‘Zigcine Ungenabala, Ungenasiphako Yaye Useluxolweni’
“Khuthalelani ukuba nifunyanwe kuye niseluxolweni, ningenabala, ninganasiphako.”—2 PETROS 3:14.
1, 2. Buyintoni ubungcwele?
UYEHOVA UTHIXO ungcwele. Emthandazweni uNyana wakhe, uYesu Kristu, wambiza ‘njengoBawo Oyingcwele.’ (Yohane 17:1, 11) Yaye izidalwa zomoya ezulwini zichazwa zisithi: “Uyingcwele, uyingcwele, uyingcwele uYehova wemikhosi.” (Isaya 6:3) Kodwa buyintoni ubungcwele?
2 Igama elithi “ngcwele” nelithi “ubungcwele” aguqulwe ngokusuka kumagama esiHebhere anentsingiselo esisiseko ethi “ukuqaqamba,” “ubutsha, ukungabi nabala okanye ukucoceka” ngokwenyama. Noko ke, eZibhalweni, la magama asetyenziswe ngokuyintloko kwingqiqo yokuziphatha okanye yokomoya. Igama lokuqala lesiHebhere likwadlulisa ingcinga yokuba ngozahluleleyo, othe ngqungu, okanye ukungcwaliswa koThixo ongcwele, uYehova. KwanakwiZibhalo zamaKristu zesiGrike, amagama aguqulelwe ngokuthi “ngcwele” nelithi “ubungcwele” abonisa ukuzahlulela kuThixo. Akwasetyenziswa ukubhekisela kubungcwele njengophawu lukaYehova, nobunyulu okanye ukufezeka kwihambo yobuntu bomntu ngamnye. Ngoko ubungcwele buthetha ukucoceka nobunyulu.
Ubungcwele Buyimfuneko Kubantu BakaYehova
3. Kutheni uYehova efanelwe lunqulo olunyulu nje?
3 Ngoko, sithetha ntoni esi sibhengezo sasezulwini sithi: “Ingcwele, ingcwele, ingcwele iNkosi uThixo uSomandla”? (ISityhilelo 4:8) Ewe, oku kuthetha ukuthi uThixo ungcwele, ucocekile ngokowona mlinganiselo ulungileyo! Ngoko ke, uYehova, ‘Oyingcwele,’ ufanelwe lunqulo olucocekileyo. (IMizekeliso 9:10) Ngokuvisisana noko, uYehova uThixo wayalela umprofeti uMoses ukuba axelele amaSirayeli oku: “Yibani ngcwele; kuba ndiyiNgcwele mna, Yehova, uThixo wenu.”—Levitikus 19:1, 2.
4. Yiyiphi ekuphela kwendlela ekunokwenzeka ngayo ukunqula uYehova ngokwamkelekileyo?
4 Nabani na ozibanga enikela inkonzo eyamkelekileyo kuYehova ngoxa eqhelisela ukungcola ulisikizi emehlweni akhe, kuba kuphela kungobulumko bukaThixo nokuba ngcwele ekunokwenzeka ukumnqula ngokwamkelekileyo. (IMizekeliso 20:25; 21:27) Ngaloo ndlela, xa uThixo waxela kwangaphambili ukuba indlela yabantu bakhe abathinjiweyo wayeya kuyicoca ukuba babuyele eYerusalem ukusuka eBhabhiloni, wathi: “Kuthiwe ukubizwa kwayo, yindlela engcwele le. Akuyi kudlula nto iyinqambi ngayo.” (Isaya 35:8) Intsalela eyabuyayo ngowe-537 B.C.E. yakwenza oko ngeentshukumisa ezingcwele, ukuze ibuyisele unqulo oluyinyaniso ‘koyiNgcwele.’ Yaye amaSirayeli ayenokungqineka engcwele ngokuthobela uThixo. Kodwa asilela ukuhlala engcwele yaye engenabala ngokwembono yakhe.—Thelekisa uYakobi 1:27.
5. UPawulos wabonisa njani ukuba amaSirayeli okomoya amele anqule uThixo ngobungcwele?
5 AmaSirayeli okomoya okanye amaKristu athanjisiweyo, nawo amele anqule uYehova ngobungcwele. (Galati 6:16) Kule nkalo, umpostile uPawulos wabongoza amakholwa angoowabo ukuba ‘anikele imizimba yawo ibe lidini eliphilileyo, elingcwele nelamkelekileyo kuThixo.’ Ukuze enze oku, la makholwa kwakuya kufuneka aqiniseke ukuba ayesenza ukuthanda kukaThixo, kuba uPawulos wongezelela esithi: “Kanjalo ningamilisi okweli phakade; manibe kumila kumbi ngokuhlaziyeka kwengqiqo yenu, ukuze nikucikide into okuyiyo ukuthanda kukaThixo okulungileyo, okukholekileyo, okuzalisekileyo.”—Roma 12:1, 2.
6. Onke amaKristu amele azilinde nxamnye nantoni?
6 Kweli xesha lolwando, abaninzi abatsha bathontelana kwintlangano kaYehova. Nabo ngokunjalo, banqula uYehova ngobungcwele. Hayi indlela abavuyiswa ngayo lithemba lokuphumela bephilile ‘kwimbandezelo enkulu’ nelokunandipha ubomi obungunaphakade kumhlaba oyiparadisi kwinkqubo kaThixo entsha yobulungisa! (Mateyu 24:21; Luka 23:43) Kodwa ukuba abo banethemba lasezulwini kunye ‘nesihlwele esikhulu’ esinethemba lasemhlabeni baza kunandipha ubomi obungenasiphelo, bamele bazilinde nxamnye nemikhwa engcolisayo okanye nayiphi na enye into echaseneyo nokuziphatha okuhle kwanemfundiso yeZibhalo. ISityhilelo 7:9, 14.
7. Yintoni uPetros awayithethayo ebalaselisa imfuneko yokuba ngumzekelo “ngeehambo ezingcwele”?
7 Esalatha kwixesha lethu, umpostile uPetros wabhala oku: “Iya kufika ke imini yeNkosi njengesela ebusuku, eliya kuthi ngayo izulu [oorhulumente behlabathi] lidlule liqhuqhumba, zithi ke iziqalelo [isimo sengqondo neendlela zehlabathi] zitshe, zichithakale, nomhlaba [ibutho labantu elityekileyo kuThixo] nayo imisebenzi ekuwo itshiswe” ibe ‘njengezulu’ ‘nanjengeziqalelo’ ‘kumlilo’ otshabalalisayo wemini kaYehova. Ngoko uPetros wongezelela esithi: “Ezo zinto zonke ngoku zichithakala nje, nimele ukuba ngabanjani na ngeehambo ezingcwele nezenzo zokuhlonela uThixo; nikulindela, nikukhawulezela, ukufika kwayo imini kaThixo, eliya kuthi ngenxa yayo izulu lifakwe isikhuni, lichithakale, zithi neziqalelo zitshe zinyibilike?” Ewe, onke amaNgqina kaYehova amele abe ngumzekelo “ngeehambo ezingcwele.” Yaye abo balondoloza ubungcwele banokukhangela phambili kwindawo enqabisekileyo ‘kwizulu nomhlaba omtsha’ wobulungisa kaThixo. (2 Petros 3:7, 10-13) Elinjani ukusikeleleka ithemba ekulilo oko!
8. Yintoni ekufuneka ayenze umKristu ukuba uye waphambuka kwikhondo lobungcwele?
8 Noko ke, kuthekani ukuba umKristu wenze kakuhle kwinkonzo kaYehova kangangexesha elithile kodwa kamva wavelisa imikhwa engcolisayo okanye akavisisana nemfundiso yeBhayibhile okanye ukuziphatha okuhle? Ngoko uye waphambuka kwikhondo lobungcwele yaye kufuneka abonakalise inguquko yokwenyaniso aze athabathe amanyathelo afanelekileyo okuchacha. Kunjengokuba uPawulos waxelela amaKristu athanjisiweyo angoowabo oku: “Sinawo nje ngoko la madinga, zintanda, masizihlambulule kuko konke ukudyobheka kwenyama nokomoya sibufeza ubungcwele, sisoyika uThixo.” (2 Korinte 7:1) Nawuphi na umKristu ofuna ukulungisa ikhondo lakhe elingathandwayo uya kusifumana isiluleko esingokweZibhalo sabaveleli abanothando siyintsikelelo ngenene.—IMizekeliso 28:13; Yakobi 5:13-20.
9. Embonakalweni yeyesi-2 kaPetros 3:14, nguwuphi umbuzo ophakamayo?
9 Emva kokwalatha kwinkqubo entsha yobulungisa, uPetros wongezelela oku: “Zintanda, nilindele ezo zinto nje, khuthalelani ukuba nifunyanwe kuye [uYehova uThixo] niseluxolweni, ningenabala, ningenasiphako.” (2 Petros 3:14) Loo mazwi ayebhekiswe kumaKristu athanjisiweyo, kodwa ngenene onke amaNgqina kaYehova amele afunyanwe ‘engenabala, engenasiphako yaye eseluxolweni.’ Ngoko simele senze ntoni?
‘Ungenabala Yaye Ungenasiphako’
10. Abo ‘besihlwele esikhulu’ bazenze njani ‘iingubo’ zabo zacoceka egazini likaYesu?
10 Kufuneka senze konke okusemandleni ethu ukuze sifunyanwe ‘singenabala yaye singenasiphako.’ Abo ‘besihlwele esikhulu’ baye ‘bazihlamba iingubo zabo baza bazenza mhlophe egazini leMvana.’ Kwixesha elidlulileyo, babeyinxalenye yeli hlabathi linesono yaye iingubo zabo zofaniso zazidyobhekile ngenxa yalo, zimdaka emehlweni kaYehova. Bazenza njani iingubo zabo zaba mhlophe ngokungenabala “egazini leMvana,” uYesu Kristu? Ngokubonakalisa kwabo ukukholeIwa kwelokuba ‘akubikho kuxolelwa kungaphalazwanga gazi’ nokuba uYesu ‘uyiMvana kaThixo ethwala isuse isono sehlabathi.’ (ISityhilelo 7:9, 14; Hebhere 9:22; Yohane 1:29, 36) Oku bakwenza ngozahlulelo olungagogotye lutho kuThixo nangokulufuzisela ngobhaptizo, ukuntywiliselwa ngokupheleleyo emanzini. Uzahlulelo olunjalo kwafuneka lwenziwe ngoYesu Kristu nangenkolelo yokuba igazi lakhe elaphalalayo lenza kwaba nokwenzeka ngoThixo ukuzixolela izono zabo yaye labenza bamkeleka emehlweni akhe.
11. Ekubeni isono siphazamisa uxolo Iwethu noYehova, yiyiphi imeko esifanele sihlale sikuyo?
11 “Isihlwele esikhulu” simele sigcine “iingubo” zaso zimhlophe ngokungadyojwa lihlabathi size ngaloo ndlela siphulukane nobuntu kwanofaniso lwaso lobuKristu njengamangqina akholisekileyo kuYehova. Eneneni, onke amaKristu okwenyaniso kufuneka azinxweme ekubeni nganesiphako ngenxa yeendlela, izenzo kwanesimo sengqondo sehlabathi. Ekubeni isono siphazamisa uxolo lwethu noYehova, kuphela kungokuhlala sikwimeko apho izono zethu zinokuthethelelwa esinokuthi sifunyanwe ‘siseluxolweni’ ekufikeni ‘kwemini enkulu kaYehova.’ Simele singabi namabala ngenxa yoqheliselo lonqulo lobuxoki okanye ukuziphatha okubi kweli hlabathi.
12. Eyesi-2 kaPetros 2:13 inokusetyenziswa njani kwanaphakathi kwibandla lamaKristu?
12 Ukuhlala singenabala yaye singenasiphako kufuna ihambo nesimo sengqondo esahlukileyo kwesabo “bafundisi bobuxoki” awathi uPetros wabhala ngabo esithi: ‘Baba luyolo ukudla ubuncwane okwemini enye; bengamabala neziphako, bexhamla ubuncwane ngokulukuhla kwabo, bezingxala ukudla ezidlweni nani.’ (2 Petros 2:1, 13) Ewe, kwanasebandleni, simele sibalumkele abafundisi bobuxoki ‘ababa kuluyolo ukudla ubuncwane okwemini enye.’ Ebudeni basemini, xa kunokwenziwa okuninzi ukuze kungenelwe abanye ngokomoya, abantu abangenabumoya basenokubandakanyeka ekwenzeni okuphosakeleyo, kuquka imigidi kwanokugqithisa ekutyeni nasekuseleni. Basenokuzama ukuguqulela amatheko asekuhlaleni anjengamatheko omtshato ukuba abe zizihlandlo zomculo ovuselela inkanuko, umngqungqo ongenyulu, ukudla ngokugqithiseleyo nokuzingxala ngeziselo ezinxilisayo. Akumele kuvunyelwe nanye yezi zinto ukuba yenzeke phakathi kwabantu bakaYehova.—Isaya 5:11, 12; bona IMboniselo kaOktobha 15, 1984, iphepha 26-32.
13. Umamkeli weendwendwe unokwenza ntoni ukuze indibano yembutho ibe yeyakhayo ngokomoya?
13 Umamkeli weendwendwe kwindibano yembutho ubophelelekile ngokwenzekayo apho. Ngoko ukuba eso siganeko siza kuba sesakhayo ngokomoya, kububulumko ukusigcina sikubukhulu obunokulawulwa nokungamemi nabani na ekunokwenzeka ukuba azise impembelelo engemyoli. Njengokuba amazwi kaPawulos akweyesi-2 kuTimoti 2:20-22 ebonisa, asingabo bonke abanxulumana nebandla abathi ngokuyimfuneko babe zizinxulumani ezinqwenelekayo. Ngenxa yoko, umamkeli weendwendwe ongumKristu akanyanzelekanga ukuba ameme abantu abaziwa bengazibambi ngentetho yabo okanye abagqithiselayo ngokutya okanye ukusela. Uyakhumbula ukuba ‘nokuba siyadla, nokuba siyasela, nokuba senza nayiphi na into, masizenzele uzuko lukaThixo izinto zonke.’—1 Korinte 10:31.
14. Kukuphi ukuma okufanele kuthatyathwe ngokuphathelele abafundisi bobuxoki?
14 Kuphela bambalwa ‘abanamabala nabaneziphako, abavuyiswa ziimfundiso ezikhohlisayo’ ngoxa benxulumana nathi. Kodwa abaveleli nabanye abasebandleni bamele baphaphe, babachase ngokuqinileyo nabaphi na abafundisi bobuxoki abasenokuthwethwela ebandleni baze bazame ukukhulisa imfundiso ephosakeleyo okanye ukuziphatha okubi. (Yuda 3, 4) Kuphela kukubambelela nkqi kwimilinganiselo kaThixo yobulungisa okuya kwenza ibandla lihlale lingenabala yaye lingenasiphako.
Yintoni Efunekayo Ukuze Sibe ‘Seluxolweni’?
15. (a) Umntu unokulufumana njani uxolo noThixo? (b) Yintoni esimele siyenze ukuze sifunyanwe ‘siseluxolweni’ ekufikeni kwemini enkulu kaYehova?
15 Ukuze bafunyanwe ‘beseluxolweni,’ abantu bakaYehova bamele balondoloze uxolo naye. (2 Petros 3:14) Siye sanikwa oku kuma ngoYesu Kristu, awathi uPawulos wabhala oku ngaye: “Ngokuba kwakholeka ukuthi ukuzaliseka konke kuhlale kuye, nokuthi ngaye azixolelanise naye zonke izinto, elwenzile uxolo ngalo igazi lomnqamlezo [umthi wentuthumbo, NW] wakhe: ewe, ngaye, nokuba zizinto ezisemhlabeni, nokuba zezisemazulwini.” (Kolose 1:19, 20) Izono ezinzulu ziyalucinezela ulwalamano lomntu noYehova zize zibangele umntu ukuba abe neentloni, aphazamiseke, ngoxa uxolo luxhanyulwa ngabo bathobela imiyalelo kaYehova. (INdumiso 38:3; Isaya 48:18) Ngoko, ukuze sifunyanwe ‘siseluxolweni’ ekuzeni kwemini enkulu kaYehova, simele sihlale kwisimo esingokobuthixo esivumela ukuba izono zethu zibe nokuthethelelwa ngegazi likaYesu elaphalalayo kumthi wentuthumbo.
16. Ngokutsho kompostile uPawulos, sinokuluphuthuma njani uxolo namakholwa angoowethu?
16 Sikwamele sibe seluxolweni nabanye abanquli bakaYehova. UPawulos wabongoza oku: “Masisukele izinto zoxolo, izinto zokwakhana.” Umongo ubonisa ukuba simele sikulumkele ukukhubekisa amakholwa angoowethu ngokuphathelele ukutya, ukusela okanye nayiphi na enye into. (Roma 14:13-23) Kodwa kukho okungakumbi kulo mcimbi kunoko, kuba uPawulos waxelela amaKristu ase-Efese oku: “Ndiyanivuselela . . . nihambe ngokulufaneleyo ubizo enabizwa ngalo, ninako konke ukuthobeka kwentliziyo nobulali, ninokuzeka kade umsindo, ninyamezelana, nisenziwa luthando, nikhuthalele ukubugcina ubunye bomoya ngentambo yoxolo.” (Efese 4:1-3) Ngokuqinisekileyo, sifun’ ukubonakalisa ubunye bethu ngokuphepha onke amazwi nezenzo eziphazamisa uxolo nangokuma ngokuqinileyo njengabaxhasi bolongamo lukaYehova.
17. Ngokweyoku-1 kaPetros 3:10-12, yintoni ebandakanyekileyo ‘ekuphuthumeni uxolo’?
17 Ngokuqinisekileyo ‘ukuphuthuma uxolo’ kufuna ukuba silinde izenzo zethu namazwi ethu, kuba umpostile uPetros wabhala oku: “Lowo unga angathanda ubomi, ayibone imihla elungileyo, makaluphezise ulwimi lwakhe ebubini, nomlomo wakhe ungathethi inkohliso; makaphambuke ebubini, enze okulungileyo; afune uxolo, aluphuthume. Ngokuba amehlo eNkosi aphezu kwamalungisa, neendlebe zayo zisingisele esikhungweni sawo; ke ubuso beNkosi buphezu kwabenza okubi.” (1 Petros 3:10-12; INdumiso 34:12-16) Ngoko, ngeendlela ezahlukahlukeneyo, abakhonzi abanyanisekileyo bakaYehova bamele baqhubeke ‘bephuthuma uxolo’ ukuba baza kufunyanwa ‘beseluxolweni.’
Xhomekeka Kuncedo LukaYehova
18. Yintoni esinokuyenza ukuba iindlela, izenzo okanye isimo sengqondo sehlabathi siba nomtsalane kuthi?
18 UPetros wabonisa ukuba ‘iziqalelo,’ umoya wehlabathi, okanye isimo sengqondo neendlela zalo, ziya ‘kunyityilikiswa,’ okanye zitshatyalaliswe, ebudeni ‘bemini kaYehova.’ (2 Petros 3:7, 10) Kodwa sinokwenza ntoni ukuba iindlela, izenzo kwanesimo sengqondo sehlabathi siba nomtsalane kuthi? Ngokuqinisekileyo, kufuneka siwasebenzise ngokuzeleyo amalungiselelo okomoya enziwe ngentlangano kaYehova. Phakathi kwezinye izinto, sifanele silifundisise ngokuthe rhoqo iLizwi likaThixo kwaneempapasho zamaKristu ezilungiselelwe ‘ngumkhonzi othembekileyo noqondayo.’ (Mateyu 24:45-47) Sikwamele sibonakalise umbulelo ongapheliyo ngelungiselelo lentlawulelo, ‘igazi elinqabileyo likaYesu, njengelemvana engenasiphako nengenabala.’—1 Petros 1:18, 19.
19. Umthandazo unokuba luncedo njani ukuba isimo sengqondo sehlabathi siyasiphembelela?
19 Sifanele sithandazele uncedo lukaYehova ukuze ‘siphuthume ubulungisa.’ (1 Timoti 6:11-14) Ukuba siyaqonda ukuba isimo sengqondo sehlabathi siyasiphembelela, okanye ukuba ikholwa elinguwethu elinothando liye lakuzisa engqalelweni yethu oku, kuya kuba bubulumko ukuba singqale ngale ngxaki kwimithandazo yethu ngokucela uYehova asincede soyise olu tyekelo. Ngokuqinisekileyo, bekuya kuba kokufanelekileyo ukucela umoya kaThixo noncedo lwakhe ekuhlakuleleni isiqhamo sawo esahluke gqitha kwiindlela nakwisimo sengqondo sehlabathi. (Galati 5:16-26; INdumiso 25:4, 5; 119:27, 35) UYehova unokusinceda sinikele ingqalelo kwizinto ezibubulungisa, ezinyulu, ezilungileyo nezifanelwe yindumiso. Yaye hayi indlela ekufaneleke ngayo ukumkhunga ngokunyanisekileyo ukuze ‘uxolo lukaThixo’ olungenakuthelekiswa nanto lulinde iintliziyo zethu namandla ethu engqondo! (Filipi 4:6, 7) Ngoko unxunguphalo, izihendo, nezinye ezinjengezo, aziyi kukhula ukusa kwinqanaba lokuba zingabi nakulawuleka. Kunoko, ubomi bethu buya kuphawulwa luxolo esilunikwe nguThixo. Eneneni, “banoxolo olukhulu abawuthandayo umyalelo [kaYehova].”—INdumiso 119:165.
Hlala ‘Ungenabala, Ungenasiphako Yaye Useluxolweni’
20. Kutheni le nto sinokuthi imeko yokungabi nasiphako ngokomoya inokwenzeka?
20 Okonwabisayo kukuba, bonke abangaphakathi kwentlangano kaYehova, kuquka abasebatsha abangenayo ngoku, banokwamkeleka kuThixo. (IZenzo 10:34, 35) Ngoncedo lukaYehova, kunokwenzeka ukuba ‘ukuchase ukungahloneli Thixo nokukhanuka okukokwehlabathi’ uze uphile ngendlela efanele amaKristu okwenyaniso. (Tito 2:11-14) Nangona sasikade sityekile kuYehova yaye iingqondo zethu zikwimisebenzi engendawo, siye saxolelaniswa noThixo ngokufa kukaKristu. Ngaloo ndlela imeko yokungabi nasiphako ngokomoya inokwenzeka, lo gama nje siqhubeka elukholweni yaye singekho mbaxa kwithemba leendaba ezilungileyo.—Kolose 1:21-23.
21. Sinokufunyanwa njani ekugqibeleni ‘singenabala, singenasiphako yaye siseluxolweni’?
21 Ngoncedo lukaYehova, iLizwi lakhe nentlangano yakhe, sinokuhlala singabekwanga bala lihlabathi yaye singadyojwanga ziindlela, zizenzo nesimo salo sengqondo. Ngaloo ndlela sikwanokulwazi uxolo lokwenyaniso. Ewe, ngokuzingisa kunqulo Iwethu olunyulu kuYehova, ekugqibeleni sinokufunyanwa ‘singenabala, singenasiphako yaye siseluxolweni.’
Uya Kusabela Njani?
◻ Kutheni le nto ubungcwele buyimfuneko kubantu bakaYehova?
◻ Sinokuhlala njani singenabala yaye singenasiphako?
◻ Yintoni efunekayo ukuze ‘sibe seluxolweni’?
◻ Ziziphi iindlela esinokukubonakalisa ngazo ukuxhomekeka kuncedo lukaThixo?
[Imifanekiso ekwiphepha 16, 17]
Iinkalo zokuhlala ‘ungenabala, ungenasiphako yaye useluxolweni’ Ukukhonza uThixo kuzahlulelo lwentliziyo epheleleyo
Ukuhlakulela ubuntu bobuKristu
Ukuba nonxulumano olwakhayo ngokomoya
Ukuphuthuma uxolo noThixo ngomthandazo