Wubambe Umlomo Wakho!
INOKUBA yehlaba ize itshabalalise njengesixhobo sokulwa. Kodwa ikwanokuba mnandi njengobusi ize ithomalalise njengesithambiso. Inokuphilisa, yaye inokubulala. IBhayibhile iwachaza ngale ndlela amandla entetho yomntu.—IMizekeliso 12:18; 16:24; 18:21.
Ngoko, akumangalisi ukuba uSolomon abe wathi: “Obambe umlomo wakhe ugcine umphefumlo wakhe; owuthe qheke umlomo wakhe, yintshabalalo kuye leyo.” (IMizekeliso 13:3) Udumo olonakalisiweyo, iimvakalelo ezibuhlungu, ulwalamano oluphazamisekileyo, kwanengozi esemzimbeni—yonke le yimiphumo ekunokwenzeka ukuba ibekho ngenxa yentetho yobudenge. Noko ke, alithandabuzeki elokuba ungulowo ufuna ‘ukugcina umphefumlo wakhe.’ Unokuzifundisa njani ukubamba umlomo wakho uze uphephe umonakalo onokubakho?
“Ebuninzini Bamazwi . . .”
Enye indlela elula kukungathethi kakhulu! Mhlawumbi ubukufuphi nendoda mhlawumbi umfazi ekubonakala ukuba usoloko enento afuna ukuyitsho kuko konke okuthethwayo. Hayi indlela anokucaphukisa ngayo umntu onjalo! “Umlomo wezinyabi umpompoza ukumatha,” ibe “isidenge sandisa amazwi,” itsho njalo IBhayibhile. (IMizekeliso 15:2; INtshumayeli 10:14) Kakade ke, oku akuthethi kuthi bonke abantu abathanda ukuthetha bazizidenge okanye bonke abo bangathethi kakhulu balumkile. Kodwa kuyingozi ukuthetha utybatyhiwe wento. IMizekeliso 10:19 ikubeka ngale ndlela oku: “Ebuninzini bamazwi akusweleki sono; owubambayo umlomo wakhe unengqiqo.”
Cinga Ngaphambi Kokuphendula
Enye indlela yokubamba umlomo wakho kukucinga ngaphambi kokuba uthethe. Xa oko kuthethwayo kungakhange kucingwe kwangaphambili, isithethi nabaphulaphuli baso banokwenzakala. Umbhali ophefumlelweyo uthi: “Kukho ophololoza njengokuhlaba kwekrele.”—IMizekeliso 12:18.
Ekuboniseni nje indlela embi ngayo intetho engacingwanga, incwadi kaYakobi eseBhayibhileni ithi: “Umlilo omncinane utshisa ihlathi elikhulu. Nolwimi olu ngumlilo, lihlabathi elizele kukungalungisi; lunjalo ulwimi ukuhlala phakathi kwamalungu ethu. Lona luyawudyobha umzimba uphela, luvuthisa intenda yobomi; lona ke luvuthiswa sisihogo somlilo [yiGehena, (NW)].”—Yakobi 3:5, 6.
IGehena yafumana igama layo kwiNtlambo yakwaHinom engasezantsi nakumzantsi ntshona weYerusalem. Maxa wambi kwimbali yakwaSirayeli, umlilo wawusoloko uvutha apho ukuze kutshiswe amabibi esixeko, nto leyo eyenza iGehena yaba ngumfuziselo ofanelekileyo wentshabalaliso epheleleyo. Noko ke, ulwimi olungalawuIwayo ‘lwalunokutshiswa njani yiGehena?’ Umntu oxokayo, okhuthaza iimfundiso zokungamhloneli uThixo, okanye kungenjalo osebenzisa kakubi ulwimi unokwenza ukuba yena nabanye baphulukane nenkoliseko kaThixo. Ube yintoni umphumo? Intshabalalo kanaphakade! Ngokomzekelo, uYesu Kristu waxelela abaFarisi oku: “Yeha, nina babhali, baFarisi, bahanahanisindini! Ngokuba nijikajika ulwandle nomhlaba ukuze nenze nokuba mnye ongena ebuYudeni; nithi, xa athe wazuzeka, nimenze abe ngumntwana wesihogo ngokuphindiweyo kunani.”—Mateyu 23:15.
Ngoko ke iBhayibhile isinika eli cebiso lisebenzisekayo: “Intliziyo yelungisa iya kucamanga ukuphendula.” (IMizekeliso 15:28) Kulunge ngakumbi ukucinga ngoko uza kukuthetha, kunokuphuhluka into enokwenzakalisa!
“Ilizwi Elithethwe Ngexa Elililo”
Ukuthetha ngexesha elifanelekileyo kukwayenye indlela yokubamba umlomo wakho. USolomon wathi: “Into yonke inexesha elimisiweyo . . . ukuthi cwaka kunexesha lako, ukuthetha kunexesha lako.” (INtshumayeli 3:1, 7) Xa iqabane lakho libonakala lidiniwe ngenxa yomsebenzi wempangelo wosuku lonke okanye imisebenzi yasekhaya, ngaba ngokuyimfuneko elo lixesha lokumngxala ngeengxaki okanye imibuzo engenamsebenzi? Mhlawumbi eli ‘lixesha lokuthi cwaka.’
Kwelinye icala, kukho ‘ixesha lokuthetha.’ KwiMizekeliso 15:23 sifunda oku: “Ilizwi elithethwe ngexesha elililo, azi lihle!” Ngaba wazi uthile odakumbileyo ngenxa yeengxaki neenkathazo? Ngaba ilizwi lokhuthazo elithethwe ngexesha elililo alikuko oko loo mntu akusweleyo?
UYesu Kristu akazange asilele ukuxhakamfula ithuba lokukhuthaza abanye. Wakhe waxelela abafundi bakhe oku: “Yizani nina ngasese kwindawo eyintlango, niphumle kancinane.” Ingxelo yongezelela oku: “Bemka ngomkhombe ngasese, baya kwindawo eyintlango. Isihlwele sababona bemka bathi abaninzi bamazi, babalekela khona ngeenyawo, bevela kuyo yonke imizi; babaphangela.” Ngokusuka kwindlela ezazibona ngayo izihlwele, eli ngokuqinisekileyo labonakala ilixesha elifanelekileyo lamazwi okuthuthuzela! Noko ke, ngokwembono kaYesu neyabafundi bakhe, elo xesha labonakala lingeloncedo konke konke. “Uthe akuphuma [emkhombeni] uYesu wabona isihlwele esikhulu; wasikwa yimfesane ngabo, ngokuba babenjengezimvu ezingenamalusi; waqala wabafundisa iindawo ezininzi.” (Marko 6:31-34) Ewe, uYesu wayewubamba umlomo wakhe. Wayelazi ixesha lokuthetha nexesha lokuthula.—Thelekisa uMateyu 26:63; 27:12-14.
Nawe, ngokunjalo, unokufunda ukuwubamba umlomo wakho. Yenza umgudu wobuqu wokuphepha ukuthetha kakhulu. Yiphephe intetho engacingwanga enokuthi yonakalise udumo lwakho nolo lwabanye. Yaye khangela amathuba okwabelana nabanye ‘ngelizwi elithethwe ngexesha elililo’ neliluncedo. Ukwenza oko kuya kukunceda ‘ugcine umphefumlo wakho.’—IMizekeliso 13:3.
[Umfanekiso okwiphepha 23]
Ngaba utyekele ekuphazamiseni abanye okanye ukuba nezwi kwinto nganye ethethwayo?