Ukuzuza Amandla, Singatyhafi

“Umnika otyhafileyo amandla, ongenakomelela amandisele ukuqina.”—ISAYA 40:29.

1, 2. Ubuya kukubonisa njani oko amaKristu afana ngako neembaleki ezikugqatso lokubaleka?

NGENTSASA yango-Oktobha we-1984, inyambalala yabantu abali-16 000 ababenenxaxheba kugqatso yathontelana kwizitrato ukuza kuqalisa ugqatso lokubaleka umGama Omde kwiSixeko saseNew York. Kwakuza kubalekwa kumgama oziikhilomitha ezingama-42,2. Loo ntwasahlobo eyayifudumele ngokungafanelekanga yayihambisana nobushushu obugqithisileyo nefuthe eliphakamileyo elaziphelisa amandla iimbaleki laza lavavanya unyamezelo lwazo. Olu gqatso lwaba ngumzabalazo oqobayo kwanakwabo baziimbaleki ezibalaseleyo. Iimbaleki ezininzi zatyhafa zaza zayeka phakathi kugqatso; phantse ezingama-2 000 azizange zilugqibe. Ezo zalugqibayo zoyisa iimeko ezinzima kakhulu.

² NamaKristu aselugqatsweni. Uyintoni umvuzo? Bubomi obungunaphakade. Ibe ngokufanayo nembaleki ekugqatso lomgama omde, amele azabalaze de kube sekupheleni. Kufuneka unyamezelo. Kumele kulondolozwe amandla kuze kuphetshwe ukutyhafa. Ugqatso lwethu lobomi asilolomgama nje omfutshane kodwa, kunoko, lunjengogqatso lokubaleka omde. UPawulos wathi kumaKristu angoowabo aseKorinte: “Anazi na, ukuba abo babalekayo elugqatsweni, babaleka bonke okunene, kodwa ke mnye owamkelayo umvuzo? Balekani ngokunjalo ke, ukuze nizuze.” (1 Korinte 9:24) Indlela amaKristu abaleka ngayo ingokuzibhokoxa ngamandla.—Luka 13:24.

3. Kukanjani kuphela anokuthi amaKristu agcine isantya sokubaleka ngamandla de alugqibe ugqatso?

³ Kodwa usenokubuza uthi: ‘Ngubani onokusigcina eso santya de alugqibe ugqatso?’ Akukho namnye unako ukukwenza oko ngamandla ethu. Ukuze siwufumane umvuzo, simele sifumane uMthombo wamandla amakhulu, uYehova uThixo.—Yobhi 36:22; INdumiso 108:13.

UYehova—UnguMthombo Wamandla Amakhulu

4. Ngokukamprofeti uIsaya, kutheni le nto sinokuba nentembelo kumandla kaYehova okulondoloza abakhonzi bakhe?

⁴ Alithandabuzeki elokuba uYehova unokubalondoloza abakhonzi bakhe. Esebenzisa umprofeti wakhe ulsaya, uSomandla wathetha ngobuchule Bakhe obungasikelwe mda nemisebenzi Yakhe yamandla engenakuthelekiswa nanto. Wathi: “Phakamiselani amehlo enu phezulu, nibone: ngubani na owadala ezi zinto? Ngulokhupha umkhosi wazo ngamaqela, uzibiza zonke ziphela ngamagama, ngenxa yobukhulu bokomelela, ekhaliphile ngamandla; akusali nanye. . . . Akwazi na? Akuvanga na, ukuba uThixo ongunaphakade nguYehova, uMdali weziphelo zehlabathi? Akatyhafi, akadinwa; ayinakugocwagocwa ingqondo yakhe.”—Isaya 40:26-28.

5, 6. Nika imizekelo yobungqina bamandla kaYehova amakhulu.

⁵ Ukususela kumlinganiselo omncinane ukusa kumlinganiselo omkhulu, imbonakaliso yamandla kaYehova okudala iyakhwankqisa! Ngokomzekelo, qwalasela izinto ezakhiwe ngazo izinto, kuquka nathi—iiathom. Zincinane kakhulu kangangokuba ithontsi lamanzi liqulethe amawaka ezigidi ezili-100 zeeathom (ngokwendlela yokubala yaseMerika). Noko ke, okumangalisayo kukuba, ngaphakathi kwinukliyasi yeeathom kukho amandla awaneleyo anokuthi ngesihlandlo esinye, adubule ngamandla anokuvula umngxuma emhlabeni obunzulu bunokungena isakhiwo esimigangatho ingama-32 uze ube ziimitha ezingama-390 ububanzi.

⁶ Kwelinye icala, khawuqwalasele ilanga. Eli dike likhulu kakhulu lenyukliya, elinobunzima obungamawaka ezigidi zeetoni, lifudumeza iphahlothi lethu lelanga. Lizaliswe ngamandla eliwafumana kwiiathom ezincinane. Nangona bonke ubomi emhlabeni—obezityalo, obezilwanyana nobabantu—buxhomekeke kumandla akhutshwa leli ziko likhulu lamandla lisesibhakabhakeni, kuphela sisixa esincinane kakhulu samandla elanga ngokwenene esifikelela emhlabeni. Kanti, loo mandla anele ukuxhasa ubomi. Kwincwadi yakhe ethi Astronomy, uFred Hoyle osisazi ngeenkwenkwezi ubhala oku: “Iqhezwana elincinane kakhulu lamandla eLanga aza eMhlabeni—ekuqikelelwa ukuba liziinxalenye ezintlanu kwezilikhulu lezigidi ngezigidi—linamandla angaphezulu phantse ngokuphindwe kali-100 000 kunawo onke amandla asetyenziswa kwimizi-mveliso yehlabathi.”

7. Sifanele sivakalelwe njani ngoYehova emva kokubona amandla abonakaliswe kwindalo yakhe?

⁷ Sekunjalo, ilanga likuphela kwenye yeenkwenkwezi ezizizigidi ezenza ikroza loMnyele wethu—ibe liyinkwenkwezi enomlinganiselo ophakathi. Ukongezelela, izazi ngeenkwenkwezi ziqikelela ukuba kukho amakroza amalunga ne-100 000 000 000 kwindalo eyaziwayo. Oku kuyakhwankqisa ukukuthelekelela, ngaba akunjalo? Akumangalisi ukuba indoda enguYobhi, emva kokucamngca ngendlela uYehova ‘alitwabulula ngayo izulu eyedwa,’ abe wathi uThixo ‘wenza izinto ezinkulu ezingenakugocwagocwa nemisebenzi ebalulekileyo engenakubalwa.’—Yobhi 9:8-10.

UYehova Unokukomeleza

8. (a) Ngoobani kuphela abanokuthi ngokupheleleyo bazuze kumandla kaYehova, yaye ngoba? (b) Idinga elikuIsaya 40:29-31 lilomeleza njani ukholo?

⁸ Abanquli bakaYehova bokwenyaniso banokuthi ngokukhululekileyo nangokupheleleyo bazuze kulo Mthombo wamandla amakhulu awadala indalo iphela nayilondolozayo. Abakhonzi bakaYehova ‘banokomelezwa ngamandla ngawo umoya wakhe,’ bengenaloyiko lokuswela amandla. (Efese 3:16; INdumiso 84:4, 5) Ngokwenene, ukuphumelela kwethu kugqatso lobomi kuxhomekeke ekubeni nentembelo epheleleyo yokuba isandla sikaThixo esinamandla sinokusenza sifikelele entanjeni. Unokusipha amandla. Kunjengokuba umprofeti uIsaya esithi ngoYehova: “Umnika otyhafileyo amandla, ongenakomelela amandisele ukuqina. Namadodana angatyhafa adinwe, nabafana bakhubeke bawe; ke bona abathembele kuYehova baya kuhlaziyeka emandleni; banyuke ngamaphiko njengeenkozi. Baya kugidima bangadinwa, bahambe bangatyhafi.” (Isaya 40:29-31) Ewe, ukufunda nje loo mazwi kunokuwuphemba umoya wethu!

9. UYehova unokukunceda njani kwiingxaki zakho ‘ezinjengentaba’?

⁹ Xa ngokucacileyo ujamelene neengxaki ezinkulu ezisongela ukuyithintela inzondelelo yakho yonqulo lokwenyaniso, usenokuziva umncinane yaye ungabalulekanga. Musa ukuncama. Yiya kuBawo wakho wasemazulwini onamandla onke. Uyabomeleza ‘bonke abathembele kuye.’ Ngaba uMdali weathom ebengenakubanika abantu bakhe amandla amakhulu ngokwaneleyo okushenxisa ezo ‘ntaba’? Ngokuqinisekileyo unako!—Marko 11:23.

10. (a) Ziziphi izinto ezinokutyhafisa iimbaleki ezingamaKristu? (b) Yintoni uSathana afuna ukuyenza kuwe?

¹⁰ Kwelinye icala, wambi amaKristu asenokudinwa kakhulu lidabi lemihla ngemihla elinxamnye neengcinezelo zehlabathi elibonakalisa ukungayihoyi imigaqo yobuKristu kangangokuba asenokuvakalelwa efuna ukuyekelela umxakatho okanye ade ayeke kugqatso lobomi. Ukugula, iingxaki zemali, iingxaki zentsapho, ubulolo, okanye ezinye iinzima nazo zinokubangela ukudimazeka. Yaye ukudimazeka kunokuwaphelisa ngokukhawuleza amandla omKristu, kanye njengokuba imini eshushu gqitha inokuwaphelisa ngokukhawuleza amandla embaleki ekugqatso lwemigama emide. UTshaba olukhulu, uSathana uMtyholi, usebenzisa izinto ezilolo hlobo ukuzama ukwaphula ingqibelelo yakho njengomkhonzi kaYehova. (1 Petros 5:8) Musa ukumvumela uMtyholi akwenze oko! Khangela kuMdali wezo zigidi ngezigidi zamakroza asezulwini ukuba ahlaziye amandla akho okomoya. UYehova unokukuxhasa.—INdumiso 37:17; 54:4.

11. Yintoni esinokuyifunda kwindlela uDavide awajamelana ngayo nemiqobo?

¹¹ Xa wayejamelene nemiqobo, uDavide wayesoloko emfumana uYehova engumthombo wamandla amatsha. Ngokuhlaziywa ngumoya oyingcwele, ngaloo ndlela uDavide wayeba nako ‘ukuqabela’ nayiphi na inkcaso. Wathi: “Ngokuba ngawe ndigila amajarha, ngoThixo wam ndiqabela ezindongeni.” UDavide waphinda wathi: “NgoThixo siya kweyisa, wobagqusha yena ababandezeli bethu.” (INdumiso 18:29; 60:12) UYehova unokwenza okufanayo ngawe.

Kulwe Ukudinwa Ngokomoya

12. (a) Kutheni le nto ukutyhafa okungokomoya kumele kushenxiswe ngokukhawuleza? (b) Ziziphi izinto ezibonakalisa ukutyhafa ngokomoya? (c) Ngawaphi amalungiselelo uYehova awenzileyo ukuvuselela abo batyhafileyo ngokomoya?

¹² Simele siyiphawule ngokukhawuleza imiqondiso yokutyhafa ngokomoya sandule ke sikhawulezise ukuhlangabezana nayo. Ngoba? Kungenxa yokuba kuphela ngabo bambalwa ‘abazama ngamandla ukungena ngesango elimxinwa,’ okanye zezo mbaleki ziyigqithayo intambo, ezizuza umvuzo wobomi obungunaphakade. (Luka 13:24; Filipi 3:12, 13) Khawuhlolisise ibhokisi enomxholo othi “Ezinye lindlela Zokulwa Ukutyhafa Okungokomoya.” Ngaba uyayibona imiqondiso ethile kuwe okanye kwilungu lentsapho? Ukuba kunjalo, thabatha amanyathelo akhawulezileyo okuyilungisa. Buhlaziye ubumoya bakho ngokufumana amandla kumalungiselelo kaYehova adwelisiweyo.

13, 14. (a) Yiyiphi imizekelo enokusinceda sihlaziye amandla ethu okomoya? (b) Icebiso elivela komnye umkhonzi kaYehova onexesha elide linokusinceda njani ukuba sihlale elugqatsweni?

¹³ Unokuwuxhathisa umkhwa wokutyhafa ngokuxelisa imizekelo yabakhonzi bakaThixo aboyisayo ababhalwe eBhayibhileni. Kwakukho amadoda nabafazi abaninzi, abancinane nabakhulu, abanyamezela kwada kwaba sekupheleni. Funda ngabo kwizibhalo ezinjengamaHebhere. Ngokukwanjalo, kumaxesha anamhla sinabazalwana noodade abaninzi abathandekayo abaqhubeka bekhonza uYehova ngokungatyhafi.

¹⁴ UGeorge, ohlala kwinxalenye esemazantsi eUnited States, uyimbaleki engumKristu nengumzekelo engazange ityhafe. Emva kweminyaka engaphezu kwama-50 kugqatso lobomi obungunaphakade, usaqhubeka eqinile. Liliphi icebiso asinika lona?

“Ndingathi ngokugxininisayo, namathela entlanganweni. Khumbula ukuba uYesu Kristu, njengoMthanjiswa kaYehova, wongamele intlangano. Ngoko musa ukudimazeka xa uthile osondeleyo kuwe esiba ngongathembekanga. Ukuba kukho nto ithile ongayiqondi ngokupheleleyo okanye ofumanisa kunzima ukuyamkela, yiba nentembelo yokuba emva kwexesha iya kuconjululwa. Intlangano kaYehova ihambe nathi yaza kuthi ga apha. Masiyithembe ukuze isikhokelele ukusa kuLungelelwaniso Olutsha.”—Yohane 6:66-68.

15. Ukuba imizekelo emihle iza kuhlaziya umoya wethu, simele senze ntoni?

¹⁵ Kusenokubakho abathile baba baxabisekileyo kwibandla okulo, okanye unokuhlangana nabo kwiindibano zesiphaluka. Thetha nabo. Funda kubo. Ukongezelela, eminye imizekelo yabathembekileyo ifumaneka kwiYearbook, kwiMboniselo, nakwezinye iimpapasho zoMbutho. Zifunde ezi ngxelo. Bona indlela onokuwafumana ngayo amandla kuloo mava.

Badala—Yibani “Nokhuthazo Olomelezayo”

16. (a) Abadala banokuwanceda njani amaKristu angoowabo ukuba azuze amandla? (b) Bamele balumke njani abadala xa benikela ukhuthazo nesiluleko?

¹⁶ Ngokukhethekileyo abadala bamabandla bafanele bakuphaphele ukunceda amalungu abonakalisa imiqondiso yokuyekelela. UIsaya 35:3 unikela isiluleko esihle xa esithi: “Yomelezani izandla eziwileyo, niwaqinise amadolo agexayo.” Kodwa nina badala ninokuyenza njani indima yenu koku? Phakathi kwezinye izinto, yibani ngabaphawulayo. Fumanisani unobangela wokwenene wokuyekelela umxakatho okubonakalayo. Nikelani amacebiso asebenzisekayo nangokweZibhalo enziwe afanelekela loo mntu. Kodwa lumkani. Nifuna ukumkhuthaza, kungekhona ukumdimaza, umzalwana wenu.a Ngoko ke, isazela senu musani ukusinyanzela komnye umntu, okanye nimcinezele ubani lowo ukuba alandele isigqibo senu, okanye nimgqale njengomKristu ongakhulanga ukuba uyazilazila ukwamkela imbono yenu yobuqu. Abadala bamele basekele isiluleko nokhuthazo lwabo eBhayibhileni. Bebengayi kufuna ukwenza iimbaleki ezingoowabo ziyekelele umxakatho ngokufumba phezu kwazo imithetho engeyomfuneko yebandla.—Thelekisa uMateyu 11:28, 29 noMateyu 23:2-4.

17. Abadala banokuhlangabezana njani nobuchule bukaSathana obucetyelwe ukwenza amaKristu angoowabo ayekelele?

¹⁷ Abadala banokumisela imizekelo emihle njengabalandeli bakaKristu ngokuthi bakhawulezise ukuncoma amalungu ebandla. Wenzeni azive efunwa ngokwenene! Inkqubo kaSathana isoloko ikulungele ngakumbi ukwenza umKristu ukuba azive kungekho yakhe. Kweli nqanaba kugqatso lwabo lobomi, abazalwana bethu abafuni bantu bahlaba amadlala, kodwa bafuna abahlobo bokubakhuthazela ekoyiseni. Ngokomzekelo, xa udade oliqina kwafuneka ayeke ukuba nguvulindlela, intliziyo yakhe yamshukumisela ukuba anqwenele ukuphindela kwinkonzo yexesha elizeleyo. Kodwa wayengenakwenjenjalo ngenxa yeemeko ezingokwemali. Nangona wayefuna ngokwenene, umdala wambuza ngendlela egxekayo ethi: “Uza kuba nguvulindlela nini kwakhona?” Impendulo yakhe equphayo yammangalisa isithi: “Xa umyeni wam enokuhlawula irhafu.” Into lo mdala awasilelayo ukuyiqonda, kodwa awayiqonda kamva kukuba, ukuba nguvulindlela kwakhe kwakuxhaswa ngokuyintloko ngumvuzo wendoda yakhe. Kodwa xa umqeshi wakhe wamnika umsebenzi ongakumbi nangakumbi othandabuzekayo kumKristu, isazela somyeni wakhe samshukumisela ukuba afune omnye umsebenzi. Kubudala bakhe, imisebenzi yayingafumaneki lula. Ngoko kwafuneka ukuba aphangele kwindawo ehlawula kancinane; kungoko kwakuyimfuneko ukuba umfazi wakhe asebenze ixesha elizeleyo.

18. Kungayiphi indlela abanokuthi abadala “babe nokhuthazo olomelezayo”?

¹⁸ Ngokwamava awandulelayo, ngaba sifanele siqonde ukuba abadala bamele bathandabuze ukunikela isiluleko kumaKristu angoowabo? Hayi. Kunoko, xa isiluleko okanye ukhuthazo lufuneka, abadala kufuneka baziqonde iimeko zokwenene zabazalwana babo bangakhangeli nje kwiimbonakalo zangaphezulu. (Yakobi 2:15, 16) Ngale ndlela, abadala banokuba “nokhuthazo olomelezayo” ebandleni labo.—Kolose 4:11.

19. Yintoni onokuyenza ukunceda oovulindlela ukuba bangadinwa?

¹⁹ Abavakalisi boBukumkani abandayo baye bavuseleleka ibe ngoku bangoovulindlela abathe ngxi. Intswahla inokuzikhuthaza iimbaleki ezikugqatso lomgama omde ukuba zihlaziyeke emandleni. Ngoko yintoni oyenzayo ukukhuthaza oovulindlela abasebandleni lakho ukuba boyise? UDoug noJoanne baye benza inkonzo yexesha elizeleyo umsebenzi wabo ebomini. Kusenokudimaza xa abanye bebabuza besithi, “Niya kuze nibe nabo nini abantwana?” okanye, “Node nihlale nini phantsi?” Noko ke, kwenzeka ntoni xa amaNgqina angoowabo ebanika inkxaso efanelekileyo ngokuthi, “Qhubekani nomsebenzi omhle. Siyavuyiswa kukuba nani njengoovulindlela kwibandla lethu”? Ewe, abaphephi nje kuphela ukutyhafa okungokomoya kodwa bayancedwa ukuba babhabhe njengeenkozi kwinkonzo yabo yobuvulindlela!—Thelekisa uIsaya 40:31.

Indlela Oovulindlela Abanokuzuza Ngayo Amandla

20, 21. Abathile abakwinkonzo yexesha elizeleyo bawazuze njani amandla?

²⁰ Khawuphulaphule kwesi sibini sitshatileyo, uFrederick noMarian. Bayayazi indlela yokuzuza amandla. Bobabini bangabavangeli basemazweni abakhonza kwilizwe elikuMbindi Merika, ibe bobabini bakuma-70 eminyaka ubudala. UFrederick waqalisa inkonzo yakhe yokuba ngumvangeli wasemazweni ngowe-1946, uMarian ngowe-1950. Yintoni ebenza baqhubeke nenkonzo kaYehova? UFrederick uphendula ngokuthi: “Ukongezelela ekuthandeni uYehova nomnqweno wokunceda abanye abantu, kukuba nosukelo lobomi obungunaphakade engqondweni.” Umfazi wakhe uphendula athi ‘Amadinga kaThixo ngawo asenze saqhubeka.’ Benza njani ukuba bangatyhafi? UFrederick ucebisa athi, “Nokuba siyintoni na isabelo sakho, zixakekise kuso.” Umfazi wakhe uncomela ukuba “ngothe rhoqo kumsebenzi wobuthixo” yaye wongezelela athi: “Njengokuba ukhula, akunako ukuzenza zonke izinto ofuna ukuzenza. Oko bekunokundicaphukisa, kodwa ndithetha ngako kuYehova ngomthandazo.” UFrederick uqukumbela ngecebiso lakhe elihle elithi: “Busuku ngabunye siyathandaza sicela uYehova ukuba asincede.”—1 Petros 4:7.

²¹ ULavonia uneminyaka engama-67 ubudala yaye ebenguvulindlela othe ngxi iminyaka engama-20 edlulileyo. Phakathi kunyaka odlulileyo, wachitha iintsuku ezili-15 esibhedlele ibe ngoku ufumana unyango lwentliziyo. Ukufa kweqela lamalungu entsapho, kuquka umyeni wakhe noyise, bekuyintlungu engokwemvakalelo kuye. Usaqhubeka ezibhokoxa. Uye wawazuza njani amandla? Uthi, “Ukuba nesabelo ngokuzeleyo kumsebenzi wokushumayela kube luncedo lokwenene kuba xa ndikwazi ukuthetha nabanye ngoYehova, oko kuyayimkisa ingqondo yam kwiingxaki zam kuze kundinike uxolo lwengqondo novuyo olwenza ubomi bufanelekele ukuphilwa.” Akacebi kubushiya ubuvulindlela kodwa uthi: “Ukubona abanye befunda ngoYehova nangeenjongo zakhe ezizukileyo kundinika uvuyo olukhulu olubangela ukuba ndingaze ndicinge kwaukucinga ngokuyiyeka inkonzo yobuvulindlela.”—IZenzo 20:35.

22. Ukuze siluphumelele ugqatso lobomi obungunaphakade, simele siqhubeke sisenza ntoni?

²² Enoba siyakwazi ukuzibhokoxa njengoovulindlela kweli nqanaba lobomi okanye asikwazi, thina sonke sinokuhlala sisondele kuMthombo wamandla amakhulu, uYehova, nentlangano yakhe. Masiqhubeke sizuza amandla ngokumkhonza ngokunyanisekileyo uThixo wethu. Ngoko, njengoHabhakuki, sinokuthi: “Ungamandla am uYehova iNkosi; uzenza iinyawo zam, zibe njengezamaxhamakazi.” (Habhakuki 3:19) Ngaloo ndlela asiyi kutyhafa okanye sidinwe. Khumbula ukuba ugqatso phantse lube luphelile. Sisondele entanjeni!

[Umbhalo osemazantsi]

Imibuzo Yempinda

◻ Ngoobani kuphela abanokuzuza ngokukhululekileyo kumandla kaYehova amakhulu?

◻ Yiyiphi eminye imiqondiso yokutyhafa ngokomoya?

◻ Ngawaphi amalungiselelo kaYehova anokusinceda ukuba sizuze amandla?

◻ Abadala nabanye ebandleni banokubanceda njani oovulindlela ukuba bahlale ‘elugqatsweni’?

[Ibhokisi ekwiphepha 19]

Ezinye lindlela Zokulwa Ukutyhafa Okungokomoya

Imiqondiso Yokutyhafa

◻ Kukuswela ukuzeyisa ekudleni, ekuseleni nasekufuneni iziyolo

◻ Kukuphelelwa lihlombe ngenyaniso, ukuba nomoya wokungakhathali

◻ Kukufihla amathandabuzo anzulu nazingisileyo

◻ Kukutyeshela unxulumano kwiintlanganiso zebandla

◻ Kukuswela inzondelelo novuyo kubulungiseleli basentsimini

◻ Kukuhlaba amadlala ngokugqith’ emgceni abadala nentlangano

Izinto Zokukunceda Unyamezele

◻ Kukuthandazela uncedo lomoya oyingcwele—Luka 11:13; Galati 5:22, 23; 1 Petros 4:7

◻ Lufundisiso lobuqu—INdumiso 1:1, 2

◻ Kukucamngca ngemicimbi engokweZibhalo—INdumiso 77:12

◻ Kukubakho rhoqo kwiintlanganiso nakwiindibano—Nehemiya 8:1-3, 8, 10; Hebhere 10:23-25

◻ Kukuba nenxaxheba rhoqo kwinkonzo yasentsimini—IZenzo 20:18-21

◻ Luncedo oluvela kubadala bebandla nakubaveleli abahambahambayo—Roma 1:11, 12; Hebhere 13:17

[Umfanekiso okwiphepha 17]

UYehova uMdali wendalo iphela, uyawanceda amaNgqina akhe ukuba azuze amandla

[Inkcazelo]

Umfanekiso weNASA