Lutsha—Musani Ukukhohliswa
“[USathana] ngokwakhe uzimilisa okwesithunywa sokukhanya.”—2 KORINTE 11:14.
1. (a) Ziziphi iindlela uninzi lwethu oluye lwakhohliswa ngazo? (b) Ngokuqhelekileyo, ngoobani abakhohliswa ngokulula?
AKUTHANDABUZEKI ukuba sonke ngaxa lithile sakhe sakhohliswa. Mhlawumbi wawudlala umdlalo ekwathi kuwo umdlali welinye icala ngenxa yentshukumo ekhohlisayo wakuqhatha kwindawo omi kuyo waza ngaloo ndlela wafaka inqaku ukuze baphumelele kumdlalo. Okanye usenokuba uye wathenga impahla yokunxiba ekhangeleka intle, suke wathi emva kokuyinxiba ixesha elifutshane nasemva kokuyihlamba wafumanisa ukuba ilaphu layo belingelolexabiso ebelibonakala lililo. Ngokuqhelekileyo, ngoobani abakhohliswa ngokulula, oko kukuthi ababhanxwayo okanye abaqhathwayo? Ngaba asingabo abo bangenamava kangako? Yaye ngokufuthi imiphumo iba mibi ngakumbi kunokoyiswa nje emdlalweni okanye ukhohliswe ekuthengeni into ethile.
2. Lumbi ulutsha luye lwakhokelelwa njani ekwenzeni okuphosakele ngokunzulu?
2 Ngokomzekelo, uJulie, umfundi okunyaka wesibini kwisikolo semfundo ephakamileyo, ngokutsho kwakhe, ‘wayethandana nomfana omhle nothandwayo kuso sonke isikolo.’ Wacacisa ngelithi: “Ndamxelela ukuba ndandingakulungele oko wayekufuna, kodwa wahlala endixelela indlela awayendithanda ngayo, yaye endixelela ukuba yonke into yayiya kulunga. Xa ndandisalandula, wandisongela okokugqibela. Wathi, ‘Bendikunyamekele ngokwenene, yaye bendicinga ukuba uvakalelwa ngendlela efanayo. Ukuba akuyi kundibonisa ukuba kunjalo, ndiyacinga ukuba kofuneka singaphinde sibonane.’” Ngoko uJulie wanikezela waza wahenyuza. Ngosuku olulandelayo, xa wafumanisa ukuba le nkwenkwe yaye yaqhayisa ngolu “loyiso” lwayo, wayiqonda indleia awayekhohliswe ngokupheleleyo ngayo. Wayefanele azi ukuba ukuba le nkwenkwe yayimthanda ngokwenene, yayingayi kuqhayisa ngolo hlobo.
3. (a) Kutheni uhenyuzo lusisono esinzulu gqitha nje? (b) Iyintoni injongo kaSathana uMtyholi?
3 Oko uJulie wabhanxelwa okanye wakhohliselwa ukukwenza kwakukukwaphula ngokunzulu umthetho kaThixo. Ngenxa yeso sizathu iBhayibhile ibongoza ngelithi: “Wubalekeni umbulo.” Yaye ngokucacileyo ithi: “Umenzi wombulo . . . akanalifa ebukumkani bukaKristu noThixo.” (1 Korinte 6:18; Efese 5:5) Ngoko ngoxa uSathana uMtyholi esenokungazikhathazi ngokuphumelela okanye ukoyisakala kwakho kumdlalo webhola okanye uthenge ngobulumko okanye kungabi njalo, ngokuqinisekileyo uzama ukukulahlekisela ukuba waphule umthetho kaThixo. IBhayibhile ilumkisa ngelithi, “Ummangaleli wenu, uMtyholi, uhamba njengengonyama egqumayo, efuna ubani engamginyayo.” (1 Petros 5:8) Eneneni, usebenzisa bonke ubuqili bakhe, kuquka ukuzimilisa okwesithunywa sokukhanya, ukuze asityekise ekukhonzeni uYehova uThixo! Ngaba leyo asiyongcinga isengqiqweni?—2 Korinte 11:14.
Funda Koko Kwenzeka KuEva
4. Kutheni le nto kunokuthiwa ulutsha lungamaxhoba akhethekileyo kaSathana?
4 Kodwa nina baselula, oku nifanele nikucingisise ngamandla: Ningamaxhoba akhethekileyo kaSathana. Kutheni kunjalo nje? Ngenxa yobutsha benu, beninexesha elincinane lokuzuza ulwazi nobulumko, yaye uSathana ucholachola abo bangenamava. Wakwenza oko kwasekuqaleni kwemvukelo yakhe. Khumbula ukuba wathetha noEva emyezweni wase-Eden, akazange athethe nendoda yakhe uAdam eyayidalwe ngaxa lithile ngaphambi kwakhe. Yaye uSathana waphumelela. Wamkhohlisa, ewe, emlahlekisa ngembonakalo yobuxoki, uEva oselula nongenamava kangako. IBhayibhile icacisa ngelithi, “Kuba kwabunjwa uAdam kuqala, kwandula ke kwabunjwa uEva. Kananjalo akulukuhlwanga uAdam; kulukuhlwe umfazi, waba sekugqitheni.”—1 Timoti 2:13, 14.
5. (a) Yintoni esingamele sikhohliselwe ekuyicingeni? (b) Yintoni umpostile uPawulos awayeyixhalabele, yaye kutheni le nto yayifanelekile?
5 Ungaze ukhohliselwe ekucingeni ukuba iindlela zikaSathana azinakusebenza kuwe, ucinge ukuba akanakuze akwenze waphule imithetho kaThixo. Khumbula isilumkiso sobuthixo sokuba ‘uSathana ngokwakhe uzimilisa okwesithunywa sokukhanya.’ (2 Korinte 11:14) Ngokufanelekileyo umpostile uPawulos wayenenkxalabo yokuba uMkhohlisi Obalaseleyo wayenokuphumelela ekuthetheni namaKristu awayesebenza noPawulos nangekabi namava kangako. UPawulos wabhala oku: “Ndiyoyika ke, hleze kuthi, njengokuba inyoka yamlukuhlayo uEva ngobuqhetseba bayo, zonakaliswe ngokunjalo nani iingqiqo zenu, zimke ekunyaniseni kuye uKristu.”—2 Korinte 11:3.
6. Kuthetha ntoni ukulukuhlwa?
6 Phawula ukuba uEva akazange akhohliswe okanye aqhathwe nje ngokulula; kwakhona walukuhlwa. Oku kuthetha ukuba wangeniswa kwikhondo lentlekele ngokuhendwa okanye ukulingwa. NgokweWebster’s Third New International Dictionary, igama elithi ukulukuhla lithetha “ukushukumisa ubani angathobeli,” “ukutsala okanye ukuzuza ngomtsalane ochulwe kunene okanye ngokungathi kungomtsalane ochulwe kunene.” Ngokungqalileyo, esi sichazi-magama sithi, ukulukuhla kuthetha “ukukhohlisela (umfazi) ukuba abe neentlobano zesini okwesihlandlo sokuqala.” Sinokuncedwa ngokuhlolisisa indlela kaSathana yokulukuhla uEva (nangona iintlobano zesini zazingabandakanyekanga kwesi sihlandlo) yaye kwakhona ngokuphawula iindlela ezifanayo azisebenzisayo namhlanje.
7, 8. (a) Yayiyintoni injongo yombuzo kaSathana kuEva? (b) USathana wakwenza njani ukudla emthini kwabonakala kunomtsalane gqitha?
7 Ekuqaleni kokutyelela kwakhe uEva, uSathana, ngendlela echuliweyo, wasebenzisa inyoka ukuba ibangele uEva ukuba aqalise ukuthandabuza umthetho kaThixo. Kumazwi ayilwe ngenyameko ukuze aphakamise ukukrokra nokuswela intembelo, wabuza oku: “Utshilo na okunene uThixo ukuthi, Ze ningadli kuyo yonke imithi yomyezo?” Ngalo mbuzo wokungcola, uSathana wayebonisa ukuba ilusizi into yokuba wayengenakudla kuyo yonke imithi yomyezo. Wathi, enyanisweni, kunokuba afe njengokuba uThixo wayethe wayeya kufa, kwakuya kumnceda ngokwenene ukudla kwisiqhamo somthi owalelweyo. USathana wamqinisekisa ngelithi, “Kuba esazi uThixo ukuba, mhlana nithe nadla kuzo, oqabuka emehlo enu, nibe njengoThixo, nazi okulungileyo nokubi.”—Genesis 3:1-5.
8 Elinjani ukungcola iqhinga likaSathana, lokuthi uThixo wayezama ukumvimba ulwazi oluluncedo uEva! Ngokutsho kukaSathana, uThixo wakwasebenzisa nesisongelo esingasebenziyo sokufa ukuze athintele umfazi ekusebenziseni amandla okuzenzela isigqibo. Ngokungathi kunjalo, waxelela uEva oku, ‘Wena, uyalahleka! Akusayi kufa. Unokunandipha oko uThixo akunandiphayo. Unokuzenzela isigqibo ngokwakho ngoko kulungileyo okanye kubi.’ Kwaba nomtsalane kuEva ukukwazi ukuzenzela izigqibo zakhe ngaphandle kokuba kufuneke aphendule nakubani na.
9. Njengokuba kuboniswe kuYakobi 1:14, 15, ziziphi iziganeko ezakhokelela ekoneni kukaEva zaza ekugqibeleni zakhokelela ekufeni?
9 Ngokomphumo, uEva waqalisa ukuwukhangela lo mthi ngokuwukhanuka. “Wabona umfazi ukuba umthi ulungele ukudliwa, nokuba uyakhanukeka emehlweni, ingumthi onqwenelekela ukuqiqisa, wathabatha eziqhameni zawo, wadla.” (Genesis 3:6) Kodwa kamva, xa uEva wafumanisa ukuba akazange akuzuze oko wayekuthenjisiwe, wathi: “Inyoka indilukuhlile.” (Genesis 3:13) Enyanisweni, kwakhona yayimlukuhlile, imkhokela ngesihendo okanye isilingo esinomtsalane de inkanuko yokuzingca yambangela ukuba one yaye, ngokomphumo, ekugqibeleni imbangela ukuba afe.—Yakobi 1:14, 15.
Walumkele Amaqhinga KaSathana
10. Kutheni le nto sifanele siwazi amaqhinga kaSathana, yaye yiyiphi imiyalelo ekububulumko ukuyilandela?
10 USathana usebenzisa amaqhinga afanayo, oko kukuthi, amacebo, inkohliso, nobuqili, ukuze akhohlise aze alukuhle ulutsha namhlanje. Kodwa ekubeni iBhayibhile inikela imbali ecokisekileyo yeendlela zikaSathana zokukhohlisa, akufuneki ungawazi amaqhinga akhe. (2 Korinte 2:11) Kufuneka ube nengqiqo entle yokunyamekela izilumkiso nemiyalelo uYehova uThixo ayinikelayo ngeLizwi nangentlangano yakhe.—IMizekeliso 2:1-6; 3:1-7, 11, 12; 4:1, 2, 20-27; 7:1-4.
11. Ngokufuthi uSathana ululukuhla okanye ulukhohlisa njani ulutsha ukuba lwenze okuphosakeleyo?
11 Ngokufuthi uSathana ubatsala okanye ubahenda njani abaselula ukuba benze okuphosakeleyo? Oko ukwenza ngokwenza oko uThixo akugwebayo, izinto ezinokukhokelela ekuphulukaneni nenkoliseko kaThixo, kubonakale kunomtsalane gqitha, yaye kwangaxeshanye kubonakale kungeyongozi, kwananjengokuba isiqhamo sabonakala sinjalo kuEva. Nanjengokuba wenzayo kuEva, uya kuzama ukukhuthaza into yokuba kukho nto ithile eyolisayo ekuphosa ngokungeyomfuneko. Ngaloo ndlela, ngobuqhinga nangenkohliso uSathana ulwela ukukujongela phantsi ukuhlonela kwakho iLizwi likaThixo, nokuhlonela kwakho imiyalelo enikelwa ngabazali aboyik’ uThixo nentlangano kaThixo. Ngoko ngesizathu esilungileyo iBhayibhile ibongoza ngelithi, “[Misani] nibuchase ubuqhinga [okanye, njengokuba iThe Kingdom Interlinear Translation of the Greek Scriptures isithi, “ubuqhophololo”] boMtyholi.”—Efese 6:11.
12. (a) Yiyiphi inyaniso engoSathana esimele siyithabathe nzulu, yaye ngoba? (b) Ukujonga njani okuthethwa kweyoku-1 Yohane 2:15 no Yakobi 4:4? (c) USathana ebeyakuthanda ukukukhohlisela ukuba ukholelwe entwenini?
12 Ngokucacileyo, uEva wayesisidenge ngokukholelwa kubuxoki bukaSathana. Kanti aluthi na ulutsha oluninzi namhlanje ngendlela efanayo luzithabathe lula izilumkiso ezikwiLizwi likaThixo okanye ezo zinikelwa ngabazali balo okanye ngabadala abangamaKristu? Kuthekani ngawe? Ngokomzekelo, ngaba usithabatha nzulu isibakala sokuba uSathana uMtyholi ungumlawuli well hlabathi nesokuba, njengothixo wale nkqubo yezinto, umfamekisa iingqondo zabantu? (1 Yohane 5:19; Yohane 12:31; 14:30; 16:11; 2 Korinte 4:4) Ngaba ngenene uzama ukuthobela umyalelo kaThixo othi: “Musani ukulithanda ihlabathi kwanezinto ezisehlabathini”? (1 Yohane 2:15) Yaye khawuzibuze wena siqu: ‘Ngaba ndiwakholelwa ngenene amazwi eBhayibhile athi, “Othe ngoko wanga angaba sisihlobo salo ihlabathi, uzenza utshaba lukaThixo’”? (Yakobi 4:4) USathana ebengathanda ukukukhohlisela ukuba ukholelwe kwelokuba ihlabathi alinasisongelo, izinto ezikulo eliziphakamisayo azinabungozi. Kodwa lumka! Musa ukukhohliswa!
Imigibe Ekhohlisayo Namhlanje
13. Luluphi uqheliselo oluye lwabalasela kwiindawo ezininzi, yaye uSathana ebeya kuthanda ukuba sikholelwe ntoni ngokuphathelele olo qheliselo?
13 Ngokufuthi uSathana ubambisa abantu ukuba benze okuphosakeleyo ngezinto ezisenokuba aziphosakele okanye ezingagwetywa ngokuthe ngqo yiBhayibhile. Ngokomzekelo, ngoxa izibini ezininzi ezitshatileyo zinokuba neenkumbulo ezivuyisayo zamaxesha amyoli ezaziwanandipha ngemihla yazo yokuthandana ngaphambi komtshato, kunokwenzeka kubekho iingozi xa abantu beba bodwa xa besenza idinga. Eneneni, ukwenza idinga luqheliselo lwanamhla oluye lwathi emva kweMfazwe Yehlabathi I lwabalasela kwiindawo ezininzi. USathana ebengathanda ukuba ukholelwe kwelokuba olu qheliselo luhlobo olumsulwa lokuzihlaziya olwenza abantu abaselula baqhelane nabesini esahlukileyo bebobabini. Kodwa, enyanisweni, olu qheliselo luzaliswe ziingozi zokuziphatha.
14. (a) Lunokuthelekiswa njani uqheliselo lokwenza idinga? (b) Ziziphi iimvakalelo ezinokukhula kwimeko yokwenza idinga?
14 AmaKristu amadala nakhulileyo, ngenxa yamava awo, aziphaphele ngakumbi ezi ngozi yaye ke ngoko anokunikela ulwalathiso oluluncedo. (IMizekeliso 27:12) Kodwa mhlawumbi uvakalelwa kukuba akukho ngozi ekwenzeni idinga yaye abazali bakho bangqongqo ngokugqith’ emgceni, bekuvimba ulonwabo. Kanti kanye njengokuba abantu bebenokugwetywa ngokwesiqhamo abasivelisayo, kunjalo nangamasiko anjengokwenza amadinga. (IMizekeliso 20:11; Mateyu 7:16) Ngokomzekelo, omnye one-18 leminyaka ubudala owayesenza amadinga ngokuthe rhoqo, nowakhulelwayo wathi: “Ndandingomnye wamawakawaka abantwana ababecinga ukuba akunakuze kwenzeke kum.” Wavuma ukuba emva kokwenza idinga kangangexesha elithile “ukubambana nokwangana kuyakruqula.” Ngokufanayo, intombi ene-17 leminyaka ubudala ngokufuthi eyayisenza idinga, ibika oku: “Ukwangana nokuphathaphathana kwakhula de ndakulangazelela kunene ukuba neentlobano zesini nenkwenkwe.” Ngaba yimvakalelo engaqhelekanga? Akunjalo konke konke.
15. Kungenxa yaziphi iintlekele ekumele ukwenza idinga kube nembopheleleko ephawulekayo?
15 Xa abantu abaselula abatsaleleke ngokomzimba omnye komnye bezahlula, njengokuba kuqhelekile xa kusenziwa amadinga, inkanuko yesini inokukhula de ikhokele kwanolutsha olunotyekelo oluhle ukuba lwaphule umthetho kaThixo. Qwalasela ukuba ngaphezulu kuhle kwesigidi seentombi ezikwishumi elivisayo eUnited States siyakhulelwa nyaka ngamnye yaye amakhulu amawaka azo aye aqhomfa okanye anabantwana ngaphandle kokutshata. Ngelishwa, kwezinye izihlandlo ezinye zezi ntombi zikwishumi elivisayo zingabantwana bamaNgqina kaYehova yaye kunjalo nangamakhwenkwe athandana nazo. Isiko lanamhla lokwenza idinga limele libe ngunobangela ophawulekayo wezi ntlekele, mhlawumbi nonobangela weziganeko ezitsha zezifo ezidluliselwa ngeentlobano zesini nyaka ngamnye.
16. (a) linkanuko zesini zaneliswa ngokufanelekileyo phi? (b) Yintoni eyenzekayo kubantu bakaThixo abaninzi?
16 UThixo wayenenjongo yokuba inkanuko yesini yaneliswe kumaqhina omtshato, apho inokuzisa uyolo nolwaneliseko oluhlaziyayo. (Hebhere 13:4; IMizekeliso 5:15-19) Kanti, uSathana ngobuqhophololo uye wasebenzisa esi sipho sanikelwa nguThixo ukulukuhla abantu ukuba basebenzise kakubi isini baze bahenyuze. Kumaxesha amandulo, amaSirayeli angama-24 000 abulawa ngosuku olunye ngenxa yokona uThixo ngale ndlela, yaye ngoku amawaka nyaka ngamnye ayasuswa kubudlelane bebandla lamaKristu ngenxa yohenyuzo. Ngoko yiba nobulumko. Phulaphula isiluleko nolwalathiso. Musa ukuzivumela ukuba ukhohliswe.—Numeri 25:1-9, 16-18; 31:16.
17. (a) Yiyiphi imbono ekhohlisayo uSathana aye wayikhuthaza ngokuphathelele izinto ezinjengemidlalo, umculo nomngqungqo? (b) Kutheni le nto ukuzihlaziya kwehlabathi kuzisa isisongelo kubantu bakaThixo?
17 Kwakhona, waphaphele namanye amaqhinga kaSathana. Ngokomzekelo, imidlalo, umculo nomngqungqo, ziye zaba yinxalenye ebalaseleyo yokuzonwabisa kweli hlabathi lakhe. Kuyinyaniso ukuba, ezi zinto zona ngokwazo aziphosakele ngokuyimfuneko yaye zinokuyolisa zide zibe luncedo. (1 Timoti 4:8; Zekariya 8:5; Luka 15:25) Phofu ke, uSathana ngenkohliso uye wakhuthaza imbono yokuba azizisi ngozi, kwanaxa ngokuthe rhoqo zisenziwa nabantu behlabathi. Kodwa iLizwi likaThixo lilumkisa ngelithi: “Musani ukulahlekiswa. Incoko embi yonakalisa izimilo ezilungileyo.” (1 Korinte 15:33) Khawucinge ngale nto. Ukuba unqulo neepolitiki ziyinxa-lenye yenkqubo kaSathana, ngaba akubobudenge ukukholelwa kwelokuba ukuzihlaziya okukhuthazwa lihlabathi akunampembelelo yakhe? Kufuneka uhlale uzilindile ukuba ungaze ‘umilise okweli phakade.’—Roma 12:2.
Amalungiselelo Okukhusela Ulutsha
18. Kutheni le nto ufanele ubaxabise abazali abakufundisayo nabakukhokelayo?
18 Ngokunothando uYehova uThixo wenze amalungiselelo okukhusela nina baselula ukuze ningakhohliswa. Okokuqala, uye wanilungiselela abazali benu ukuba banifundise baze banalathise. Yaye ninokuvuya xa bekwenza oko. Omnye one-18 leminyaka ubudala nowayengonwabanga, owakhawula umntwana engatshatanga, wakhalaza ngelithi ngekwakungenzekanga “ukuba abazali bam babewenzile umsebenzi obafaneleyo njengabazali, baze bandixelele imigibe yokuthandana nenkwenkwe, baze bandalele ukuthandana nenkwenkwe.” Ngoko yibani nombulelo ukuba ninabazali aboyika uThixo. Abazami kunibiyela yaye abazami kwenza ubomi benu bungayolisi ngemiqathango abayibeka kuni. Ngokwahlukileyo koko, bayanithanda yaye bafuna ukunikhusela. Wasebenziseni kakuhle amava nobulumko babo ngokufuna isiluleko sabo.
19. Luluphi uncedo olongezelelekileyo oluye lwanikelwa ukuze kukhuselwe ulutsha?
19 Ukongezelela koku, uYehova uye walungiselela intlangano yakhe yasemhlabeni ukuba inincede. Ngokomzekelo, inkupho nganye kaVukani! iqulethe imbalasane ethi “Abantu Abaselula Bayabuza . . . ” ebonisa ukuba sengqiqweni kwemilinganiselo kaYehova. Ngokufanayo, incwadana ethi Isikolo NamaNgqina KaYehova yalungiselelwa ukuze inincede nibambelele kwimigaqo nemithetho kaThixo esikolweni. Ukhuthazo nesiluleko esingakumbi sinikelwa kwiMboniselo nakwiintlanganiso zebandla, kwiindibano zesiphaluka nezesithili. Eneneni, kanye lo mbandela uthi, “Lutsha—Musani Ukukhohliswa,” wawuyintetho eyanikelwa kwindibano yakutshanje yesithili ibe waba ngumbandela wenxalenye yeNtlanganiso Yenkonzo.
20. (a) Kutheni le nto kukho uncedo oluninzi lokunceda abantu abaselula? (b) Sisiphi isimo sengqondo esiya kukunceda uxhathise imigudu kaSathana yokukukhohlisa?
20 Ningaze nicinge ukuba ngayo yonke le ngqalelo sizama ukunigonyamela ukuze sinibandeze ulonwabo lwenu. Kunoko, intlangano kaThixo iyanithanda, yaye yonke into eshicilelwayo nethethwayo yenzelwe ukukhusela nina—ukusindisa ubomi benu! Fundani ukuwaxabisa la malungiselelo. Kwenzeni umkhwa wenu ukufundisisa iBhayibhile ngokusebenzisa iimpapasho zoMbutho; zivumeleni iinyaniso zeBhayibhile zinichwayitise ngoxabiso. Kwanga ninganesimo sengqondo somnye one-18 leminyaka ubudala owathi, emva kokuqwalasela isiluleko esasalathiswe kulutsha, wabhala oku: “Sindenze ndayiqonda indlela esinethamsanqa ngayo thina baselula ngokuba senyanisweni! Ayikho enye intlangano emhlabeni ebanyamekela nebathanda kangaka abantu bayo abaselula!” Kwanga singamanyana size sixhathise imigudu kaMtyholi yokusikhohlisa, kuba amaqhinga akhe siyawazi!
IBHOKISI YEMPINDA
◻ Kutheni lento abantu abaselula belixhoba elikhethekileyo likaSathana?
◻ USathana wamlukuhla njani uEva ukuba enze okuphosakeleyo?
◻ Namhlanje, uSathana udla ngokululukuhla njani ulutsha ukuba lwenze okuphosakeleyo?
◻ Ngawaph amalungiselelo akhoyo okukhusela abantu abaselula?
[Umfanekiso okwiphepha 10]
Kanye njengokuba uSathana walukuhla uEva, owayengenamava kangako kunoAdam, ngoko ulutsha lulixhoba elikhethekileyo likaSathana
[Umfanekiso okwiphepha 13]
Xa abantu abaselula bezikhetha, inkanuko yesini inokukhula ize ikhokelele ekwaphuleni umthetho kaThixo