Ngaba Unokulwamkela Uqeqesho?
‘NAMHLANJE abazali babetha kuphela itam tam (igubu lomngqungqo), abababethi abantwana babo.’ La magqabaza eviwa ephuma emilonyeni yamantombazana ahamba isikolo kwikholeji yaseAfrika. Ayethetha ntoni? Ayethetha ukuba uqeqesho lwalungasekho kwifashoni. Abazali abakufuni ukulusebenzisa, yaye abantwana babonwabe gqitha kukungalufumani.
Ngaba esi sisimo sengqondo sobulumko? Ngokwesichazi-magama, uqeqesho ngokusisiseko “yimfundiso elungisa, eyakha okanye efezekisa ubuchule bengqondo okanye ukubalasela kokuziphatha.” Ngaba nabani na unokuphumelela ngenene ngaphandle kohlobo olunjalo loqeqesho? Kwakutheni ukuze loo mantombazana aseAfrika—kwanabazali bawo—acinge ukuba anokuphumelela?
Eneneni, isimo sengqondo esiphosakeleyo ngoqeqesho asipheleliselwanga kumantombazana afundayo aseAfrika kwanakubazali bawo. Kubonakala ukuba inkoliso yabantu namhlanje isijonga nasiphi na isiluleko okanye uqeqesho njengesiphazamiso esingafanelekanga kwinkululeko yabo, njengento enciphisa amalungelo abo. Noko ke, isimo sengqondo esinjalo siqhelekile kule nkulungwane yama-20. Amawaka eminyaka eyadlulayo, uThixo waphawula ukuba “ukuyila kwentliziyo yomntu kubi kwasebutsheni bakhe.” (Genesis 8:21) Esalatha kumphumo wokugqibela waloo mawaka eminyaka yotyekelo olubi ngolo hlobo, umpostile uPawulos wabhala oku: “Abantu baya kuba ngabazithandayo, abathandi bemali, abaqhankqalazi, abakratshi, abanyelisi, abangeva bazali, abangabuleliyo, abangengcwele, abangenabubele, abangenatarhu, abatyholi, abangenakuzeyisa, izibhoja, abangenakuthanda kulunga, abancethezi, izityhuthutyhuthu, abathiwe lwale likratshi.” (2 Timoti 3:2-4) Akumangalisi ukuba uqeqesho lungathandwa kangaka!
Ngaba Uqeqesho Lubi Ngenene?
Ngaba umKristu ulufuna ngenene uqeqesho? Kaloku, uYesu wathi indlela eya ebomini “icuthene.” (Mateyu 7:13, 14) Kulula ukutyeka kuyo. Ngoko bekungayi kuba bubulumko na ukwamkela uqeqesho, imfundiso, njengoko isichazi-magama silubiza? Qwalasela imeko yomhambi othi ngokungaqondi aphambuke kwindlela yakhe aze ngokubuhlungu azifumane esondele kummandla oyingozi. Ukuba ubani angamaziyo uyazinikela ukuba ambonise indlela yokubuyela kwakumgaqo wakhe, ubeya kusabela njani? Ngaba ngomsindo ebeya kulugatya uncedo, ezingisa ngelokuba unelungelo lokuya apho anqwenela ukuya khona? Ngaba ebeya kuthi lo mhambi unobuhlobo uphazamisa amalungelo akhe? Akunjalo. Ubeya kuba nombulelo ngoncedo alunikiweyo.
Ngoku umKristu olumkileyo uyabulela xa uncedo lunikelwa ngendlela yoqeqesho lobubele. Amazwi omprofeti ayinyaniso kungakhathaliseki ubudala okanye amava ethu ebomini: “Ndiyazi, Yehova, ukuba ayikhona emntwini indlela yakhe; akukhona endodeni ehambayo ukuqinisela ukunyathela kwayo.” (Yeremiya 10:23) Ngenxa yoko, sonke siyalufuna uqeqesho.
Balugatya Uqeqesho
Omnye owalugatyayo uqeqesho yayinguKayin, owayemonela umntakwabo uAbheli. Ebona ukuba uKayin wayeqalisa ukuwushiya umendo olungileyo, uYehova wamyala, embuza oku: “Yini na ukuba uqumbe, yini ukuba busangane ubuso bakho? Ukuba uthe walungisa, abuyi kuswabuluka ubuso yini na? Ukuba uthe akwalungisa, isono sibuthumile ngasesangweni, singxamele wena; yaye ngaba wena, uya kusilawula?” (Genesis 4:6, 7) UKayin akazange aphulaphule. Wambulala umntakwabo uAbheli waza ngaloo ndlela wezisa ukubulala kwimbali yabantu.—Genesis 4:8-16.
Ngemihla kaSamuweli, oonyana bakaEli nabo abazange balwamkele uqeqesho. Uyise wayengumbingeleli omkhulu engcweleni kaYehova, kodwa oonyana bakhe basebenzisa isikhundla sabo ukuba bebe kwiminikelo yaye bahende abafazi ukuba baziphathe kakubi nabo. Uyise wabakhalimela—ngendlela ebuthathaka—kodwa abazange baphulaphule. Waba yintoni umphumo? Ukugatya kwabo uqeqesho kwakhokelela ukuba babulawe edabini, yaye iindaba ezothusayo zabangela ukufakukaEli.—1 Samuweli 2:12-17, 22-25; 3:11-18; 4:1-4, 10-18.
Abathile Baphulaphula
Noko ke, abanye balwamkela uqeqesho. UDavide, ukumkani kwanegorha lemfazwe, wenza isono esoyikekayo xa wabangela ukufa kukaUriya, indoda yomfazi uDavide awayekrexeze naye. Kodwa uDavide wasamkela isiluleko uThixo awasithumela ngomprofeti uNatan, yaye ngaloo ndlela uYehova akazange amgatye ngokupheleleyo. (2 Samuweli 12:1-14) Ewe, uqeqesho lunokusinceda ukuba sichache kwanakwizono ezinzulu gqitha.
UYobhi walulekwa ngumfana uElihu yaye wayenokuthi ngomsindo asigatye eso siluleko. Nangona uYobhi weva ubunzima ngokoyikekayo kwizandla zikaSathana, wakwala ‘ukumlahla uThixo aze afe.’ Enengxelo enjalo, wayesenokukubona kungeyomfuneko ukuphulaphula kwisiluleko salo mfana. Noko ke, uYobhi waphulaphula yaye wafunda ukuba, phezu kwayo nje ingqibelelo yakhe, isimo sakhe sengqondo sasifuna ukulungiswa. Ngoko waba nelungelo lokufumana isiluleko esiphuma kuYehova waza ekugqibeleni wavuzwa ngeentsikelelo ezininzi. (Yobhi 2:9, 10; 32:6; 42:12-16) Ngaloo ndlela, uqeqesho lunokunceda kwanabo baneengxelo ezibalaseleyo zonyamezelo nokuthembeka.
Kwanompostile uPetros walwamkela uqeqesho. Khumbula, uPetros wayengumpostile kaYesu Kristu, ingqina lokuzibonela ukwenziwa kumila kumbi kukaYesu, yaye engulowo uKristu wamnika “izitshixo zobukumkani.” (Mateyu 16:18, 19) Kanti, ngesinye isihlandlo umpostile uPawulos, umlandeli kaYesu owayesemtsha ngokwenene, wamluleka ekuhleni uPetros ngenxa yehambo yakhe kwibandla lakwa-Antiyokwe. Ngokucacileyo uPetros wasamkela isiluleko, kuba kamva wathetha ‘ngomzalwana wethu oyintanda uPawulos.’ (2 Petros 3:15; Galati 2:11-14) Ngenxa yoko, umKristu onamalungelo amaninzi, usenokulindela ukulwamkela uqeqesho.
AmaKristu Angoku Noqeqesho
Ebandleni, asifanele simangaliswe kukwamkela isiluleko esiphuma kuye nawuphi na umntu okhulileyo. Kodwa ababopheleleke ngokukhethekileyo ukuba balinde izilangazelelo zethu ngabadala abamiselweyo. Kukwaba balusi bokomoya iBhayibhile ethi kubo: “Khuthalela ukubazi ubume bempahla yakho emfutshane, yibhekise intliziyo yakho emihlambini yakho.”—IMizekeliso 27:23.
Kunokusinceda samkele uqeqesho ukuba siyaqonda ukuba kufuna uthando nenkalipho ngabadala ukunikela isiluleko. Abadala badla ngokuchaswa xa bezama ukunikela uncedo. Ngokomzekelo, omnye umdala oNtsundu wathetha nomKristu owayenexesha elide, emlumkisa ngokubandakanyeka kwakhe kwinto engeyoyabuKristu. Kwakunzima ukunikela eso siluleko, ibe oku kwaba nzima ngakumbi xa owayenikwa isiluleko waqumbayo. Ekugqibeleni, isiluleko sagatywa, waza lowo sasinikelwa kuye wakwala ukusebenzisana ngakumbi nomdala owayezama ukumnceda. Hayi indlela engekwaba bubulumko ngayo ukukhumbula ukuba ‘akholekile amanxeba omhlobo onothando’!—IMizekeliso 27:6.
Uqeqesho lunokusinceda sisebenzise omnye umzekeliso weBhayibhile othi: “Onobuqili ubona into embi, azifihle; ke zona iziyatha ziya kugqitha kuyo zihlawuliswe.” (IMizekeliso 22:3) Loo mazwi ayenokuyinceda enye indoda engumKristu kwakwilizwe elinye. Yangenwa ngumkhwa wokuya kwiivenkile zokutyela zasesidlangalaleni ishiya umfazi nabantwana bayo ngasemva. Oku kwabaphazamisa abanye kuba kuloo mmandla iiweyitala kwiivenkile zokutyela ezininzi zazingamahenyukazi okwenene alindele abathengi. Ngoko izihlandlo eziliqela abadala basekuhlaleni bathetha nale ndoda ngalo mcimbi. Kodwa yasigatya isiluleko, ngokufuthi isala ngenkani. Ekugqibeleni, yawela kumgibe wokuziphatha okubi. Hayi indlela engekwaba bubulumko ngakumbi ngayo ukuba yayisinikele ingqalelo isiluleko esisengqiqweni!
Ukuba siyayilibala eyethu imbono kangangomzuzwana size sizame ukuzijonga izinto ngendlela uYehova azijonga ngayo, ngokuvumayo siya kulwamkela ngakumbi uqeqesho. Kuyinyaniso ukuba, uqeqesho lusenokuba sisikhumbuzo esingamkelekiyo sokungafezeki kwethu. Lunokusenza siqumbe. Kodwa khawucinge ngendlela uYehova avuya ngayo xa abakhonzi bakhe besenza ngobulumko baze bakuphephe ukuwela esonweni. ILizwi lakhe lithi: “Yiba nobulumko, nyana wam, uyivuyise intliziyo yam; ukuze ndimphendule ngezwi ondingcikivayo.” (IMizekeliso 27:11) Ukuba sinokuzithoba size samkele uqeqesho olunikelwayo, siya kuba phakathi kwabo banika uYehova impendulo yokuphendula ucelomngeni lukaSathana.
Uqeqesho Luvelisa Isiqhamo Esihle
Njengoko sesibonile, uqeqesho lolwethu sonke. Luyafunwa ngamadoda nabafazi, abaselula nabadala, abo bebesenyanisweni kangangexesha elide nabo basebatsha. Ngenxa yoko, sifanele silulindele uqeqesho, side silukhangele. Fundisisa iLizwi likaThixo uze uphawule oko likuthethayo okusebenza njengesiluleko kuwe. (2 Timoti 3:16, 17) Yibakho kwiintlanganiso uze uphulaphule ngenyameko ukuze ubone oko kusebenzayo kuwe. (Hebhere 10:24, 25) Ukuba uqeqesho olungokweZibhalo lothando lunikelwa kuwe, lwamkele ngomoya olunikelwa ngawo. Sebenzisa ngengenelo naluphi na uqeqesho olulungisayo oluvela kuYehova.
UPawulos waxelela amaHebhere oku: “Lonke ke uqeqesho okunene ngokwakalokunje alubonakali luluvuyo, lubonakala luyintlungu; kodwa kamva lubanika isiqhamo esiluxolo, oko kukuthi sobulungisa, abo baqhelisiweyo lulo.” (Hebhere 12:11) Ngaloo ndlela, nangona uqeqesho lusenokuba yintlungu maxa wambi, luphumela kokulungileyo. Ukwamkela uqeqesho kunokusinceda sibe phakathi kwabo bakholisa uYehova. Uqeqesho luya kusinceda ukuba ‘sihambe ngokugqibeleleyo, senze ubulungisa, size sithethe inyaniso ngentliziyo yethu.’ (INdumiso 15:1, 2) Ngoko ke, kwanga thina sonke singalwamkela uqeqesho.