Imibuzo Evela Kubafundi

◼ Ngaba UYonatan waphulukana nenkoliseko kaThixo xa wadla ubusi emva kokuba uKumkani uSawule waqalekisa naliphi na ijoni elalingadla ngaphambi kokuba umlo uphele?

Isifungo sokungxama sikaSawule sambeka kwimeko yesiqalekiso uSirayeli, kodwa akubonakali ukuba uYonatan wayefanelwe kukulahlwa nguYehova ngenxa yokuba wenza ngokuchasene nesifungo.

EyokuQala kaSamuweli 14:24-45 ibalisa ngesi siganeko. AmaSirayeli, efakwe inkalipho zizenzo zikaYonatan, ayesilwa notshaba olungamaFilisti. Ukumkani uSawule wathi: “Uqalekisiwe odla isonka kungekahlwi, ndide ndiziphindezelele ezintshabeni zam.” (lndinyana) Engazi nto ngesifungo sikayise, uYonatan wazinika amandla ngokudla intwana yobusi. Amanye amadoda omkhosi akwaSirayeli, nawo awayediniwe, ona ngokuxhela iinkomo aza adla ngokunyoluka inyama engophiswanga gazi. Ngokubhekisele kweso sono uSawule wakha isibingelelo, kodwa wayengakwazi okwakwenziwe ngunyana wakhe.

Xa uSawule wafuna ulwalathiso lukaThixo ukuze oyise emfazweni, uYehova akazange amphendule. Ngokusebenzisa iTumim (mhlawumbi kuquka namaqashiso angcwele), uSawule weva ukuba unyana wakhe wasivukela isifungo awasenza ngokungxama okukhulu. Kodwa ngokwenene, wayenganetyala njani uYonatan?

Okokuqala, khumbula isimo sengqondo sikakumkani xa wayesenza isifungo. Akazange azingqine engonqwenela ukuzukisa uThixo ngoloyiso kumaFilisti. Kunoko, ngokungxama wavakalisa isiqalekiso kuye nabani odlayo “ndide ndiziphindezelele ezintshabeni zam.” Ewe, isifungo saphuma kuloo mbono iphosakeleyo yokubonisa amandla okuba ngukumkani okanye saphuma kwinzondelelo ephosakeleyo. Eso sifungo sasingayi kuxhaswa nguThixo. Eso sifungo sasingunobangela wesono segazi lesilwanyana samadoda omkhosi kaSirayeli. Ukuba ayengazange athintelwe sisifungo, ngewayekwazile ukuzifunela ukutya aze ngoko abe namandla okusukela amaFilisti de azuze uloyiso olupheleleyo.

UThixo wakuvumela ukusetyenziswa kweTumim ukuze kuqondwe ukuba uYonatan (ngokungazi) wasivukela isifungo sikaSawule, kodwa oku akuthethi kuthi Yena wayekholiswa sisifungo sokungxama. Akukho apho ingxelo ibonisa khona ukuba uThixo wamjonga uYonatan njengobekek’ ityala. Enyanisweni, nangona uYonatan wayekulungele ukwamkela umphumo wokwaphula isifungo sokungxama sikayise, iimeko zabenza ubomi bukaYonatan basinda ekufeni. Amajoni akwaSirayeli athi uYonatan wayephumeze izenzo zakhe “noThixo,” aza ke ngandlel’ ithile amkhulula uYonatan. Kwiminyaka eyalandelayo, yayinguYonatan owaqhubeka engokholekileyo kuYehova njengoko uSawule waqhubeka esenza okugwenxa.

◼ Babebangaphi abagwebi, abanjengoSamson noGidiyon, ababekho?

Xa ubala abagwebi, inani ofika kulo lixhomekeke kwindlela owajonga ngayo amaSirayeli athile. Kodwa kunokutshiwo ngokuqinisekileyo ukuba amadoda ali-12 akhonza njengabagwebi kwixesha eliphakathi kukaYoshuwa noSamuweli.

Ngemihla kaMoses noYoshuwa, amadoda athile awayesel’ ekhulile ebandleni ayengabagwebi ngengqiqo yokuba ayenyulelwe ukuphulaphula nokwenza izigqibo ngamatyala angokomthetho. (Eksodus 18:21, 22; Yoshuwa 8:33; 23:2) Emva kokufa kukaYoshuwa, uSirayeli walulahla unqulo lokwenyaniso waza wacinezelwa zezinye iintlanga. ABagwebi 2:16 bathi: “UYehova wavelisa abagwebi; bawasindisa esandleni sabaphangi bawo.” Kuqala uYehova wavelisa indoda egama linguOteniyeli njengomgwebi, okanye ‘umsindisi.’ (ABagwebi 3:9) Emva kwakhe kwalandela uEhudi, uShamgare, uBharaki, uGidiyon, uTola, uYayire, uYifeta, ulbhetsan, uElon, uAbhedon noSamson.

Ngaphandle kwaba ball-12, iBhayibhile ikhankanya uDebhora, uEli noSamuweli ngokunxulumene nomsebenzi wokugweba. (ABagwebi 4:4; 1 Samuweli 4:16-18; 7:15, 16) Phofu ke, okokuqala uDebhora ubizwa ngokuthi ungumprofetikazi, yaye unxityelelaniswe noMgwebi uBharaki, owathi ngokukodwa wakhokela ekuhlanguleni abantu kwingcinezelo. Ngokufanayo, uEli ngokuyintloko wayengumbingeleli omkhulu, engenguye ‘umsindisi’ owakhokelela amaSirayeli ekukhululekeni ngokwenza idabi. (Nehemiya 9:27) Ngenxa yoko, ngoxa uDebhora noEli babe nendima abayiphumezayo ekugwebeni uSirayeli, kukho isizathu sokuba bangadweliswa namadoda ali-12 awathi ngokucacileyo nangokuyintloko ‘aveliswa’ ngokukhethekileyo ukuba abe ngabagwebi. IZenzo 13:20 zithi “[banikwa] abagwebi, kwada kwakuSamuweli umprofeti.” Oku kukusikela umda oko kusenokwaziwa kulixesha labagwebi, yaye kubonisa isizathu sokuba uSamuweli noonyana bakhe bangasoloko bebalelwa enanini labagwebi.—1 Samuweli 8:1.