Bazali—‘Ninokulakha Njani Ikhaya Lenu?
“Indlu yona yakhiwa ngobulumko; izinziswe ngengqondo.”—IMIZEKELISO 24:3.
1. Yintoni efunekayo ukuze intsapho yomelele?
KUHLOLISISO olwenziwe kutshanje kwabuzwa iingcaphephe ezingaphezu kwama-550 nezisebenza ngokukhethekileyo ekuncedeni iintsapho ukuba ziziphi na iimpawu ezidla ngokuzifumana kwiintsapho ezomeleleyo. Iimpawu zokuqala kolo ludwe zezi: kukuncokolisana nokuphulaphula. Umbhali wolu hlolisiso, uDolores Curran, wachaza isizathu esithi: “Ngamandla aphembelela inyameko, ukupha, ubudlelane nokomelezana. Ngaphandle kokuphulaphulana nobudlelane bokwenyaniso, asinakwazana. Siba ngabantu abahlala nabanye abaphindezelayo kunokuba basabele kwiintswelo zomnye nomnye.” Ewe, ukuncokolisana ngokukhululekileyo kungumjelo wobomi bentsapho eyomeleleyo.
2, 3. (a) Yiyiphi ingxaki ephawulwa kwanakumakhaya athile amaKristu? (b) Yintoni etyhilwa kwiMizekeliso 24:3, 4 leyo inokunceda ekwakheni intsapho eyomeleleyo? (c) Yiyiphi imibuzo efuna ukuphendulwa?
2 Noko ke, ukungabikho kokusondelelana kunokuba nemiphumo eyintlekele. Ngokomzekelo, elinye lamasebe eWatch Tower Society eAfrika labuzwa isizathu sokuba lumbi ulutsha lwamaKristu lwakushiyayo ukuziphatha okuhle okungokweBhayibhile. Ngokutsho kwempendulo, “ubuthathaka obukhulu obuhlobene nayo yonke le ngxaki yayikukusilela kwabazali ukuba ngabaphulaphuli abalungileyo nokungakwazi kwabo ukuqiqa nabantwana babo. Ngoko abazali abaninzi abanalwalamano lokwenene nolusenyongweni nabantwana babo.” Kakade ke, le yinkalo nje enye yale ngxaki—nangona iyebalulekileyo. Ukuthobela komntu ngamnye nokuhlonela uThixo kolutsha, kanye njengakuye wonke ubani, kuza kuqala. (Roma 14:12; 1 Timoti 6:6) Kwakhona, qwalasela IMizekeliso 24:3, 4. Ifundeka ngolu hlobo: “Indlu yona yakhiwa ngobulumko; izinziswe ngengqondo; ngokwazi kuzaliswa amaqonga bubuncwane bonke obunqabileyo nobumnandi.”
3 Unokubusebenzisa njani ubulumko, ingqondo nokwazi ukuze uphumeze ubuqabane obusenyongweni obungokweemvakalelo obufunekayo, ingakumbi nabakwishumi elivisayo? Ukuphepha njani ukubangela ngempazamo imiqobo yokuncokolisana? (Thelekisa IMizekeliso 14:1, 12.) Ngaphezu kwako konke, unokuyakha njani intsapho ebambelele nkqi kunqulo oluyinyaniso? Njengokuba unezinto ezininzi ezifuna ixesha nengqalelo yakho, usenokuzibuza apho mawuqale khona. Uphawu lokuqala, ubulumko, lunokukunceda ukuba umisele izinto zokuqala.
Misela Izinto Zokuqala Ngobulumko
4. Ifanele ibe yintoni into yokuqala neyintloko yentsapho yomKristu?
4 Umdumisi wabhala oku: “Ingqalo yobulumko kukoyika uYehova.” (INdumiso 111:10) Ukukoyika ngokufanelekileyo ukungamkholisi uThixo, kunye nokubeka unqulo lwakhe kuqala, kubalulekile. Omnye umama wachaza indlela yena nomyeni wakhe ababakhulisa ngokunempumelelo ngayo oonyana babo ababini ukuze bakhonze uYehova: “Ubomi bethu sabuzalisa ngenyaniso—sisiya kuzo zonke iindibano, silungiselela yaye sisiya kwiintlanganiso, yaye inkonzo yasentsimini sasiyenza inxalenye ethe rhoqo yobomi bethu.” Umyeni wakhe wongezelela oku: “Inyaniso asiyonxalenye yobomi bethu, ibubomi bethu. Yonke enye into isekelwe kuyo.” Ngaba ngokukwanjalo unqulo lukaYehova nilubeka kweyona ndawo iphambili kwikhaya lenu?
5. Kutheni ukulungelelana kufuneka kubazali abangamaKristu?
5 Ukubandakanyeka kubulungiseleli basentsimini njengentsapho kuya kunisondeza ngakumbi, kanti iimfuno ezikhethekileyo zabantwana zifuna ixesha lenu elisecaleni namandla angokweemvakalelo. Ngoko ke, kufuneka ukulungelelana ukuze kugqitywe ngobungakanani bexesha elinokusetyenziselwa umsebenzi wokushumayela okanye imisebenzi yebandla ngoxa ukwabanyamekela ngokomoya, ngokweemvakalelo nangokuphathekayo ‘abo bangabenu.’ Nimele ‘ukuqala nifunde ukuhlonela elenu ikhaya.’ (1 Timoti 5:4, 8) Ngokukhethekileyo, ukuze kuncedwe oobawo babe nokulungelelana okufunekayo phakathi kwemisebenzi yentsapho nemisebenzi yobulungiseleli, inkupho yeMboniselo (yesiNgesi) kaSeptemba 15, 1959, yabongoza ngolu hlobo: “Makubekho ukulungelelana okufanelekileyo kwizilangazelelo zentsapho yakho. Ngokuqinisekileyo uYehova uThixo ebengayi kulindela ukuba indoda isebenzise lonke ixesha layo kumsebenzi webandla, ekuncedeni abazalwana nabamelwane bayo ukuba bazuze usindiso, ukanti ingakunyamekeli ukusindiswa kwendlu yayo. Umfazi nabantwana bendoda bayimbopheleleko eyintloko.”
6. Yiyiphi ingozi abazali abamele bayiphephe, yaye kunokwenziwa njani oku?
6 Le mbopheleleko ayithi ngokuyimfuneko inyanyekelwe ngokuchitha iiyure ezininzi nabantwana benu kodwa ngokulisebenzisa ngokuzeleyo elo xesha. Okulusizi kukuba, bambi abazali baye babambiseka gqitha ekunyamekeleni imicimbi yebandla, kumsebenzi olucelomngeni, okanye kwizinto eziphathekayo kangangokuba kwanaxa benabantwana babo, iingqondo zabo ziba kwenye into. Kuphela kusemva kwentlekele entsatsheni abaye bayiqonde imfuneko yokuphinda baxabise izinto ezimele zize kuqala. “Ke bona ubulumko baphezulu buyancendezela, buthozame kakuhle.” (Yakobi 3:17) Ubulumko basezulwini obunjalo buya kukunceda ukuba ulahlulahlule ngokufanelekileyo ixesha lakho nokubandakanyeka kwakho ngokweemvakalelo ukuze uyithobele yonke imithetho kaYehova.
Intonga Nokukhalimela Zinika Ubulumko
7. IMizekeliso 29:15 inokusetyenziswa njani ngokunempumelelo?
7 Ukuyiqinela imigaqo elungileyo, okubonakaliswa ngobubele, kubaxelela abantwana bakho ukuba unenkathalo. Ukuyekelela kubangela ukungakhuseleki nobunjubaqa ebantwaneni. “Intonga nesohlwayo [nokukhalimela, NW] sinika ubulumko.” (Imizekeliso 29:15; 22:15) Ukuze zibe nempumelelo “intonga nokukhalimela” zimele ziphelekwe luthando. Uqeqesho olunikelwa ngokungekho ngqiqweni okanye ngemvakalelo eshushu lunokwaphula umoya womntwana. “Nina booyise, musani ukubacaphukisa abantwana benu, ukuze bangafi iintliziyo.” (Kolose 3:21) “Intonga” yokuqeqesha iquka isohlwayo esifanelekileyo, kodwa ukuba ufuna izinto ngesinyanzelo ngokungekho ngqiqweni, ukuba ungohlab’ amadlala ngokugqith’ emgceni yaye umthob’ isidima umntwana, oku kukuyisebenzisa kakubi le “ntonga” ibe kusenokuyiphelisa intembelo yomntwana kuye nakuwe. ‘Usenokufa intliziyo.’
8. Chaza ukuba kutheni le nto “ukukhalimela” kuthetha okungakumbi kunokohlwaya?
8 Kodwa “intonga nokukhalimela” ziyafuneka. Ukukhalimela kufuna okungakumbi kunokohlwaya; kubandakanya ukunikelwa kwezibakala ukuze kweyiswe omnye umntu.a Igama lesiHebhere elithi ‘ukukhalimela’ likwaguqulelwa ngokuthi ‘ukuthethisa.’ (INdumiso 38:14) Ngoko ke, ukukhalimela ngokwenyaniso kuthetha ukuvuma nokukwazi ukunikela izibakala ukuze umntwana wakho abe nokuzibona izizathu zesenzo sakho. Iimpapasho zeWatchtower Society ziqulethe umbandela, wumbi wawo ngokuyintloko obhalelwe ulutsha, onokukunceda ukuba unikele izizathu ezivakalayo kumntwana wakho ngokuphosakala kwekhondo elithile. Ngaba uzisebenzisa ngokupheleleyo ezo mpapasho?
Ingqiqo Ibangela Uvelwano
9. lyintoni ingqiqo, yaye kutheni ibalulekile nje?
9 Ingqiqo ikwabobunye ubuchule bokuncokolisana obufunekayo. Igama lesiHebhere lantlandlolo livela kwigama eliyingcambu elithetha “ukuqonda phakathi,” “ukwahlula.” Le ngqiqo iqondakalayo ihlola ngaphaya kwezinto ezicacileyo, yaye ngoko ke ihlobene nokuqonda, uvelwano nemfesane.—1 Petros 3:8.
10. Ukuhlola ngaphaya kwemeko ecacileyo kwabuthintela njani ubutshaba kumaxesha okubhaIwa kweBhayibhile?
10 Umzekelo weBhayibhile obonisa ukuxabiseka kokuqonda ubhalwe kuYoshuwa 22:9-34. Isizwe sakwaRubhen, sakwaGadi nesiqingatha sesizwe sakwaManase, ezazinikwe umhlaba olilifa kwimpuma yoMlambo iYordan zakha isibingelelo esikhulu kwilizwe lazo. Zikujonga oku kuluwexuko, ezinye izizwe zalungiselela ukuba zikohlwayele oko kwabonakala kukukuwaphula ngabom umthetho kaThixo. (Levitikus 17:8, 9) Ngaphambi kokuba zithabathe inyathelo, zathumela abameli ukuba baye kuthetha nezi zizwe zibini zinesiqingatha. (IMizekeliso 13:10) Ingxubusho yatyhila ukuba isibingelelo sasingakhelwanga ukunyusa imibingelelo kodwa sasakhiwe “ngenxa yenkxalabo, NW” Zahluliwe kwezinye izizwe nguMlambo iYordan, ezi zizwe zibini zinesiqingatha zaziyixhalabele nzulu into yokuba kwakunokwenzeka ukuba izizukulwana zazo zexesha elizayo ziyekiswe ukunqula uYehova. Isibingelelo sasiza kusoloko sisebenza njengesikhumbuzo, ‘njengobungqina,’ bokuba nazo, zazingabantu bakaThixo. Enjani inguqulelo le ngcaciso eyayenzayo! Kwakhanyiswa ukukhanya okwahlukileyo koko kwabonakala kusisono sangabom. Ngenxa ‘yokuzeka kade umsindo,’ ezinye izizwe zancedwa ukuba ziyiqonde imeko yokwenyaniso, yaye oku kwabangela ukuqonda.—IMizekeliso 14:29.
11. Omnye umzali wayibonakalisa njani ingqiqo?
11 Xa kuvela ingxaki ngomntwana wakho, ngaba uzama ukuba ngoqiqayo? Ngokomzekelo, omnye woonyana besibini esingamaKristu waqalisa ukufika ekhaya ebuya esikolweni ‘ecaphukela yonke into.’ Uyise wacacisa esithi: “Wayengavumi ukuchaza isizathu sokuba abe nomsindo ngolo hlobo. Ekuqaleni ndacinga ukuba wayevukela nje, kodwa ndaphawula ukuba wayethula athi cwaka xa ndandimbuza ngesikolo. Saba nengxubusho ende, yaye ndafumanisa ukuba ngenxa yokuba wayemncinane ngeminyaka, abantwana esikolweni babemchwisha. Emva kokumqinisekisa ukuba ndandiyiqonda indlela enzima ngayo le mpatho, ndamnika amacebiso athile aluncedo okumnceda ukuba ajongane nayo.” Isimo sengqondo sale nkwenkwe saphucuka ngokukhawuleza.
12. Kutheni le nto iminyaka yeshumi elivisayo inzima kulutsha oluninzi, yaye yintoni efunekayo kubazali?
12 Ngaba ngewawubonakalise umonde ofanayo ngomntwana wakho? Ulutsha, ingakumbi olukwishumi elivisayo, lunokuphenjeleIwa ngokunzulu zizinto ezinjengesikolo, imbonakalo yomzimba, inkanuko yesini nokuthandwa ngabantu. Ulindixesha othi Adolescence uthi: “Kuwo onke amanqanaba okukhula komntu, elokufikisa ebuntwini lilelona linzima. Abo bafikisa ebuntwini, abagxeka iziqu zabo yaye bengenamava, baba noluvo lokuba abayonto kwihlabathi elikhuphisanayo nelingenaluvelwano. Kunokuba bamkele ihlazo nokusilela, benza izinto ngeemvakalelo ezinamandla zokucaphuka nexhala.” Iimvakalelo ezinjalo ezibangel’ inkathazo zinokukuchaphazela ukuziphatha komntwana. (Thelekisa INtshumayeli 7:7a.) Kuphela kungokuncokolisana ngokusondeleyo nomntwana wakho oya kuthi uyiqonde ingxaki yokwenene uze ube nokuyiqonda eyona ndlela ilungileyo yokumnceda.
13. (a) Yiyiphi eminye imiqobo yokuncokolisana? (b) Kutheni le nto abazali kufuneka beyisebenzise ngokuzingisileyo IMizekeliso 20:5? Zekelisa.
13 Kunzima kulutsha oluninzi ukuchaza iimvakalelo zalo ngamazwi. Ngoko ke, njengokuba umntwana wakho eqabuka, waphephe amazwi angacingwanga ahlabayo, anjengathi: ‘Ngaba kuphela koko? Bendicinga ukuba bekuyinto ebalulekileyo.’ ‘Ingxaki ngawe ikukuba . . . ’ ‘Unokuyenza njani le nto kum?’ ‘Ke, ulindele ntoni? Ngapha koko ungumntwana.’ (IMizekeliso 12:18) Maxa wambi oselula uya kufuna ukucikidwa, ingakumbi ukuba unengxaki eqondakalayo. “Indoda [okanye, umfazi] enengqondo” iya kusoloko izabalazela ‘ukurhola’ iimvakalelo ezinjalo. (IMizekeliso 20:5) Esinye isibini esingamaKristu safumanisa ukuba intombi yaso yayirhoxa kwimisebenzi yentsapho. Abazali bayicikida kodwa oko akuzange kuncede. Bazingisa. Umama wayo wabika oku: “Ekugqibeleni, ngenye imini ndahlala nayo ebhedini, ndaza kwakhona ndayibuza ingxaki yayo. Hila yandixelela ukuba yayinoluvo lokuba thina nabanye sasingakuthandi ukunxulumana kwayo nathi, ngoko yaba yinkomo edla yodwa kangangoko yayinako. Into endandifuna ukuyithetha kwasekuqaleni yayikukuthi, ‘Oko akukho ngqiqweni ngokupheleleyo,’ kodwa ndazibamba ndaza nje ndaphulaphula njengokuba yayizityand’ igila.” Abazali bayo bayiqinisekisa ngelokuba bayikhathalele kakhulu baza emva koko baqinisekisa ukuba bayenza izive yamkelekile kwisangqa sentsapho. Yayoyisa le ngxaki yaye ngoku ikhonza njengomvangeli owonwabileyo wexesha elizeleyo.
14. Kutheni le nto ukuba nentsapho esondeleleneyo ngokweemvakalelo kunganele?
14 Ukwakha intsapho esondelelene gqitha kubalulekile, yaye kwaneentsapho ezithile zehlabathi zikuphumezile oko. Kodwa kungomnye umcimbi ukwakha intsapho ecinga ngezinto zokomoya ehlala isondele kuYehova nemanyene kwiLizwi lakhe. Ukuze oku kuphunyezwe, kufuneka okungakumbi kunokusondelelana nje ngokweemvakalelo nabantwana bakho.
Ulwazi Olomelezayo
15. Luhlobo luni lolwazi olubalulekileyo, yaye ngoba?
15 Ngokwazi kuzaliswa amaqonga bubuncwane bonke obunqabileyo nobumnandi.” (IMizekeliso 24:4) Ezi zinto zexabiso azibobutyebi bokuphathekayo kodwa ziquka ukunqabiseka ngokomoya, uthando lokuzincama, uloyiko lokuhlonel’ uThixo nokholo olusekelwe ekwazini uThixo. Ezi zinto zibangela ubomi bentsapho obutyebileyo. (IMizekeliso 2:5; 15:16, 17; 1 Petros 1:7) Olu lwazi luya kubanika abantwana amandla angaphakathi ukuze bawaxhathise amacebo kaSathana, kwanachuliweyo, kuba IMizekeliso 24:5 ithi: “Umfo osisilumko unamandla, nendoda enokwazi ibonakalisa amandla amakhulu.” Kodwa umele ulubethelele olo lwazi ezintliziyweni zabo.—Duteronomi 6:6, 7; 1 Yohane 2:14.
16. (a) Yintoni efunekayo ukuze ulwazi lukaThixo ulufake kwintliziyo yomntwana wakho? (b) Ukuze abantwana bangenelwe ngokwenene, yintoni efunekayo?
16 Olunye lwawona mancedo mahle ekubetheleleni iLizwi likaThixo kubantwana bakho lukukuqhutywa kwesifundo sentsapho esithe rhoqo esibakhuthaza ukuba inyaniso bayenze eyabo. Omnye umzali onempumelelo nonabantwana abane uchaza esithi: “Isifundo sentsapho simisela isimo sengqondo esihle, ukuze ingqondo yomntwana wakho iyamkele imfundiso.” Wongezelela wathi: “Xa uqalisa ukulungisa abantwana, ngokuzenzekelayo baba ‘nobutshaba.’ Kodwa xa unokuwuxubusha umbandela ngexesha ekungekho butshaba, njengakwisifundo sentsapho, kukho ithuba elingakumbi lokuba iingongoma ofuna ukuzibethelela zingene.” Kodwa ukuze abantwana bangenelwe ngokwenene, kufuneka uxelise umpostile uPawulos, owabhala oku: “Ndilangazelela ukunibona, ukuze ndinabele sibabalo sithile sisesomoya, ukuze nizimaseke.” (Roma 1:11) Isipho sixatyiswa ngokukhethekileyo xa siyinto lowo usamkelayo anokuyisebenzisa yaye sisesexabiso lokwenene kuye. Ngoko kumbandela fumana into echukumisa ubomi bomntwana.
17. (a) Yintoni enokunceda ukwenza isifundo sentsapho sibe sesibangel’ umdla nesifundisayo? (b) Ngaba unawo amacebiso awongezelelekileyo?
17 Abazali bakwafanele baqinisekise ukuba yonke intsapho iyalazi ixesha lesifundo, nombandela oya kuqwalaselwa. Abanye basebenzisa amancedo ayimifanekiso ekufundeni, anjengeemaphu nezicangca, ukuze bandise umbandela. Abanye abazali baquka izimuncumuncu ngaphambi okanye emva kwesifundo. Emva kwesifundo basenokuxubusha iingxaki zemini okanye zeveki. (Ukuze ufumane amacebiso ongezelelekileyo bona ibhokisi elapha.) Ngaphezu kwako konke, siqhube rhoqo esi sifundo seBhayibhile! Abazali abaninzi kufuneka benze umgudu omkhulu ukulungiselela ukudla nekhusi labantwana babo; kodwa okude kwaba kokwembaluleka enkulu ngakumbi kukubalungiselela ‘amasi angawelizwi, angenankohliso, ukuze [abantwana bethu] bakhule ngendlela enokubenza bazuze usindiso.’—1 Petros 2:2, NW; Yohane 17:3.
18. Yintoni eya kukunceda ‘ukwakha’ ikhaya lakho?
18 Ukwakha intsapho eyomeleleyo ngokomoya kufuna ubuchule nexesha. Zimisele ukuvelisa ubuchule bokuncokolisana obufunekayo ukuze uzigcine usondele ngokweemvakalelo kubantwana bakho. Musa ukuvumela nantoni na ukuba ikuthintele ekubeni nexesha elifunekayo lokomeleza intsapho yakho ngobulumko, ngengqondo nangolwazi. Kuthandazele oko yaye, ukunye nabantwana bakho, usazi ukuba nguYehova kuphela onokuyihombisa ngempumelelo imigudu yakho ‘yokwakha.’—INdumiso 127:1.
[Umbhalo osemazantsi]
a NgokweThe Hebrew and English Lexicon, nguJohn Parkhurst, igama elithetha ‘ukukhalimela’ livela kwisenzi esithetha ‘ukubonisa ngokuphandle, ukwalatha ngokwezibakala, ukubonakalisa, ukubonisa ngobungqina okanye ngezizathu ezeyisayo okanye ngeempikiswano.’ IOld Testament Word Studies, nguWilliam Wilson, ithi ngesi senzi sikwasinye: “ukungqina.”
Uyakhumbula Na?
◻ Ikhaya lomelezwa njani ngobulumko, yaye yintoni enokunceda abantwana ukuba babuvelise?
◻ Kutheni le nto ingqiqo inceda ekubangeleni ukuncokolisana okulungileyo kwentsapho?
◻ Kutheni ulwazi lukaThixo lubalulekile nje?
◻ Isifundo sentsapho sinokwenziwa njani sibe sesomdla yaye sibe sesifundlsayo?
[Ibhokisi ekwiphepha 24]
ISIFUNDO SENTSAPHO ESINEMPUMELELO
Sifanele siqhutywe njani isifundo?
Masibe kwimeko epholileyo, kanti ehloniphekileyo, Yiphephe inkqubo ezenzekelayo ngokugqithiseleyo. Buza imibuzo eyongezelelekileyo yaye sebenzisa imisekeliso ukye ukhuthaze ukucinga nokuze ubagcine bonke bebandakanyekekile. Wenze lula umbandela xa kuyimfuneko. Kulungile ukuba eli thuba lokufundisisa ungalisebenziseli ukungxolisa abantwana, Mhlawumbi nakuphi na ukukhalimela okufunekayo kunokwenzisa ngasese.
Yintoni efanele ifundisiswe?
Yikhethe ngokweentswelo zentsapho. Yiba bhetyebhetye. Kusenokuba kukulungiselelwa kwesifundo seeveki ngeeveki se Mboniselo. Kusenokufuneka ukuba kuxutyushwe ngeembambano ezingqalileyo, ezinjengeengxaki ulutsha olujongana nazo esikolweni, ukwenza amadinga, imicimbi engaphandle kweeyure zesikolo, imidlalo notyekelo lokuziphatha okubi. Sebenzisa amanqaku okanye iimpapasho ezithetha ngezi zinto. Unokulahlulahlula ixesha lesifundo ukuze ugubungele imibandela eyahlukahlukeneyo.
Sifanele siqhutywe nini yaye ixesha elide kangakanani?
Intloko-ntsapho inokugqiba ngoko emva kokuxubusha ngocwangciso lwamalungu entsapho nokuqwalasela izinto asikelwe umda kuzo. Kufuneka ihlolisise ubudala nengqalelo yabantwana. Isenokufuna kubekho ucwangciso olufutshane amaxesha aliqela ebudeni beveki ukuba abantwana basebancinane. Bambi baye banawo amathuba anjalo ngesidlo sasemini emva nje kwesidlo. Undoqo obalulekileyo asbonbude kodwa lixesha elichithwe kunye.
Unokuqineska njani ngokufikelela intliziyo yomntwana?
Mkhuthaze umntwana ukuba aphendule ngawakhe amazwi. Ngobuchule sebenzisa imibuzo yokufumana imbono ukuze ubone indlela umntwana avakalelwa ngokwenene ngayo ngombandela. Unokubuza uthi: “Abantwana esikolweni bavakalelwa njani ngalo mbandela? Ngaba uvakalelwa kukuba banengqiqo?” Okanye. “Ubuya kumchazela njani ofunda naye isisizathu sokuba singahenyuzi? Ngaba uvakalelwa kukuba ngokwenene oku kokokulungelwa kwakho? Ngoba?” Kulumkele ukuhlab’ amadlala ngeempendulo ezinikelwa kwimibuzo yokufumana imbono, khon’ukuze umntwana azive ekhululekile ukuthetha ngokunyanisekileyo. Ngamnye mnike ixesha lokuba athethe, ukuze uqiniseke ukuba uzinqonda ngokuchanileyo iingongoma ezibalulekileyo.