Umzekelo Wokuxeliswa—UAsafu

Kukho into ekhathaza uAsafu. Abantu aphila nabo baphula imithetho kaThixo kodwa izinto zibahambela kakuhle! Ngenxa yoko, uAsafu uyazibuza enoba kuyingenelo kusini na ukuzama ukukholisa uThixo. Uthi: “Ngokuqinisekileyo kulilize ukuyihlambulula kwam intliziyo yam nokuhlamba kwam izandla zam ngobumsulwa.” Kodwa ke, emva kokucingisisa nzulu ngalo mbandela, uAsafu utshintsha isimo sakhe sengqondo. Uyaqonda ukuba ukuziyolisa kwabangendawo kokwexeshana. Uphetha ngelithini ke uAsafu? Uculela uYehova le ngoma: “Ngaphandle kwakho ayikho enye into endiyolisayo emhlabeni.”—INdumiso 73:3, 13, 16, 25, 27.

Mhlawumbi nawe ukhe ukuthandabuze ukubaluleka kokuphila ngemilinganiselo kaThixo. Kodwa njengoAsafu, ziqwalasele ngenyameko izinto. Cinga ngemeko yabo baye bayigatya imithetho kaYehova. Ngaba ngokwenene baseluxolweni? Ngaba bonwabe ngaphezu kwabo bathembekileyo kuThixo? Emva kokuba ucingisisile ngalo mbandela, ngokuqinisekileyo uya kuvakalelwa njengoAsafu owathetha la mazwi: “Ukusondela kuThixo kulungile kum.”—INdumiso 73:28.