Zimisele Ukukhonza UYehova Ngentliziyo Epheleleyo
“Umkhonze ngentliziyo epheleleyo, nangomphefumlo ovumayo; ngokuba uYehova uyazingxoka zonke iintliziyo, akuqonde konke ukuyila kweengcinga”—1 KRONIKE 28:9.
1. Yiyiphi imibuzo ephakanyiswa yeyoku-1 yeziKronike 28:9?
ISIBHALO esicatshulwe ngasentla siphakamisa imibuzo ethile ngentliziyo. Ukuba sibhekisela kwintliziyo yokwenyama, umntu unokuphila njani ngaphandle kwentliziyo epheleleyo? Ngokomzekelo, ngaba nabani na unokuphila enentliziyo esisiqingatha? Njengengcali yanamhla yentliziyo, ngaba uYehova uyayigocagoca intliziyo yokwenyama ejonga izifo? Ngokuphathelele iingcinga, ngaba iingcinga zihlala entliziyweni yethu? Zimbi iimbekiselo zeBhayibhile zibonakala zithetha oko, zithetha ‘ngokuyila kweengcinga zentliziyo.’ (Genesis 6:5; 1 Kronike 29:18) Ngaba uYehova uyazivavanya iintliziyo zethu zenyama ukuze aqonde iingcinga zethu? Ngenene kuthetha ukuthini ‘ukumkhonza ngentliziyo epheleleyo’?
2. Ngokuphathelele intliziyo ziziphi iinkolelo amaYiputa amandulo, amaBhabhiloni nesithandi sobulumko samaGrike uAristotle ababebambelele kuzo?
2 AmaYiputa amandulo ayekholelwa ukuba intliziyo yokwenyama yayiligumbi lobukrelekrele neemvakalelo. Kwakhona ayecinga ukuba yayinomnqweno ongowayo. AmaBhabhiloni ayesithi ubukrelekrele nothando zihlala entliziyweni. Isithandi sobulumko samaGrike uAristotle wafundisa ukuba izivamvo zihlala entliziyweni yaye iyindawo umphefumlo okuyo. Kodwa njengokuba ixesha lalihamba nolwazi lusanda, ezi mbono zagatywa. Ekugqibeleni intliziyo yaziwa ngokoko ikuko, impompo yokujikelezisa igazi emzimbeni wonke.
3. Ziziphi izibakala ezenza ukuba intliziyo ikhwankqise kangaka?
3 Ewe, ngokuyintloko iyimpompo, kodwa enjani yona ukukhwankqisa, ngokuthembekileyo ihambisa umsinga obomvu wobomi mzuzwana ngamnye kubomi bethu! Ingaphezulu kancinane kunenqindi, inobunzima obungaphantsi kobeekhilogram ezili-0,373, intliziyo yomntu ibetha izihlandlo ezili-100 000 ngosuku, impompa igazi lobomi ngenkqubo yomzimba yokujikelezisa igazi eziikhilomitha ezingama-96 000—impompa iilitha ezingama-7 600 mihia le, amashumi ezigidi zeelitha kubomi bonke. Ukubetha kwentliziyo kubangelwa liqela leeseli ezibumba isicwili sayo esikhethekileyo ngesiNgesi ekuthiwa yipacemaker, zithumela iintshukumisa zombane ezilawula umlinganiselo wokubetha kwentliziyo. Asikho isihlunu emzimbeni esisebenza nzima ngakumbi, ixesha elide, ngokuthe ngcembe, amashumi ngamashumi eminyaka, kunentliziyo. Phantsi koxinezeleko lweemvakalelo okanye umthambo ofuna amandla inokunyusa ukusebenza kwayo kangangezihlandlo ezihlanu. Yishenxise intliziyo esifubeni yaye iya kuqhubeka ibetha kangangexesha elithile. Kwaneeseli ezisikwe entliziyweni ziya kuqhubeka zisebenza, phantsi kweemeko ezilungileyo. Kuphela yingqondo efuna isondlo neoksijini engakumbi kunentliziyo.
4, 5. (a) Ziziphi iimpawu iZibhalo ezizinxulumanisa nentliziyo? (b) Ngokutsho kweZibhalo, ziziphi iimvakalelo neentshukumisa ezihlala entliziyweni?
4 ILizwi likaThixo lithetha ngentliziyo phantse izihlandlo eziliwaka. Ezimbalwa kwezo ndinyana zibhekisela kwintliziyo yokoqobo. Ezimbalwa zibhekisela kwisazulu sento, ‘njengasembilinini yolwandle’ ‘nasembilinini yomhlaba.’ (Hezekile 27:25-27; Mateyu 12:40) Noko ke, kwezinye iimbekiselo eziphantse zibe liwaka, intliziyo isetyenziswe ngokwengqiqo yokomfuziselo. ITheological Dictionary of the New Testament kaKittel idwelisa izibhalo ezininzi phantsi “kwentliziyo” kumxholo ngamnye kwelandelayo: “Entliziyweni kuhlala iimvakalelo, iminqweno neenkanuko.” “Intliziyo sisihlalo sokuqonda, umthombo wokucinga.” “Intliziyo sisihlalo somnqweno, umthombo wezigqibo.” “Ngaloo ndlela intliziyo yimbilini yomntu, leyo uThixo aphethukela kuyo, leyo ubomi bokuthanda ukunqula bumiliselwe kuyo, leyo igqiba ngehambo entle.”
5 Iimvakalelo neentshukumisa zihlala kule ntliziyo yokomfuziselo. Ngokutsho kwezibhalo ezininzi, intliziyo inokuvuya, ibe nosizi, yenziwe mnyama, ikhanyiswe, inokuba sisifo esibi, inokuthenjwa, ibe buthathaka yaye inokuba lukhuni. Inokuba shushu ngumsindo okanye iphele kukoyika, ibe inokuba nekratshi yaye ikhukhumale okanye ibe nobulali yaye ithobeke, inganothando olunyamekileyo okanye izaliswe yintiyo, inokuba nyulu yaye icoceke okanye ibe netyala lokukrexeza. Ityekele ebubini, kodwa inokusishukumisela ukwenza okulungileyo.
Ningabi Mbaxa
6, 7. (a) Luhlobo luni lwabantu umdumisi awayeluthiyile, yaye kwaSirayeli nakwaYuda le meko izekeliswe ngaziphi izenzo? (b) UYesu wakuzekelisa njani ukungamkeleki kwenkonzo embaxa kuYehova?
6 Intliziyo yokoqobo imele iphelele ukuze isebenze, kodwa intliziyo yokomfuziselo inokwahlulwahlulwa. Umdumisi, ngokucacileyo indoda eyayinentliziyo kaThixo, wabhala oku ephantsi kwempefumlelo: “Abambaxa ndiyabathiya.” (INdumiso 119:113) Phakathi kwabanjalo yayingaloo maSirayeli uEliya wawacel’ umngeni, esithi: “Kode kube nini na nijingxela nineengcinga ezimbini ezahlukahlukeneyo? Ukuba uYehova nguThixo [oyinyaniso], landelani yena; ke ukuba nguBhahali uThixo, landelani yena.” (1 Kumkani 18:21, NW) Ngobumbaxa, ‘babejingxela beneengcinga ezimbini ezahlukahlukeneyo.’
7 Ngokufanayo, emva kokubuyela kwamaYuda kuYehova ngokuyinxenye, kwabhalwa oku: “Abantu bebesabingelela noko ezigangeni; kodwa babingelela ke kuYehova uThixo wabo yedwa.” (2 Kronike 33:17) Ngeentliziyo ezahluleleneyo, babezibanga benqula uYehova kodwa ngendlela engagunyaziswanga yaye kwimimandla apho ngaphambili babenqulela kuyo uBhahali. UYesu wathi: “Akukho mntu unako ukukhonza nkosi mbini.” (Mateyu 6:24) Ngaloo mihla abakhonzi babefana nenxalenye yempahla. Babekhonza inkosi yabo ama-24 eeyure ngemini. Ixesha labo lalingenakwahlulwahlulelwa iinkosi ezimbini—icandelo lexesha kwenye necandelo lexesha kwenye. UYesu wayebethelela le ngongoma: akunakunikelwa nkonzo imbaxa kuYehova!
8. Ngokufuziselayo, umntu unokuba neentliziyo ezimbini njani, yaye ziziphi izibhalo ezibonisa oku?
8 Inye kuphela intliziyo yokoqobo kumntu ngamnye, kodwa, ngokufuziselayo, umntu unokuba neentliziyo ezimbini. UDavide wabhekisela kubantu abanjalo, esithi: “Bathetha ngomlomo ogudileyo, nangentliziyo embaxa [“ngentliziyo nentliziyo,” umbhalo osemazantsi weNW eneembekiselo].” (INdumiso 12:2) Enye intliziyo izinikele ukuba izibonakalise ekuhleni, ngokufihlakeleyo enye iqwabazela iliso ingenelo yokuzingca. Le meko yokuhanahanisa nokuba mbaxa ichaziwe eZibhalweni: “Kuba njengoko anjalo ocinga yedwa, unjalo yena; uthi kuwe, Yidla usele, ukanti intliziyo yakhe ayinawe.” “Xa athe walimnandisa ilizwi lakhe, musa ukukholwa nguye; kuba ngamasikizi asixhenxe entliziyweni yakhe.”—IMizekeliso 23:7; 26:25; INdumiso 28:3.
9. Yintoni ebonisa ukuba unqulo olumbaxa lwalukho ngomhla kaYeremiya nangexesha likaYesu?
9 Uhanahaniso olunjalo kulwalamano lwabantu lubi, kodwa xa luhlwayelwe kunqulo lukaYehova, luvuna intlekele. “Musani ukukholosa ngamazwi obuxoki, okuthi, Yitempile kaYehova, yitempile kaYehova, yitempile kaYehova yona leyo. Yabonani, nikholosa ngamazwi obuxoki angancediyo. Yini? Niyeba, nincinithe, nikrexeze, nifunge ubuxoki, niqhumisele kuBhahali, nilandele thixo bambi ningabaziyo; nize ke nime phambi kwam kule ndlu, ibizwa ngegama lam, nithi, Sihlangulwe; ukuze nenze la masikizi onke?” (Yeremiya 7:4, 8-10) UYesu wababhenca abahanahanisi abambaxa ngolo hlobo phakathi kwababhali nabaFarisi, esithi: “Bahanahanisindini, watyapha ukuprofeta ngani uIsaya, esithi. Aba bantu basondela kum ngomlomo wabo, bandibeke ngemilebe yomlomo wabo; kanti intliziyo yabo ikude lee kum.”—Mateyu 15:7, 8.
10, 11. UYehova noKristu Yesu bakhangela phi xa begweba umntu, yaye kutheni?
10 Ngokuphuma kuko konke oku sicacile isizathu sokuba uYehova wathi kuSamuweli: “Andikhangeli njengokukhangela komntu; ngokuba umntu ukhangela umphandle, uYehova ukhangela intliziyo.” (1 Samuweli 16:7) Ngenxa yoko, xa uYehova ehlola umntu, oku akusekelwa kwimbonakalo yangaphandle; uhlolisisa kanye isazulu somcimbi. UKristu Yesu wayifanisa intliziyo njengamandla ashukumisa ihambo yethu, enoba ilungile okanye imbi: “Umntu olungileyo, ebuncwaneni obulungileyo bentliziyo yakhe, uvelisa oko kulungileyo; nomntu okhohlakeleyo, ebuncwaneni obukhohlakeleyo bentliziyo yakhe, uvelisa okukhohlakeleyo; kuba umlomo wakhe uthetha ngokuphuphuma kwentliziyo.” Kwakhona, “Kuyo intliziyo kuphuma izicamango ezingendawo, ookubulala, ookukrexeza, oomibulo, oobusela, ookungqina ubuxoki, ookunyelisa.”—Luka 6:45; Mateyu 15:19.
11 UKristu Yesu, ekunikelwe kuye ukugweba, ukwakhangela indawo ekhangelwa nguYehova: “Mna ndingulowo uphengulula izintso [“ezona mvakalelo zinzulu,” umbhalo osemazantsi weNW Eneembekiselo] neentliziyo, ndininike elowo ngokwemisebenzi yenu.” (ISityhilelo 2:23) Ngenxa yesi sizathu, “nazintweni zonke ezigcinwayo, londoloza intliziyo yakho; kuba aphuma kuyo amathende obomi.”—IMizekeliso 4:23.
12. Kutheni le nto ukuba nentliziyo epheleleyo kwinkonzo kaYehova kufuna umgudu wenkuthalo kuthi?
12 Ukunqula kwethu uYehova akumele kube mbaxa, kodwa kumele kube kokwentliziyo epheleleyo. Oku kufuna umgudu wenkuthalo kuthi. Kutheni kunjalo nje? Kuba intliziyo iyaqhatha yaye inokukhohlisa gqitha. Indlela enobuchule ngayo ekuthetheleleni iziphoso ezitsala inyama yethu enesono iyoyikisa. Ngoxa inokusikhohlisa ize izifihle iintshukumisa zethu zokwenene kuthi, uYehova ubona oko ikuko. Usenza sikuphawule oku, esithi: “Intliziyo inenkohliso ngaphezu kweento zonke, isisifo esibi; ngubani na onokuyazi? Mna, Yehova ndiyayigocagoca intliziyo, ndiyazicikida izintso, ukuze ndinike ulowo nalowo ngokwendlela yakhe, ngokwesiqhamo seentlondi zakhe.”—Yeremiya 17:9, 10.
Ukuzuza Intliziyo Epheleleyo
13. Wathini uYesu ngabantu abathile bonqulo bomhla wakhe, yaye ngenxa yehambo enjalo, waba yintoni umphumo kubo?
13 Ethetha nabantu bonqulo bomhla wakhe, uYesu wathi: “Intliziyo yaba bantu ithe fithi kukutyeba, beva ngeendlebe ezithe nkqi, bayawacima namehlo abo; hleze babone ngamehlo, beve ngeendlebe, baqonde ngentliziyo, bajike, ndibaphilise.” (Mateyu 13:15) Ngenxa yeengcamango ababesele benazo ngonqulo, bawavala amehlo abo neendlebe zabo baza bazenza lukhuni iintliziyo zabo kwimfundiso kaYesu. Begatya ukukhalinyelwa, abazange bazuze intliziyo eneentshukumisa ezifanelekileyo: “Osivayo isohlwayo ufumana intliziyo [“ufumana intshukumisa elungileyo,” umbhalo osemazantsi weNW Eneembekiselo].” (IMizekeliso 15:32) Babezibanga benqula uThixo, kodwa “ubulungisa” babo babebenza ukuze babonwe ngabantu.—Mateyu 6:1, 2, 5, 16.
14. Yiyiphi imizekelo ebonisa indlela inyaniso engena ize ihlale ngayo kuthi?
14 Hayi indlela ekulunge ngakumbi ngayo ukufana noKumkani uYehoshafati wakwaYuda ‘owayisingisela intliziyo yakhe ekumquqeleni uThixo wenyaniso.’ (2 Kronike 19:3) Umthandazo osuk’ entliziyweni yeyona ndlela ilungileyo yokuquqela kuThixo. Xa wayexinezelekile uHana wathandaza ngokunyanisekileyo kuYehova, “wayethethela entliziyweni yakhe,” yaye umthandazo wakhe waphendulwa. Kwakhona kufuneka uvume ukuphulaphula. Unina kaYesu waphulaphula: “Wamana ukuzigcina [ngenyameko] ke unina zonke ezo ndawo entliziyweni yakhe.” Waqalisa ‘ukuzenzela izigqibo entliziyweni yakhe,’ yaye waba ngumfundi othembekileyo kaYesu. UYehova uyamnceda umntu ofuna ngokunyanisekileyo. ULidiya owoyik’ uThixo waphulaphula kuPawulos, ‘yaye uYehova wayivula intliziyo yakhe ukuba azinyamekele izinto ezazithethwe nguPawulos.’ Wabhaptizwa. (1 Samuweli 1:12, 13; Luka 2:19, 51; IZenzo 16:14, 15) Kusoloko kuyintliziyo yokomfuziselo—iimvakalelo, iintshukumisa ezilungileyo—evumela inyaniso ingene ize ihlale emntwini.
15. Ukuze sizuze intliziyo epheleleyo, simele silungele ukwenza ntoni?
15 Ukuze sizuze intliziyo epheleleyo, simele sikulungele ngokweemvakalelo ukushenxisa izimvo ebesesinazo, sikulungele ukuvumela uThixo abe ngowokwenyaniso kwanokuba oku kutshabalalisa ezinye zeengcinga zethu esizithandayo okanye izimvo zethu ezithandwayo. (Roma 3:4) Iintshukumisa zokuzingca zimele zicocwe ukuze senze iintliziyo zethu zamkele ukuthanda neendlela zikaYehova. UYehova wakhe wabhala imithetho yakhe elityeni, kodwa kamva wayibhala imithetho ezintliziyweni zabantu. Umpostile uPawulos naye wabhala ezintliziyweni. Yaye nawe, ‘unokubhala [ubabalo nenyaniso] kwicwecwe lentliziyo yakho.’—IMizekeliso 3:3; Hebhere 10:16; 2 Korinte 3:3.
16. Yiyiphi imibuzo ebalaselisa amanyathelo ubani amele awathabathe ukuze abe nentliziyo epheleleyo kuYehova?
16 Ngaba intliziyo yakho iyafaneleka njengendawo elungileyo yokubhalela imigaqo nemiyalelo kaYehova? Ngaba uya kucoca zonke iingcamango ebesele zikho kuyo uze uvulele indlela inyaniso kaThixo? Ngaba uya kwandula ke uqhubeke ufundisisa, uhlaziya ingqiqo yakho, uhluba umntu omdala, uze wambathe umntu omtsha ongokomfanekiselo kaThixo? Ngaba uya kukhuthalela ukuba ngumsébenzi ongenazintloni, ulungisa ukulahlula ilizwi lenyaniso?—Roma 12:2; Kolose 3:9, 10; 2 Timoti 2:15.
Ukulondoloza Intliziyo Epheleleyo
17. UDavide wamyala njani unyana wakhe uSolomon, yaye yintoni eyabangela ukuba uSolomon angalilandeli eli cebiso?
17 UDavide waxelela uSolomon oku: “Ke wena Solomon, nyana wam, uze umazi uThixo kayihlo, umkhonze ngentliziyo epheleleyo, nangomphefumlo ovumayo; ngokuba uYehova uyazingxoka zonke iintliziyo, akuqonde konke ukuyila kweengcinga.” USolomon waqalisa ukukhonza ngentliziyo epheleleyo, kodwa njengokuba iminyaka yayihamba, akazange ayilondoloze: “Kwathi, ngexesha lobudala bukaSolomon, abafazi bakhe bayityekisela intliziyo yakhe ekulandeleni thixo bambi; intliziyo yakhe ayaphelela kuYehova uThixo wakhe, njengentliziyo kaDavide uyise.”—1 Kronike 28:9; 1 Kumkani 11:4.
18, 19. (a) Ziziphi iindlela ezahlukahlukeneyo uSathana aya kuzisebenzisa ukukwenza usilele ukulondoloza intliziyo epheleleyo? (b) Ukuba le migudu kaSathana ingakumbi neyiyeyobuqhophololo iyasilela, aya kuguquka njani amaqhinga akhe?
18 Ngaba uya kuphumelela kwindawo uSolomon awasilela kuyo? Ekubeni uzahlulele njengengqina likaYehova, ekubeni ulahle konke ukuba mbaxa kunqulo lwakho, ekubeni uvisisana namazwi kaYesu ‘okuthanda uYehova uThixo wakho ngentliziyo yakho yonke,’ ngaba ngoku uya kuzimisela ukugcina intliziyo yakho izinikele ngokupheleleyo kwinkonzo kaYehova? (Mateyu 22:37) USathana akayi kukuthanda oko, yaye ulutshaba olunobuqhophololo. Intliziyo yakho iza kuba lixhoba lakhe. Uyakwazi ukutyekela kwayo esonweni, yaye ukuba uyayeka ukuyilondoloza uya kuyikhohlisa. Ngaba akazange ‘akubeke entliziyweni kaYuda Sikariyoti ukuba angcatshe uYesu?’ (Yohane 13:2) Imali, izinto eziphathekayo, ukuzonwabisa, ikratshi, imisebenzi yehlabathi, ukuqhayisa, iinkanuko zenyama—uyazazi iindawo esibuthathaka kuzo yaye ujolisa iintolo zakhe zomlilo kuzo. Ngaba uya kuzicima zonke ngekhaka lokholo?—Efese 6:16; 1 Yohane 2:15-17.
19 Yaye xa onke la macebo kaSathana esilela, akancami. Uyingonyama egqumayo ezama ukuqwenga amangqina kaYehova athembekileyo ngamahlokondiba anogonyamelo, ngokubethwa, ngokuvalelwa ezintolongweni yaye kwanangokufa. Kodwa kuko konke oko uYehova uya kubomeleza abo iintliziyo zabo zipheleleyo kuye.—Yakobi 4:7; 1 Petros 5:8-10; ISityhilelo 2:10.
20, 21. (a) Yiyiphi imibuzo esenokubuzwa ekuhlolisiseni intliziyo yokoqobo? (b) Imibuzo efana nale inokusetyenziswa njani ukuhlolisisa intliziyo yokomfuziselo?
20 Intliziyo yokoqobo ifuna ukuhlolisiswa kumaxesha athile. Ngaba ngezihlandlo ezithe rhoqo ifumana isondlo esilungileyo ngezixa ezifanelekileyo? Ngaba ibetha ngokuthe ngcembe yaye ibonisa ukomelela okanye ibetha nzima yaye ibuthathaka? Ngaba ilondoloza uxinezeleko lwegazi olufanelekileyo? Ngaba iyawufumana umthambo ewufunayo? (Ukuze ibe sempilweni intliziyo kufuneka impompe igazi ngamandla kangangexesha elide.) Ngaba isicwili sayo esikhethekileyo (pacemaker) siyasahlulahlula isantya sayo ukuze ihlangabezane neemeko eziguquguqukayo? Ngaba ilawulwa yindawo yeemvakalelo eyibeka kuxinezeleko olunzima?
21 Ukuba intliziyo yokoqobo ifuna ukuhloIwa, kukangakanani ke ngentliziyo yokomfuziselo! UYehova uyayigocagoca; nathi sifanele sibe njalo. Ngaba ifumana izixa ezaneleyo zokutya kokomoya ngofundisiso oluthe rhoqo lobuqu nangokuya kwiintlanganiso? (INdumiso 1:1, 2; IMizekeliso 15:28; Hebhere 10:24, 25) Ngaba iimvakalelo zayo ezinzulu zisishukumisela kwinkonzo yenzondelelo kubulungiseleli basentsimini—mhlawumbi isibangela ukuba maxa wambi sizame ngamandla kubuvulindlela babancedani? (Yeremiya 20:9; Luka 13:24; 1 Korinte 9:16) Kuthekani ngemekobume yayo? Ngaba ijikelezwe zezinye iintliziyo ezimanyeneyo nezipheleleyo ezineemvakalelo neentshukumisa ezifanayo?—2 Kumkani 10:15, 16; INdumiso 86:11; IMizekeliso 13:20; 1 Korinte 15:33.
22. Yintoni eya kuqinisekisa ukuphumelela kuzimiselo Iwethu lokukhonza uYehova ngentliziyo epheleleyo?
22 Ukuba ukuyihlolisisa kwakho kukwenza uphendule ngokuthi ewe kwimibuzo engasentla, ngoko uyayilondoloza intliziyo yakho yokomfuziselo. Uya kuphumelela, kunye nezigidi zamanye amaNgqina athembekileyo, kuzimiselo lwakho lokukhonza uYehova ngentliziyo epheleleyo. Bonke abanjalo banesi siqinisekiso sithi: “Uxolo lukaThixo, olugqithisele kuko konke ukuqonda, luya kuzigcina iintliziyo zenu neengqiqo zenu kuKristu Yesu.”—Filipi 4:7.
Uyakhumbula Na?
◻ Ziziphi iimpawu ezininzi ezinxulunyaniswa nentliziyo yokomfuziselo?
◻ Sinokukuphepha njani ukuba ngabantu abambaxa?
◻ Kutheni le nto uYehova noKristu Yesu bekhangela intliziyo xa bagwebayo?
◻ Sinokuyizuza size siyilondoloze njani intliziyo epheleleyo?
[Umfanekiso okwiphepha 17]
Ngaba umbaxa?
[Imifanekiso ekwiphepha 18]
Ulidiya
UYehoshafati
UHana
UMariya