Ubomi Nobulungiseleli BukaYesu

Ukukha Izikhwebu NgeSabatha

KUNGEKUDALA uYesu nabafundi bakhe bayemka eYerusalem bebuyela eGalili. Kusentwasahlobo, yaye emasimini kukho izikhwebu ezindizeni. Abafundi bakhatywe yinkawu. Ngoko bakha izikhwebu baze badle. Kodwa ekubeni kungeSabatha, izenzo zabo ziyaphawulwa.

Iinkokeli zonqulo eYerusalem bezisandul’ ukufuna ukubulala uYesu ngenxa yoko zithi kukwaphulwa kweSabatha. Ngoku abaFarisi bayamangala. Bathi: “Yabona, abafundi bakho benza oko kungavumelekileyo ukwenziwa ngesabatha.”

AbaFarisi bathi ukuthabatha isikhwebu uze usihlikihle ezandleni ukuba usitye kukuvuna nokubhula. Kodwa indlela yabo engqongqo yokuqonda oko kungumsebenzi kuyenze iSabatha yanobunzima, ngoxa yayilungiselelwe ukuba ibe lixesha elivuyisayo nelakhayo ngokomoya. Ngoko uYesu ubaphendula ngemizekelo engokweZibhalo ukubonisa ukuba uYehova uThixo akazange acebe oko kusetyenziswa kungqongqo ngokungafanelekanga komthetho Wakhe ongeSabatha.

UYesu uthi, xa uDavide namadoda akhe babelambile, bema eminqubeni baza badla izonka zeminikelo. Nakubeni ezo zonka zazisele zishenxisiwe phambi koYehova zaza zathatyathelw’ indawo zezinye ezitsha, ngokucacileyo zazibekelwe ukuba zidliwe ngababingeleli. Kanti, phantsi kwazo nje ezo meko, uDavide namadoda akhe abazange bagwetywe ngenxa yokuzidla.

Enikela omnye umzekelo, uYesu uthi: “Anilesanga na emthethweni, ukuba ngesabatha ababingeleli etempileni bayayingcolisa isabatha, bangazeki tyala noko?” Ewe, kwanangeSabatha ababingeleli bayaxhela yaye benza neminye imisebenzi etempileni ekulungiseleleni amadini ezilwanyana! UYesu uthi: “Ndithi ke kuni, omkhulu kunayo itempile ukho apha.”

Eluleka abaFarisi, uYesu uyaqhubeka esithi: “Ukuba ke nibe nikwazile ukuba kuthini na ukuthi, Ndithanda inceba, andithandi mbingelelo, ninge ningabagwebanga abangenatyala.” Wandula ke aqukumbele ngokuthi: “Kuba uNyana woMntu uyiNkosi yayo nesabatha.” Wayesingisele entwenini uYesu ngokuthetha oko?

UYesu wayebhekisela kulawulo lwakhe loBukumkani olunoxolo lweminyaka eliwaka. Kangangeminyaka engama-6 000 uluntu luye lweva ubuhlungu ngobukhoboka obunzima lulawulwa nguSathana uMtyholi, yaye kusoloko kuxoxwa ngogonyamelo nangemfazwe. Kwelinye icala, ulawulo lukaKristu oluyisabatha enkulu luya kuba lixesha lokuphumla kuzo zonke iimbandezelo neengcinezelo ezinjalo. Mateyu 12:1-8; Levitikus 24:5-9; 1 Samuweli 21:1-6; Numeri 28:9; Hoseya 6:6.

◆ Sisiphi isityholo esibekwa kubafundi bakaYesu, ibe uYesu usiphendula njani?

◆ Kukuphi ukusilela kwabaFarisi uYesu akuchazayo?

◆ UYesu “uyiNkosi yayo nesabatha” ngayiphi indlela?