo; benokumila kokuhlonela uThixo, ukanti bayawakhanyela amandla ako . . . Abantu abangendawo noosiyazi, kukhona baya kuhambela phambili ebubini, belahlekisa, belahlekiswa.”—2 Timoti 3:1-5, 13.
14, 15. Iziganeko zale nkulungwane yama-20 zingqina njani ukuba ngokwenene besikwimihla yokugqibela?
14 Ngaba ezo zinto uYesu noPawulos abazixela kwangaphambili zenzekile kumhla wethu? Ewe, zenzekile. IMfazwe Yehlabathi I yayiyeyona imbi ukuza kuthi ga ngelo xesha. Yayiyimfazwe yokuqala yehlabathi lonke yaye yabangela iinguqulelo ezininzi kwimbali yanamhlanje. Kunye naloo mfazwe kwabakho ukunqongophala kokutya, oobhubhani bezifo, nezinye iintlekele. Ezo ziganeko zenzeka ukususela ngowe-1914 ukusa phambili, ngokutsho kukaYesu, ‘zazikukuqaleka kwenimba.’ (Mateyu 24:8) Zaqalisa ixesha elalixelwe kwangaphambili elibizwa ngokuba ‘yimihla yokugqibela,’ ukuqalisa kwesizukulwana sokugqibela uThixo awayeya kubuvumela kuso ubungendawo nokubandezeleka.
15 Kusenokwenzeka ukuba uqhelene neziganeko zale nkulungwane yama-20. Uyawazi umbhodamo oqhubekileyo. Abantu abamalunga ne-100 lezigidi babulewe ezimfazweni. Amakhulu ezigidi abanye aye afa ngenxa yendlala nokugula. Iinyikima ziye zasuba ubomi babantu abangenakubaleka. Ukungakhathalelwa kobomi nezinto zabantu kuyanda. Ukoyika ulwaphulo-mthetho kuyinxalenye yobomi bamihla le. Imilinganiselo yokuziphatha ilahlelwe kwelokulibala. Ukwanda kwabemi bomhlaba kungunozala weengxaki ezingaconjululwayo. Ukungcoliswa kwemeko-bume konakalisa ubomi yaye kububeka engozini. Enyanisweni, besikwimihla yokugqibela ukususela ngowe-1914 yaye sisondela kwincopho yeziprofeto zeBhayibhile ezingexesha lethu.
16. Imihla yokugqibela ilixesha elide kangakanani?
16 Iya kuba lixesha elide kangakanani le mihla yokugqibela? UYesu wathi ngexesha eyayiya ‘kuqaleka ngalo inimba’ ukususela ngowe-1914 ukusa phambili: “Asisayi kudlula esi sizukulwana, zingadanga zonke ezo zinto zibekho.” (Mateyu 24:8, 34-36) Ngaloo ndlela, zonke iinkalo zemihla yokugqibela zimele zenzeke ngexesha lokuphila kwesizukulwana esinye, isizukulwana sowe-1914. Ngoko abantu abathile ababephila ngowe-1914 baya kuba besaphila xa le nkqubo ifikelela esiphelweni sayo. Eso sizukulwana sabantu sele saluphele gqitha ngoku, nto leyo ebonisa ukuba akusekho xesha lingako liseleyo ngaphambi kokuba uThixo ayiphelise le nkqubo ikhoyo yezinto.
17, 18. Sisiphi isiprofeto esibonisa ukuba sisondele gqitha ekuphelisweni kweli hlabathi?
17 Esinye isiprofeto esibonisa ukuba isiphelo sale nkqubo sisondele gqitha sanikelwa ngumpostile uPawulos, owakuxela kwangaphambili, wathi: “Imini yeNkosi, njengesela ebusuku, yenjenjalo ukuza kwayo. Kuba xenikweni baya kuthi, Luxolo nokunqaba, oko baya kufikelwa yintshabalaliso ngebhaqo . . . , baye bengayi kukha basinde.”—1 Tesalonika 5:2, 3; bona kwanoLuka 21:34, 35.
18 Namhlanje iMfazwe Yomlomo iphelile, yaye imfazwe yamazwe ngamazwe isenokungaphindi ibe sisisongelo. Ngoko iintlanga zisenokuvakalelwa kukuba zisemgubasini wolungelelwaniso olutsha lwezinto. Kodwa xa zivakalelwa kukuba imigudu yazo iyaphumelela, oko kuya kuthetha okwahlukileyo koko zikucingayo, kuba oko kuya kuba ngumqondiso wokugqibela wokuba ukutshatyalaliswa kwale nkqubo nguThixo kusemnyango. Khumbula, iingxoxo nezivumelwano zezobupolitika azibaguquli abantu. Azibenzi abantu bathandane. Yaye iinkokeli zehlabathi aziluphelisi ulwaphulo-mthetho, zingaziphelisi nezifo nokufa. Ngoko musa ukuthembela kuyo nayiphi na indlela yabantu yokuzisa uxolo nonqabiseko uze ucinge ukuba eli hlabathi sele liza kuzicombulula iingxaki zalo. (INdumiso 146:3) Isindululo esinjalo kuphela nje siya kuthetha ukuba eli hlabathi lisondele gqitha esiphelweni salo.
Ukushumayela Iindaba Ezilungileyo
19, 20. Sisiphi isiprofeto esingokushumayela kwimihla yokugqibela esisibona sizaliseka?
19 Esinye isiprofeto esibonisa ukuba besikwimihla yokugqibela ukususela ngowe-1914 seso sanikelwa nguYesu: “Kumele ukuthi ke ukuqala kuvakaliswe iindaba ezilungileyo ezi kuzo zonke iintlanga.” (Marko 13:10) Okanye njengokuba uMateyu 24:14 ekubeka: “Zaye ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.”
20 Namhlanje kunanini na ngaphambili embalini, iindaba ezilungileyo ezingokuphela kweli hlabathi nokuza kwehlabathi elitsha eliyiParadisi ngaphantsi koBukumkani bukaThixo ziyashunyayelwa kulo lonke ihlabathi. Ngoobani? Zizigidi zamaNgqina kaYehova. Zishumayela kuwo onke amazwe asemhlabeni.
21, 22. Yintoni amaNgqina kaYehova abonakala ngayo, ngokukhethekileyo, njengamaKristu okwenyaniso?
21 Ukongezelela ekushumayeleni kwawo ngoBukumkani bukaThixo, amaNgqina kaYehova aziphatha ngendlela ebonisa ukuba angabalandeli bakaKristu bokwenyaniso, kuba wathi: “Ngayo le nto baya kwazi bonke, ukuba ningabafundi bam, ukuba nithe nathandana.” Ngaloo ndlela, amaNgqina kaYehova amanyaniswe kubuzalwana bomhlaba wonke yintambo engaqhawukiyo yothando.—Yohane 13:35; bona kwanoIsaya 2:2-4; Kolose 3:14; Yohane 15:12-14; 1 Yohane 3:10-12; 4:20, 21; ISityhilelo 7:9, 10.
22 AmaNgqina kaYehova akholelwa oko iBhayibhile ikutshoyo: “UThixo akamkhethi wabuso bamntu; kwiintlanga zonke, lowo umoyikayo, asebenze ubulungisa, wamkelekile kuye.” (IZenzo 10:34, 35) Awagqala amanye amaNgqina kumazwe onke njengabazalwana noodade bokomoya, kungakhathaliseki uhlanga okanye ibala. (Mateyu 23:8) Yaye isibakala sokuba kukho ubuzalwana obunjalo emhlabeni wonke ehlabathini namhlanje songezelela ubungqina bokuba injongo kaThixo iza kuzaliseka kungekudala.
[Umfanekiso okwiphepha 26]
BuBukumkani bukaThixo obufezekileyo basezulwini kuphela obuya kulawula uluntu kwihlabathi elitsha