“Ukuze Ningangeni Ekuhendweni”
“Hlalani nilindile yaye nithandaze ngokuqhubekayo, ukuze ningangeni ekuhendweni.”—MATEYU 26:41.
WAYEXINEZELEKE gqitha—kunanini na ngaphambili. Kwakusele kumbovu ukuba uYesu Kristu, uNyana kaThixo, abugqibe ubomi bakhe basemhlabeni. UYesu wayeqonda ukuba uza kubanjwa kungekudala, agwetyelwe ukufa, aze abethelelwe kwisibonda sentuthumbo. Wayesazi ukuba nasiphi na isigqibo okanye inyathelo alithabathayo liya kulichaphazela igama likaYise. Kanti uYesu wayesazi ukuba kubandakanyeke amathemba ekamva loluntu. Kulo lonke olu xinezeleko, wenza ntoni?
2 UYesu wahamba nabafundi bakhe ukuya kumyezo waseGetsemane. Leyo yindawo uYesu awayethanda ukuya kuyo. Apho wafika wema mganyana kubafundi bakhe. Wathandaza kuYise wasemazulwini ecela amandla, yaye ephalaza imbilini yakhe—kungekuphela nje isihlandlo esinye, kodwa kathathu. Nakuba wayefezekile, uYesu akazange acinge ukuba wayenokumelana nolo xinezeleko ngokwakhe.—Mateyu 26:36-44.
3 Nathi namhlanje sixinezelekile. Ekuqaleni kwale ncwadana inemifanekiso, sithethe ngobungqina obubonisa ukuba siphila kwimihla yokugqibela yale nkqubo ingendawo. Izilingo neengcinezelo zeli hlabathi likaSathana zithabath’ unyawo. Izigqibo esizenzayo namanyathelo esiwathabathayo thina bazibanga bekhonza uThixo oyinyaniso, ziyalichaphazela igama lakhe yaye zinegalelo kwithemba esinalo lokuphila kwihlabathi lakhe elitsha. Siyamthanda uYehova. Sifuna ‘ukunyamezela kude kube sekupheleni’—ekupheleni kobomi bethu okanye ekupheleni kwale nkqubo, nayiphi na kwezi efike kuqala. (Mateyu 24:13) Kodwa ke sinokuqhubeka njani sinemvo yongxamiseko size sihlale silindile?
4 Eqonda ukuba abafundi bakhe—abamandulo nabanamhlanje—baya kuxinezeleka, uYesu wabongoza ngelithi: “Hlalani nilindile yaye nithandaze ngokuqhubekayo, ukuze ningangeni ekuhendweni.” (Mateyu 26:41) Loo mazwi anayiphi intsingiselo kuthi namhlanje? Ziziphi izilingo wena ojamelene nazo? Yaye ‘unokuhlala njani ulindile’?
Silingelwa Ukuba Senze Ntoni?
5 Mihla le sonke sijamelana nesilingo sokunikezela ‘kumgibe kaMtyholi.’ (2 Timoti 2:26) IBhayibhile isilumkisa ngelokuba abona bantu baphunyelw’ iphulo nguSathana ngabakhonzi bakaYehova. (1 Petros 5:8; ISityhilelo 12:12, 17) Unayiphi injongo? Ukusibulala akuyiyo eyona njongo yakhe iphambili. USathana akaphumezi nto kangako xa sisifa sithembekile kuThixo. Uyayazi into yokuba, ngexesha Lakhe elifanelekileyo, uYehova uza kusivusa ekufeni.—Luka 20:37, 38.
6 USathana ufuna ukuphelisa eyona nto ixabiseke ngaphezu kobomi bethu—ingqibelelo yethu kuThixo. USathana utsha ziintambo efuna ukubonisa ukuba unokusahlula kuYehova. Ngenxa yoko, ukuba sinokulukuhlelwa ekubeni singathembeki—siyeke ukushumayela iindaba ezilungileyo okanye sishiye imilinganiselo yobuKristu—angaba woyisile uSathana! (Efese 6:11-13) Usilinga ngaloo ndlela ke lo “Mhendi.”—Mateyu 4:3.
7 USathana ‘unamaqhinga’ awahlukahlukeneyo. (Efese 6:11) Unokusihenda ngokuthanda izinto eziphathekayo, uloyiko, amathandabuzo, okanye ukuthanda iziyolo. Kodwa enye yezona ndlela zakhe zinamandla kukudimazeka. Lo somaqhingashe uyazi ukuba ukuphelelwa lithemba kunokusenza buthathaka ngokomoya, kusibeke esichengeni. (IMizekeliso 24:10) Ngoko usihendela ukuba sinikezele, ngakumbi xa sinomoya ‘otyumkileyo.’—INdumiso 38:8.
8 Njengoko ihambela phambili imihla yokugqibela, kubonakala ngathi zininzi izinto ezidimazayo, yaye asikwazi kuziphepha. (Bona ibhokisi ethi “Ezinye Izinto Ezidimazayo.”) Enoba kubangelwa yintoni na, ukudimazeka kunokusitheza amandla. ‘Ukuzongela ixesha’ lezinto zokomoya—eziquka ukufundisisa iBhayibhile, ukuya kwiintlanganiso zamaKristu, nokuya kwinkonzo yasentsimi—kunokuba yinto enzima gqitha xa udinwe emzimbeni, engqondweni, nangokweemvakalelo. (Efese 5:15, 16) Uz’ ukhumbule ukuba lo Mhendi ufuna sityhafe. Kodwa eli asiloxesha lokuyekelel’ umxakatho okanye elokuphelelwa yimvo yongxamiseko ngokuphathelele amaxesha esiphila kuwo! (Luka 21:34-36) Unokumelana njani nesilingo uze uhlale ulindile? Nanga amacebiso amane anokukunceda.
‘Thandaza Ngokuqhubekayo’
9 Thembela kuYehova ngomthandazo. Khumbula umzekelo kaYesu xa wayekumyezo waseGetsemane. Wenza ntoni xa wayexinezelekile? Wacela uncedo kuYehova, ethandaza ngokuzingisileyo kwada “ukubila kwakhe kwaba njengamathontsi egazi esiwa emhlabeni.” (Luka 22:44) Khawucinge ngoku. UYesu wayemazi kakuhle uSathana. Esesezulwini wazibona zonke izilingo uSathana awayezisebenzisa ezama ukurhintyela abakhonzi bakaThixo. Sekunjalo, uYesu akazange avakalelwe kukuba wayenokumelana ngokulula nayo nantoni na eyayinokuziswa ngulo Mhendi kuye. Ukuba uNyana kaThixo ofezekileyo wayibona imfuneko yokuthandaza, acele uncedo nokomelezwa nguThixo, kukangakanani ke ngathi!—1 Petros 2:21.
10 Kwakhona, khumbula ukuba, emva kokuba ebongoze abafundi bakhe ukuba ‘bathandaze ngokuqhubekayo,’ uYesu wathi: “Kambe ke, umoya unentumekelelo, kodwa inyama ibuthathaka.” (Mateyu 26:41) Yiyiphi le nyama uYesu wayebhekisela kuyo? Ngokuqinisekileyo yayingeyoyakhe; yayingekho buthathaka inyama yakhe efezekileyo. (1 Petros 2:22) Kodwa yayahlukile imeko kubafundi bakhe. Ngenxa yokuzuz’ ilifa ukungafezeki nokutyekela kwabo esonweni, babeza kufuna uncedo olukhethekileyo ukuze boyise isilingo. (Roma 7:21-24) Yiyo le nto wababongozayo—nawo onke amaKristu okwenyaniso awayeza kulandela emva kwabo—ukuba bathandazele uncedo xa bejamelene nesilingo. (Mateyu 6:13) UYehova uyayiphendula imithandazo enjalo. (INdumiso 65:2) Njani? Ubuncinane ngeendlela ezimbini.
11 Okokuqala, uThixo usinceda ukuba siziqonde izilingo. Izilingo zikaSathana zifana nemigibe esendleleni emnyama. Ukuba akuyiboni isenokukubambisa. UYehova usenza siyibone imigibe kaSathana, esebenzisa iBhayibhile neempapasho ezisekelwe eBhayibhileni, yaye oku kuyasinceda ukuba singanikezeli xa silingwa. Ukutyhubela iminyaka, uncwadi olushicilelweyo, iindibano ezinkulu nezincinane, ziye zaphindaphinda ukusilumkisa ngeengozi ezifana nokoyika abantu, ukuziphatha okubi ngokwesini, ukuthanda izinto eziphathekayo, nezinye izilingo zikaSathana. (IMizekeliso 29:25; 1 Korinte 10:8-11; 1 Timoti 6:9, 10) Ngaba akuziva unombulelo kuYehova ngokusilumkisa ngamaqhinga kaSathana? (2 Korinte 2:11) Zonke ezi zilumkiso ziyimpendulo yakhe kwisicelo sakho sokuncedwa uxhathise isilingo.
12 Okwesibini, uYehova uphendula imithandazo yethu ngokusinika amandla okunyamezela isilingo. ILizwi lakhe lithi: “UThixo . . . akayi kuniyekela nihendwe ngaphaya koko ninokukuthwala, kodwa kunye nesihendo eso uya kwenza nendlela yokuphuma.” (1 Korinte 10:13) UThixo akasayi kuvumela ukuba sisindwe sisilingo de singabi nawo amandla okomoya okumelana naso—ukuba siqhubeka sithembela kuye. ‘Uyenza njani indlela yokuba siphume’? “Ubanika umoya oyingcwele abo bamcelayo.” (Luka 11:13) Loo moya unokusinceda ukuba sikhumbule imigaqo yeBhayibhile eya komeleza uzimiselo lwethu lokwenza okulungileyo uze usincede ukuba senze izigqibo zobulumko. (Yohane 14:26; Yakobi 1:5, 6) Unokusinceda sibonise ezona mpawu zifunekayo ukuze soyise utyekelo oluphosakeleyo. (Galati 5:22, 23) Umoya kaThixo usenokushukumisa nabo sikhonza kunye nabo ukuba ‘basomeleze.’ (Kolose 4:11) Ngaba akumbuleli uYehova ngenxa yokusabela kwakhe ngothando kwimithandazo yakho yokucela uncedo?
Yiba Nolindelo Olusengqiqweni
13 Ukuze sihlale silindile, sifanele sibe nolindelo olusengqiqweni. Ngenxa yoxinezeleko lobomi, siyadinwa sonke maxa wambi. Kodwa simele sikhumbule ukuba uThixo akazange athembise ukuba siza kuphila ubomi obungenazingxaki kule nkqubo indala. Kwanangamaxesha okubhalwa kweBhayibhile, abakhonzi bakaThixo babejamelana neenkxwaleko, eziquka intshutshiso, ubuhlwempu, uxinezeleko, nokugula.—IZenzo 8:1; 2 Korinte 8:1, 2; 1 Tesalonika 5:14; 1 Timoti 5:23.
14 Nathi namhlanje sinazo iingxaki. Sisenokujamelana nentshutshiso, sibe neengxaki zemali, sibe noxinezeleko, sigule, size sibandezeleke nangezinye iindlela. Ukuba uYehova ebenokusikhusela ngokungummangaliso kuzo zonke iingozi, ngaba loo nto ibingenakunika uSathana isizathu sokugculela uYehova? (IMizekeliso 27:11) UYehova uyabavumela abakhonzi bakhe ukuba balingwe baze bavavanywe, maxa wambi bade bafe ngaphambi kwexesha bebulawa ngabachasi.—Yohane 16:2.
15 Yintoni ke ethenjiswa nguYehova? Njengoko besele sitshilo ngaphambilana, uthembise ukuba uya kusinceda simelane naso nasiphi na isilingo esinokudibana naso, ukuba nje sithembela kuye ngokupheleleyo. (IMizekeliso 3:5, 6) Esebenzisa iLizwi lakhe, umoya wakhe, nentlangano yakhe, uyasikhusela ngokomoya, esinceda ukuba silondoloze ulwalamano lwethu kunye naye. Ukuba sinokugcina olo lwalamano lomelele, sakuba soyisile enoba singafa. Ayikho into—nditsho nokufa—enokunqanda uThixo angabaniki umvuzo abakhonzi bakhe abathembekileyo. (Hebhere 11:6) Yaye kwihlabathi elitsha elisele lisondele, uYehova akayi kubuya nganeno ekuzalisekiseni zonke izithembiso zakhe ezimangalisayo zokusikelela abo bamthandayo.—INdumiso 145:16.
Khumbula Iimbambano Ezibandakanyekileyo
16 Ukuze sinyamezele de kube sekupheleni, simele sikhumbule iimbambano ezibalulekileyo nezibangela ukuba uThixo avumele ubungendawo. Ukuba maxa wambi iingxaki zethu zibonakala zisongamela yaye silingelwa ekubeni siyekelel’ umxakatho, simele sikhumbule ukuba leyo yindlela kaSathana yokucel’ umngeni ulongamo lukaYehova. Kwakhona lo Mkhohlisi uye wakuthandabuza ukuzinikela nengqibelelo yabakhonzi bakaThixo. (Yobhi 1:8-11; 2:3, 4) Ezo mbambano kuquka nendlela uYehova aza kuzicombulula ngayo, zibaluleke ngaphezu kwakhe nawuphi na umntu. Njani?
17 Ukuvumela kukaThixo ukubandezeleka okwethutyana kuye kwavulela abanye ithuba lokuba bamkele inyaniso. Khawucinge nje ngoku: UYesu wabandezeleka ukuze sifumane ubomi. (Yohane 3:16) Ngaba asinambulelo ngaloo nto? Kodwa ngaba sikulungele ukunyamezela iinzingo kangangethutyana ukuze nabanye bafumane ubomi? Ukuze sinyamezele de kube sekupheleni, simele siqonde ukuba ubulumko bukaYehova bubodlula lee obethu. (Isaya 55:9) Uya kubuphelisa ubungendawo xa sele kulixesha elifanelekileyo lokuzinziswa kweembambano nokuze singenelwe ngonaphakade. Eneneni, ibiyiyiphi ke enye indlela ebinokwenziwa ngayo loo nto? Akukho okungekho sikweni kuThixo!—Roma 9:14-24.
“Sondelani KuThixo”
18 Ukuze sihlale sinemvo yongxamiseko, simele sisondele kuYehova. Ungaze ulibale ukuba uSathana wenza nantoni na anokukwazi ukuyenza ukuze aphelise ulwalamano oluhle esinalo noYehova. USathana unokusenza sicinge ukuba isiphelo asisayi kuze sifike nokuba akuyomfuneko ukuba sishumayele iindaba ezilungileyo okanye siphile ngemilinganiselo yeBhayibhile. Kodwa “ulixoki noyise wabo ubuxoki.” (Yohane 8:44) Simele sizimisele ‘ukumchasa uMtyholi.’ Ulwalamano lwethu noYehova asimele siluthabathe lula. Ngothando iBhayibhile isibongoza isithi: “Sondelani kuThixo, naye uya kusondela kuni.” (Yakobi 4:7, 8) Unokusondela njani kuYehova?
19 Ukuthandaza nokucamngca kubalulekile. Xa kubonakala ngathi uxinezeleko luyakongamela, phalaza imbilini yakho kuYehova. Okukhona ungqala xa uthetha naye, kokukhona kuya kuba lula ukuyibona indlela aziphendula ngayo izicelo zakho. Usenokungaphenduli ngendlela obulindele ngayo, kodwa ukuba ufuna ukumhlonela nokugcina ingqibelelo, uya kukunika uncedo olufunayo ukuze unyamezele ngokuphumelelayo. (1 Yohane 5:14) Njengoko ubona indlela akwalathisa ngayo, uya kusondela ngakumbi kuye. Enye into ebalulekileyo, kukufunda nokucamngca ngeempawu neendlela zikaYehova njengoko zichazwe eBhayibhileni. Ukucamngca ngolo hlobo kukunceda umazi ngakumbi; kushukumisa intliziyo yakho kuze kwenze nzulu uthando onalo ngaye. (INdumiso 19:14) Yaye ngaphezu kwako konke, olo thando luya kukunceda ukuba umelane nezilingo uze uhlale ulindile.—1 Yohane 5:3.
20 Enye into ebalulekileyo ukuze sihlale sisondele kuYehova, kukusondelelana nabo sikhonza kunye nabo. Oku kuya kuxutyushwa kwicandelo lokugqibela lale ncwadana inemifanekiso.
IMIBUZO YESIFUNDO
• Wenza ntoni uYesu xa wayephantsi koxinezeleko oluqatha ngaphambi nje kokuba afe, yaye wababongoza ukuba benze ntoni abafundi bakhe? (Isiqe. 1-4)
• Kutheni uSathana ehlasela abakhonzi bakaYehova, yaye usihenda njani? (Isiqe. 5-8)
• Ukuze sixhathise izilingo, kutheni simele sithandaze ngokuqhubekayo (Isiqe. 9-12), sibe nolindelo olusengqiqweni (Isiqe. 13-15), sikhumbule iimbambano ezibandakanyekileyo (Isiqe. 16-17), size ‘sisondele kuThixo’ (Isiqe. 18-20)?
[Ibhokisi ekwiphepha 25]
Ezinye Izinto Ezidimazayo
Impilo/ubudala. Ukuba sinesigulo esinganyangekiyo okanye sinezinto esingasakwazi kuzenza ngenxa yobudala, sinokudandatheka ngenxa yokuba singasakwazi ukwenza okungakumbi kwinkonzo kaThixo.—Hebhere 6:10.
Ukuphoxeka. Sisenokudana ukuba abantu abasabeli kangako kwimigudu esiyenzayo yokushumayela ngeLizwi likaThixo.—IMizekeliso 13:12.
Ukuziva ungento yanto. Ngenxa yokuphathwa kakubi kangangeminyaka emininzi, umntu usenokuzixelela ukuba akathandwa, nkqu nanguYehova.—1 Yohane 3:19, 20.
Ukukhubeka. Ukuba umntu uye woniwa ngokhonza kunye naye, usenokuba buhlungu kangangokude ahendelwe ekubeni ayeke ukuza kwiintlanganiso zamaKristu okanye ukushumayela.—Luka 17:1.
Intshutshiso. Abanye abangakhonzi kunye nawe banokukuchasa, bakutshutshise okanye bakugculele.—2 Timoti 3:12; 2 Petros 3:3, 4.
[Umfanekiso okwiphepha 26]
UYesu wasibongoza ukuba ‘sithandaze ngokuqhubekayo’ ukuze sifumane uncedo lokulwa nezilingo