Ucelomngeni Lokwahluka Konqulo

Njengomfundisi-ntsapho, ujamelene nocelomngeni abafundisi-ntsapho beenkulungwane ezidluleyo ababengafane bahlangabezane nalo—ukwahluka konqulo.

EBUDENI bamaXesha Aphakathi, abemi belizwe elinye babedla ngokuba nonqulo olunye. Izolo oku ngenkulungwane ye-19, eYurophu kwakukho iinkonzo ezimbalwa eziphambili: ubuKatolika nobuProtestanti entshona, empuma ibubuOthodoki nobuSilamsi, kunye nobuYuda. Ngaphandle kwamathandabuzo namhlanje ukwahluka konqulo kuxhaphake ngakumbi eYurophu nasehlabathini lonke. Kuvele iinkonzo ezintsha ezisenokuba zamkelwe ngabantu bomthonyama belizwe elo okanye zize nabantu abafudukele kulo kunye neembacu.

Ngaloo ndlela, sithetha nje kumazwe afana neBritani, iFransi, iJamani, iOstreliya neUnited States, kukho inkungu nelanga yamaSilamsi, amaBhuda namaHindu. Kwangaxeshanye, amaNgqina kaYehova, njengamaKristu, asebenza ngokukhutheleyo kumazwe angaphezu kwayi-239. Kwilizwe ngalinye kwayi-14, kukho amaNgqina angaphezu kwayi-150 000.—Bona ibhokisi ekwiphepha 15.

Ukwahluka kweendlela iinkonzo zasekuhlaleni ezizenza ngayo izinto kusenokuba lucelomngeni kumfundisi-ntsapho. Ngokomzekelo, kusenokuphakama imibuzo ebalulekileyo ngemibhiyozo exhaphakileyo: Ngaba bonke abafundi bafanele banyanzelwe babhiyozele zonke iiholide—kungakhathaliseki ukuba bakuluphi na unqulo? Uninzi lusenokungaboni nto iphosakeleyo kuloo mibhiyozo. Noko ke, ngaba imbono yeqaqobana leentsapho ayifanele ihlonelwe? Yaye kukho enye into efanele iqwalaselwe: Kumazwe apho umthetho ulwahlulayo unqulo kwizinto zeLizwe nalapho izifundo zonqulo zingaqukwanga kwizinto ezifundwayo, ngaba abanye bebengayi kukufumanisa kungadibani naloo nkqubo ukunyanzelisa ukubhiyozela iiholide ezithile esikolweni?

Imihla Yokuzalwa

Kusenokubakho ingxaki ngakumbi ngokuphathelele imibhiyozo ebonakala ingadibananga kangako, okanye engenanto yakwenza nonqulo. Umzekelo woku yimibhiyozo yemihla yokuzalwa, eyenziwayo ezikolweni ezininzi. Nangona amaNgqina kaYehova elihlonela ilungelo labanye lokubhiyozela imihla yokuzalwa, ngokuqinisekileyo wazi kakuhle ukuba akhetha ukungabi nasabelo kwimibhiyozo elolo hlobo. Kodwa mhlawumbi akuzazi izizathu zokuba wona nabantwana bawo egqiba kwelokuba angabi nanxaxheba kule mibhiyozo.

ILe livre des religions (Incwadi Yeenkonzo), eyintyilalwazi esasazwa kulo lonke elaseFransi, ilibiza eli siko ngokuthi sisithethe yaye ilifaka kuludwe “lwemibhiyozo yehlabathi engcwele.” Nangona namhlanje ijongwa njengesiko elingenabungozi, imibhiyozo yemihla yokuzalwa inemvelaphi yobuhedeni.

IThe Encyclopedia Americana (uhlelo lowe-1991) ithi: “Kwihlabathi lamandulo eYiputa, eGrisi, eRoma nasePersi kwakubhiyozelwa imihla yokuzalwa yoothixo, ookumkani neyezidwangube ezithile.” Umbhali uRalph noAdelin Linton badiza esinye isizathu soku. Kwincwadi yabo ethi The Lore of Birthdays, babhala benjenje: “IMesopotami neYiputa, apho yazalwa khona impucuko, zaba ngamazwe okuqala anabantu abakhumbula nabazukisa imihla yokuzalwa kwabo. Ukugcinwa kweengxelo zemihla yokuzalwa kwakuyeyona nto ibalulekileyo kumaxesha amandulo injongo ephambili yayikukuba umhla ozelwe ngawo wawubalulekile ukuze kuqondwe inkwenkwezi yakho.” Oku kudibana kwayo nokuvumisa ngeenkwenkwezi yeyona nto ixhomis’ amehlo kubo bonke abangafuniyo ukuvumisa ngeenkwenkwezi ngenxa yoko kuthethwa yiBhayibhile ngako.—Isaya 47:13-15.

Ngoko alimangalisi elokuba kwiThe World Book Encyclopedia sifunde oku: “AmaKristu okuqala akazange akubhiyozele ukuzalwa Kwakhe [uKristu] kuba ayekujonga ukubhiyozela ukuzalwa kwakhe nabani njengesiko lobuhedeni.”—Umqulu 3, iphepha 416.

Kuba ekwazi oku kungasentla, amaNgqina kaYehova akhetha ukungabi nasabelo kwimisitho yemihla yokuzalwa. Ngokuqinisekileyo, ukuzalwa komntwana kusisiganeko esivuyisayo nesizukileyo. Ngokwemvelo, bonke abazali bayavuya xa abantwana babo bekhula nyaka ngamnye. NamaNgqina kaYehova avuyiswa gqitha kukubonisa uthando kwiintsapho zawo nakubahlobo ngokuzipha izipho nokonwaba nazo. Noko ke, ngenxa yemvelaphi yemibhiyozo yemihla yokuzalwa, akhetha ukukwenza oko ngamanye amaxesha ebudeni bonyaka.—Luka 15:22-25; IZenzo 20:35.

IKrisimesi

IKrisimesi ibhiyozelwa ehlabathini lonke, kwanakumazwe amaninzi angengowabuKristu. Ekubeni le holide isamkelwa yinkoliso yeenkonzo zeNgqobhoko, kusenokubonakala kungumnqa ukuba amaNgqina kaYehova akhethe ukungayibhiyozeli. Kutheni kunjalo nje?

Njengokuba iintyilalwazi ezininzi zibonisa ngokuphandle, umhla wokuzalwa kukaYesu wamiselwa ngabantu njengoDisemba 25 bewudibanisa nomsitho wamaRoma wobuhedeni. Phawula le nkcazelo ilandelayo ivela kwiincwadi ezahlukeneyo:

“Umhla wokuzalwa kukaKristu awaziwa. Iincwadi zeVangeli zibonisa ukuba umhla nenyanga azaziwa.”—New Catholic Encyclopedia, Umqulu II, iphepha 656.

“Inkoliso yamasiko eKrisimesi akhoyo ngoku eYurophu, okanye awamandulo abhalwe kwiingxelo, akangomasiko obuKristu bokwenene, kodwa ngamasiko obuhedeni iCawa eyathi yawamkela okanye yawanyamezela. . . . Amasiko okubhiyozela ixesha leKrisimesi avela kwiSaturnalia eRome.”—Encyclopædia of Religion and Ethics (Edinburgh, 1910), eyahlelwa nguJames Hastings, Umqulu III, iphepha 608-9.

“IKrisimesi ibibhiyozelwa ngoDisemba 25 kuzo zonke iicawa zamaKristu ukususela kwinkulungwane yesine. Ngelo xesha, lo yayingumhla abahedeni ababebhiyozela ngawo ukuvela kwelanga lasebusika owawubizwa ngokuba ‘Kukuzalwa (natale, ngesiLatini) Kwelanga,’ ekubeni ilanga lalibonakala ngathi liyazalwa xa iimini zazisiba nde kwakhona. ERome, iCawa yasithabathela kuyo esi sithethe sidume kunene . . . ngokusinika intsingiselo entsha.”—Encyclopædia Universalis, 1968, (ngesiFrentshi) Umqulu 19, iphepha 1375.

“Umsitho weKrisimesi wavela ngokuthi udityaniswe nemibhiyozo yeSol Invictus (Mithra). Kwelinye icala, uDisemba 25, owayengumhla wokuvela kwelanga lasebusika, wadityaniswa nokukhanya okwaziswa nguKristu ehlabathini, ngoko oko kwakufuziselwa yiSol Invictus kwatshintshwa kwabhekisela kuKristu.”—Brockhaus Enzyklopädie, (ngesiJamani) Umqulu 20, iphepha 125.

Yintoni eyenziwe ngabanye bakuva ngeenyaniso ezingeKrisimesi? IThe Encyclopædia Britannica ithi: “Ngowe-1644 amaNgesi awayebambelele ngokungqongqo kwimithetho yonqulo akwalela nakuphi na ukuyibhiyozela okanye ukuyenzela umsitho wonqulo exhaswa ngumthetho wePalamente, kuba [iKrisimesi] yayingumsitho wobuhedeni, aza ayalela ukuba igcinwe njengomhla wokuzila. UCharles II wawuvusa wema ngeenyawo loo msitho, kodwa abantu baseSkotlani babambelela ngokuthe nkqi kwimbono yamaPuritan.” AmaKristu okuqala akazange ayibhiyozele iKrisimesi, ibe namaNgqina kaYehova namhlanje akayibhiyozeli okanye abe nenxaxheba kwizinto ezenziwayo ezinokuthanani neKrisimesi.

Noko ke, iBhayibhile iyakuncoma ukuphana izipho okanye ukumema intsapho nabahlobo ukuze ninandiphe isidlo ngamathuba athile. Ikhuthaza abazali baqeqeshe abantwana babo babe nobubele ngokunyanisekileyo, kunokuba baphe kuphela xa belindelwe ukuba benze oko ekuhlaleni. (Mateyu 6:2, 3) Abantwana bamaNgqina kaYehova bafundiswa ukunyamezela baze bahlonele abanye, ibe oku kuquka ukuhlonela ilungelo labanye lokubhiyozela iKrisimesi. Nabo ke, bakuxabisa gqitha ukuba isigqibo sabo sokungabhiyozeli iKrisimesi sihlonelwe.

Eminye Imisitho

AmaNgqina kaYehova azijonga ngendlela efanayo nezinye iiholide zonqulo okanye ezonqulo oluthile ezibakho ebudeni bonyaka ngoxa izikolo zisavuliwe ebudeni bonyaka kumazwe awahlukeneyo, njengemisitho yenyanga kaJuni eBrazil, iEpiphany yaseFransi, iCarnival yaseJamani, iSetsubun yaseJapan neHalloween yaseUnited States. Ngokuphathelele le mibhiyozo neminye engakhankanywanga apha, abazali abangamaNgqina okanye abantwana babo ngokuqinisekileyo baya kukuvuyela ukuphendula nayiphi na imibuzo osenokuba nayo.

[Amagama acatshulweyo akwiphepha 17]

“Amasiko okubhiyozela ixesha leKrisimesi avela kwiSaturnalia yaseRome.”—Encyclopædia of Religion and Ethics

[Ibhokisi ekwiphepha 18]

Okuthethwa Ngabantwana

“Nangona ndingafumani zipho ngomhla wokuzalwa kwam, abazali bam bayandithengela izipho ngamanye amathuba. Yeyona nto ndiyithandayo leyo kuba ndifumana isipho ebendingasilindelanga.”—UGregory, oneminyaka eli-11 ubudala.

“Abantwana abaninzi bayijonga iKrisimesi njengexesha lokufumana izipho ezininzi. Kodwa unyaka wonke ndifumana izipho yaye ndiyaphuma ndibone iindawo. Intsapho yasekhaya seyikhe yandikhupha yandisa kwamanye amazwe, anjengeFiji, iNew Zealand neBrazil.”—UCaleb, oneminyaka eli-10 ubudala.

“Sonwaba kakhulu nabahlobo bam, ibe siphana izipho ebesingazilindelanga ngamaxesha athile.”—UNicole, oneminyaka eli-14 ubudala.

“Abaninzi esikolweni bayandibuza ukuba ndikwazi njani ukuhlala ndingayibhiyozeli iKrisimesi okanye ezinye iiholide. Loo nto ayindivimbi lonwabo kwaphela. Mna nentsapho yasekhaya sisoloko sisenza izinto kunye. Sinabahlobo bokwenene esikunandiphayo ukuya ekhefini kunye nabo. Siyazikhupha sibethwe ngumoya emahlathini size siye kudlala emkhenkceni, yaye ngokufuthi siba neembutho ekhaya. Ndicinga ukuba bangamangaliswa ngenene abanye xa benokuyazi indlela esonwaba ngayo!”—UAndriana, oneminyaka eli-13 ubudala.

“Andiziva kukho into endiphosileyo kuba ndingayibhiyozeli iKrisimesi okanye ezinye iiholide. Ebudeni bezi holide, xa singayanga esikolweni noTata engayanga emsebenzini, sidlala imidlalo, siye kubukela imifanekiso eshukumayo, sibukele umabonwakude. Sichitha ixesha elininzi sisenza izinto kunye njengentsapho.”—UBrian, oneminyaka eli-10 ubudala.

[Umfanekiso okwiphepha 16]

AmaNgqina ayakunandipha ukonwaba kunye

[Inkcazelo Ngomfanekiso okwiphepha 17]

Mary Evans Picture Library