Abavakalisi BoBukumkani Bayabalisa

UYehova ‘Uyahlumisa’ EFiji

IINTSIKELELO zikaYehova ziyabonakala kubavakalisi boBukumkani abathembekileyo kwiziqithi ezihle zaseFiji. Ngoku kukho amaNgqina kaYehova ali-1 049 kwezi ziqithi, ulwando lwe-10 ekhulwini ngaphezu konyaka odluleyo. Baye batyala baza bankcenkcesha, yaye uThixo wenze izinto zakhula.a—1 Korinte 3:6, 7.

Iofisi yesebe yeWatch Tower Society ithi “ngokungalindelekanga abantu babonisa umdla kwisifundo seBhayibhile.” Amalungu elinye ibandla ayesebenza kwilali ekwanti apho kwixesha elidlulileyo ayengamkelwanga ngokonwabisayo. Kodwa ngesi sihlandlo isibonda selali savakalisa ukuba bonke abemi belali bafanele bahlale emakhaya baze baphulaphule kumaNgqina kaYehova aze kamva amanenekazi anike abazalwana izimuncumuncu kwiholo yasekuhlaleni. Ekubuyeleni kwiiveki ezimbini kamva, uvulindlela othe ngxi wafumana abantu abangama-28 bekulungele ukufundisisa iBhayibhile. Ukususela ngoko, le lali ibityelelwa ngeendaba ezilungileyo rhoqo ngeeveki ezimbini ukunceda abanomdla. Kutyelelo ngalunye “abantu abangakumbi bayongezeleleka kwizifundo.”

Omnye kwabangama-68 abatsha ababhaptizwa kwindibano yakutshanje yesithili wayengumfundisi kwisikolo seCawa kangangeminyaka esithoba. Wayephuma kwintsapho eluxabise gqitha unqulo. Wabonwa ngamaNgqina amabini kubulungiseleli bawo bendlu ngendlu, yaye “emva kweengxubusho ezinde nokubuyela kaninzi, ekugqibeleni isifundo saqaliswa.” Emva kweenyanga ezimbini zokufundisisa iBhayibhile, warhoxa kwisikhundla sakhe njengomfundisi wesikolo seCawa, wamela inyaniso, waza wabhaptizwa emva konyaka. Esitsho ngawakhe amazwi oko kwathethwa ngumpostile uPawulos, wathi: “Kusenokuba nivile ngomsebenzi wam wenzondelelo kunqulo lobuxoki xa ndandinenzondelelo ngenxa yezithethe zoobawo. Kodwa ngoku ndiye ndayifumana inyaniso, yaye ndonwabile ukukhonza uYehova kunye nani.”—Thelekisa amaGalati 1:13, 14.

Ngowe-1984 iFiji yaba neendibano zayo ezimbini zesithili okwesihlandlo sokuqala. Abadala abangama-22 abaphuma kwisiqithi esikhulu bazinikela, ngeendleko zabo, ukuba banikele inkxaso kucwangciso kwindibano encinane yesibini kwesinye isiqithi. Iofisi yesebe yalungiselela uhambo yaza yalindela ukuba abazalwana abangama-90 baye bephuma kwisiqithi esikhulu. Noko ke, abali-115 baya ngenqwelo-moya ekhethekileyo baza abangama-320 baya ngenqanawa eqashwayo. Ngenxa yehambo entle yamaNgqina, omnye umqhubi wenqwelo-moya wathi: “Ndimangalisiwe yihambo yabo, ekubeni bekulungele ukuthobela imiyalelo. Xa ndavakalisa ukuba bamele behlike ngenxa yomonakalo ozenzekelayo, ngokuthe cwaka behlika kwinqwelo-moya ngaphandle kokumbomba okanye ukukhalaza. Ekukhweleni kwakhona, bakwenza oko ngolonwabo, ngokuthe cwaka, ngaphandle kokuxabana. Ndinqwenela ukuba bonke abahambi ngeenqwelo-moya bebefana nani.”

Umphathi omkhulu wenqanawa eqeshiweyo wagqabaza wathi: “Kulungile ukuba nani njengabahambi, kuba nahluke ngokupheleleyo kwiqela lolutsha olungamaKristu ebesilusa kwesinye isiqithi. . . . Nicocekile yaye nisebenzisana ngokulula nabantu.” Umhambi onguwabo wathi: “Ndibone into endingazange ndiyibone ngaphambili . . . ndandilele kumgangatho obandayo xa omnye woodade benu wanika mna nomfazi wam umatrasi wakhe ukuba silale kuwo. Bendifuna unqulo olunjengolu.” Lo mntu waya kwindibano ukuba abone aze afunde okungakumbi.

Eneneni, ihambo entle yabo bonke aba bazalwana yileyo wonke umntu afanele ayilindele kumaKristu okwenyaniso. UYesu wathi: “Yonke imithi elungileyo ivelisa iziqhamo ezihle.” (Mateyu 7:17) Kuluvuyo ukubona ulwando uYehova alunika abanquli bakhe abathembekileyo eFiji. Yaye akuthandabuzeki abaninzi abangakumbi baya kusabela kwiindaba ezilungileyo njengoko bephulaphula ngokubhekele phaya ibe beqhubeka besondela ihambo entle yabantu bakaYehova.

[Umbhalo osemazantsi]