Imibuzo Evela Kubafundi

◼ UYesu wayenokuba “nguthixo” njani owadalwa nguYehova xa ku-Isaya 43:10 UYehova esithi: “Phambi kwam akubunjwanga Thixo, nasemva kwam akuyi kubakho namnye”?

Yaziwa kakuhle into yokuba amaNgqina kaYehova afundisa ngokuphuma eBhayibhileni ukuba uYesu unguNyana kaThixo owadalwayo yaye ungaphantsi kukaYise. (Yohane 14:28; 1 Korinte 11:3) Sekunjalo, njengaLowo unamandla osebenza njengesithethi sikaThixo, okanye uLizwi, unokubizwa ngokufanelekileyo kuthiwe “nguthixo.” Iinguqulelo eziliqela zeBhayibhile zimguqulela uYohane 1:1 ngokuthi uLizwi “wayenguthixo.” Ngokomzekelo, iDas Evangelium nach Johannes (yowe-1979) kaJürgen Becker ifundeka ngolu hlobo: “ . . . und der Logos war bei dem Gott, und ein Gott war der Logos.” (Inguqulelo yesiNgesi ithi: “ . . . waye uLizwi ekuye uThixo, waye uLizwi enguthixo.”)a

Noko ke, njengokuba umntu obuzayo ebonisa, oku kusenokubonakala kuphikisana noIsaya 43:10, 11, othi; “Ningamangqina am, utsho uYehova, nina ningumkhonzi wam endimnyulileyo; ukuze nazi, nikholwe ndim, niqonde ukuba ndim; phambi kwam akubunjwanga Thixo, nasemva kwam akuyi kubakho namnye. Mna ke, mna ndinguYehova, akukho msindisi ingendim.”

Umfundi onyanisekileyo weBhayibhile uyancedwa ngokuwuphawula ngokunyamekileyo umongo waloo mazwi. UThixo onguSomandla uYehova wayezibonisa engowahlukileyo kwizithixo ezenziwe ngumntu kwiintlanga ezazingqonge uSirayeli. UYehova uyabuza esithi: “Ningamfanekisa ke nabani na uThixo, ninxulumanise mfanekiselo mni na naye?” Ngokuqinisekileyo akanakuthelekiswa nomfanekiso owenziwe ngumntu osebenza ngeentsimbi okanye okrolwe emthini. (Isaya 40:18-20; 41:7) ‘Izithixo’ ezinjalo zazingenako ‘ukutwabulula izulu njengeqhiya eyasuyasu,’ njengokuba uYehova wenzayo. (Isaya 40:21-26) Ngokubhekele phaya, uYehova uyakwazi ukulixela kwangaphambili ikamva; ngokuqinisekileyo izithixo zeentlanga azinako ‘ukuxela izinto ezizayo ngasemva, ukuze sazi ukuba zingoothixo.’ (Isaya 41:23) Le ngcamango iyaphindwa kuIsaya 43:9, apho uYehova athi: “[Mazihlangane] izizwe. Ngubani na kuni onokukuxela oko? Asivise izinto zangaphambili, mabamise amangqina abo.” Ngokufanelekileyo, uSomandla uthi: “NdinguYehova, lilo elo igama lam; andiluniki omnye uzuko lwam, nendumiso yam andiyiniki imifanekiso eqingqiweyo.”—Isaya 42:8.

Ngoko umongo ubonisa ukuba uSomandla uzisa ucelomngeni kwabo kuthiwa ngoothixo beentlanga. Ekubeni izizithixo nje ezingenamandla obuthixo, ngokuqinisekileyo azingabo oothixo bokunqulwa; eneneni zililize. UYehova uyaqhubeka esithi: “Kukho Thixo na, ingendim? Akukho liwa, andilazi mna. Abayili bemifanekiso eqingqiweyo bonke bephela baluchuku, neento zabo ezinqwenelekayo [ezenziwe ngesinyithi okanye ezikrolwe emthini] azincedi nto.” (Isaya 44:8-17) Ngenxa yoko, umongo okuIsaya 43:10 wenza kucace ukuba apha akuthethwa ngoYesu; kuthethwa “ngoothixo” abangenaluncedo beentlanga.

Igama elithi “Thixo” okanye “thixo” ngokuqhelekileyo lisetyenziswa ngokuphathelele isidalwa esilumke ngaphezu komntu esifanele sihlonelwe. Ngaloo ndlela, kwiingqondo zabantu abaninzi, igama elithi “thixo” lisenokuthetha (1) Umntu Owongamileyo, uSomandla, okanye (2) uthixo wobuxoki, njengesithixo. Noko ke, iBhayibhile iyakuvumela ukusetyenziswa kwalo ngenye indlela. Sinokukubona oku kwiNdumiso 82:1, 2. Apho uThixo (uYehova uThixo) uyahlulwa kubagwebi abangabantu abo umdumisi ababiza ngokuthi ‘ngoothixo.’ Kamva uYesu wabhekisela kula mazwi. Kuba wayethethe ngoYehova uThixo njengoYise, wambi amaYuda afuna ukumxuluba ngamatye. Kwisityholo sawo sokuba ‘wayezenza uthixo,’ uYesu waphendula esithi: “Akubhaliwe na emthethweni wenu, kwathiwa, Mna ndithe ningoothixo? Ukuba uthe bona [abo bagwebi bangabantu] bangoothixo . . . nitsho na nina ngaye lowo uYise wamngcwalisayo, wamthuma ehlabathini, ukuthi, Uyanyelisa; ngokuba ndithe, NdinguNyana kaThixo?”—Yohane 10:31-36.

Ngokungathandabuzekiyo mnye kuphela uThixo onguSomandla, kwananjengokuba umpostile uPawulos wabhalayo esithi: “Nokuba kukho ekuthiwa bangoothixo, nokuba kusezulwini, nokuba kuphezu komhlaba (kwanjengokuba kukho oothixo abaninzi, neenkosi ezininzi), kuthi thina mnye uThixo, uYise, eziphuma kuye izinto zonke; . . . Inye iNkosi, uYesu Kristu, ezingaye zonke izinto; nathi singaye.” (1 Korinte 8:5, 6) INkosi uYesu Kristu asingothixo wobuxoki, asingothixo oyidemon, okanye isithixo nje. ‘Ulubengezelo lobuqaqawuli bukaYehova uThixo.’ (Hebhere 1:3) Ngaloo ndlela kufanelekile ukuba uYohane 1:1 amazise uYesu ‘njengothixo,’ okanye ‘ofana nothixo’ (ngokukaJohannes Schneider)

[Umbhalo osemazantsi]