Uyamazi Na UThixo Omnqulayo?

“UTHIXO UFILE.” Elo binzana, elaqanjwa sisithandi sobulumko saseJamani uFriedrich Nietzsche kwinkulungwane edluleyo, sahlaziywa ngabefundisi abathile kwiminyaka yee-1960. Ngelo xesha abantu abaninzi abafundileyo babecinga ukuba ibutho labantu behlabathi elinyulu lalinokuzicombulula iingxaki zoluntu lize liqinisekise ulonwabo.

Kwandula ke kwakho ukubuyela ezingqondweni, yaye kwiminyaka yee-1970 abantu batyekela ‘kwizinto zokomoya.’ Iingcali zenzululwazi engoluntu zafumanisa ukuba ukuze abantu bonwabe, bafuna izinto zokomoya ebomini babo. Kwanakwiinkqubo zenzululwazi kwaya kuba lula ngakumbi ukuvuma ukuba kuyafuneka ukukholelwa kuThixo. Ngaloo ndlela kwincwadi yakhe yowe-1979 ethi Dieu existe? Oui (Ngaba UThixo Ukho? Ewe), umbhali ongumFrentshi uChristian Chabanis wakwazi ukuquka udliwano-ndlebe olwenziwa nabantu abasithoba abangamaFrentshi nabafunde inzululwazi, abathi bonke bakuvuma ukukholelwa okuthile kuThixo.

Kakade ke, izigidi zabantu azizange zivumelane nengcamango ethi “uThixo ufile.” Ziye zalulondoloza ukholo lwazo kuThixo. Kodwa ngaba oku ngokuyimfuneko kuthetha ukuba zinembono ecacileyo ngoThixo?

Ngowe-1967 iBhunga loobhishophu bamaKatolika laseFransi landlala uludwe lweengxaki ezaziphazamisa amaKatoIika. Eyokuqala ukuvela kolo ludwe yayiyethi “Ulwazi lwethu ngoThixo” yaye eyesibini yayiyethi “Ubuntu bukaKristu.” Kwincwadi yakhe ethi God for Men of Today, umbhali u Jacques Duquesne wadlan’ indlebe nendoda engumKatolika nenama-58 eminyaka ubudala eyavumayo yathi: “Maxa wambi ndikhe ndizibuze enoba uKristu unguThixo ngenene na. . . . Ndiyazama ukuzenza ndikholelwe. Kuyingxaki enkulu kum.” UDuquesne wakwacaphula abefundisi ababini bamaKatolika njengabathi kumaKristu amaninzi “iingcamango ziziindlela ezahlukahlukeneyo, eziqikeleIwayo nezokuzithandela; nganye yazo ayinantsingiselo; enye ingcamango ayicacisi enye; ngoko ke, kunzima ukuzivakalisa kubantu abaphila namhlanje. Ukuba abefundisi bagqiba kwelokongezelela uMntu wesine kuBathathu Emnye, oko bekuya kuwaphazamisa ukusa kuwuphi umlinganiselo awona maKristu maninzi nabalaseleyo?”

Eneneni, eyona mfundiso engaxaki amaKatoIika kuphela kodwa kwanamalungu eCawa yobuOrthodox yaseMpuma noninzi lweecawa zamaProtestanti yekaBathathu Emnye. Ngayo iA Catholic Dictionary ithi: “Sinokuyiqonda indlela abantu abathathu abahlukene ngayo omnye komnye ukanti benobuntu obufanayo. Ukumanyana kwAbantu abangooThixo abathathu kwahluke ngokupheleleyo. Xa sithetha ngabo njengoThixo omnye, asitsho ukuba asikuphela nje ukuba ngamnye kubo unguThixo, kodwa ukuba omnye usekwangulaa Thixo umnye, yaye ilapha ke le mfihlelo, ingaqondakaliyo kuso nasiphi na isidalwa esinengqiqo.” Alimangalisi elokuba amaKatoIika ekhalaza ngelokuba eyona ngxaki yawo inkulu ‘kukwazi uThixo’!

Ukunqula UThixo Ongaziwayo

Phantse iwaka lezigidi zabantu beecawa zeNgqobhoko libizelwa ukuba lizokunqula uThixo elingenakumqonda. Lizifumana likwimeko efana naleyo yamaSamariya amandulo, uYesu awathi komnye wawo: “Nina maSamariya ninqula eningakwaziyo.” (Yohane 4:22, New International Version) Kwakutheni ukuze uYesu abe nokuthetha loo nto?

Kwinkulungwane yesibhozo Ngaphambi kweXesha Eliqhelekileyo, ubukumkani basentla bezizwe ezilishumi zakwaSirayeli nekomkhulu labo eliyiSamariya boyiswa ngama-Asiriya, yaye amaSirayeli amaninzi asiwa eAsiriya nakweminye imimandla eyayoyisiwe. Kamva, ukumkani waseAsiriya wathumela abantu abaninzi aboyiswayo, ekuphawuleka ukuba babesuka eBhabhiloni, ukuba baye kummandla wakwaSirayeli owaziwa ngokuba yiSamariya. Oku kwabangela ukuxubana kwabemi abangamaSirayeli nabangabahedeni. Ngokuphathelele abo babeqhelisela unqulo oluxubeneyo olwavela apho, iBhayibhile ithi: “UYehova ayemoyika, oothixo bawo ebakhonza ngokwesiko leentlanga ababefuduswe kuzo.”—2 Kumkani 17:26-33; thelekisa eyoku-1 yooKumkani 12:28-31.

Ewe, amaSamariya ayemoyika uYehova. Ade amkela nenxalenye yeLizwi lakhe—iPentatike, okanye iincwadi ezintlanu zokuqala zeBhayibhile. Kodwa axuba unqulo lukaYehova nonqulo lobuxoki lwaseBhabhiloni. Yaye yayingamaSamariya anjalo la uYesu wathi ngawo: “Nina ninqula eningakwaziyo.” Ayemazi uYehova, kodwa akazange alamkele lonke ilizwi lakhe. Yaye ayengamnquli uThixo “ngoMoya nangenyaniso.”—Yohane 4:22, 23.

Ngaba amalungu eecawa zeNgqobhoko akazifumani ekwimeko enjalo? Ayamazi uThixo, kodwa amaninzi kuzo ayavuma ukuba akamazi ngenene. Akunakho ukuba ungakukhathaleli oku, kuba uYesu wathi: “Bubo ke obu ubomi obungunaphakade, ukuba mabakwazi, wena okuphela koThixo oyinyaniso, naye uYesu Kristu omthumileyo.”—Yohane 17:3.

Yiyiphi imfundiso eye yathi ngokukhethekileyo yawathintela amalungu eecawa zeNgqobhoko ekubeni amazi uYehova, “okuphela koThixo oyinyaniso”? Ngokungathandabuzekiyo, ‘yimfihlelo engaqondakaliyo’ kaBathathu Emnye. Kanti xa efunda iBhayibhile umntu akabi namvakalelo yokuba amaKristu angaphambili ayenqula ‘uThixo oyimfihlelo.’ Umpostile uYohane wathi “uNyana kaThixo . . . wasinika ingqondo, ukuze simazi oyinyaniso [uYehova uThixo]. Sikuye ke oyinyaniso, kuye uNyana wakhe uYesu Kristu.”—1 Yohane 5:20.

[Umfanekiso okwiphepha 22]

Isibingelelo esanikezelwa koothixo abangaziwayo, esafunyanwa ePergamum, eAsia Minor