“Ilixa Lokugweba” Lifikile

ISITYHILELO esiyincwadi yokugqibela yeBhayibhile, sisixelela ngengelosi ephaphazela esazulwini sezulu “ineendaba ezilungileyo ezingunaphakade ukuba izivakalise njengesigidimi esichulumancisayo.” Ngelizwi elikhulu ithi: “Moyikeni uThixo nimzukise, kuba lifikile ilixa lokugweba kwakhe.” (ISityhilelo 14:6, 7) Elo “lixa lokugweba” liquka ukuvakaliswa nokuphunyezwa kwemigwebo kaThixo. “Ilixa” lixesha elifutshane. Ukuphunyezwa komgwebo kuyincopho ‘yemihla yokugqibela,’ esiphila kuyo ngoku.—2 Timoti 3:1.

“Ilixa lokugweba” liziindaba ezilungileyo kubathandi bobulungisa. Kulixesha lokuba uThixo abanike isiqabu abakhonzi bakhe abaye baphathwa kakubi kule nkqubo yezinto ikhohlakeleyo.

Ngoku, ngaphambi kokuba elo “lixa lokugweba” lifikelele incopho yalo ngokutshatyalaliswa kwale nkqubo ingendawo yezinto, siyabongozwa: “Moyikeni uThixo nimzukise.” Ngaba wena uyakwenza oko? Oku kubandakanya okungakumbi kunokuthi, “Ndiyakholelwa kuThixo.” (Mateyu 7:21-23; Yakobi 2:19, 20) Uloyiko olufanelekileyo ngoThixo lufanele lusenze simhlonele. Lufanele lusenze sikuphephe okubi. (IMizekeliso 8:13) Lufanele lusincede sithande okulungileyo size sithiye okubi. (Amosi 5:14, 15) Ukuba siyamhlonela uThixo, siya kumphulaphula ngenyameko. Asiyi kuzixakekisa ngezinye izinto de singakwazi ukulifunda rhoqo iLizwi lakhe, iBhayibhile. Siya kukholosa ngaye ngalo lonke ixesha nangentliziyo epheleleyo. (INdumiso 62:8; IMizekeliso 3:5, 6) Abo bamhlonela ngokunyanisekileyo bayaqonda ukuba njengoMdali wezulu nomhlaba, unguMongami Wendalo Iphela, yaye bazithoba kuye njengokuphela kwaLowo unelungelo lokubalawula. Ukuba siyayiqonda indlela ekubaluleke ngayo oku, masenjenjalo ngaphandle kokulibazisa.

Ixesha lokugweba eyathetha ngalo ingelosi likwabizwa ngokuba ‘yimini kaYehova.’ Loo “mini” yafikela iYerusalem yamandulo ngowama-607 B.C.E. ngenxa yokuba abemi bayo bengazange bazithobele izilumkiso zikaYehova awazikhupha ngabaprofeti bakhe. Bazibeka engozini ngokuyihlehlisela emva imini kaYehova ezingqondweni zabo. UYehova wayebalumkise ngelithi: “Ikufuphi, yaye ikhawuleza kakhulu.” (Zefaniya 1:14) Enye “imini kaYehova” yafikela iBhabhiloni yamandulo ngowama-539 B.C.E. (Isaya 13:1, 6) Ethembele kwiinqaba nakoothixo bawo, amaBhabhiloni azityeshela izilumkiso ezanikelwa ngabaprofeti bakaYehova. Kodwa ngobusuku nje obunye, iBhabhiloni enkulu yoyiswa ngamaMedi namaPersi.

Thina silindele ntoni namhlanje? Silindele ‘imini kaYehova’ enkulu ngakumbi. (2 Petros 3:11-14) Umgwebo kaThixo sele uvakalisiwe ‘kwiBhabhiloni Enkulu.’ KwiSityhilelo 14:8 ingelosi yasezulwini ithi: “IBhabhiloni Enkulu iwile.” Oko sele kwenzekile. Ayisenakuphinda ibathintele abanquli bakaYehova. Ubuqhetseba bayo nokubandakanyeka kwayo emfazweni kwaziwa ngumntu wonke. Ngoku ukutshatyalaliswa kwayo ngokupheleleyo sele kusemnyango. Ngenxa yoko, iBhayibhile ibongoza abantu ehlabathini lonke isithi: “Phumani kuyo [iBhabhiloni Enkulu] . . .ukuze ningabelani nayo ngezono zayo, nokuze ningamkeliswa kwizibetho zayo. Kuba izono zayo ziye zafumba zada zafikelela ezulwini, noThixo uye wazikhumbula izenzo zayo zokungekho sikweni.”—ISityhilelo 18:4, 5.

Yintoni iBhabhiloni Enkulu? Yinkqubo yonqulo esehlabathini lonke enezinto efana ngazo neBhabhiloni yamandulo. (ISityhilelo, isahluko 17, nese-18) Khawuhlolisise ezinye zezo zinto:

• Abefundisi beBhabhiloni yamandulo babengene zwabha kwezobupolitika zeentlanga. Kunjalo nangeenkonzo ezininzi zonqulo namhlanje.

• Abefundisi beBhabhiloni babedla ngokukhuthaza ukuliwa kweemfazwe zeentlanga. Iinkonzo zonqulo ezininzi zanamhlanje bezisoloko ziphambili ekuthandazeleni amajoni kwiimfazwe zeentlanga.

• Iimfundiso nezenzo zeBhabhiloni yamandulo zakhokelela olo hlanga ekuziphatheni okubi okugabadeleyo. Xa iinkokeli zonqulo namhlanje zityeshela imilinganiselo yeBhayibhile yokuziphatha, kudla ngokugquba ukuziphatha okubi phakathi kwabefundisi namarhamente. Okunye okuphawulekayo kukuba ngenxa yokuba iBhabhiloni Enkulu izenza unongogo wehlabathi nenkqubo yalo yezobupolitika, iSityhilelo siyichaza njengehenyukazi.

• Kanti iBhayibhile ithi iBhabhiloni Enkulu iphila “kubunewunewu bokungabi nazintloni.” KwiBhabhiloni yamandulo, itempile yayinomhlaba omkhulu, yaye abefundisi balapho babezenzela igama kwezoshishino. Namhlanje, ukongezelela kwizakhiwo zonqulo, iBhabhiloni Enkulu inamashishini amaninzi. Iimfundiso zayo neeholide ezibhiyozelayo ziyenzela ubutyebi obuninzi, kuze kungenelwe nabanye oosomashishini.

• Ukusetyenziswa kwemifanekiso, ubugqi nokukhafula kwakuxhaphakile kwiBhabhiloni yamandulo, njengokuba kunjalo kwiindawo ezininzi namhlanje. Ukufa kwakugqalwa njengendlela yokudlulela kolunye uhlobo lobomi. IBhabhiloni yayizaliswe ziitempile nezinye izakhiwo zonqulo ezazizukisa oothixo bayo, kodwa amaBhabhiloni ayebachasile abanquli bakaYehova. Nanamhlanje iBhabhiloni Enkulu isaqhelisela ezo nkolelo.

Mandulo, uYehova wasebenzisa iintlanga ezinamandla kwezobupolitika nakwezomkhosi ukuze zohlwaye abo babebonisa ukungabi nankathalo ngaye nangokuthanda kwakhe ngokuqhubekayo. Ngenxa yoko iSamariya yatshatyalaliswa ngama-Asiriya ngowama-740 B.C.E. IYerusalem yatshatyalaliswa ngamaBhabhiloni ngowama-607 B.C.E. aza ayiphinda amaRoma ngowama-70 C.E. Yona iBhabhiloni yoyiswa ngamaMedi namaPersi ngowama-539 B.C.E. IBhayibhile ixele kwangaphambili ukuba ngemihla yethu oorhulumente bezobupolitika, abanjengerhamncwa, baza kulihlasela “ihenyukazi,” balihlube libe ze, bebhenca oko likuko. Baza kulitshabalalisa ngokupheleleyo.—ISityhilelo 17:16.

Ngaba ngokwenene oorhulumente bomhlaba bangayenza into enjalo? IBhayibhile ithi ‘uThixo uya kukufaka oko ezintliziyweni zabo.’ (ISityhilelo 17:17) Oko kuya kwenzeka ngequbuliso, ngebhaqo, ngendlela eyothusayo, yaye kungacingelwanga.

Liliphi inyathelo ofanele ulithabathe? Zibuze: ‘Ngaba ndisabambelele kunqulo olungcoliswe ziimfundiso nazizenzo zeBhabhiloni Enkulu?’ Kwanokuba akuyiyo inxalenye yayo, usenokuzibuza: ‘Ngaba ndiye ndavumela umoya wayo ukuba undiphembelele?’ Nguwuphi loo moya? Ngumoya wokunyamezela ukuziphatha okubi, wokuthanda izinto eziphathekayo nokuzonwabisa kunokuthanda uThixo, okanye ukulityeshela ngabom iLizwi likaYehova (kwanakwizinto ezisenokubonakala zincinane). Cingisisa ngenyameko ngaphambi kokuba uphendule.

Ukuze uYehova akholiswe sithi, izenzo zethu neminqweno yentliziyo yethu ifanele ibonise ukuba ngokwenene asiyiyo inxalenye yeBhabhiloni Enkulu. Alikho ixesha lokuzilazila. Xa isilumkisa ngokufika kwesiphelo ngequbuliso, iBhayibhile ithi: “Ngokugadlela okukhawulezileyo iBhabhiloni isixeko esikhulu iya kuphoselwa phantsi, ingabi safunyanwa kwakhona.”—ISityhilelo 18:21.

Kodwa akuphelelanga apho. Kwenye inkalo ‘yelixa lokugweba,’ uYehova uThixo uya kugweba inkqubo yehlabathi yezobupolitika, abalawuli bayo, nabo bonke abo balutyeshelayo ulawulo loBukumkani bakhe basezulwini obuphantsi kukaYesu Kristu. (ISityhilelo 13:1, 2; 19:19-21) Umbono wesiprofeto obhalwe kuDaniyeli 2:20-45 uchaza abalawuli bezobupolitika abasusela kwixesha leBhabhiloni yamandulo ukuza kuthi ga ngoku njengomfanekiso omkhulu owenziwe ngegolide, isilivere, isinyithi, intsimbi nodongwe. Esi siprofeto sathi ngokuphathelele umhla wethu: “UThixo wezulu uya kumisa ubukumkani obungenakuze bonakaliswe.” Kanti iBhayibhile ithi xa ithetha ngoko uBukumkani buya kukwenza ‘ngelixa likaYehova lokugweba’: “Buya kuzityumza buziphelise zonke ezi zikumkani [zabantu], buze bona bume ukusa kwixesha elingenammiselo.”—Daniyeli 2:44.

IBhayibhile ilumkisa abanquli bokwenyaniso nxamnye nokuthanda ‘izinto ezisehlabathini’—indlela yobomi ekhuthazwa leli hlabathi lingazaniyo noThixo oyinyaniso. (1 Yohane 2:15-17) Ngaba izigqibo nezenzo zakho zibonisa ukuba ubumela ngokuqinileyo uBukumkani bukaThixo? Ngaba ububeka kwindawo yokuqala ebomini bakho?—Mateyu 6:33; Yohane 17:16, 17.

[Ibhokisi ekwiphepha 14]

Siya Kufika Nini Isiphelo?

“UNyana womntu uza ngelixa eningacinganga ukuba lilo.”—Mateyu 24:44.

“Hlalani nilindile, ngenxa yokuba ningayazi imini okanye ilixa.”—Mateyu 25:13.

“Awuyi kufika emva kwexesha.”—Habhakuki 2:3.

[Ibhokisi ekwiphepha 14]

Ngaba Ukwazi Bekuya Kwenza Umahluko?

Ukuba ubuqinisekile ukuba umgwebo ozayo kaThixo awuzi kufika kangangeminyaka embalwa, ngaba loo nto ibiya kutshintsha indlela ophila ngayo? Ukuba isiphelo sale nkqubo indala yezinto asifiki ngexesha obulilindele, ngaba uya kuvumela oko kukwenze uyekelele umxakatho kwinkonzo kaYehova?—Hebhere 10:36-38.

Ukungalazi elona xesha lichanileyo kusinika ithuba lokubonisa ukuba simkhonza uThixo ngeentshukumisa ezintle. Abo bamazi kakuhle uYehova bayaqonda ukuba akanakukholiswa yinzondelelo yomzuzu wokugqibela, kuba ubona intliziyo.—Yeremiya 17:10; Hebhere 4:13.

UYehova uba kwindawo yokuqala kwabo bamthanda ngokwenene. AmaKristu okwenyaniso asenokuba nomsebenzi wengqesho njengabanye abantu. Noko ke, akasukeli ukuba zizityebi kodwa afuna nje ukuba nezinto eziphathekayo ezaneleyo, ukuze akwazi ukwabelana nabanye. (Efese 4:28; 1 Timoti 6:7-12) Kanti ayakunandipha ukuzihlaziya ngendlela efanelekileyo, kwakunye nokuphumla, kodwa engakwenzi oko kuba nje elinganisa abanye abantu. (Marko 6:31; Roma 12:2) Kanye njengoYesu Kristu, ayavuyiswa kukwenza ukuthanda kukaThixo.—INdumiso 37:4; 40:8.

AmaKristu okwenyaniso afuna ukuphilela ukukhonza uYehova ngonaphakade. Elo themba akalithabathi lula kuba nje kuza kufuneka alinde iintsikelelo ezithile kangangethuba elide kunokuba abanye bebelindele.

[Ibhokisi/Umfanekiso okwiphepha 15]

Imbambano Yolongamo

Ukuze sibone isizathu sokuvumela kukaThixo ukubandezeleka okungaka, kufuneka siqonde imbambano yolongamo.

Ngenxa yokuba enguMdali, uYehova unelungelo lokulawula umhlaba nabo bonke abahlala kuwo. Noko ke, iBhayibhile isichazela ukuba phambili phaya kwimbali yabantu, ulongamo lukaYehova lwacelwa umngeni. USathana uMtyholi wathi uYehova ungqongqo ngokugqithiseleyo, kangangokuba uyabaxokisa abazali bethu bokuqala xa ebaxelela ngoko kuya kwenzeka xa betyeshela umthetho kaThixo baze bakhethe ukuzimela geqe, kwanokuba kuya kubalungela gqitha ukuzilawula ngaphandle kukaThixo.—Genesis, isahluko 2, nesesi-3.

Ukuba uThixo wayebatshabalalise ngoko nangoko aba bavukeli, oku kwakuya kubonisa amandla anawo kodwa kwakungayi kuyisombulula imbambano eyaphakanyiswayo. Kunokuba abatshabalalise ngoko nangoko aba bavukeli, uYehova uye wavumela zonke izidalwa ezinengqondo ukuba zizibonele imiphumo yemvukelo. Nangona oku kwakubandakanya ukubandezeleka, salifumana ithuba lokuba nathi sizalwe.

Ukongezelela, ngokuzincama okukhulu uYehova ngothando wenza ilungiselelo lokuba abantu ababeya kumthobela baze babe nokholo kwidini lentlawulelo loNyana wakhe bakhululwe esonweni nakwimiphumo yaso baze baphile eParadesi. Xa kuyimfuneko, oku wayeza kukwenza ngokubavusa nokuba sele befile.

Ukuvunyelwa kwexesha elithile ukuze kusonjululwe le mbambano kuye kwavulela abakhonzi bakaThixo ithuba lokusabela kuthando lukaThixo nokuzingqina bethembekile kuYehova phantsi kwazo naziphi na iimeko. Ukuzinziswa kwale mbambano yolongamo lukaThixo, kunye nezinye iimbambano ezibandakanya ukuthembeka kwabantu kubalulekile ekuqinisekiseni ukuhlonelwa komthetho kwindalo yonke. Ngaphandle koko, belungayi kubakho uxolo lokwenene.a

[Umbhalo osemazantsi]

[Umfanekiso]

Inkqubo yolawulo yezobupolitika yehlabathi lonke iza kupheliswa